#مني_وإلي❤️
بقلمي:meme mohammed
_ 11_
بيحكي قال " اول م شفتها حسيت براحه شديده كانت لسه حلوه وملامحها البريئه طاغيه، حسيت قلبي طار عديل من الفرحه، قلت استحاله تكون م سامعه صوتو من شده م بيدق، مبسوط لانو رويت شوق سنين كتيره، عاينت لعيونها البحبها اتمنيت بس تعاين لي بيهم ، للحظه اتمنيت الزمن يقيف وانا بعاين ليها م شبعت منها ولا من عيونها، بقيت واقف مكاني كأني منتظرها تجيني وتدسني في حضنها ، اتمنيت يقيف الزمن عشان اشبع من عيونها ، بقيت واقف ومبتسم بعاين ليها ، م ممكن تكون زادت حلاوه كدا ٣ سنواات بتعمل في الزول كدا معقوله؟؟ ولا هي اصلاً كل م اشوفها بتحلى اكتر من كتر شوقي ولهفتي عليها م قدرت امشي عليها واقف بعاين بعيوني كأنها م اكتفت بشوفتها، مستغرب من كميه المشاعر الجاتني فجأه ومن اطرافي البردت و قلبي الطوالي بيدق لمن يشوفها ، استغربت انو مشاعري اتجاهها م بردت رغم البُعد الحصل بينا، بس كأنو حبي زاد؟؟ لالا م زاد انا اكيد بريدها ، ياخي بريدها شنو؟؟ انا بقيت ولهان ومتيم بيها اكتر من اول❤️"
بتحكي قالت " م اتوقعت اني اشوفو تاني ولا عيوني وعيونو تتلاقى تاني اول م عاينت لعيونو اتذكرت لمن كان بيقول لي(م عايز شي من الدنيا دي غير تدسيني في عيونك شده م بحبها)،م اتوقعت شعور وحب سنين يحيى بعد مرور الوقت دا كلو من البعد، كنت بوهم روحي اني م بحبو بس استحاله اكون م بحبو بعد الاحساس الاحياهو فيني من جديد، استحاله مشاعري تكون بتلعب بي كدا استحاله ابطل احبو ، هو كان لي الاخ والحبيب والرفيق والسند، لا م كان هو لسه كدا ، اكتشفت اني بحبو اكتر مني، ياريت لو بقدر اجري عليهو واحضنو واقول ليهو اني "بحبك" "ومشتاقه ليك وفاقداك" "ولسه عايزاك"، عرفت اني م هاعرف احب ولا حبيت غيرو وانو كلامي كذب ونكراني لحبي برضو طلع كذب، بس هل هيسامحني بعد يعرف الحصل في غيابو؟؟ هل هيقيف معاي؟؟ هل هيتقبل فكره اني اتزوجت واحد غيرو؟ م هو طوالي كان بيقول لي "انتي مني ولي❤️" شعورو هيكون شنو لمن يعرف؟؟ هل هيسامحني بجد؟؟ مش قالو المُحب بيغفر اخطاء حبيبو؟ بس دا خطأ بيتغفر؟؟"
مشت عليهو وهي شايله بتها ولسه بيعاين ليها وقفت مدت يدها قالت ليهو: كيفك؟
بيحكي قال" ٣ سنين من صوتها البحبو؟ معقوله هان عليها كل الزمن دا وم تسمعني صوتها؟؟، معقوله يدها الماسكها دي م ضميتها لي ٣ سنوات؟؟ هل في حب كدا؟؟ في حب بيزيد بالبعد؟؟"
عمران رد ليها وقال: كيفك انتي خليك مني
مَهره قالت ليهو:كويسه الحمدلله
عمران ابتسم ليها بس ابتسامتو اتلاشت بعد عاين للبت الشايلاها قال ليها بإستغراب: دي بت منو؟
مَهره عاينت ليهو وقوت قلبها وقالت: بتي
عمران بقى واقف بيعاين ليها وسرح وقال" بتها؟؟ بتها كيف؟ مش مفروض كانت تقول بتنا؟؟ مش مفروض تكون شايله بتي انا كمان؟ معقوله نستني بالسهوله دي؟؟معقوله مَهره م بتحبني؟؟ بطلت تحبني؟؟ كنا هنسمي بتنا ليندا اختارتو هي وكانت بتتشاكل معاي عشان هتسميها هي!! معقوله مَهره بتقول بتها وم بتقول بتنا؟؟؟"
عمران قوا قلبو وقال ليها: ماشاء الله اسمها منو
مَهره قالت ليهو والدموع في عيونها: ليندا
وهنا كانت صدمه تانيه لعمران ابتسم ليها وم قال شي ، جا كِنان وقف بأستغراب قال لمَهره:مالك واقفه بيها هنا؟
عمران في اللحظه دي قرب يدفن كِنان حي
عمران قال ليهو: انا عمران صديق طفولتها
ومد ليهو يدو ، كِنان ابتسم ليهو وسلم عليهو سلام الرجال داك وعمران م اداهو اي رده فعل قال ليهو: اتفضل اتفضل البيت بيتك
عمران كان نفسو يوقف مَهره ويقول ليها لقيتي فيهو شنو م لقيتيهو فيني عملتي كدا ليه كنت جاي ابرر ليك كل شي بس م بيفيد بشي مشى قعدو ومَهره دخلت ببتها الغرفه اول م قفلت الباب قعدت تبكي قالت" ياريت يا عمران لو وريتك بالحقيقه ياريت"
بهناك عمران بيحاول يمسك اعصابو ودموعو بالعافيه شعور الغيره ماليهو فل ،من نص دايره الرقيص شَهله شافتو واتخلعت قبلت تفتش مَهره م لقتها طوالي مشت ليهو قالت ليهو: الجابك شنو؟
عمران بإستغراب قال ليها: بتعرفيني من وين؟
شَهله قالت ليهو : انت هتستعبط ولا شنو جاوبني الجابك شنو في الوقت دا؟
عمران وقف على حيلو وقال ليها:جيت لحبيبه عمري
شَهله قالت ليهو: حبيبه عمرك هسي؟ وين كنت لمن هي كانت بتعاني ال٣ سنوات دي براها؟ لا اخ لا اب لا ام لا اخت لا صاحب حتى؟
عمران قال ليها وهو معصب: انا م كنت عارف ليها طريق وصدقيني كنت بسأل طوالي منها بس اخوانها م راضيين يوروني وين
شَهله ضحكت بأستهزاء جا آصِف قال ليها: مالك يا شَهله
قالت ليهو: ماف شي ارح
ساقتو ومشو يرقصو ، بهناك عمران حس بجسمو مسخن وم قادر يمسك نفسو طوالي وقع من الكرسي المعازيم كلهم اتخلعو وشالوهو دخلوهو الصاله جوا
مَهره سمعت صوت كِنان بيقول" زحو زحو وجيبو ريحه سريع"
مَهره شالت بتها وطلعت كلو من خوفها عليها لقت عمران راقد في الكرسي وكِنان قاعد في الارض بيشممو ريحه ، مَهره بخلعه جرت عليهو وقالت: عمران عمران اصحى
جات مِسكه شالت البت منها لانو بدت تبكي ، ومَهره بقت تصحي فيهو لحدي م فتح عيونو قام براحه وقال: اسف يا جماعه لخبطه ليكم اليوم
كِنان قال ليهو: لالا ياحبيب حصل خير
المعازيم كلهم طلعو الجنينه يتمو الحفله ومَهره شايله بتها وقعدت معاهو قال ليها: ممكن تجيبي لي مويه؟
مَهره حركت راسها ومشت تجيب ليهو المويه هو طلع الدوا وبلع حبايتين قالت ليهو بإستغراب: مالك؟
بعد شرب المويه قال ليها: سكري
مَهره اتخلعت وقالت ليهو: جاك متين؟
عمران ابتسم عشان لهفتها عليهو قال ليها: من سنه
مَهره قالت ليهو: سلامتك
عمران ابتسم وقال ليها: الله يسلمك
عاين لليندا قال ليها: ماشاء الله حلاتها
مَهره نزلت راسها وقالت: تسلم
عمران عاين ليها مسافه وقال: زي م انتي م اتغيرتي بس زدتي حلا كالعاده يعني
مَهره رفعت راسها وعاينت ليهو وم قالت شي قال ليها: حتى عيونك بعد تبكي بتبقى حلوه
نزلت راسها ورفعت بتها في كتفها قال ليها: مَهره
رفعت راسها سكت مسافه وقال ليها: ليه عملتي فيني كدا؟؟
مَهره دموعها نزلت قالت ليهو: كل شي م بيدي
عمران قال ليها: وسميتيها ليندا؟ مش المفروض تكون بتنا؟
مَهره نزلت راسها وم قالت شي قال ليها: م هاعاتبك ولا شي يا مَهره بس كان تراعي لقلبي الاديتو ليك
هنا مَهره بكت وقالت ليهو: عارفه العملتو م بيتغفر لي بس سامحني انا اسفه وحقك علي بس كل شي غصب عني صدقني
عمران جا عليها ومسح دموعها وقال ليها: عارفاني م بحب اشوفك بتبكي وكمان بسببي
مَهره قالت ليهو: انا اسفه بتمنى تسامحني
عمران قام على حيلو وقال ليها: انا كنت جاي هنا عشان ارجعك معاي واوريك خبر يفرحك
مَهره قالت ليهو بإستغراب: خبر شنو؟
عمران ابتسم وقال ليها: اهلك اسلمو
#يتبع....
