حور الجناد

14

المدارس فتحت ...سجلت في نفس مدرسة شفق ...جبنا كل حاجات المدرسة وكنا متحمسين شديد لسنة تالت ...

أول يوم من الصباح عملت الشاي حتى مشيت جهزت للمدرسة ...اليونيفورم كان فستان وبنطلون باللون الأزرق الداكن والقميص والطرحة بالأبيض ..سرحت شعري ولبست ...لقيت عمر جاهز شربنا الشاي وغشينا شفق ...كان مودينا عمر ..ركبنا في العربية وكنا ساكتين لما وصلنا للمدرسة ...كنت متوترة لأنها مدرسة جديدة وبناتها غريبات ..لكن الحمد لله على انو شفق موجودة ..وكنا في نفس الفصل و مساقنا علمي ...عرفتني على صحباتها وكان يوم لا بأس به ...نهاية الدوام رجعنا بالمواصلات لانو عمر في الشغل لسة ...شفق كانت حافظة المواصلات ..ف رجعنا بسهولة ...

إرتحت شوية بعدين إتذكرت الغداء ..رغم إنو عمتي قالت لي م تطبخي لكن عمر إذا رجع ولقاني م طابخة شي أكيد هيجوط ...

عملت الغداء وغسلت العدة حتى نظفت البيت ...شلت جزء من الأكل واتغدينا مع بعض ...بعد الغداء قعدنا انا وشفق قلنا نجهز لينا جدول للقراية (حماس البدايات)..

بعد خلصنا مشيت غسلت ملابس المدرسة ولقيت عمر عندو ملابس وسخانة برضو غسلتها ...لما خلصت هو جا ..رصيت ليهو الأكل ومشيت أرتب كتبي وباقي حاجاتي في الشنطة ...لما الملابس جفت مشيت كويتها ..حتى نمت ...

يومي نفس الروتين... والقراية مع شغل البيت إرهاق شديد ..يوم ورا يوم أنا بندم أكتر على زواجي من عمر ...وم عارفة نفسي المفروض أعمل شنو...كنت مخدوعة بالعرس ..مفتكرة إني هأكون مرتاحة وأعمل العايزاه ..ألبس وأكشخ على كيفي ...هألاقي الحب الفي القصص الأسطورية و أفلام ديزني ..كيف الأمير أو الفارس العندو حصان بتزوج بت وببقيها أميرة سعيدة وبعيشوا في ثبات ونبات وفي بيت مليان بالحب والحنية ..لكن للأسف دا كله م حصل ...

دايماً بسأل نفسي هل إذا إلتقيت مع عمر في ظروف أحسن من دي ..كان هيكون هو الأمير المنتظر؟! هل ح يحبني ؟شكل علاقتنا هيكون أفضل من كدا ..؟ م كنت قادرة أحدد إذا المشكلة في شخص عمر نفسه ولا في سبب الزواج ولا قرار الزواج من أصله ؟!

كنا قاعدين في المدرسة فسحة الفطور ...إلتفت على شفق وقلت ..

-بالمناسبة يا شفق اليوم عيد ميلادي ..

-هييي ...مالك م كلمتيني من بدري ...كل سنة وانتِ طيبه..واحلى 17 سنة ماشية على الأرض ..

-(ضحكت)وانتِ طيبه يا رب..

-يا سلام لازم اليوم نعمل ليك بارتي بالمناسبة دي ..

-بارتي شنو مع أخوك المنفسن دا ..

-اي والله وكمان عندو الإحتفال بعيد الميلاد حرام م حصل خلانا نحتفل بيه ..لكن بنحتفل بالدس ..هاهاهااا ..

-إنتي أخوك دا أنصار سنة ولا شنو؟

-(ضحكت) ...اسمو ملتزم ومتدين يا شيخة ...صح هو عصبي ومعاملته قاسية لكن حاجة بتخص الدين دي م بجامل فيها خالص ...