اليوم علوش تم 5 شهور اللهم زد وبارك ...وكمان نزلت جامعة .. والمهون علي انو علي بقى مسكين وهادىء جداً عكس الشهور الأولى كان بكاي و تعبني شديد ...لما اكون شغالة جامعة بخليه م عمتي ..بقضي معظم أوقات غيابي في النوم أو اللعب ...بخلي ليه حليب في البزة وتاني خبري م بجيبه ..
الليلة عندي محاضرة الساعة 8 ...صحيت بصوت علي وهو بلعب وبضحك براهو ...الزمن كان بدري لسه وعمر شكلو في المسجد ...قمت لاعبتو شوية حتى دخلت الحمام واتوضيت ..صليت الفجر واتحصنت وحصنت معاي علي ...بعدين شلتو وقعدت ألعب معاه لما عمر جا من المسجد ..
-صحيتو ..؟
-ايوة ... ليه قبيل م صحيتني للصلاة وانت ماشي المسجد .؟
-قلت امشي واجي حتى أصحيك ..
-(ضحكت)في الحالتين علوش قام بالمهمة ..
جا عليه وشالو مني وباسه في خده وهو بقول ..
-ايوة ولدي الفالح هيبقى إمام مسجد لما يكبر ..
-ان شاء الله...عليك الله أمسكو عندك امشي اجهز الشاي وانظف البيت لانو شغالة جامعة الساعة 8.
-طيب اسرعي لاني برضو طالع ..
-تمام ..
مشيت بسرعة عملت الشاي ومعاهو زلابية كالعادة ..وديت لعمر شرب وانا شربت بسرعة ...البيت كان شبه نظيف ف الترتيب والنظافة م أخدو معاي زمن كتير .. حتى بديت اجهز للجامعة ...بعد جهزت شلت علي من عمر عشان يبدا يجهز ..نزلت تحت لقيت عمتو بس صاحية وشفق عشان م شغالة جامعة اليوم لسه نايمة ...عمتي شالت مني علي وقعدت تلاعب فيه ...
-هدي شنطتو يا عمتو ..جهزت ليك فيها اي حاجة والحليب حقو في البزة برضو ...عندي محاضرة وحدة م بتأخر...
-طيب تمام ...وزاتو ولدك دا كان تغيبي اليوم كلو م بفقدك ما شاء الله عليه..والله لو كان جا بكاي ياهو الحماك القراية ..
-الحمد لله...الله شاف لي غايتو ..(وضحكت).
-ربنا يحفظو الرايق ..
-امين يارب.
-جاييك حاج مبارك ولا ماشة بالمواصلات ..؟
-لا لا عمر هسي طالع ..بطلع معاه سوا ..
-ايواا أحسن لكن في الجية اضربي لحاج مبارك يجيك عشان م تتعبي ساي بالمواصلات ..
-طيب إن شاء الله ...
عمر جهز وجا نازل صبح لأمو ..وودعنا علوش وطلعنا سوا ...وصلني الجامعة وهو مشى شغلو ...
دخلت حضرت المحاضرة بسرعة وأول م طلعت اتصلت لعمو مبارك جاني ورجعت معاه البيت ..بالي كان مع علوش حتى لو هو مسكين وم بكاي لكن دا م معناها اني أهملو ..
أول م وصلت البيت لقيتو نايم ي حليلو بوستو ومشيت غيرت ملابسي ...طلعت من الجامعة بسرعة عشان كدا م فطرت ولقيت ناس عمتي برضو يداب عايزين يفطرو ..قعدت فطرت معاهم وبعدين قعدنا نتونس سوا.
