حور الجناد

23

الشهر الرابع دا اكتر واحد تعبت فيه ...قبل امتحان الشهادة بتلاتة أسابيع تعبت أكتر لدرجة رقدوني في المستشفى اسبوعين وكم يوم ...لما خرجوني كان باقي للامتحانات النهائية أيام بالعد بس وتبدأ...كنت فاقدة الأمل تماماً إني أقدر أمتحن ...

قاعدة في الصالة بدون اي موضوع وحاسة بالملل والعجز ...عمر طلع من الغرفة وجا علي ..

-حور ..

-ايوة يا عمر ..

-ألبسي عبايتك طالعين مشوار ..

-مشوار ؟

-ايوة ..ويلا بسرعة ..

لبست العباية وانا م فاهمة شي .. نزلت تحت لقيتو كلم ناس امو اننا طالعين قريب وجايين ..

ركبت في العربية وساق طوالي ..

-ماشين وين ؟

-هسي هتعرفي ..

وقف العربية قدام مطعم...دخلنا وطلب أكل ..كنت مستغربة لانو م حصل طلعنا مشوار خاص سوا ..

بعد خلصنا أكل طلعنا من المطعم ..

-دا المشوار يعني .؟

-لأ ..تعالي ..

مشينا كافي هادىء شديد وم فيهو ناس كتير ..قعدنا في الجلسات الخارجية ...وكنا ساكتين لحدي م عمر قال ...

-جبتك هنا عشان عايز اتناقش معاك برواق بخصوص امتحاناتك ..

-.....

-هتمشي تمتحني ..

-امتحن ؟!! يا عمر باقي 3 يوم بس ح ألحق كيف !؟..

-يعني خلاص ح تستسلمي وعلى قولك ح تضيعي عام كامل ؟

-ما فارق معاي ..

-وين حور العنيدة والطموحة !!

-ما بيدي شي ياعمر ..

-لأ بيدك يا حور ..استعدي في باقي الأيام دي وراجعي القريتيه زمان وبإذن الله بتلقي ..

-حاسة إني نسيت معلومات كتيرة ..

-قلنا تراجعي في الفترة دي بالاضافة لأيام القاب وتاني اتوكلي على الله بس..

-برأيك هأقدر ..؟

-اكيد بتقدري يا حور ..

-ان شاء الله .

بعدها بقينا نتكلم عادي ولأول مرة نتونس مع بعض ..

-نمشي بعد دا..؟

-ايوة ..بس عايزة ايسكريم ماف محل قريب هنا ..؟

-طيب تعالي قدام في مكان ظريف اجيب ليك منه ..

ركبنا ومشينا مسافة قصيرة وقف العربية ونزل عشان يجيبو لي ...شرى الايسكريم وطلع ..كان في سوبر ماركت جنب المحل دخل ليه وطلع شايل أكياس وجا علي ...فتح الباب ودخل ..ختى الاكياس قدامي طوالي فتحتهم ..