طول الطريق كنا ساكتين ...لحدي م وقفنا قدام بناية سكنية كبيرة...عمر بركن العربية ونزل وانا نزلت وراه ...طلع الشنطة من العربية واتحرك من غير م يكلمني ...مشيت وراه وانا ساكتة...طلعنا للدور التالت،طلع مفتاح وفتح بيه باب الشقة...دخلنا جوا وبرضو م إتكلم معاي خلى لي شنطتي جنب الباب ودخل وحدة من الغرف وقفل بابها بعصبية لما إتخلعت ...قلت مالو يا ربي ودا شنو البعمل فيه دا ..كأنو في زول غصبو على العرس..طبعاً م قادرة احدد تصرفات عمر دي ابداً ...كنت تعبانة ونعسانة ..جريت شنطتي لغرفة تانية وقعدت فيها ...طلعت لي بجامة بعد استحميت لبستها حتى صليت وطلعت في السرير نمت طوالي لأني م عايزة أفكر في اي شي ...المهم انوم هسي وبعدين اليحصل يحصل ...
....
صحيت الصباح على ضرب الباب الشديد...كنت بحاول استوعب انا وين والحاصل شنو ...بعدها مشيت فتحت الباب وكان دا عمر وواضح من وجهو انو زهجان شديد .
-نايمة للآن ليه .
-نعم !!
-اطلعي سرعة أعملي لي الشاي انا طالع ..بعد 7 دقايق القى الشاي جاهز ...فاهمة ولا لأ ..
هزيت ليه راسي بس وانا مخلوعة من الاسلوب والصوت المخيف دا ...بديت أندم على الزواج ..قلت اذا من بدايتو بتزهج وبكورك لقدام هيعمل شنو ...
دخلت الحمام جهزت نفسي بسرعة وصليت الفجر حتى مشيت المطبخ فتشت حاجات الشاي لقيت كل شي في المطبخ موجود ...كنت بسوي في الشاي وأنا خايفة يجي يجوط فيني تاني ...لانو واضح غير الجوطة م بعرف لشي ...بعد خلصت ..شلتو ومشيت ليه لقيته قاعد في الصالة ولابس رسمي وخالف رجل على رجل ...مديت ليه الشاي ...شربو وقال لي ..
-تاني تصحي الساعة 5 صباحاً ...5 ونص الشاي يكون جاهز ومعاه زلابية ...البيت دا يتنضف يومياً ...تطبخي زيك وزي بقية النسوان وماف حاجة اسمها م بعرف ...دلع وحركات م بنفعو معاي ...ملابسي تتغسل وتتكوي اسبوعياً ...اجي راجع القى الحمام جاهز والغداء كذلك ...بعد الغداء بشرب كباية شاي سادة ..وقبل العِشاء شاي لبن ...قلة أدب وجوطة وكلام كتير م بينفعوا معاي ..صلاتك في وقتها ومن غير تقطيع ... بعد العشاء اذا انا م عايز شي تنومي طوالي وماف سهر ... مفهوم ..؟
هو بيتكلم وانا مخلوعة في الكلام البقولو ...يعني انا هعمل كل دا براي ..؟لا هو مفتكر نفسو ملك ولا شنو ...معرسني جارية تحتو ؟ وقفت وانا بستجمع في شجاعتي ...
-انت معرسني عشان أخدمك ؟ ولا دا شنو البتقول فيه دا .؟ في زول غصبك علي وقال ليك إلا تعرسني ؟ ليه محسسني إني كنت جارية وراك وقلت ليك إلا تتزوجني؟ اذا عايز يخدموك جيب ليك شغالة ...واذا م عجبك رجعني بيتنا ..
قلت كلامي دا وانا م عارفة جاتني الشجاعة دي من وين وحسيت كأني قللت أدب معاه لكن لازم من البداية اوضح ليه وجهة نظري وانو عندي لسان وبقدر ارد ...هو كان ساكت وقابض يدو بقوة وملامحو م بتوحي بالخير أبداً ... وفعلاً وقف على حيلو وعيونو الحادة بتعاين لي بقوة ...وم أحس إلا بكف قوي في وشي لما حسيت بصداع ...
