حور الجناد

5

طول فترة خطوبتنا م حصل إتكلمت مع عمر ...ولا حتى عندي رقمو ..أمي بتديني التلفون يوم الخميس بعد ارجع من المدرسة وبتشيلو يوم السبت تاني ..

مرة يوم سبت ناس خالتو أماني عزمونا في بيتهم ...مشينا انا وأمي وسدين لانها م بتقعد ساي ..وأبوي كان في الشغل وباقي أخواني خليناهم مع ناس عمو عيسى ..

أجرنا ترحال لبيتهم...لما وصلنا لقينا خالتو أماني وشفق ورزان ومعاهم حبوبتهم ..ضيفونا وقعدنا نتونس معاهم ...الونسة كانت حلوة شديد ..وحبوبتهم ظريفة زيهم كدا ...بعد الغداء ناس أمي كانوا بتناقشوا في مواضيع مملة كدا ..فطلعنا انا وشفق ورزان الحديقة والجو كان رهيب شديد ...

-وااي يا حُور انا م مصدقة إنو هتجي تسكني معانا هنا ..هيكون في مواضيع كتيرة ومتعة جد ..

-والله يا حور ولا تصدقي شفق دي أكتر إنسانة إنطوائية وم بتحب البرامج ..

-بس دايماً يا رزان تحبي تبشعي...

-دي الحقيقة .

-خلاص انا هأجي أبرمج بيكم وورانا مواضيع كتيرة هنعملها مع بعض ...

-يا سلام وهو المطلوب ..

شفق متحمسة شديد لفكرة اني هأسكن معاهم في المستقبل هنا ..

-هي انا ماشة أتونس مع النسوان الكبار مقعدني مع الشفع شنو ...

-بالله يا رزان ..!لو ما التلاتة ولا الاربعة سنة البينا دي ؟ قال شفع قال ..هو انتي اكبر شافعة ..

ضحكت لتعليق شفق عليها ودخلت جوا ...كفينا ونستنا وفتحنا موضوع القراية والمدارس وانو الامتحانات قربت وكدا ...لحدي م سمعنا صوت عربية بعدها جا داخل عمر وهو لابس رسمي ...شكله كان هيبة وصارم شديد ...كان داخل جوا لكن شفق ندهت عليه عشان ينتبه انو معاهم ضيوف ...

جا علي مد لي يدو ...

-السلام عليكم..كيف حالك؟

-وعليكم السلام ...كويسة الحمد لله.

-الحمد لله..عن إذنكم ..

دخل جوا ...كل م اشوفه بحس بإرتباك ورهبة ...إلتفت على شفق وقلت ليها ..

-وبعلي إنتي أخوك دا عايشين معاه كيف .؟

-(ضحكت)..يا بت دا زوجك في المستقبل...وبعدين إنتي لسه م شفتي شي ...

-يا زولة الله يطمنك.

-والله انا بقول الصراحة وم بكذب ..عمر دا صعب شديد وبكره الكذب واللف والدوران ..ورومانسية ومواضيع زي دي هو زيرو فيها ...وشغل الأمن والجيش دا زادو زيادة ...لكن كمان عندو مميزات ودي إنتي هتكتشفيها بنفسك ..

شردت في كلامها .. أبداً م طمنتني ...لكن قلت أحسن شي الراجل المالي مركزه وكل الناس بتحسب ليه ألف حساب وبتحترمه ودي كلها صفات واضحة في عمر اللي بفرض إحترامه عليك أول م تشوفه..للمغرب كدا حتى طلعنا منهم وعمر وصلنا للبيت ...قبل م انزل استأذن من أمي إنو عايز يتكلم معاي ل 5دقايق ... طبعاً لما إتخلعت وقت قال كدا ..وضربات قلبي زادت ..كنت راكبة ورا ..كان بتكلم معاي وبعاين لي بالمرايا ..