هاجسي وافكاري شاغلها غرامه

Part 26

بارت خفيف مو لطيف تفاعلو بالتعليقات وكذا ونشوفكم البارت الجاي ان شاء الله

على اساس اكتب احداث يوم جديد بس مدري شفيني علقت في نفس اليوم

-----------------------------------------

ومن بعد ماوردوا الضيوف على العشاء جلس سعود على يمين ماجد اللي كان مكتف ايدينه وهو يناظر في صحن الرز واللحم اللي كان قدامه على السفره

بدء سعود ياكل بشراهه وهو راسم الابتسامه على وجهه يستفز فيها ماجد اللي عض لسانه وهو يهمس:" شوي شوي مابتطير اللحمه فضحتنا قدام الخلق يا المفجوع"

ضحك سعود وهو مكمل ياكل باصابعه الخمس :"مايهذري المهذري الا من حر السخونه"

عض ماجد على شفايفه وهو ويتربع ويناظر في سعود اللي كان يصدر اصوات وهو يتلذذ بطريقة اكله يحاول انه يستفز فيها ماجد

حط ماجد يده على اللحم يقطع لنفسه وهو يسمي ويقول:"بغامر واكل ويصير اللي يصير"

وسع سعود عينه وهو ينثر الرز واللحم من بين اصابع ماجد:" صاحي انت لا تاكل تحسب ماعندي شغله الا انت قسم بالله لو جاك شي ما اتنوم معك"

ابتسم ماجد وهو يغمز وقال :"ياعمري انت خايف علي عندي جفاف بالله حبني بس بدون غزل بدوخ عليك"

ضحك سعود بسخريه:" الله يخلف بس"

ناظر ماجد في لقمة سعود بعد ما رجع ياكل تحت عيون ماجد اللي قال:"بقى شوي للضيوف كلت الدنيا مقلوب"

غص سعود بلقمته وعطاه ماجد مويه وهو يضحك بعد ماقال سعود له بهمس:" قوم الله يقلعك خلني اعشيك قبل لا تعشي الناس علي من عيونك يا الحسود"

قام سعود من على السفره وهو ينفض ايدينه من الرز ويرمي بمفتاحه وجواله على ماجد اللي كان يلحقه وهو يسمعه يقول له:" بغسل واجي"

رجع سعود يلتفت على ماجد يقول:" لو ركبت السياره ولقيتك مشغل وحده من شيلاتك دفنتك تسمع "

لقط ماجد المفتاح وهو مستمر يضحك:"لا تحوي بس وانت تغسل"

ركب ماجد السياره وهو يقلب في جوال سعود يدور في الارقام على رقم الترف كانت عيونه في نفس اللحظه على المغاسل اللي قدامه يراقب سعود اللي كان واقف بينها يغسل يدينه

اتصل ماجد على رقم الترف اللي وصله صوتها وهي تقول:" اهلين سعود"

ماجد:" منب سعود انا ماجد"

تغيرت نبرة الترف بعد ماكشرت وجهها وهي تتافف:" وع وش تبي"

ماجد:"لازم يعني تسفلين فيني ماتعرفين تردين بادب؟"