#مني_وإلي❤️
بقلمي:meme mohammed
_4 _
مَهره نزلت من العربيه وبخطوات تقيله وصلت خبطت الباب فتحت ليها الشغاله دخلت وم عاينت حوالينها في شنو لقت مِسكه شايله البت وبتبكي شديد وفي الكرسي التاني في واحد قاعد م عاينت ليهو اصلا شالت بتها ودخلت غرفتها نومتها ودخلت اخدت دش ورقدت نامت بقت بتفكر ، في نص سرحتها الباب خبط ودخلت شَهله
شَهله: قومي اكلي معانا
مَهره حركت راسها واكتفت بكدا ، شَهله قفلت ليها الستاير وقالت ليها:لو عايزه حاجه مسكلي لي
مَهره م قالت شي ، شَهله مشت وخلتها...
اول م طلعت قالت لأمها: رفضت يا امي
كِنان قال ليها: هي مالها اصلا؟؟
شَهله قعدت في السفره وقالت ليهو:ايييك دي قصه طويله شديد
كِنان اكتفى بإنو عاين ليها وسكت م قال شي
مِسكه بحزن قالت: حظها شنو من الدنيا دي والله مسكينه ليها قريب التلاته سنوات هنا وم عندها زول غيرنا
كِنان بإستغراب: طيب انا كم مره جيت هنا وم حصل شفتها!
شَهله قالت ليهو: هي لمن جات انت كنت في قطر عشان كدا م قابلتها ووو....
مِسكه قالت ليها: اتكلمي قولي ليهو انك خاصمتيها وليك شهور م شفتيها
شَهله قامت من السفره بزهج قالت ليها:يا امي انتي م عارفه شي عشان كدا خلينا ساكتين بس
كِنان بنهره قال ليها:اقعدي يابت وم تتكلمي مع امك كدا
شَهله اتأفأفت وقعدت
كِنان قال لأمو: انا هامشي للشباب والجمعه الجايه بعزمهم فطور هنا تعملي لينا بلدي كدا عشان اشتقنا ليهو
مِسكه ضحكت وقالت ليهو: يشرفونا
قام باس راسها وشال تلفونو ومفاتيح عربيتو ومرق
مِسكه قالت لشَهله: ياريت لو عرستو لمَهره والله تستاهلو م شبه المرمطه دي
شَهله بسرعه قالت ليها: لالا م ينفع
مِسكه بإستغراب قالت ليها: ليه يابتي م فيها غلطه مالو لو مطلقه ولا عندها بنيه
شَهله قالت ليها:م بينفع محمد بزولتو يا امي
مِسكه ضحكت وقالت ليها:لو كدا معليش يابتي
فجأه جات مَهره طالعه
مِسكه: يابتي تعالي اكلي ليك لقمتين م تنسي انتي بترضعي وفي يدك شافعه
مَهره قالت ليها: والله م نفسي يا خالتي
شَهله ساكته ساي ومَهره بتعاين ليها ،فجأه شَهله قامت ودخلت غرفتها ،مِسكه ساقت مَهره وقالت ليها: تعالي شمي هوا ونقعد نتونس
مَهره مشت معاها وقعدت
مِسكه قالت ليها: يابتي اهلك كيف
مَهره عاينت لمِسكه وقالت ليها: م عارفه عنهم اي شي يا خالتي والله
مِسكه طبطبت عليها وقالت: مصيرهم في يوم يحنو انا متأكده وعارفه
مَهره قعدت تبكي قالت ليها: والله يا خالتي تعبانه وتعبت من الحياه دي كل م اقول خلاص هتتسهل بتتقفل في وشي
مِسكه قالت ليها: صدقيني يا بتي بتتقفل عشان تفرج خليك واثقه في ربنا
مَهره وهي بتمسح في دموعها قالت ليها: ابوها عايز يسوق بتي مني وخايفه ادخل في محاكم وكلام فارغ وانا م قدر الحاجه دي نهائي
مِسكه وهي مبتسمه قالت ليها: الحضانه للام يابتي وانتي م عندك شي بعد تتمي ال٤٠ تمرقي تفتشي شغل وانا بمسك ليك بتك م تشيلي هم هي حفيدتي برضو
مَهره ابتسمت وقالت ليها: عارفاك م بتقصري لكن لو مشيت واشتغلت ابوها م هيخليني هيعرف ويجيني لحدي عندي
مِسكه قالت ليها: بنتصرف لبعدين اصبري بس
مِسكه قامت وخلت مَهره قاعده جات الشغاله شايله البت ادتها لمَهره بقت تسكت فيها وتلعب فيها في قعدتها سمعت صوت بوراها
كِنان: ماشاء الله تبارك الله ربنا يحفظها يارب
مَهره صلحت طرحتها وقبلت عليهو وهي مبتسمه: م تنضر يارب
كِنان اتحرك بخطوات متردده قال ليها: هأطلب منك طلب غريب م تستغربي بس عايز اشيلها
مَهره ضحكت من كلامو قالت ليهو: شيلها بس براحه م تقع منك
كِنان وهو فرحان جا عليها ودنقر براحه وشالها ويدو بترجف قال ليها: بحب الشفع في العمر دا
مَهره ضحكت ليهو وم قالت شي في وقفتو دي جات امو شايله صينيه الاكل قالت لمَهره: اكلي يابتي عشان البت
مَهره كرفست وشها كِنان عاين ليها وقال: اكلي انا بقعد بيها هنا
وقعد في الكرسي ، مِسكه ضحكت فيهو وقالت ليهو: وقت بتحب الشفع قلت ليك عرس جيب ليك واحد تلاته
كِنان ضحك وم قال شي ، مَهره بقت تاكل براحه براحه وماسكه تلفونها قاعده في الفيس بتتصفح، جاها صوت كِنان قال ليها: الشافعه دي بتسكت لأي زول كدا ولا لي انا بس؟،
مَهره رفعت راسها قالت ليهو: ايي مع اي زول عشان كدا مريحاني
كِنان كشر وشو وقال ليها: كان تقولي لي انا بس عشان افرح
مَهره ضحكت وقامت شالت الصينيه ومشت جوا بعد غسلت يدها طلعت برا عشان تشيل البت لقت كِنان ماف مشت بخلعه لمِسكه
مَهره بخوف: خالتي ليندا وين؟
مِسكه وهي بتوطي صوت التلفزيون قالت ليها: مع كِنان شوفيهو في الصالون
مشت مَهره وهي لابسه طرحه بس خبطت الباب سمعت صوت من بعيد: اتفضل
دخلت بخطوات متردده لقت كِنان شايل ليندا ومعاهم واحد قالت : السلام عليكم
ردو السلام قالت لكِنان: عن اذنك هاشيلها اغير ليها
كِنان قام اتجهه عليها اداها البت ومشت وهي ماشه قالت لمِسكه: وين شَهله؟
مِسكه قالت ليها: مرقت مع صحباتها
مَهره استغربت قالت ليها: عندها صحبات هي؟
مِسكه قالت ليها: اي صحباتها من الشغل الفات لكن خلتو قبل فتره
مَهره حركت راسها ومشت تغير لبتها بقت تفكر هتعمل شنو هي زاتها لازم تفتش شغل....
في جانب تاني
ادهم جا داخل وفي يدو كيس مشى على فاطمه القاعده بتحضر تلفزيون وسرحانه جا باسها من راسها ، هي اتخلعت وعاينت ليهو ابتسمت ، هو ضحك ليها قال ليها: سرحانه وين
فاطمه قالت ليهو: ولا شي
زحت ليهو وقالت: تعال اقعد جنبي
جا وقعد جنبها اداها الكيس قال ليها: جبت ليك حاجات انتي بتحبيها شديد
فاطمه بفرحه ظاهره في وشها قالت ليهو: لي انا؟؟
حرك راسو بمعنى "اي" شالت الكيس وفتحتو لقتو كلو شوكلاتات كم نوع هي بتحبهم نطت فيهو وقالت : والله بحبك
ادهم ضماها عليها وقال: وانا كمان بحبك
فاطمه وهي مبسوطه قالت ليهو: رأيك شنو نمشي نتعشى برا؟؟ كمل جميلك بقى
ادهم ضحك وقال ليها: يا بكاشه
فاطمه وعامله فيها زعلانه: انا بكاشه يا ادهم؟؟
ادهم ضحك تاني قال ليها: حاشاك والله "وباسها من خدها "وقال ليها: عندي كم فطوم انا ، طوالي نمشي نتعشى
فاطمه ابتسمت ليهو وسكتت قالت ليهو: هأقوم البس
ادهم قال ليها: من هسي؟؟
فاطمه وهي جاريه في السلم وبتكورك قالت ليهو: اي لي زمن م طلعت معاك ومشتاقه ليك انا
ادهم عاين ليها وابتسم صلح قعدتو وبقى سرحان...
#يتبع...
