كلام حور القالته لي زعلني جداً...أبداً م اتوقعتها في يوم تتهمني إتهام زي دا ... هي مفتكرة إني ممكن أعمل كدا ؟ معقولة م بتثق فيني للدرجة دي وكمان مخبية عني سبب تواجدها هناك ...أكيد في سبب خلاها تمشي هناك ...
حور بتفكر في شنو انا م عارف ...عنيدة وم بتسمع الكلام ..قايلة نفسها براها بتقدر تصل لشي ...
م بنكر إني أذيتها معاي جداً وزي م قال سالم الانتقام كان عامي على عيوني ... وحالياً انا ندمان على كل الحصل ولكن بعد نخلص من كل المشاكل والقضايا دي هأحل كل شي ...هأعتذر من حور عن كل البدر مني وأتمنى إنها تسامحني ...
____________
بعد آخر مرة شفت فيها عمر تاني م إتكلمت معاه ..كان بجي يشوف علي وبجيب معاه حاجات كالعادة ...مرات يوم الجمعة بجي بسوق علي واخواني الصغار بطلعهم مشاوير وبشتري ليهم العايزنه ...م بنكر إني بحترم لعمر وقفته مع أخواني دي وانو بحاول ينسيهم فقد أبوي وم يحسسهم بفراقه ..لكن كمان م بنسى ليه إتهامه الباطل لأبوي والأيام السيئة العشتها معاه ..
جا أكرم قال لي عمر عايز تلفونه لانو فيه حاجات مهمة عايزها هسي...
إتذكرت الفيديو الفي التلفون بسرعة مشيت فتشت التلفون لقيتو قاعد في الشنطة ...إتذكرت انو يوم الحادثة وبعد الحصل وقع من يدي والشرطية لما جات رفعتو دخلتو جوا الشنطة...
طلعتو ومشيت شلت تلفون أمي حولت فيه الفيديو ومسحتو من تلفون عمر والصور برضو مسحتهم ..واصلاً م مهم اذا لقاهم ولا لأ لانو في الحالتين عرف وجه المجرم...أبداً م عايزة أشوف الفيديو دا لكن يمكن أحتاجه في حالة تم القبض على المجرم ودا إدانة واضحة بحقه ...انا لازم أستعين بزول بعيد عن الناس البعرفهم عشان يساعدني في القضية دي ...طوالي جا في بالي الضابط جناد ..سمعت عنو مدح كتير وانو اي قضية يمسكها بحلها طوالي ..قلت يا ربي هأوصل ليه كيف ؟ لكن عمر بعرفه وأكيد عنده رقمه...وحدة من شرايح عمر كانت قاعدة في التلفون وإن شاء الله يكون رقم جناد فيها ...بسرعة فتشت جهات الاتصال وبفضل الله لقيت رقمه مسجل ...سجلته في تلفون أمي وسيفتو ..وطلعت شريحتي من تلفون عمر وحذفت المسجات الجات من أبوي لعمر وإتأكدت انها رسلها أبوي لما لقيت فعلاً عنده شريحة بنفس الرقم ... اديت التلفون لأكرم وداه ليه ...
م عارفة قرار الاستعانة بجناد دا صاح ولا لأ لكن في الحالتين لازم ألقى زول يساعدني غير عمر ...
كنت بفكر ابوي عنده شنو محتفظ بيه..وهل الملفات موجودة عنده ولا لأ ...قلت لازم أفتش بيتنا فيهو شنو ...دخلت غرفة أمي ولقيتها ماف شكلها في الحمام ...فتشت الدواليب ولكن م لقيت شي ...بسرعة فتشت الغرفة كلها ولكن طلعت بخفي حنين في الآخير...لما طلعت برا جا أكرم شايل كيس مكتوب عليه " علي استور " اداني ليه ..
-دا شنو ؟
-دا تلفون حقك ..
-جابو عمر ؟
