مكان لا انتمي له ( سعودي في أمريكا )

عودة الجحيم .... مارينا part 14

صحيت من النوم على صوت المنبه .... مع الحماس صحيت

٥:٠٠

غسلت وجهي و تجهزت للمدرسه

طقيت على ابوي و امي باب الغرفه ....و مع الحامس تكسرت يدي و انا أطق الباب

فتحت امي الباب و وجهها مفقع من النوم .... قالت و هي تتثاوب

: اخخ الله يهديك يا فهد وش عندك مصحينا من صباح الله خير

: افا يمه .... اليوم اول يوم في المدرسه ولا ناسيه ..... المهم حبيت اذكركم ان العقاب خلص و صار لازم الحين اخذ جوالي و الابتوب

طلعت امي الجوال من الدرج و عطتني اياه و قالت

: تفضل هذا الجوال .... و الابتوب ترجع من المدرسه و تلقاه في غرفتك .... الله يهديه ابوك ما ادري وين حطه

: خلاص اجل مو لازم اخذه الحين ..... يلا اشوفك بعدين يمه

امي : بالتوفيق فهد

أفطرت فطوري على السريع و رحت لم بيت ايملي

اول ما وصلت لقيتها موقفه عّند البيت تستناني

ايملي : اخيرا وصلت

: لا يكون بس من زمان جالسه تنتظريني؟

ضحكت ايملي و قالت : لا لا امزح معاك ....توني فاتحه الباب و طلعت .... اول ما طلعت الا و توصل

: ايه تطمنت الحين .... يله نروح للمدرسه ؟ علشان تعرفين اليوم تسجيل في مجلس الطلاب

ايملي : ايه اتفق معاك .... يلا اجل خل نوصل بدري قبل الزحمه

راح كل الطريق سواليف و وناسه ..... مهما تسولف ايملي مستحيل امل من سوالفها ..... لو تسولف يوم كامل عادي مستعد اسمعها

وصلنا انا و ايملي المدرسه الساعه

٦:١٠ دقايق

و كانو توهم فاتحين طاولة التقديم على مجلس الطلبة

ايملي : منظر المدرسه و هي فاضيه حلو ..... كويس لحقنا على التسجيل قبل الزحمه ..... و المشكله اغلب الي يجون يكونون متفرجين مجرد لقافه ..... اما المسجلين قليل جدا

: الله ايملي ما تتخيلين كيف متحمس..... اخيرا فتحو التسجيل عاد يله جا دوري الحين و لازم ما أخيب ظنكم .... لازم أفوز علشان اقدر أوصل صوتي و حتى لو ما نفع لكن على الأقل سويت تحسين و لو تحسين بسيط .... يله توكلنا على الله خل أسجل اسمي

و رحنا انا و ايملي و خلاص .... صرت الحين رسميا مسجل في انتخابات المدرسه

كنا جالسين انا و ايملي في الفصل نستنى المدرسه .... و كان في الفصل طلاب قليل بسبب ان الوقت جدا مبكّر ... سالت ايملي

: الحين ايملي ؟ ما تعرفين متى يبدى التصويت ؟

ايملي : ايه اعرف ... سألت الأستاذه المسؤلة عّن التسجيل .... قالت التصويت يبدى من بكره و ينتهي في نهاية الشهر الثالث.... و لمن يوصلون ١٠ مشتركين خلاص يوقف باب التسجيل