مكان لا انتمي له ( سعودي في أمريكا )

غموض مارينا ....part 4

بعد مرور ١٥ دقيقه من المشي وصلت البيت و كانت الساعه تقريبا

٣:٤٥ الظهر

فتحت الباب و رحت للصاله علشان اسولف مع امي زي ما وعدتها

و مثل ما توقعت لقيت امي قاعده تشوف تلفزيون ....

: السلام عليكم .... تراي رجعت

امي : وعليكم السلام اهلًا اهلًا .... ايه اخيرا جيت تعال جمبي جمبي

: خليني اتوقع ..... تبيني اسولف لك عن اول يوم لي في المدرسه صح ؟

امي : و يبيلها تفكير ..... اكيد ايه

و جلست جمب امي و قلت : اجل يله بِسْم الله نبدأ

( مستحيل اقولها كل شي صار اليوم .... امي و اعرفها زين وما ابيها تقلق .... ما لي خيار غير اني اكذب )

ما لقيت خيار عندي غير اني اكذب ....... و قلت

: اليوم كان جدا عادي ... دخلت المدرسه و جلست في فصلي و كان يوم جدا ميت .... و بما انه اول يوم كل الفصل يجتمعون و يتغدون برا و هذا الي انا سويته طلعت و تغديت معاهم

امي : حلو شكل الفصل علاقتهم كويسه و مترابطين مع بعظ

: ايه نعم

امي : يلا ابوك شوي و يجي خل اجهز الغدا

: لا لا ابد تغديت برا البيت و جدا شبعان .... بروح انام ما نمت زين و دايخ ما اشوف طريقي

: خلاص اجل براحتك

: الا يمه وين فرح ؟ صاير نادرا ما أشوفها

: فرح ... اخ يا فرح اختك و تعرفها زين اربعه و عشرين ساعه مسكره على نفسها الغرفه و ترسم

: اها ... اجل بروح اسولف معاها من زمان ما شفتها زين

و رقيت فوق لغرفة فرح و طقيت باب غرفتها

فرح : ادخل

فتحت الباب و لقيت نفس المنظر الي تعودت اشوفه .... الوحه قدامها و فرشة الرسم بيدها و ترسم

ناظرتني و قالت فهد !!! الحمدلله على السلامه ما بغيت ترجع ما صارت مدرسه

: ليش ما قالت لك امي

تركت فرشت الرسم و لألوان على جمب و قامت تضحك و قالت : لا تخاف قالت لي ..... من زمان عنك سولف لي ... كيف كانت الطلعه و كيف كان اول يوم

( انا ما اعتدت أخبي عن اختي فرح شي .. هي دايم الي الجء لها في اي مشكله تصيرلي ... هي دايم الي تعطيني حلول ما تخطر على اي بشر اخر .... هي الوحيده الي تفهمني من عيوني اذا تظايقت ... مدري وش اقول اكثر من كذا بس الله لا يحرمني منها ما ادري بدونها وش بيصير علي )

قربت منها و قلت : شوفي فرح انا اخوك الصغير و اكثر وحده تفهمني في ذا العالم هو انتي

يوم سمعت كلامي علطول عرفت ان فيني شي و قالت : ايه بس من كلامك باين انك في مصيبه تكلم ... كلي اذان صاغيه