ချစ်ခြင်း၌ တစ်ဖက်သတ်ငြိတွယ်မှု [Completed]

အပိုင်း(၄)

ဆိုင်မှအပြန်တွင် လင်းထွဋ်သော် Mart ကိုဝင်၍
အိမ်အတွက်ဝယ်စရာရှိသည်များကို
ဝယ်သည်။ လင်းထွဋ်သော်က
တစ်ယောက်တည်းနေသော်လည်း
အပြင်စာအမြဲစားတာမျိုးမဟုတ်ဘဲ
အိမ်မှာလည်းကိုယ်တိုင် ချက်စားဖြစ်တာကြောင့်
ဟင်းသီးဟင်းရွက်နဲ့ အသား၊ငါးကိုလည်း
တစ်ပတ်စာမျှ ကြည့်ဝယ်ခဲ့လိုက်၏။

ထို့ပြင် အပြန်တွင် စာအုပ်ဆိုင်သို့ဝင်ကာ
စာအုပ်လည်း ဝင်ဝယ်ခဲ့သေးသည်။
မြတ်သွင်တို့နဲ့ တွေ့တာနဲ့ ၊ ဆိုင်သွားတာကလွဲ လင်းထွဋ်သော်က အပြင်သိပ်မထွက်တတ်။
အိမ်မှာသာ ဇာတ်ကားကြည့်လိုက် ၊
အိမ်အလုပ်လုပ်လိုက်၊စာအုပ်ဖတ်လိုက်ဖြင့် အေးအေးဆေးဆေးနေတတ်သူဖြစ်သည်။

အိမ်ပြန်ရောက်သည့်အခါ  အရင်ဆုံး
ညစာအတွက် လွယ်ကူပြည့်စုံသည့်
ဟင်းလျာဖြစ်သည့် အသားနဲ့
အရွက်တစ်မျိုးကို ရောကြော်လိုက်သည်။
ထမင်းကတော့ မနက်က တစ်ခါတည်း
ညမနက်စာချက်ခဲ့၍ ပြန်ချက်စရာမလို။

ညစာပြင်ပြီးသည့်အခါ ဆေးကြောသန့်စင်စရာ
ရှိသည်များကို သန့်စင်ပြီး သူကိုယ်တိုင်လည်း ရေချိုးအဝတ်အစားလဲရန်အတွက်
အိပ်ခန်းထဲသို့ ဝင်လာလိုက်ပါတော့သည်။

လင်းထွဋ်သော်၏ နေ့ရက်များသည်
ရိုးရှင်းသည်။အပြောင်းအလဲ အတက်အကျမရှိ။
သို့သော် သူ့အတွက် နေသားတကျ
ရှိနေခဲ့ပါသည်။

~

ညစာစားပြီးနောက်တွင်မူ ည ၉ နာရီခန့် ရှိပေပြီ။ အိပ်ရာပေါ်လှဲမနေချင်သေးတာကြောင့်
လင်းထွဋ်သော် TV ရှေ့ထိုင်ကာ
ဇာတ်ကားတစ်ကားဖွင့်ကြည့်လိုက်၏။

TV ကြည့်နေရင်းဖြင့်
တစ်ဖက်မှလည်း ဖုန်းကို သုံးမိနစ်ခြား၊
ငါးမိနစ်ခြား တစ်ခါဆိုသလို ကြည့်နေမိသည်။

ဘယ်သူနဲ့မှ စကားမပြော၍
notification သိပ်မတက်တတ်သည့်
သူ့ဖုန်းကို ဘာလို့ ဒီနေ့ကျမှ သူဒီလောက်ထိ
ဖွင့်ကြည့်နေမိတာလဲ
သူ့ကိုယ်သူလည်း နားမလည်နိုင်။