سَهيتْ بنظِرة عيونك واثّاري هالعيونُ بلاد

Part 11

طلعت جوري للمواقف تفتح السياره وتأخذ الشاحن ، جمدت بمكانها من شافت زيد خلفها : وجع !
تقدم زيد لها بخطوات بطيئه ونطق : اضبطي لسانك يابنت عبدالله
جوري بغضب : واذا ماضبطته ؟ وش تبي انت خير ارجع ورا احسن لك
زيد : واذا مارجعت ؟
جوري : بيصير لك شي عمرك ماشفته
زيد : خفت
مشت تتخطاه بس استوقفها من مسك ذِراعها يسحبها له بقوه : قريب بتصيرين حُرمي! اعقلي وخليك هاجده معي احسن لك
حاولت تسحب إيدها بوجع : تخسى فاحلامك
شد على ايدها بغضب وهي تصرخ : فك اييدي ياحقييير
طلع سِراج على صراخها وهو يشوف قبضة زيد على ذِراعها فقد اعصابه يتوجه له بغضب عمى عيونه ، يمسكه من رقبته يخنقه بكل قوته ، يلكمه الين يتوسد الأرض تحت أنظارها بخوف ، ويجي فوقه يلكمه مره ثانيه بصراخ ينطق : ياكلبب هاذي اخر مره اشوفك تحوم حولها فااهم ؟ ايدك اكسرها لو تلمسها
نطقت جوري بخوف وهي تمسك كتفه : خلص سِراج تكفى خله
سِراج وهو لازال مستمر بلكمه : يخسى اخليه مين هو عشااان يمد ايده عليك مييين !
جوري وهي تسحبه : خلص خلص بيطلع ابوووي تكفى خله
طلع أيّهم وهو يتقدم يسحب سِراج عنه : شبلاك انت وش صار ؟؟
رجع سِراج عنه بعد ماسحبه أيهم وهو يسحب جوري خلفه : هالكلب اكسر له يده لو يمدها ثاني مره
أيهم : خلص اهدأ
تقدم أيهم لزيد وهو يقومه : قم انت مافيك الا العافيه رح بيتكم يلا
قام زيد بغضب ويحس بدوران براسه : هيين ياسِراج
سِراج : فارق
توجه سِراج لجوري يمسك كفوفها : جاك شي منه؟ اوجعك؟
هزت رأسها بـ لا تتوجه للداخل بدموعها اللي ملت عيونها وشافها
أيهم : شفيك انت وش صاير لك ؟
سِراج : الحقير ذا خطب جوري له وعمي عبدالله وافق تخييل!
أيهم : ايش ؟
سِراج : الي سمعته لكن وربي يحلم تكون له يحلم لاأكفر فييه
أيهم خلص الحين اهجد وبعدين تقول لي السالفه بالتفصيل
دخلو يتوجهون للمجلس..
-
عند البنات ~
ارجوان : وربي الفرحه مو سايعتني يابنات واخيراً بنرجع للديره مو مصدقه!
جنى : اي والله واخيرا احس اشتقت اشتقت هنا مافي فعاليات زي هناك
دُرر : تدرون يابنات انا مبسوطه لاننا بنرجع عشان افتك من هموم ابوي وزوجته
وداد : من ذي الناحيه حتى انا مبسّوطه معاك
شهد : بس ماننكر المدينه احلى!
ارجوان : حلوه مظهر بس ! نبي الديره احنا فعاليات وكشتات وهواشات وفعاليات هناك صدق
ريم : تبين اقوم انتف شعرك هنا عادي ترا
ارجوان : انتي اهجدي يالبزره
ريم : ياي انتي الكبيره
ليال : يابنات احلى شي اننا بنسكن في بيت واحد
ارجوان : منجددد
-
فالصاله عند الحريم ~
سارة : وش جاب طاري الرجعه يا امي فجأه ؟
فهده : والله مادري يابنيتي بس انا مبسوطه اننا بنرجع لديرتنا ومكاننا وناسنا
ريهام : اي والله الحمدلله على ذي الايام
هيفاء : انا ما اسعدني الا شوفة عيالنا مبسوطين
هناء : اي والله صادقه
فهده : ان شاءالله نشوف ايام حلوه اكثر
سارة : امين
-
فالبر ~
فيصل بتنهيده : شرير وثقيل نوم!
صحى يزيد على غثى فيصل : وش بلاك علي انت؟
فيصل : اشرقت شمسك تو الناس اقول صحصح صحصح ماعندي ناس ينامون لذا الوقت!
يزيد : اقول اذلف عني خلني انام وارتاح
فيصل : بعطيك ربع ساعه اوكل النيّاق واجيك
يزيد : توكل توكل
-
عند البنـات ~
سوالفهم وضحكهم وحشهم المستمر اللي مايخلص دخلت ليال وهي شايله الشبسات والمشروبات وحطتها وجلست
ليال : بنات الحين جدي قال بيجمعنا عشان يقولنا بخبر الديره وخلصنا منه ليه يقول لنا اجلسو الين الليل بيجون ضيوف ! اي ضيوف ؟
جنىٰ : مادري الصراحه
دُرر : جدي ضيوفه كثير ودايم يزورونه يمكن ذي المره ارجوان تعرف
ارجوان : للاسف نو
ريم : خلصونا وش نلبس طيب ؟
وداد : عن نفسي مادري بقوم اشوف اغراضي لسى
ارجوان بمقاطعه لسرحان جوري : وانتي جوري ؟
التفت جوري بفهاوه : وش
ارجوان : وش بتلبسين؟
جوري : عشان ؟
ارجوان : واضح مو معانا بيجون اليوم ضيوف جدي وش نلبس
جوري : مادري مالي خلق لشي انا اساساً يمكن اطلع انام
ارجوان ماحبت تضغط عليها : الي يريحك
ارجوان  : اجل قومو يلا شوفو و وروني وش عندكم
ليال : تمتم
-
فالليل فالمجلس ~
ثنيان : هياف!
هياف : سم
ثنيان : شفت زيد وينه ؟
هياف : لا
طلع ثنيان يعيد محاولة الاتصال فيه وبعد دقايق رد
زيد : سم
ثنيان : وينك انت اختفيت من الظهر!
زيد : رجعت البيت
ثنيان : وليه ترجع؟
زيد : يبه حسيتني تعبان ومالي خلق شي ومنوم وو ، قلت ارجع ارتاح
ثنيان : متأكد مافي شي ثاني؟
زيد : لا
ثنيان : على خير ان شاءالله
..
بالليل اجتمع الكل وصار المجلس كِله فوضى وازعاج والكل يتكلم والعيال مندمجين بسوالفهم وضحكهم العالي ومناقراتهم لبعض، و بوسط الفوضى
نطق عزام لخالـد : وش أخبار الأعمال ؟
خالد : ابد على نفس الشغل مستمرين والاوضاع طيبه
سلطان : انا بجي للشركه بذي اليومين
خالد : تشرّفنا
بعد ثواني من السـوالف الطويله اللي دارت بينهم ، دق جوال هياف وهو يحس بأهتزازته بجيبه ، طلعه وهو يشوف الأسم وتتوسع أبتسامه خفيفه منه ، قام يتوجه للخارج بس أستوقفه من نطق مهند : على وين ؟
هياف : عندي مكالمه شوي وأجي
طلع للمواقف ويرد : هلا بروح هياف
وريف : روح هياف زعلانه من هياف
هياف : افا ! وش مزعلها ؟
وريف : هياف
هياف : وش سوا ؟
وريف : مايقول عنده وريف ويدق يتطمن عليها ولا يسأل ما يحبها هو ايوه ايوه ما يحبها
أردف بضحكه خفيفه تطرب مسامعها : الا أحبها
وريف : هياف
هياف : سمي ياعيونه
وريف : كلمت أبوي وقال لسى بيطولون اسبوع زياده والله مليت والبيت موترني وانا لحالي يخوف!
نطق بعد ثواني من التفكير : تجهزي نص ساعه وجايك
وريف : وش بتجي ليه مو حلا ترا ؟!
هياف : جايّك
قفل المكالمه يتوجه للسياره يركب ويدق على أرجوان تأخذ عبايتها وتجيه ،
طلعت أرجوان بخرشه من دق وقال لها شيلي عبايتك وتعالي السياره ، فتحت الباب وهي تركب : بسسم الله وش فيييه
هياف : شفييك؟
أرجوان : انتتت الي شفيك تخررش وش الي تعالي وش صار
هياف : مافي شي أبيك بشغله
أرجوان : ياخي تخرش انت وش شغلته بعد؟
هياف : أرجوان انا بقولك وأبيك تفهميني وماتقولين لحد
أرجوان : وش من مصيبه مسوي وليه هنا نتكلم
هياف : مو مصيبه بنروح مكان
أرجوان : ياخي تكلم بسررعه لا تمهد قاعد توترني!
هياف : صبر صبررر اسكتي خلص شوي شوي
أرجوان : يلا
نطق هياف دفعه وحده بكلامه : انا أحب وريف بنت فارس الي بالحيّ الثاني وهي تحبني وانا شاريّها على سنة الله ورسوله وأبيها ، منتظر بس فترة تكون الأوضاع فيها تمام وأخطبها ، والحين أبيك تروحين معي نجيبها معنا هنا للبيت أهلها مسافرين وهي وحدها مابجيبها وحدي عشان مايشوفنا أحد بس بجيبها وعلى أساس صديقتك وبتزورك وجبناها سوي مليون كذبه تمام أهم شي البنت تكون هنا معانا وتحت أنظااري!
كانت أرجوان تحت تأثير الصدمة فعلاً وهي مبتسّمه له بعدم أستيعاب من هياف واللي بباله : هاااه ! ورييف وريف؟
هياف : تعرفيها؟
أرجوان : انت تحب منجد ؟
هياف : وش شايفتني المهم خلص وش قلتي انا جيتك انتي ابيك تمشين معي الأمور
أرجوان : بمشي معك الأمور بس بعد ما تنتهي هالليله بجلس معك جلسه بتكون طويييله حيل
أبتسم هياف يهز رأسه وهو يحرك سيارته لبيت وريـف ..
-
بالحوش ~
طلع آسر للمواقف يدق على ريم يأخذ طلباتها
آسر : وش تبين؟
ريم : برسل لك اغراض المكتبه بالواتس بعد ماتخلص عزيمة جدي روح لها
آسر : تمام
نزل جواله وهو يناظر مهند يأشر له من بعيد ويبتسم ، وسع عيونه من شاف الكودرد حقه معاه ونطق بصوت عالي : يااويلك لو يطلع حقي
مهند وهو يشرب منه ويضحك باستهزاء : خلف الدجاج ها
رفع آسر ثوبه يطرده بس وقف من شافه يتوجه للمجلس ويدخل ، زفر بطفح ما يخبي شي الا ويأخذونه ، ألتف يتوجه للمطبخ لأجل يتفقد الكودرد الثاني ، دخل بخطوات ثقيله عشان يتأكد المطبخ مافيه احد وأبتسم من تأكد وهو يستعجل ويفتح الثلاجه يجلس أمامها يدور ويدعي بصوت شوي مرتقع : يارب ألقاه يااارب
توسعت أبتسامته من لقاه وانبسط على الاخر بس مازال بطنه يوجعه على الي اخذه مهند ، قام يتنفض ويقفل أبواب الثلاجه بيخرج بس وقف من صدمت فيه بزيِنتها ، وريحة عطرها اللي أنتشرت بالمطبخ ودخلت بنخاع رأسه ، تبنج بمكانه من أردفت هي بوجع بكتفها ونطقت بصوت عالي : اخخخ
وقفت بصدمه قدامه ولا قدرت تتحرك شِبر من التوتر اللي صابها ،  ماقدر يشيل عينه عن حلاوّة وجهها وبرائته ، لمعت عيونه بذهول من جمالها ، حفظ تفاصيل وجهها بدون مايرمش ، وهي بالمثّل مو قادره توصف توترها ورجفتها اللي صابتها بكفها من قرّبه ، من توترهم ببعض أخذهم الصمت و النظرات لثواني من قاطعتهم سحر وهي تنادي بصوت عالي : جنى يا بنت
صدت تركض بخوف للخارج تحت أنظاره ، تحت تأثير إنعجابه بعيونها ، طلع يتوجه للحوش وهو يحلف بنفسه ماقد حركته بنت زيِها ، ويكرر أسمها وهو يمشي متوجه للمجلس ببتسامه عريضه والكودرد لازال في يِده : جنى بنت ثنيـان ، جنى بنت ثنيـان ،
-
بالمجلس عند عبدالله وثنيـان تحت أنظار سِراج اللي مراقبهم نطق ثنيان : أقول عبدالله
عبدالله : سم
ثنيان : متى تبينا نتكلم بباقي التفاصيل ونحدد الخطبه؟
عبدالله : ان شاءالله الخطبه تتم بكره او بعده والزواج نتكلم فيه بعد ما نرجع الديره
ثنيان : على خير ان شاءالله
أكلهم سِراج بنظراته وهو متأكد انهم يتهامسون عشان موضوع جوري ، لِمحه سلطان ونطق : سراج
ألتفت له بهدوء : سم
سلطان : أيهم وينه؟
سِراج : راح يرتاح يقول ببيته وراه شغل
سلطان : زين زين
-
فالسيـاره قدام بيت وريف ~
طلعت وريف بهدوء وتصلبت عظامها من شافت بنت راكبه معاه ، أشر لها بيده بمعنى تعالي ، تقدمت بخطوات تردد وهي تركب ورا وبرأسها مليون سؤال و سؤال مين البنت ، ألتفت لها هياف : هلا والله
ضربته أرجوان : استح
ألتفت لها : هلللاا والله ياوريف
وريف كانت مكتفيه بالنظرات بس من الصدمه ، حس فيها هياف انها مو فاهمه شي ورجفة ايدها باينه ، نطق بهدوء وهو لاف لها : ذي أرجوان اختي وجايبها عشان تأخذك معانا البيت وتدخلين تسولفين مع البنات وتكونين معاهم على أنك صديقتها ووو .. احنا مضبطين الامور لاتتوترين واذا بغيتي شي ارسليلي واتس تمام؟
نطقت وريف : بـ..
قاطعتها أرجوان : خلاص جايه معانا جايه وش قعدك بالبيت لحالك! ومنها يتطمن حبيب القلب وهي تطبطب على كتف هياف
أبتسم هياف لها ونطقت وريف بحياء : تسلمين
مشى هياف متوجه لبيتهم ، وبكل مره يلتفت عشان يشوف وريف تضربه أرجوان بصراخ : غض بصرررك عن البنت وانتبه للطريق لاتنسى انا موجوده لاتسوي حركااات!
بعد دقايق نطقت أرجوان : ايوا اشرحولي
هياف : وش نشرح؟
أرجوان : كيف تعرفتو على بعض ومن متى ؟
هياف : خصوصيات!
أرجوان : وش خصوصياته انت بعد
هياف : خلص بعدين وريفي تقولك
أرجوان : قول وريف عييب
هياف بعناد : وريفي
أبتسمت وريف بُحب لمناقرات هياف وأرجوان طول الطريق وهي تضحك عليهم..