حور الجناد

17

صباح اليوم التاني نفس الشي رجّعت ..بديت أشعر بالخوف ..لأني يومياً كل م أحس نفسي أحسن تاني بتعب من جديد ...بعد جهزت للمدرسة ..وشربت الشاي..دخلنا المطبخ انا و شفق عشان نجهز لينا فطور ...لانو عمتي منعتنا من أكل المدرسة وقالت م مغذي ..خليت شفق حشت ليها سندوتشات وانا حشيت بجبنه عادية وسايلة ... فجأة بقيت بحب الجبن والحوامض شديد ..

شلنا فطورنا ولقينا عمر لسة بشرب في الشاي بالزلابية العملتها ليه عمتي ...كان نفسي أعرف هو ليه م بشرب بغيرها الصباح ...شكلو بحبها شديد ...

سمعنا صوت بوري برا عاينا لعمر ...وهو عاين لينا وقال ...

-يلا اطلعوا عشان تمشوا المدرسة ..

-كيف ؟ وانت م هتودينا ..؟

-لأ ..

-شنو ..!؟

-الترحيل منتظركم برا ..كلموه بمواعيد رجعتكم برضو ...يلا سرعة منتظركم ..

ادانا مصروفنا وطلعنا برا لقينا عربية عمر التانية الكان مبركنها ساي .. سايقها عمو كبير كدا...سلمنا عليه وركبنا ...عرفنا على نفسو اسمو مبارك ..قال انو شغال مع ناس عمر فراش ...وراتبو م كفاية عشان كدا عمر اداهو العربية حقتو يرحلنا بيها ولما يكون فاضي يشتغل بيها مشاوير ..كان ونّاس شديد وطول الطريق بمدح لينا في عمر وبدعي ليه ...قلت صح كلام شفق حديث الناس عن عمر يخلينا نشك انو دا نفس الشخصية العايشة معانا دي ...

وصلنا المدرسة وورينا عمو مبارك عن مواعيد رجعتنا لما دخلنا المدرسة حتى هو إتحرك ومشى ..

-على فكرة عمر عمل كدا عشانك ..

-عمل شنو ..؟!

-ترحيل وحركات ..

-بالله ..ودا من حبه الشديد إن شاء الله !!

-لأا لكن شكله عايز يلين شوية ..

-عمر دا آخر شخص ممكن انو يبقى لين في تعامله ...لكن هو بهتم بالجانب الاكاديمي ومركز مع قرايتنا شديد ..

-صح لكن إنتِ حاولي غيريه...

-أغيرو !؟ أخوك عايش ليه كم و30 سنة ..عايزاني انا بشهور بس أغيره ؟

-مالو... لو خليتيه يحبك هيتغير عشانك أكيد ..

-(ضحكت)..

-هسي المضحك شنو؟

-طبعاً م قادرة ..ي بتي حب شنو !؟ ياخ خلي لي تركيزك كله في قرايتك ..

-م تستخفي بي ..بفهم في العلاقات برضو ..

-(ضحكت) ...واضح ..واضح جداً..

-مستهترة ليس إلا ..

-المهم ..خلينا في الأحياء ..على اساس نقراها اليوم مش ؟

-طيب ممكن ..

-إنتي الدنيا دي لافة بينا ولا انا براي حاسة بكدا ..؟!