حور الجناد

21

نص الليل جاني صداع وألم شديد ...م قدرت أصحي عمر بالكلام..مديت يدي بتعب وهزيتو من كتفه ...صحى مخلوع وقعد في السرير ..

-حور ...بسم الله واجعك شنو ؟

من قال كدا بديت أبكي وانا منكمشة على بطني وماسكاها بيديني ..

-واجعك شنو بالضبط ؟

-كل جسمي يا عمر ..

-لا حول ولا قوة إلا بالله.

قام بسرعة وطلع برا ..بعد فترة جا ومعاهو عمتي ...جات علي وهي ملهوفة ..

-كررر ي بتي ...غايتو حملك دا هيتعبك شديد بس الله يستر ..

-يا أمي لبسيها حاجة بسرعة عشان نوديها المستشفى ...ح امشي اطلع العربية ..

هو طلع وعمتي لبستني عباية ورفعت لي شعري ولبستني الطرحة ...هي كانت لابسة توبها جاهزة ...

عمر جا وسندني مع أمو لأني قلت ليهم بقدر أمشي ...ركبنا ورا ونزلت راسي في رجلين عمتي وانا بئن من الألم ...

عمر ساق بسرعة لما وصلنا المستشفى انا كنت م قادرة أتحمل الألم حتى ...أول شي أدوني حقنة وبعدها م وعيت على شي ...

لما صحيت كان اليوم التاني ...كنت مرقدة في غرفة وعمتي نايمة في الكنبة ...كان موصل لي درب ...كنت حاسة بخدر في جسمي ...الباب فتح كانت سستر ...سألتني عن حالي وفحصتني ..فكت الدرب لانو خلص ..وقالت لي ممكن تدخلي الحمام اذا عايزة ..بعدها طلعت ..وراها طوالي جا عمر داخل وشايل كوب شاي لما شافني صحيت ختى الكوب في التربيزة قدام عمتي وجا علي ..

-حمد لله على السلامة ...اها كيفك اليوم ؟

-كويسة ..

-ان شاء الله ماف شي واجعك ؟

-لا لا .

عمتو صحت على أصواتنا ...إبتسمت وقالت ..

-ألف حمد وشكر يا الله ...خوفتينا عليك شديد والله...كيفك هسي ؟

-الحمد لله طيبة ..

عمتي ساقتني للحمام ....بعد خلصت رجعت السرير تاني ...عمر كان ماف ..

-تعبتك معاي ي عمتو أعفي لي ..

-تعب شنو !!..هو انتي التعبتي والله ...تعبك راحة يا بتي ..

-الله يخليك ي رب ..

عمر جا ومعاهو سستر شايلة صينية شاي ..ختتها وجابت لي كباية عصير قالت لازم أشربها ...شربتها وادتني معاها حبوب برضو بلعتها حتى طلعت ..

-اتصلت لأخواتك ي عمر ..

-ايوة وشفق جا عم مبارك ساقها ورزان اليوم أول امتحان ليها هتطلع بعد شوية ..

-ربنا يوفقها ...اها الدكتورة قالت بتخرجنا متين ؟

-م حددت لكن قالت غالباً بعد 3 أيام..لانو حالة حور م مستقرة ولازم تكون تحت المراقبة ..