حور الجناد

22

-حور ...قومي صلي الفجر ..

-اي خلاص قايمة ..

-قايمة شنو وانتي لسه مغمضة ..

-يا زول هوي خليني انوم وبقوم بعدين ..

بصوت عالي طير النوم من عيوني لما قعدت في السرير وبعاين ليه قال ...

-حووووور .

-بسم الله خلعتني ..

-صحيتك قبل امشي المسجد عشان تصلي ..مشيت وجيت لقيتك لسه نايمة ...يلا م أعيد الكلام تاني... امشي صلي وتعالي كفي نومك .

-طيب ..

قمت بتكاسل دخلت الحمام حتى اتوضيت وجيت صليت ...غريبة زمان أول م يصحيني للصلاة بقوم طوالي وبكون نشيطة ومتحمسة عشان أصلي ...لكن هسي بقيت كسلانة شديد ولو علي أفضل الوقت كله نايمة ..

الزمن كان لسه بدري ..هو بدا يجهز في ملابسه ..

-حور حزامي البني وين ؟

-م عارفة انا طولت م هبشت ملابسك ولا رتبت ليك شي ..

-يا رب ألزمنا الصبر ..

أعصابو قاعدة على الهبشة...يعني براحة لو فتش ومن غير نرفزة كان لقاهو وانا أصلاً شايفة الحزام لكن م عايزة اقول ليه ...عشان اشوف نهاية زهجو دي وين ...لما عصبني ولقيت انو بفتش على الفاضي ..مشيت سحبت الحزام وختيتو ليه في يدو ..

-عارفة مكانو صح ؟ ليه مخلياني أفتش من قبيل طيب !؟

-م عارفاهو ولا شي لكن هسي لمحتو وجبتو ليك ...

-طيب المكواة وين ؟

-في الغرفة التانية ..

شال ملابسو وطلع ...بعد فترة جا شايلهم مكويات ...لو م الزمن بدري كان أكيد وداهم لأخواتو عشان يكونهم ليه ..

دخل الحمام استحم وبعد طلع قعد يشتغل لابتوبو ..كان لسه في زمن حتى مواعيد شغله تجي ...إتذكرت زمان زي الوقت دا بعمل ليه في الزلابية والشاي ..طوالي خطرت في بالي فكرة قلت مالو نشغلها ليه شوية ..

-عمر ..

-ايوة ..

-عايزة زلابية ..

-انتظري بعدين أمي هتعملها ..

-لكن انا عايزاها هسي ..

-طيب انا أصنعها ليك في الزمن البدري دا ولا كيف؟! ..

-أعمل لي وحدة ..

-نعم .!! م جادة أكيد ..

-يا عمر انا نفسي فيها شديد وانت عارف انو دا من الوحم ..

-حور ..انا م بعرف اعمل زلابية ..

-كنت في الكلية العسكرية أكيد عارف تطبخ ..

-كنا بناكل عدس ..ارتحتي ؟

-خلاص بعدين لما ولدك يجي راسو زي الزلابية م تسألني ..