#مني_وإلي❤️
بقلمي:meme mohammed
_8 _
اتصل ليها وقال: اطلعي انا برا
هي اتوترت لبست توبها وطلعت ليهو اول م شافتو :عمران بتعمل شنو هنا؟؟ امشي قبل ايمن يشوفك
عمران متكل ع العربيه ورافع حاجبو قال ليها: ولو قلت م ماشي؟
جات عليهو لزتو وقالت : يوم هتخلي اخواني ديل يقتلوني بسببك
عمران كشر حواجبو وقال ليها:انا برضو يا مَهره؟؟قلت ليك اجي واتقدم؟
مَهره حركت راسها بسرعه وقالت:لا ابوي م هيوافق
عمران عاين ليها وقال:طيب خلينا من ابوك هسي وهاك دا
اداها خاتم مكتوب فيهو اسمو بعد لبسو ليها غمز ليها وقال: عشان تكوني عارفه انك حقتي وهأعرسك يعني هأعرسك
مَهره ابتسمت وقالت ليهو: شكراً شديد
عمران ضحك وقال ليها: شكراً في عينك، امشي يلا عشان ايمن م يشوفك
مَهره عاينت ليهو وقالت: يعني هسي بقت ايمن بعد عملت الفي راسك
عمران ضحك ولزاها بيدو وقال: يلا يلا يابت صدعتي بي
مَهره وقفت وهي مبتسمه قالت: بحبك
عمران ابتسم هو كمان وقال ليها: وانا بريدك ياستهم
"جزئيه من الماضي"
_______________
عمران وهو مخلوع قال ليها: عرفتي عنوانها من وين انتي؟؟
دلال بتوتر قالت ليهو:وقعت ايمن في الكلام وقال لي عنوانها لانو ابوها هو السفرها
عمران حرك راسو بمعني "عارف النقطه دي"
جا قريب منها وقال: وريني عنوانها بالظبط؟
دلال حركت راسها بمعنى "م عارفه"
خبط راسو بيدو وقال ليها: بأي طريقه تجيبي لي عنوانها والا م هيحصل خير يا دلال وفكره اني اسامحك دي انسيها عديل
دلال م قالت شي وطلعت وخلتهم
عمران بقا ماشي وجاي في الغرفه جات مَهره قالت ليهو: انا اسفه عشان ظلمتك كل السنوات دي
عمران غمض عيونو وم قال شي
مَهره قالت ليهو:هتمشي متين؟؟
عمران قال: هابدا في الاجراءات هسي وهاسافر على اول طياره
مَهره قالت ليهو: طيب انا هأقعد مع بنات خالتي لحدي م يجو
عمران باس راسها وقال: هأرجع مَهره وهأتزوجها
في جانب تاني
وهم في باب المستشفى جا كِنان وقف عربيتو وركبو اول م ركبت مَهره ، كِنان بإبتسامه قال ليها: نورتينا ياخ
مَهره ابتسمت وعاينت لبتها وهي مبتسمه ،بعد وصلو البيت كِنان نزل معاهم وشال ليندا من مَهره ، اول م شالها باسها ومَهره مبسوطه من تصرفو جات مِسكه شالت ليندا من كِنان ودخلو البيت طوالي مَهره قالت ليهم: انا هأرتاح شويه في الغرفه
مِسكه قالت ليها: خلاص شيلي ليندا نوميها معاك
شَهله قالت ليها: عنك عنك انا بجيبها انتي امشي قدامي
مَهره ضحكت ومشت الغرفه اول م جات شَهله داخله وقفت لمَهره قالت ليها: اسفه على الحصل مني واسفه عشان خليتك فتره حملك
مَهره ابتسمت وقالت ليها: صح كانت فتره صعبه لانها حرفيا صعبه شديد علي بس الحمدلله هسي ربنا بيعوضني
شَهله حضنتها وقالت: حاسه لسه ربنا هيعوضك عشان صبرتي ع الاذى الجاك من كل حته وصبرتي على الظروف
مَهره ابتسمت وقالت: الحمدلله ، العوض كلو جا في البيت دا بإختصار
شَهله حضنتها وقالت: ربنا م يحرمني منك يا صحبتي
شَهله طلعت وخلتها ترتاح ..
اول م طلعت امها جات وجرتها من يدها قالت ليها: تعالي معاي
شَهله مشت مع امها وهي مخلوعه بعد قعدت قالت ليها: امي بسم الله مالك؟
مِسكه قرصتها من جضومها وقالت ليها:انا تغشيني وتقولي لي كِنان بزولتو؟؟
شَهله بإستغراب قالت:بري يا امي م غشيتك انا
مِسكه حمرت ليها وقالت: والله م اخليك
شَهله قالت ليها: يا امي اخوي حلات الدنيا عليهو والف بت تتمناهو ليه تديها لواحده مطلقه وعندها بت
مِسكه قالت ليها: وهي زاتها حلات الدنيا عليها وم معناها مطلقه معناها حرام تعرس تاني خلي كلامك الرجعي دا
شَهله سكتت مسافه بقت تفكر قالت ليها: امي بإختصار مَهره بتحب واحد تاني
مِسكه عاينت ليها قوي وقالت: طليقها يعني؟؟
شَهله حركت راسها بمعنى "لا"
مِسكه قالت ليها: سجمي منو يعني؟؟
شَهله سكتت م قالت شي ، في قعدتهم جا كِنان مبسوط قال ليهم: مالكم بتتوسوسو في شنو
شَهله كانت عايزه تتكلم مِسكه سكتتها وقالت: ولا شي يا ولدي تعال اقعد
كِنان استغرب منهم وقعد قال ليهم: آصِف قال جاي بكره
شَهله عدلت قعدتها والبسمه لنهايه ضرسها قالت ليهو: م قال ليك جاي لشنو؟
كِنان حمر ليها وقال: يجي لشنو يعني جاي يسلم علينا الله؟
شَهله ابتسامتها اختفت وم قالت شي عشان م يلاحظ ليها ، كِنان م اشتغل بيها ومسك تلفونو ، وشَهله مزاجها اتعكر طلعت غرفتها
كِنان قال لامو: دي مالها فجأه قلبنت كدا
مِسكه قالت ليهو: بري م بعرفها منفسنه ساي خليها
كِنان سكت وم قال شي
في جانب تاني
جا داخل محمد قال لادهم: سلامتها المدام
ادهم قعد وقال ليهو: االله يسلمك يارب
محمد قال ليهو: مالك؟
ادهم عاين للارض وقال: مَهره م راضيه تديني البت وفاطمه بقت تشك اني عايز ارجعها وموضوع كبير
محمد قال ليهو: هنلقاها وهنشيل منها البت
ادهم حرك راسو وم قال شي
جا الدكتور قال ليهو: استاذ ادهم؟
رفع راسو قال ليهو: ايوا انا
الدكتور قال ليهو: معليش تعال معاي عايزك في كلمتين
ادهم قام معاهو ومشو على جنب قال ليهو: بعد عوضنا المريضه بالدم عملنا فحص شامل والنتيجه ظهرت قبل شويه
ادهم بتوتر قال ليهو:مالها يا دكتور؟
الدكتور قال ليهو: عندها مشكله في القلب ولازم عمليه
ادهم بقى واقف بيعاين ليهو مسافه وقال: كيف يعني مالها بالظبط؟
الدكتور قال ليهو: ضيق في الشرايين ولازم عمليه
"طبعا الكلام كلو بالانجليزي"
ادهم بقى مخلوع الدكتور طبطب عليهو ومشى جاهو محمد قال ليهو: مالك الدكتور قال شنو؟
ادهم بصعوبه قال ليهو: هيعملو لفاطمه عمليه قلب
محمد بإستغراب قال ليهو: فجأه كدا ؟؟
ادهم م قال شي ، بعد مسافه قال ليهو: بتي هأجيبها يعني هأجيبها
#يتبع...
