حور الجناد

7

-حُور ..

بقيت اترعب من اسمي لما اسمعه بنطقو ...جريت عليه بسرعه ..

-نعم .

-شيلي الملابس دي غسليها بسرعة وتتكوي أول م تجف ...فاهمة ؟

-اااايوة ..فففاهمة ..

بقيت قدامه م بقدر أقول كلمتين ورا بعض ...شلت الملابس وكانت كتيرة شديد م عارفة وسخها متين..وديتها البلكونة وجهزت حاجات الغسيل ..كان ماف غسالة في الشقة ..عشان كدا بديت أغسل بيديني ...الساعة أصلاً كانت 11م ..ودا م زمن غسيل أصلاً لكن هو بحب كدا يعذبني ...كنت بغسل وأصلاً انا تعبانة من شغل النهار ونعسانة شديد والزاد علي أكتر كان البرد ..لانو الوقت كان فصل شتاء والبرد عاصف لدرجة ...لما خلصت الغسيل حسيت روحي هتطلع ..لانو ملابسو كتيرة وتقيلة خصوصي البناطلين وملابس الشغل حقته كسرو يديني ...وهو كان بجي بعاين لي وبمشي ...متكيف شديد شكله ...شريت الغسيل وقلت هسي هيجفوا متين لما أكويهم وهو لو صحى ولقاهم م مكويات م معروف يعمل فيني شنو ...لكن الجو بارد أكيد م بجفو بسرعة ...شفت الساعة في الحيطة لقيتها 2 وحاجة ..قلت أخد لي غفوة واصحى اشوفهم لو جفو ...من التعب الشديد م قدرت انوم ...لما أقرب أنوم تاني بقوم مخلوعة وبقول يمكن جفو ..أمشي ليهم بلقاهم لسة لينات ...تاني نفس الشي ..استمريت زي دا لآذان الفجر ...بعد صليت ..لقيت الأقمصة والتشيرتات والجلاليب جفو لكن البناطلين وملابس الشغل الزي الكاكي ديلك لسه مرطبات ...جهزت مكان للكوي وبديت أكوي ... الزمن المفروض أعمل فيه الشاي والزلابية جاء وانا لسة م خلصت مكوة ...

طلعت المطبخ سرعة جهزت الشاي وكنت برمي في الزلابية هو جاء داخل ..قربت أكشح الطوة الفيها الزيت في جسمي ..لكن الله ستر ...ايوة عمر بتصرفاته معاي خلاني أصل لدرجة الهلع بقيت أترعب من أصوات رجلينه وهو ماشي ...

-الشاي ليه إتأخر ..!!

-كنت بكوي في...في الملابس .

-خلصتيهم ولا لسه ..

-ل لسه ..

-وليه إن شاء الله.

-لأنهم ي يداب جفو ...وفي وحدات لسه مشرورات ....أول م يجفو بكويهم والله ...

-أجي راجع من الشغل ألقاهم مرتبات في الدولاب ..مفهوم ..

-أيوة مفهوم ...

بعد خلصت أديتو الشاي ورجعت كملت مكوة من غير م أشرب حتى ... أصلاً مصدعه من السهر وعيوني فاتحاها بالعافية...

طول الفترة دي أهلي لما يتصلوا هو بديني أتكلم معاهم بتلفونه وبكون قاعد جنبي ...بتكلم مع أهلي عادي وبحسسهم انو ماف شي ..لأنو و هو معاي م بقدر أقول ليهم شي ...قال ليهم إنو تلفوني باظ ولسه م اشترى لي واحد جديد ...

بعد خلصت كوي الجافات نمت طوالي لأني نعسانة شديد ....نمت م صحيت إلا بعد الظهر ...صليت وشربت لي شاي عشان الصداع يخف شوية ...بعدين لقيت بقية الملابس جفت كويتها ورتبتها ليه في دولابه ...ورتبت الغرفة برضو ...حتى نضفت باقي البيت بعد خلصت غسلت العدة وبديت أعمل في الغداء ...بعد انتهيت إستحميت وجيت وقفت قدام المراية وانا بعاين لشكلي ال بمرور اسبوعين بس إتغير ...بقيت باهتة شديد وصحتي بدت تتراجع ...قعدت قدام التسريحة وفكيت شعري الأهملتو شديد في الأيام المضت دي ...سلكتو بعد صعوبة حتى سرحتو ...

إنتبهت للزمن لقيت المغرب بأذن ،والمفروض عمر يكون رجع زي الوقت دا ...مشيت صليت وهو لسه م جاء ...كل م الزمن يمشي انا بخاف زيادة ...للعشاء لما م جاء قفلت الغرفة علي وبعد صليت شلت لي مصحف وبقيت أقرا في قرآن وانا برجف من الخوف ...تاني قمت براحة طلعت الصالة بحذر لحدي م مشيت البلكونة وشفت الشارع كان فاضي وم ليه أثر ...قلت الليلة اذا م جاء أنا بقعد براي كيف ..كنت خايفة شديد وانا بفكر كدا سمعت حركة المفتاح في كيلون الباب ...اتنفست الصعداء وكل الهم إنزاح من صدري ..جاء داخل ولأول مرة أتبسط بشوفته ...إبتسمت لما هو إستغرب ...مشيت عليه وشلت منو الشنطة ...مشى قعد في كرسي وهو بتنهد من التعب ...ختيت الشنطة حقت جهازه في التربيزة ،ومشيت جبت ليه موية وقعدت تحت على مستوى رجلينه وطلعت ليه البوت والشرابات ووديتهم البلكونة ...دخلت ليه ملابس بيت في الحمام ..مشى استحم وجاء لقى الأكل جاهز ..

-ليه للآن م اتغديتي ..

-فطرت متأخر ..

-بكرة بعد الصلاة عندي ضيوف جايين ..عايز كل شي يكون مظبوط ..وم عايز أكل اي كلام ... واضح!؟

-طيب ..

بعد أكلنا رفعت الصحون وغسلتهم بعدين عملت ليه شاي وديتو ليه ...

-ناوليني الجهاز دا ...

جبتو ليه ووصلت ليه الشاحن في القابس ...كان بشرب وشغال ..قلت هو م بتعب من شغلوا دا ..من يرجع ولا برتاح زاتو ببدا شغل في اللابتوب ...تاني قلت انا مالي ومالو ..م يتعب كان تعب ...

قعدت في الكنبة الجنبو ..وشردت في حياتي البقيت م فاهماها دي ...بداية من مراقبة عمر لينا زمان ...اصراره على الزواج مني ...كلامه المبهم عن أبوي ...كرهو لي بالتحديد والمعاملة السيئة البعاملني بيها ...تصرفاته الغريبة وعصبيته المفرطة..عمر كان لغز في حد ذاته ...وانا عايزة بس الطريقة التبعدني عنه لانو الواضح إنه خطير وفي حاجات أخطر مخبيها ...لكن حالياً انا كيف أقدر أهرب منه وامشي لأهلي !؟..

إلتفت عليه لقيته كان بعاين لي بنظرات كلها حقد لما خفت منه ..بسرعة نزل عيونه وكمل شغله ..

تاني وجه علي اللابتوب وكان ظاهر في الشاشة صورة راجل ..

-بتعرفي الراجل دا ..؟

دققت كويس في الصورة وقلت ليه ...

-لأ م بعرفه ...

-ركزي كويس ..

-والله م حصل شفته قبل كدا ..

-متأكده ..؟

-ايوة متأكدة..

استغربت من سبب السؤال ..والراجل دا منو ..وليه سألني اذا بعرفه ولا لأ ..وعلاقتي بيه شنو يعني ؟

يتبع...