لو أنت عزيزي المتابع قرأت الاعلان السابق فكمل اللي هقوله، لو مقرأتش هتلاقيني نزلت قبل ده بالضبط فصل تحت عنوان ( اعلان هام) رجاءً اقرأه وتعالى تاني عشان كل شيء يكون واضح .
طبعا انا قولت فوق بكامل الاسف أن ما بين الألف باقي ليها خمس أو ست فصول، وده شيء أحزنني قبلكم لأني بالفعل تعلقت بصالح وصلاح وميمو ورانيا وجميع الابطال، ويعز عليا فراقهم كما باقي الابطال .
لكن كما هي العادة لن تنتهي رواية إلا وأنتم راضون يا شباب وده شيء تأكدوا منه (｡♡‿♡｡)
نيجي لتوضيح هام واللي عشانه نزلت كل ده ...
البعض في التعليقات رشح الفصحى الكاملة لأنهم قد يكونوا عرب غير مصريين وحابين لهجة مفهومة للكل، والبعض من المصريين حبوا الفصحى لأنهم متعودين عليها.
والبعض ممكن يكون غير معتاد على الحوار الفصحى، وقد يشعر بالغرابة لقراءة حوار بين بعض الابطال بغير العامية، لكن يا عزيزي سبق لك وأن قرأت الاحفاد ..
هل في يوم شعرتم أثناء قراءة رواية الاحفاد لحوار فصحى بينهم أنها ثقيلة، أو إن الفصحى قال من الكوميديا مثلا او جمال الحوار ؟؟ معتقدش، فليه البعض مش حابب الحوار فصحى ؟! صدقوني هيكون ممتع جدا ومش هتحسوا بشيء .
طب سؤال ( هل يا رحمة جميع رواياتك هتكون سرد وحوار فصحى ؟؟)
لا يا قلبي ابدا، بدليل اني بنزل ما بين الألف عامية، لكن الفكرة إن بعض التصنيفات مينفعش يكون معاها حوار عامي وإلا هكون بعك على الاخر، زي مثلا لو الرواية غربي ومافيا ( هل ينفع اخلي مثلا بطل امريكي يتكلم عامية مصرية أو بطل روسي يقلش بالمصري ؟؟ ) ده غير واقعي بالمرة، فهنا التصنيف أجبرني اكتب حوار فصحى، اللهم وإلا في حالة دخول شخصية مصرية على الرواية هيكون فيه بعض العامية ليس إلا.
واه للعلم يعني مش هتكون نفس اسلوب الاحفاد، يعني اكيد مش هجيب قرايب بنفس الشخصيات وهكذا، لأن مش هكرر نفسي في المافيا، بس اوعدكم في ابهار وشخصيات جديدة بالكامل ولخداث خاطفة للانفاس ومين عارف يمكن يجي اللي يكون بمنزلة الاحفاد عندكم أو يزيد، ربما ......
وكمان الروايات الفانتازيا اللي بيكون الابطال من عوالم مختلفة، مينفعش يكون شخص من برة الكوكب مثلا او كائن خرافي واخليه يتكلم عامية، برضو غير واقعي .
عدا ذلك فأنا جميع رواياتي معروفة ( سرد فصحى حوار عامي )
طب ايه اللي هيحصل ؟؟؟
أنا بعد انتهاء ما بين الألف وكوز الذرة _ للاسف تاني _ هنزل ليكم مجموعة اقتباسات مشوقة، لكل رواية اقتباس، وأنت عزيزي القارئ الجميل هتقرأ الاقتباس وتستمتع وتجري تشوف الرواية هتكون ماشية ازاي وتقولي عجبك ايه أكثر .
وتاني بقول جميع الأفكار هتتنفذ وجميع الروايات هتنزل ونستمتع بيها سوا واحنا مع بعض باذن الله، الفكرة كلها هنبدأ بإيه مش اكثر ..
وده كان توضيح ودردشة خفيفة، لأجل محدش يزعل أو غيره .
وصدقوني أنا لا يعنيني شيء سوى سعادتكم وبسمتكم...
وعايزاكم تثقوا إن أي نوع هكتبه وهينزل هيعجبكم وهفاجئكم فيه بعالم تاني يسحبنا كلنا ليه، وصدقوني أنتم لم تروا شيئًا بعد ....
دمتم سالمين .
رحمة نبيل
أنت تقرأ
ما بين الألف وكوز الذرة (مكتملة )
Adventureثم ؟! أتُراكَ تدري ما الفرق بينهما ؟! أقصد بين ( الألِف) و (كوز الذرة ) عدا أن الأول أحد حروف الهجاء والآخر نوع من أنواع النباتات ؟! لا علاقة بينهما صحيح ؟! هذا ما بدر لذهنك في التو ولا داعي لهز رأسك رفضًا، فأنا أعلم ردة فعل الجميع حينما يتم طرح ذلك...
