#مني_وإلي❤️
بقلمي:meme mohammed
_22 _
اول م الطياره هبطت مَهره حست بشعور غريب، عرفت انها مشتاقه للسودان وهي م كانت عارفه، كانت فاقده ريحه الوطن، نزلو هم التلاته وهنا مَهره كانت في قمه السعاده بتعاين حوالينا وهي مبتسمه وشعور الرضا طاغيها انها عملت خطوه زي دي، بعد طلعت من المطار ابتسمت لمن لقت بتاع الامجاد واقف وببشاشه بيقول ليهم اتفضلو يا اولادي ،مَهره تلقائياً ابتسمت ، ركبت وهي مبسوطه كأنها نست الحصل ليها في ال٣ سنوات الفاتت ، بتعاين بالشباك والبسمه شاقه وشها، عرفت انو السودان منها وفيها وعرفت انها اشتاقت ليهو والحنين كان زارها من زمان بس عرفت دا متأخر، قطع سرحانها لمن سمعت كلمات الاغنيه الكلماتها وطنيه بكل م تحملها الكلمه من معنى ، وبقت تدندن معاها " مرحبتين بلدنا حبابا" ،لمن دخلو الحي جاتها كل ذكرياتها من وهي شافعه لحدي اخر لحظه طلعت من السودان ابتسمت لمن عاينت للشفع البيلعبو "بلي" والبنات بيلعبو "حجله"، لمن وصلو البيت نزلت وعاينت حوالينا لقت راجل عجوز قاعد بيرش الشارع والشجر الجنب بيتو وريحه الطين فايحه، مَهره غمضت عيونها واستنشقت ريحه الطين، سمعت صوت عمران بيقول ليها يلا!، عاينت لعمران وعاينت لباب بيت عمران كانت متمنيه اسمهان تفتح ليهم الباب تستقبلهم كالعاده لمن كانت بتجي من الجامعه هي ومَهره وبتشاكل عمران لمن يجي عشان م جا وصلهم ، اتوقعت هتجي وتستقبلهم بالحضن هم التلاته احساس الحزن في ثواني زارها ، مسكت دموعها بالعافيه بس غلبتها لمن دخلت الحوش ولقت باب البيت قافل بكت لانها حست بغرابه حست في شي ناقص في البيت لمن دخلو البرنده مَهره الدموع غلبتها وبقت تبكي بصوت ، كل ذكرياتها جات ماره من وهي صغيره وكانت معاها اسمهان وبتعاملها كأنها تومه بتها، اتنهدت وراقت بعد عمران اتكلم معاها وقال: ادعي ليها يا مَهره
مَهره حضنت اخت عمران وبكت مسافه بعدها الباب خبط، عمران مشى فتح الباب، جا داخل ومعاهو خالتو اول م شافت مَهره لوت خشمها وقالت: دي طلعت من وين كمان
عمران قال ليها: خالتي!!!
خالتو قعدت وبتعاين لمَهره من فوق لتحت ، مَهره اتضايقت من نظراتها عايزه تقوم قالت ليها: كنتي وين كل السنوات دي
مَهره عايزه ترد عمران قال ليها: تعالي يا مَهره اوصلك غرفتك
خالتو قالت ليهو: توصلها انت لشنو م توصلها مَهره اختك
عمران اتنهد وم قال شي ، مَهره اختو قامت معاها ، مَهره قالت ليها: عارفه الغرفه وين مش غرفتك؟
مَهره اخت عمران حركت راسها وقالت ليها: اي
مَهره قالت ليها: خليك انا بمشي براي
مَهره اخت عمران قالت ليها: م تزعلي من خالتي عارفاها بترمي الكلام
مَهره ابتسمت وقالت ليها: عادي عادي م حصل شي
مشت وخلتها واقفه دخلت الغرفه استحمت ورقدت نامت من التعب
بهناك عمران قال لخالتو: خالتي بالغتي والله ليه تقولي ليها كدا م شفتيها اتضايقت
خالتو رفعت اصبعها قالت ليهو: هووي ياولد فتح عيونك ديل كويس البت دي مرقت من هنا ماف زول عارف ليها طريق وم عارفاك جبتها من وين زاتو لكن تضمنها كيف م عملت شي كعب
عمران قال ليها: خالتي انا بعرف مَهره شنو وبحترم حته انك عايزه تنصحيني كأم بس دي حياتي وانا حر فيها
خالتو قالت ليهو: بقت كدا يا عمران؟؟ بعد اختي ماتت عايز تتأمر وتتشرط وتقول دي حياتك براك؟
عمران قال ليها: م قلت كدا يا خالتي بس م ترمي مَهره بالكلام ولا تضايقيها لانها م عملت شي غلط وانا متأكد من الحته دي
خالتو لوت خشمها وقالت ليهو:الترابه في خشمك يا ولدي
عمران سكت م قال شي، الباب خبط مَهره اختو مشت فتحت الباب جات داخله بت خالتو الكبيره ناهد سلمت عليهو وحمدت ليهو السلامه وقعدت
خالتو طوالي قالت ليها: اتخيلي يابتي عمران جاب معاهو منو
ناهد بإستغراب قالت ليها: منو؟
خالتو عاينت ليهو وعاينت لبتها قالت ليها: هيكون منو غيرها العايزه تخرب حياتنا دي
عمران قال ليها: خالتي معليش لحدي هنا كفايه
خالتو قالت ليهو: يا غبي عايزه الحقك منها انت هسي عارف عملت شنو من وراك لمن واقف معاها كدا وفي صفها
عمران قال ليها: النقطه دي اتكلمت فيها يا خالتي م عندي كلام تاني
خالتو قالت ليهو: بتقل ادبك علي في بيت اختي ولا شنو؟
عمران سكت لانو عارف لو رد هتكبر الموضوع وهتعمل زعلانه قام على حيلو وقال ليهم:عن اذنكم البيت بيتكم
مشى وخلاهم قاعدين، مَهره قالت ليهم بإحراج: معليش يا خالتي نجوان عارفاهو بيزعل سريع
نجوان قالت ليها: انتو بقيتو اولادي بعد اسمهان مشت لربها وهسي عايزه اريحها في تربتها يابتي اقوم اخليهو يعمل الفي راسو؟ ويدخل بت زي دي هنا؟
مَهره قالت ليها: خالتي م تظلميها
نجوان لوت خشمها وقالت: مش كانت عايشه براها في بلد الكفار دي؟؟ وم معروف ليها طريق هسي جايبينها هنا تاني م معروف سمعتها شنو؟؟
مَهره قالت ليها: ياخالتي بعدين اصلا هتمشي اهلها م تتضايقي انتي
نجوان سكتت وم قالت ليها شي...
