ချစ်ခြင်း၌ တစ်ဖက်သတ်ငြိတွယ်မှု [Completed]

အပိုင်း(၇)

'မအိပ်သေးဘူးလား'

လင်းထွဋ်သော် Facebook တွင်
တက်လာသည့် Video တွေကို
ကြည့်နေချိန် ည ၁ နာရီမှာ ဝင်လာခဲ့သည့်
စိုင်းစစ်သွေးမာန်ဆီမှ message ကြောင့်
တစ်ချက်ပြုံးလိုက်မိပြီးမှ reply ပြန်လိုက်သည်။

ခုနကအထိ သူသွားကြည့်မိတုန်းက active now
မဖြစ်သေးတာမို့ အခုမှ လိုင်းတက်လာသည်
ဖြစ်မည်။

'အိပ်ပျော်အောင် video တွေ
လျှောက်ကြည့်နေတာ။'

လင်းထွဋ်သော်ပို့လိုက်သည့် message
လေးက Seen ဖြစ်သွားသည်။

သို့သော် reply အစား စိုင်းစစ်သွေးမာန်ဆီမှ
Ph Call လေးဝင်လာခဲ့၏။

လင်းထွဋ်သော်သည် အိပ်ရာထက်တွင်
ခွေခွေလေးအိပ်နေရာမှ
ထထိုင်လိုက်ပြီး အသံကိုလည်း
အိပ်ချင်မူးတူး ဗလုံးဗထွေးဖြစ်မနေအောင်
ချောင်းကို ခပ်တိုးတိုးဟန့်သည်။

ထို့နောက်မှ ဖုန်းကိုင်လိုက်၏။

"ဖုန်းကိုင်ဖို့ကြာလိုက်တာကွာ။
ဘာတွေလုပ်နေတာလဲ"

"ဘာမှမလုပ်ပါဘူး။ လှဲနေလို့လေ ။
အဲ့ဒါထထိုင်နေတာ"

"ဘယ်အချိန်အိပ်မှာလဲ"

"ခဏနေရင်အိပ်တော့မယ်။ မင်းရော.."

"မအိပ်သေးဘူး။
အလုပ်လုပ်စရာနည်းနည်းကျန်သေးလို့"

"ညနက်တဲ့အထိ
အလုပ်တွေလုပ်တာမကောင်းဘူး။
နားချိန်သတ်သတ်မှတ်မှတ်လေးရှိသင့်တယ်။
Screen time တွေအရမ်းများရင်လဲ
ကြာရင် မျက်စိပျက်လိမ့်မယ်"

"ဘာလဲ။ စိတ်ပူတာလား"

ထိုမေးခွန်းကိုမဖြေဘဲ
လင်းထွဋ်သော်တိတ်နေလိုက်သည့်အခါ
စိုင်းစစ်သွေးမာန်က တစ်ချက်ရယ်သည်။

"ဖြေလေကွာ။ စိတ်ပူလို့လားလို့"

"စဉ်းစားပေါ့ ကိုယ့်ဟာကိုယ်"

"မစဉ်းစားတတ်ဘူး။
ငါက ဉာဏ်မကောင်းဘူး"

"ဟွန်း။ လျှောက်ပြောနေတယ်..။
ဉာဏ်မကောင်းတဲ့သူက
Australiaမှာဘွဲ့ရခဲ့တယ်ပေါ့.."