هاجسي وافكاري شاغلها غرامه

Part 11

بارت طويييل وبمناسبة الويكند

--------------------------

ماكان يخفى نوره حوار بنات اختها مع اريام عنها كانت واقفه ورا الباب تسمعهم وهم يتكلمون عنها

ابتسمت نوره بسخريه وهي مغمضه عينها تفكر كيف ان حتى اقرب الناس لها يتكلمون عن شرفها ويتهمونها بالخيانه وهم يعرفون حتى بادق مشاعرها

وسعت عيونها وهي تتنهد تهمس لنفسها:"وشلون الغريب يفكر فيني اجل ؟"

خرجت نوره من الغرفه وهي تمحي ملامح الكدر من وجهها وتزرع ابتسامه على وجهها

بلعت مشاعل ريقها بعد ما شافت خالتها خافت انها سمعتها وهي تتهمها بالخيانه  كونها غدرت في زيد واختارت فهد عليه

ناظرت نوره في مشاعل وهي رافعه حاجبها وقالت:"شفيك خايفه؟ ماراح اسوي لك شي في النهايه انتي صغيره وتسمعين هذا الكلام من امك"

نفت مشاعل براسها وهي تقول:"لا امي ماتقوله"

ضحكت نوره بسخريه وقاطعتها تقول:"ما اعرف ليش دايم يقولون عني خنت زيد ويحسسوني انه شخض مظلوم وطيب واني انا الشخص الشرير في القصه كلها مو ضحيه"

استغربت اريام من ردة فعل نوره توقعت انها بتهاوش او تخرج تصرخ بس دخلت عليهم وهي تضحك وكانها مو مهتمه للموضوع

نثرت نوره شعرها بغرور وهي تسمع  مشاعل اللي نطقت بخوف تقول  لخالتها :" بس ياخاله انتي خنتيه صدق مع فهد زوجك"

التفتت نوره على مشاعل ترد عليها بتهجم :"انا كنت احب فهد من قبل لا يغصبوني اهلي على  زيد ويبلشوني فيه حتى امك كانت تدري بحبي لفهد هي اكثر شخص كان يعرف بمشاعري له"

رفعت اريام حاجبها باستغراب بعد ما التفتت نوره عليها تقول:" لا تصدقينهم ترى انا ما خنت ابوك"

ضحكت نوره بسخريه وكملت كلامها تقول:" ابوك هو اللي استغل ان اهلي ماعندهم شي والفقر ماكلهم اكل كان عارف انه بيعميهم بالفلوس  وبيوافقون عليه هو اللي ظلمني معه  "

سالتها اريام بفضول :"شلون استغلك ابوي"

حطت نوره راسها تحت كف ايدها وهي ترجع ظهرها على الكنب تتكي عليه بمرفقها وهي تقول:" من يوم كنت صغيره كنت احب فهد  ولد جيرانا كانو اهلي واعدينه اني له بس ابوك دمر كل شي "

غمضت نوره عيونها وهي تسترجع المشهد بعقلها وقالت:" وقتها ابوك كان جاي يزور واحد من اخواني في بيتنا وكنت انا توني جايه من عند الجيران من لحظتها حطني في باله لين حقق مناه واخذني"