حور الجناد

20

لما وصلنا البيت عمر شال الشنطة والكيس ودخل معاي ...عمتي فتحت لينا الباب وهي مستغربة ...

-مالكم راجعين بدري كدا ..؟ عيونك واقعة ي بتي إن شاء الله م واجعك شي ..؟

-حور تعبت اليوم واتصلوا علي من مدرستها عشان أجي أسوقها ..

-كررر يا يمة ..وهسي كيف ..واجعك شي ..؟ان شاء الله مشيتوا المستشفى ؟

-هسي كويسة الحمد لله..وايوة مشينا المستشفى حتى جينا ..

-حمد لله على سلامتك ...تعالو أقعدوا يلا ...وانتي يا حور أحسن ترقدي القعدة معاك م كويسة ..

رقدت في السرير بتعب وعمتي دخلت المطبخ ...عمر جا قعد جنبي بعدها إتكلم ..

-هسي م حاسة بأي ألم صح .؟

-ايوة ..

-طيب انا راجع الشغل اذا حصل اي شي اتصلوا لي ..حاضر ..؟!

-حاضر ..

-عايزة شي أجيبو ليك معاي ؟

-جبنة بوك السائلة ...

-جبنة برضو..؟ طيب تمام..

جات عمتي طالعة من المطبخ وشايلة صينية في يدها ..

-واقف مالك ي عمر ..تعال عشان تاكل ..أكيد م فطرت..

-راجع الشغل والله ..زمن الوجبة مشى تاني م بقدر أكل ..يلا في أمان الله..

-سمح ي أبوي ربنا يعدل طريقك ..

عاينت ليه لما طلع ...معقول من لما جاني وللان م أكل شي ..حسيت بتأنيب الضمير ..لكن قلت وجبة وحدة أكيد م هتأثر معاه ...

-والله عمر عنيد شديد ...هسي تلقاه يومي بفوت وجبة الفطور ..

-تبقى مشكلة لو كدا ..

-اي والله ..ربنا يهديه بس ... يلا قومي عشان تاكلي ..عايزة الصينية دي تكون فاضية ..

-والله يا عمتو هسي لما جايين مع عمر أكلت وهداك باقي أكلي م كملتو حتى..

-الأكل الجاهز دا لا نافع ولا شي ..قومي ان شاء الله تضوقيه بس ..ولا واجعك شي .. ؟

-لا لا طيبة م فيني شي ...

-ان شاء الله دايماً..

-امين يا رب..

_____________

أول م وصلت المكتب جاني إستدعاء من القائد...بعد التحية والسلام قعدت في الكرسي قدامو ..

-يا جنابو عمر والله انا مستعجل عشان كدا هأدخل في القضية طوالي ...ولد وزير الثقافة والاعلام السابق تم إختطافه قبل اسبوع بغرض الاحتيال وطلب الأموال..ولكن عند التسليم والاستلام في طرف تالت اتدخل وللاسف ق*تل الولد ...القضية معقدة جداً ...تدخلت الشرطة ولكن م وصلت للحل ..