#مني_وإلي❤️
بقلمي:meme mohammed
_21 _
جا داخل وهو شايل البت ولسه بتبكي جات فاطمه وهي متردده شالتها منو اول م شالتها البت سكتت فاطمه انبسطت ودموعها نزلت حضنت البت وبقت تبكي قالت : واخيراً هأسمع كلمه ماما
باستها في خدها وبقت ماسكه يديها وبتهزها ، رفعت راسها عاينت لادهم قالت ليهو: مبسوطه شديد بتنا في حضننا يا ادهم
ادهم ابتسم ليها واكتفى بكدا ختا الشنطه ومشى هو وفاطمه قعدو في الكنبه ، فاطمه حست بشعور غريب قالت ليهو:بتشبهني!!
ادهم حرك راسو بمعنى" اي" فاطمه ابتسمت ليهو وقالت : تفتكر العملناهوو دا غلط؟
ادهم قال ليها بإستغراب:وين الغلط في الموضوع دي بتنا نحن ودا اتفاق بينا
فاطمه قالت ليهو: خايفه ربنا يختبرني فيها
ادهم قال ليها: ماف داعي للكلام الكعب دا هسي ، ودي في الاول والاخير بتنا نحن
فاطمه اتنهدت وعاينت لبتها ومبسوطه لانها معاها وفي حضنها واختلطت مشاعر الامومه مع الحب والامان والدفا وبقت في قمه السعاده واتمنت احساس زي دا م يفارقها ابداً...
في جانب مَهره
عمران قال ليها بإستغراب: في الظروف دي عايزه تسافري؟؟
مَهره حركت راسها وقالت: م عندي شي بيقعدني هنا يا عمران بتي وشالوها مني تاني في شنو
مَهره قعدت تبكي مشت عليها اخت عمران وقعدت جنبها قالت ليها: خلاص هنمشي م تفكري كتير
مَهره رقدت في حضن مَهره اخت عمران وهي بتتنهد ، عمران طلع، واختو بقت قاعده مع مَهره
مَهره قالت ليها: خايفه اقابلهم بعد السنين دي كلها بس محتاجه ليهم شديد
مَهره اخت عمران قالت ليها: هتلاقيهم وهيقيفو معاك صدقيني
مَهره اتنهدت وقالت: ياريتني م جيت هنا
اخت عمران قالت ليها: ختي في بالك انو كل شي بيحصل ليك لخير ف م تتحسري على شي فات وانتهى
مَهره سكتت م قالت شي ، جا الدكتور قال ليهم يطلعو بعد دا ، وفعلا مَهره اخت عمران اتصلت على عمران وجا ساقهم ووصلو الشقه ، دخلو مَهره جوا وهم قعدو في الصاله
مَهره قالت لعمران: حجزت؟
عمران قال ليها: اي
مَهره قالت ليهو: مَهره مسكينه م تستاهل كل دا
عمران قال ليها: مَهره قويه واتحملت حاجات كتيره ماف زول بيقدر يتحملها وانا م هأخليها
مَهره ابتسمت وقالت ليهو: بختها مَهره بيك والله
عمران ابتسم وقال ليها: يا بختي بيكم انتو الاتنين
باس راسها وحضنها
قالت ليهو: هامشي استف لمَهره شنطتها
عمران قال ليها: طيب امشي ، انا هارتاح شويه
مَهره قامت وخلتو سرحان اتنهد و قال"هانت خلاص "
في جانب شَهله
آصِف قعد جنبها وقال:مالك يا شَهله!
شَهله اتنهدت وقالت ليهو: مَهره هتكون زعلانه مني
آصِف قال ليها: م هتكون زعلانه منك لانك م عملتي شي غلط انتي مشيتي ليها وسقتيهم معاك وم شالو البت غصب عنها شالوها بالهداوه ف انتي م تلومي نفسك
شَهله اتنهدت وم قالت شي ، جا كِنان داخل خت مفتاح العربيه والتلفون قال ليهم بإستغراب:مالكم في شنو؟
شَهله سكتت م ردت آصِف قال ليهو: اختك زعلانه عشان صحبتها عايزه تمشي ليها وتراضيها
كِنان قال ليها: قومي طيب البسي هنمشي كلنا
شَهله وهي مخلوعه قالت ليهو: مالك فجأه؟؟
كِنان عاين ليها ورفع حاجبو قال ليها: اغيير رأيي يعني ولا شنو؟
شَهله قامت سريع وقالت ليهو: لالا خلاص ماشه البس
كِنان ضحك وآصِف كمان قال ليهو: كنت عارف م هتخلي اختك زعلانه
كِنان قال ليهو: في النهايه صحبتها
بعد ربع ساعه جات شَهله نازله قالت ليهم: يلا؟؟
آصِف صفر وقال ليها: احلى خطيبه في الدنيا
شَهله ابتسمت ابتسامه خجل كِنان قاال ليهو: شنو يا حبيب قدامي كدا؟
آصِف حك جبهتو وقال باحراج: معقوله ياخ
طلعو التلاته وهم مبسوطين وصلو شقتهم ، خبطو الباب فتح ليهم عمران عاين ليهم كدا وقال ليهم: اهليين اتفضلو
كِنان قال ليهو: تسلم يا حبيبنا
عمران دخلهم الصاله وضيفهم جات مَهره اخت عمران طالعه سلمت عليهم وقعدت شَهله قالت ليها: وين مَهره؟
مَهره اخت عمران قالت ليها: تعبانه شويه قبيل جينا من المستشفى
شَهله بخلعه قالت ليها: ليه مالها؟
عمران قال ليها: م عليها شي الحمدلله بس شويه تعب م قدرت تتحمل فراق بتها
كِنان رفع حاجبو وم قال شي
عمران عاين لكِنان وقال: بكره ان شاء االله راجعين السودان
شَهله قالت ليهم: شنو؟
عمران قال ليها: مَهره قالت عايزه ترجع السودان
شَهله قالت ليهو: كيف يعني انت اقنعتها؟؟
عمران حرك راسو بمعنى"لا" قالت ليهو: الغير رأيها شنو؟
عمران حرك كتفو نظام م عارف وسكت
جاتهم مَهره سلمت عليهم وقعدت
شَهله قالت ليها: ممكن اتكلم معاك كلمتين؟
مَهره حركت راسها واكتفت بالسكوت مشو البلكونه وقعدو
شَهله قالت ليها: م عايزاك تزعلي مني انتي صحبتي واختي ، عملت كدا عشان تسمعيهم عايزين يقولو شنو، وصدقيني انا لمن عملت كدا عشان مصلحتك لاني عارفه نهايتها محاكم وغيرو وادهم ظاهر من طباعو انو عصبي وصعب ، عشان تتخلصي منو عملت كدا وكنت عارفه عمران معاك وم هيخليك عشان كدا جبتهم معاي وعارفه كِنان زعلان حبتين بس هسي شويه بقى راضي بعد اديتيهم بتهم
مَهره عاينت ليها وم قالت شي
شَهله بزعل قالت ليها:عارفاك عايزه ترجعي السودان عشان كل حلولك انتهت وم عايزه شي يذكرك ببتك بس اكيد م هتنسيني صح؟
مَهره عاينت ليها مسافه وحضنتها قالت ليها: م زعلت منك واي شي بيحصل لخير
شَهله قالت ليها: حقك علي
مَهره قالت ليها : حصل خير
شَهله وهي بتبكي قالت ليها: هافقدك
مَهره اكتفت بإبتسامه ، رجعو الاتنين وشَهله كانت مبسوطه كِنان وآصِف ابتسمو ليها
كِنان قال لمَهره:انا اسف عشان حكمت عليك من غير م اسمع منك وقلت كلام م مفروض اقولو
مَهره ابتسمت ليهو وقالت: م مشكله
قضو اخر اوقاات ليهم مع بعض وحاولو يطلعو مَهره من مودها ، بعد مشو عمران جا لمَهره قال ليها: ممكن اتكلم معاك؟
مَهره ابتسمت ليهو قالت: اكيد
عمران قاال ليها: عارفه انك اقوى بت تقابلني في حياتي؟؟ بعدتي عن اهلك واتغربتي وحاولتي تشتغلي عشان تصرفي على نفسك وحاولتي تقيفي براك وكافحتي في دوله انتي م عارفه فيها اي شي واتحملتي تعب سنوات براك!!
مَهره قالت ليهو وهي مستغربه: ليه بتقول كدا؟
عمران قال ليها: عشان باختصار عايزك شريكه لحياتي!
مَهره ابتسمت وقالت ليهو: طيب ممكن لمن نرجع السودان وتلاقي اهلي واسلم على خالتو اسمهان!
عمران سكت مسافه وم قال شي، مَهره بإستغراب قالت ليهو: مالك؟
عمران سريع قال ليها: لالا ماف شي بس بتخيل حياتي كيف هتكون معاك
مَهره ابتسمت وم قالت شي
عمران بقا يغني ليها واشر عليها: انا بيك وليك متاع عيونك مشتهيك مهما تجور بنزف واجيك" اشر بيدو" لا بقسى لا بزعل عليك ،لانك انتَ بتهمني وخايف تفوت والسكه بيك م تلمني وم تلمني
مَهره ابتسمت وقالت ليهو: انت المهم والناس جميع ما تهمني
عمران عاين ليها بكل حب قال ليها: خلي عيونك تضحك دايماً عشان بالي يرتاح يا مَهره
مَهره ابتسمت ليهو وسكتت ، قال ليها: يلا نومي عشان راجيانا طياره الصباح
جات مَهره اختو داخله قالت ليهم: بقيتو خاينين خلاص م بتنادوني اقعد معاكم ليه
عمران قام على حيلو وقال:اسوي ليك شنو كنتي بتتكلمي في البلكونه
مَهره اختو ضحكت وقالت: كنت بتكلم مع خاالتي وبناتها
عمران قال ليها: سمح يلا انتي زاتك اتخمدي مع صحبتك دي انا ماشي
مَهره اختو ومَهره حبيبتو ضحكو فيهو
مَهره قالت لاخت عمران: انتي خالتو اسمهان ليه م بتتصل تتكلم معاي؟ م عارفه ولا شنو؟
مَهره اخت عمران سكتت م قالت شي
مَهره بإستغراب قالت ليها: مالك سكتي؟
مَهره اخت عمران قالت ليها بزعل: امي اتوفت قبل سنه وشويه
مَهره بقت مخلوعه بتعاين ليها بس
قالت ليها: وم توروني انتي وعمران؟ كيف جاكم قلب م توروني عارفينها دي زي امي صح؟؟
مَهره اخت عمران حضنتها وبقت تبكي قالت ليها: عمران م كان عايزني اكلمك عشان وضعك الماره بيهو هسي ونبهني م اكلمك بس احسن تعرفي من هسي بدل ننزل السودان وتتصدمي
مَهره وهي بتبكي قالت ليها: بس كان تكلموني يامَهره
مَهره شالت ليلها كلو بتبكي وبتتذكر في اسمهان وطيبتها
اصبحت الواطه تاني يوم مَهره م نامت زي الناس ، عمران جا خبط الباب فتحت ليهو مَهره عاين ليها مخلوع قال ليها: مالها عيونك محمره كدا
مَهره رجعت تبكي تاني قالت ليهو: ليه م توريني خالتو اتوفت💔
عمران نزل راسو وقال: اوريك كيف واانتي تعبانه ونفسياتك كعبه يا مَهره
مَهره بقت تضربو في كتفو بيدينها الاتنين قالت ليهو: دا م مبرر ليك دي امي وانت عارف كدا
عمران مسك يدها وضماها عليهو قال ليها: اسف اسف حقك علي
مَهره بقت تبكي في حضنو مسافه رفعت راسها وقالت ليهو: اتوفت كيف وليه
عمران بزعل واضح في عيونو قال ليها:ظهر ليها كانسر ولمن اكتشفناهو طلع في مراحلو الاخيره بقت تتعالج وم استجابت للعلاج واتوفت
مَهره مسحت دموعها وقالت ليهو: وانت السكري جاك قبل سنه برضو؟
عمران جراها من يدها وقعدها في الكرسي قال ليها: بعد امي اتوفت كنت براي بس معاي مَهره اختي وحاولت تطلعني من الصدمه الكنت فيها في يوم حسيت نفسي م كويس نهائي ووقعت وكنت براي في البيت مَهره كانت مع بنات خالتي جات لقتني واقع في الارض اتصلت للاسعاف وجو اسعفوني واكتشفت عندي سكري
مَهره وهي بتبكي قالت ليهو: استحملت كل دا براك؟
عمران ابتسم وملامح الحزن في وشو قال ليها: صح فقدان امي كان لي صعب وفقدانك انتي كمان كان صعب بس حاولت استحمل وواقيف على رجلي تاني عشان اختي ، بس دا كلو ولا شي قصاد الانتي استحملتيهو يا مَهره
مَهره دنقرت راسها وختت يدها في وشها وقالت: كنت حاسه في شي وحتى قلت لشَهله كدا بس م كنت قايله خالتو اسمهان اتوفت
وبقت تبكي تاني عمران قال ليها: م تبكي ادعي ليها بالرحمه والمغفره محتاجه لدعاءنا اكتر من اي شي في اللحظه دي
مَهره مسحت دموعها رفعت راسها لقت مَهره اخت عمران واقفه وهي كمان بتبكي مشت عليها وحضنتها عمران قال ليهم: يلا يا بنوتات اجهزو عشان نمشي الزمن قرب خلاص
الاتنين مشو يتجهزو واتحركو مَهره قالت لعمران:ممكن امشي اسلم على خالتو مِسكه؟
عمران قال ليها: ضروري يعني عشان الزمن؟
مَهره قالت ليهو: عليك الله دي وقفت معاي كتير
عمران قال ليها: طيب حاضر
غيرو شارعهم ومشو ليهم
مَهره اول م شافت شَهله سلمت عليها وقالت: اشوفك على خير ياصحبتي
شَهله ابتسمت ليها في عز دموعها وقالت: اكيد م هتنسيني مش؟
مَهره قالت ليها: عيب عليك انتي اختي وصحبتي
شَهله ابتسمت ليها وحضنتها تاني
جات مِسكه ،مَهره طوالي حضنتها وقالت ليها: شكراً على وقفتك معاي وحنيتك كمان
مِسكه حضنتها وقالت: الله يرضى عليك يابتي ويقويك ونتلمى في ساعه خير يارب
مَهره ابتسمت وباست راسها ، مشت على كِنان سلمت عليهو وقالت ليهو: كنت الاخو والصاحب وهتفضل كدا دايماً، ربنا يوفقك ويسعدك يا صحبي
كِنان ابتسم ليها وقال:نتلاقى على خير ان شاء الله
آصِف قال ليها: شنو لكن م هتسلمي علي
مَهره ابتسمت ومشت عليهو قالت ليهو: انت م هتبطل روشنتك دي
آصِف قال ليها: اخليها لمنو لكن
مَهره ضحكت سلمت عليهو وقالت: خلي بالك من شَهله ختها في عيونك
آصِف قال ليها:م توصي حريص ، انتي الخلي بالك من نفسك
اشر على عمران وقال: الزول دا بحبك شديد عارفو هيخلي بالو منك
مَهره عاينت لعمران وابتسمت ليهو ، قالت ليهم:في امان الله
مَهره وعمران طلعو ومشو على المطار
قبل يدخلو المطار مَهره سمعت صوت ادهم بيناديها التفتت مخلوعه قالت ليهو:ادهم!!
ادهم جاها ومعاهو فاطمه وهي شايله البت، مَهره بقت واقفه بتعاين ليهم ، فاطمه قالت ليها:حقك علي
مَهره م قالت شي ، فاطمه ادتها البت وقالت ليها: م نفسك تودعيها!!
عمران م كان عاجبو الموضوع عشان م تتعلق بيها تاني ونفسياتها تتعب قال لمَهره: يلا!!!
مَهره عاينت ليهو وعاينت للبت مشت عليها وشالتها عاينت ليها باستها وحضنتها مَهره دموعها نزلت عمران قال ليها: يلا يا مَهره الزمن
مَهره ادتها لفاطمه وعاينت لادهم وقالت ليهم: العفو والعافيه وخلو بالكم منها
مشت من غير م تسمع منهم شي ، التلاته خلصو الاجراءات ودخلو صاله الانتظار ومَهره سرحانه وقاعده وعمران بيعاين بعيونو بس بعد ركبو الطياره مَهره كانت جنب الشباك وجنبها مَهره اخت عمران اتنهدت وابتسمت قالت بينها وبين نفسها " لسه في العمر في حكايات باقيه وابداً دي م النهايه اكيد دي البدايه ❤️"
#يتبع...
