#مني_وإلي❤️
بقلمي:meme mohammed
_ 1_
صحت من النوم وهي حاسه بألم شديد وبتاخد نفسها بصعوبه مسكت تلفونها واتصلت لصحبتها
مَهره وهي بتاخد نفسها وبتتكلم بالعافيه وبصوت متقطع: ش..ش..شَهله تعالي س..سريع
شَهله بتكورك: انا مش قلت ليك م تتصلي لي تاني؟؟
مَهره بصوت متقطع: ح..حرام عليك محتاجاك هسي "وكوركت شديد والتلفون وقع من يدها"
عدت ربع ساعه من الالم ومَهره بتبكي لسه فجأه جات داخله شَهله صحبتها ومعاها الاسعاف ، مَهره ابتسمت لانها عارفه صحبتها م كانت هتخليها
الاسعاف ساقتها ومشت المستشفى طوالي دخلوها وشَهله بقت منتظره برا وهي سامعه كواريك مَهره وبتتألم معاها ، بعد زمن طلعت الممرضه وشايله بيبي في يدها كان صغير شديد شَهله جرت عليها وشافتو ابتسمت واتنهدت الممرضه مشت ومَهره ساقوها غرفتها وشَهله مشت معاها ، مَهره بإبتسامه وهي تعبانه قالت ليها: عارفاك م هتخليني
شَهله اكتفت بإبتسامه وم قالت شي ، دخلو الغرفه وشَهله لسه في سكوتها ومَهره تعبانه لسه م قادره تتكلم، جات الممرضه وشايله البيبي ادتو لمَهره ، شالتو براحه ختتها في حضنها ودمعت ومعاها ابتسامه ، شَهله بتعاين بس ، مَهره قالت: هأسميها ليندا
شَهله م قالت شي بتعاين بس ودموعها في عيونها
مَهره عاينت ليها بتعب وقالت: م هتتكلمي معاي ولا هتحمدي لي السلامه؟؟
شَهله بصوت مبحوح: حمدلله ع السلامه
مَهره بإبتسامه باهته: الله يسلمك
شَهله قامت مَهره اتنهدت وحضنت بتها ومبسوطه بيها شديد❤️.
في جانب تاني
جات نازله وهي لابسه عبايه خليجيه وشعرها مفكوك لبعد ضهرها وجميله بمعنى الكلمه قعدت جنب راجلها قالت ليهو: مالك سرحان؟
ادهم اتنهد وعاين ليها وقال: ماف شي يا فاطمه بس الشغل في الشركه متوتر شويه
فاطمه ختت يدها في كتفو وقالت ليهو: كل شي بيتحل ان شاء الله
ادهم اكتفى بإبتسامه باهته وسكت ، فاطمه حبت تكسر الصمت قالت ليهو: ياريت لو بقدر املى ليك البيت شفع
ادهم عاين ليها وحضنها عليهو وقال: اي شي لخير وماف شي بعيد من ربنا
فاطمه اتنهدت وغمضت عيونها شديد قالت ليهو: العملناهو نحن حرام؟
ادهم قال ليها: كانت حاجه م بإرادتنا بس اكيد هنلقى حل
فاطمه قالت ليهو: ياريت لو قدرت اشوف ولدي
ادهم قومها ومسك وشها بيدينو قال ليها: صدقيني انا معاك وم هأخليك يا فاطمه
فاطمه دموعها نزلت وم قالت شي.
في المستشفى
جات داخله شَهله عاينت لمَهره وقالت ليها: امي بتتصل من قبيل منتظراني
مَهره ابتسمت وقالت ليها: طيب اقعدي عايزه اتكلم معاك بعد كدا امشي
شَهله بسرعه قالت ليها: نحن ماف بينا كلام يا مَهره
مَهره بحزن قالت ليها: بالسهوله دي هُنت عليك؟؟
شَهله ضحكت وقالت ليها: انتي عارفه عملتي شنو ولنفس السبب طلعتيني كعبه وانانيه مش؟
مَهره قالت ليها: والله غصب عني افهميني
شَهله اشرت ع البيبي وقالت ليها: حتى دي غصب عنك؟؟
مَهره قالت ليها: والله كلو غصب عني كلو عشان القروش بس يا شَهله وانتي عارفه الحصل لي في السودان وخلاني اجي هنا وخليت كل احلامي وبيتي وعيلتي وجيت لبلد غريبه علي وعني وم في يدي مليم احمر 💔
شَهله قالت ليها: وعملتي شنو في المقابل؟؟ مشيتي ورا كلام قلبك!
مَهره بكت وم قالت شي ، شَهله قامت وقالت ليها: مع السلامه امي منتظراني
مَهره م قالت شي حركت راسها ومسحت دموعها وعاينت لبتها تاني دموعها نزلت قالت ليها: انتي الوحيده الفضلتي لي
مدت يدها ومسكت يد بتها الصغيره وبقت تلعب معاها
تاني يوم صحت بصوت بتها بتبكي جات الممرضه شالت البت ادتها لمَهره عشان ترضعها، بعد نامت هي زاتها رجعت نامت صحت بعد نص ساعه سامعه صوت شَهله التفتت ع بتها لقت شَهله بتلعب مع بتها وهي ساكته بتعاين ليها ، مَهره ابتسمت وقالت ليها: عرفتك برضو هتجي
شَهله عاينت ليها ورجعت تلعب مع البت ، مَهره اتنهدت وقامت براحه مشت الحمام وجات لقت شَهله بترتب في الشنطه
مَهره بإستغراب: خير في شنو؟؟
شَهله قالت ليها: هتمشي معاي البيت امي م رضت تخليك براك وانتي في وضع زي دا وانا وافقت عشان البت م ذنبها شي
مَهره ابتسمت وقالت ليها: جميلك دا م هنساهو طول عمري
شَهله اتجاوزتها وقالت: يلا عشان هنمشي، السواق تحت منتظرنا
مَهره قامت بصعوبه والممرضه شايله البت وركبو العربيه واتحركو
اول م وصلو البيت مَهره عاينت بالشباك قالت لشَهله: ماشاء الله تبارك الله البيت حلو شديد
شَهله اكتفت بإبتسامه وفتحت الباب ونزلت ،مَهره اتنهدت وهي كمان نزلت بصعوبه ، دخلو البيت وام شَهله استقبلتها بكل حب
مِسكه ام شَهله: قومي يابتي ادخلي الغرفه عارفاك تعبانه
مَهره قامت بصعوبه وقالت ليها: والله بجد تعبانه شديد تسلمي يا خالتو
مِسكه ابتسمت ليها وقالت لشَهله: قومي يابت وصلي صحبتك الغرفه
شَهله شالت الشنطه وقامت ومَهره اتسندت عليها براحه ومشت اول م دخلو الغرفه مَهره قالت لشَهله: عارفاك زعلانه مني بس اي شي هتعرفيهو في وقتو
شَهله قالت ليها: م عايزه اعرف شي كفايه الشفتو
مَهره سكتت م قالت شي ، شَهله مشت جابت البت ورقدتها جنب مَهره ومشت من غير م تقول شي، مَهره عاينت لبتها ومشت يدها ع شعرها واتنهدت وقالت: يارب قوه وصبر من عندك
#يتبع..
