#مني_وإلي❤️
بقلمي:meme mohammed
_14 _
تاني يوم صحت من النوم الباب بيخبط شديد اتخلعت مشت قفلت باب الغرفه بالمفتاح وطلعت شافت بالعين السحريه لقتو عمران اتنهدت وفتحت ليهو الباب قالت ليهو بزهج: دا وقت زياره هسي
عمران م اشتغل بيها وقفل الباب الموضوع حرقها شديد مشت لقتو قعد في الكنبه قالت ليهو: يا استاذ بتعمل شنو هنا
عمران م اشتغل بيها وفتح التلفزيون شالت الريموت وقفلتو قالت ليهو: الناس لمن تجي بتقول صباح الخير ، السلام عليكم مش بتقعد كدا
عمران عاين ليها وقال: براك قلتي الناس وانا م ناس
رفعت حاجبها وقالت ليهو: انت يا ود م نصيح ولا شنو عايز تجلطني؟
عمران غمز ليها وابتسم وقال: فداي
مَهره حمرت ليهو وشالت المفتاح من تحت الكنبه ومشت تفتح باب الغرفه وعمران بيعاين ليها وم فاهم هي بتعمل شنو فتحت الباب وخلتو فاتح وجات لعمران عاينت ليهو بزهج وقعدت قالت ليهو: مالك بتعاين لي كدا
عمران ابتسم وقال ليها: بعاين لعيونك البحبها
مَهره قامت وم ردت عليهو مشت جابت جك المويه وختتو في التربيزه قدامو عاينت للتلفزيون قالت ليهو: مصر تفتحو يعني؟
عمران كب من الجك وقال: عندي كوره مهمه تحضري معاي؟
قبلت منو وقالت: لا احضرها براك
عمران م قال شي بقى منتبهه مع التلفزيون وهي بتعاين شويه شويه قال ليها: م قلتي م عايزه تحضري
حمرت ليهو وم قالت شي، قال ليها: كنتي داسه المفتاح تحت الكنبه ليه
مَهره قالت ليهو: م يخصك
عمران رفع حاجبو وعاين ليها وقال: لو م ببخصني بيخص منو يعني؟
مَهره قالت ليهو: عمران م تخلينا نكون واضحين؟؟
عمران عدل جلستو وقال: اها بحب الوضوح
مَهره قالت ليهو: من الاخر كدا انا م هأرجع معاك السودان عشان بتي
عمران بإستغراب قال ليها: وانا قلت ليك ارمي بتك وامشي معاي؟؟
مَهره ضيقت عيونها وقالت ليهو: احسن ليك بطل استهبال
عمران ضحك وقال ليها: مَهره عارف عندك مشاكل مع طليقك وعايز يشيل البت بس انا طالما لقيتك م هأمشي واخليك
مَهره طبعا مبسوطه من جواها وبتبين عكس كدا قالت ليهو: طيب م ينفع تمشي وتجيني وانا قاعده هنا براي
عمران قال ليها: م واثقه فيني انتي ولا شنو
مَهره م قالت شي قال ليها: قايله نفسك في السودان ولا شنو هنا زول بجيب خبرك ماف
مَهره حمرت ليهو وقالت: انا قلت زول ولا م زوله؟ كل الحكايه شرع ربنا وحرام تقعد معاي وماف بينا شي ولا معانا محرم
عمران رفع حاجبو وقال ليها: قلتي كدا؟
مَهره حركت راسها بمعنى "اي" قال ليها: قومي اعملي لي شي اكلو
مَهره ختت يدها في نصها وعاينت ليهو وقالت: قايل نفسك منو انت
عمران قال ليها وهو مبتسم: راجلك!اخوك! صحبك! ابوك !اي شي انتي عايزاهو انا من هنا م ماشي
مَهره عاينت ليهو وعصبت مشت غرفتها لقت بتها صحت رضعتها وغيرت ليها وطلعت بيها برا قالت ليهو: امسكها مسافه اخلص الاكل
عمران شالها وقال ليها: م تعملي اكل كتير
مَهره حمرت ليهو وم قالت شي مشت وخلتو قاعد مع ليندا فجأه جات طالعه وشايله مكعبات تلج في يدها ختتهم في الجك وعاينت لعمران من فوق لتحت ومشت خلتو، عمران طبعا مبسوط من الحته دي فجأه الجرس ضرب جات مَهره جاريه لعمران قالت ليهو: جيبها جيبها هتمشي تفتح بيها الباب؟
عمران زحاها منو وقال: يابت هيحصل ليها شنو وهي معاي بطلي خوفك دا
مشى وخلاها واقفه فجأه سمعت صوت شَهله قالت ليها: من قبيل بتصل عليك م بتردي مالك
مَهره قالت : بعمل الاكل والتلفون في الغرفه جوا
شالت منها الاكياس ودخلتها المطبخ مَهره قالت ليها: ليه متعبه نفسك كدا
شَهله عاينت ليها وم قالت شي، بعد مسافه غمزت ليها وقالت: عمران عامل شغل
مَهره حمرت ليها وقالت: عايزه اتخلص منو بأي طريقه
شَهله قعدت في الكرسي بتاع السفره وقالت ليها: م هتتخلصي منو الا ترجعي السودان
مَهره سكتت م قالت شي ، في نص ونستهم جاهم صوت عمران بيكورك: مَهره يا مَهره
جاتو بزهج وقفت قالت ليهو: مالك في شنو
عمران ابتسم وقال ليها: هاك مَهره عايزه تتكلم معاك
مَهره جرت بلهفه مسكت التلفون والدموع في عيونها قالت ليها: ياغبيه مشتاقه ليك شديد
مَهره اخت عمران قالت ليها: كدا يعني اهون عليك كل السنوات دي؟؟ مش انا اختك وصحبتك
مَهره بتبكي قالت ليها:والله حقك علي عارفه اني غلطه بس اعمل شنو
مَهره اخت عمران ابتسمت ليها وقالت: اخيراً الواحد انبسط بشوفتك
مَهره ابتسمت وقالت: تعالي انتي كمان
مَهره اخت عمران قالت ليها: كلمي عمران يرسل لي اجيك اصلو م عندي مشكله
مَهره ابتسمت وقالت ليها: حاضر بكلمو
اتونست معاها شويه وادت التلفون لعمران وهي ماشه فجأه سمعت صوت واحده مَهره قبلت على عمران وحمرت ليهو عمران اداها نظره بالجنبه وبقى يتكلم مع بت خالتو بعد قفل عاين ليها وقال: خير واقفه مالك؟
مَهره واعصابها خلاص فلتت قالت ليهو: هسي سألتك انا؟
عمران ضحك وقال ليها: بسألك الموقفك شنو؟
مَهره قالت ليهو: واقفه عشان اقول ليك خلي اختك تجي
عمران قال ليها: هي م هتجي نحن هنمشي ليها
وغمز لمَهره، مشت وم اشتغلت بيهو
دخلت المطبخ وهي معصبه شَهله بإستغراب قالت ليها: مالك يابت بسم الله هتتفجري
مَهره وهي معصبه: عمران بيتكلم مع بت خالتو وانا متأكده هو القال لمَهره تعمل كدا
شَهله ضحكت وقالت ليها: طيب براحه وشك هيقع منك
مَهره حمرت ليها وواصلت شغلها بعد خلصت الاكل رصتو في السفره جا عمران قعد وشمر كم قميصو وبدا ياكل ومَهره شايله بتها وبطبطب عليها
عمران قال: ختيها البت دي هتعوديها على الشيل
مَهره قالت ليهو: م يخصك
شَهله لكزتها نظام اسكتي مَهره حمرت ليها وسكتت ، بعد عمران خلص اكل قام يغسل يدو ، مَهره منتظراهو يعلق على الاكل زي م بيعمل كل مره بس م قال شي قامت هي زاتها غسلت يدها جات لقتو قاعد في الصاله واخر انبساطه مَهره مشت وم قالت شي لقت شَهله بتغسل العده ،مَهره بزعل قالت ليها: م علق ع الاكل ولا قال شي
شَهله عاينت ليها بإستغراب وقالت: دا شنو االتناقض الانتي فيهو دا؟ مش قلتي عايزاهو يزهج ويمشي
مَهره سكتت م قالت شي عملت الشاي ومشت ختت ليهو كبايتو وقعدت بعدها جات شَهله وشالت ليندا من عمران وبقت تلعبها ومَهره منتظراهو يفتح خشمو وهو حلف كان يقول كلمه بيشرب في سكوت تام....
في جانب تاني
فاطمه قالت ليهو: ادهم وريني كيف يعني بتي؟
ادهم سكت مسافه وم قال شي هي كوركت قالت ليهو: بسألك يا ادهم؟
ادهم قال ليها: روقي روقي هاوريك اي شي بس امرقي من هنا وبجيبها ليك لحدي عندك
فاطمه مخلوعه وحست نفسها م فاهمه شي عاينت ليهو بإستغراب ، ادهم غمض عيونو وقال: هافهمك كل حاجه بس اهدي وروقي
فاطمه دموعها نزلت وقالت لمحمد: وريني كيف بتي؟
ادهم قام باس راسها وساق محمد وطلع
ادهم وهو معصب قال ليهو: محمد انت جادي؟ عايز تخرب اي شي في ثواني؟
محمد وهو مستغرب قال ليهو: ادهم انا اعرف من وين انك داسي منها؟
ادهم ضغط على اسنانو وقبض كفو وسكت م قال شي
محمد قال ليهو: لقيت مكانها
ادهم عاين ليهو وقال: وين؟
محمد وصف ليهو البيت
ادهم عاين ليهو وقال: عرفتو من وين
محمد حكى ليهو ، ادهم حرك راسو بمعنى "طيب" ودخل لفاطمه قال ليها: لقيتها يا فاطمه
فاطمه وهي مبتسمه قالت ليهو: طلعت بت يعني
ادهم جا وقعد جنبها قال ليها: هي اصلاً بت عرفت بعد ولدوها وجو يسجلوها بإسمي وم حبيت اوريك عشان اعملها ليك مفاجأه بس انتي م صبرتي علي خالص
فاطمه ابتسمت ليهو وقالت: طيب امشي وتعال سريع
ادهم ابتسم ليها ومشى هو ومحمد ، اول م وصلو ادهم قال ليهو: انت متأكد؟
محمد قال ليهو: اي ارح انزل
ادهم بإستغراب قال: البيجيبها تعيش هنا شنو؟
محمد حرك كتفو بمعنى" م عارف" نزلو وخبطو الباب فتح ليهم كِنان
كِنان بخلعه قال: محمد!!!!!
#يتبع....
