'The Moon Pulls The Tide' (Season 2 of IBYLM)

Extra - 3

အိပ်ခန်းကျယ်တစ်ခုအတွင်း အက်စ်တစ်ယောက် အိပ်နေရာမှ နိုးလာ၏။ နယ်မြေစက်ဝန်းမှပေးထားသော ပြစ်ဒဏ်ကာလ ပြီးဆုံးသွားပြီးနောက် အစောင့်အရှောက်အကြီးအကဲများ၏ လမ်းညွှန်မှုဖြင့် သူဟာ လုပ်ခဲ့သောအပြစ်အတွက် အကြီးအကဲများနှင့်အတူ ဆုတောင်းနယ်မြေတွင် တောင်းပန်ခြင်းများစွာကို ပြုလုပ်ခဲ့သည်။

ထို့ပြင် အစောင့်အရှောက်တာဝန်များကိုလည်း ဆက်လက်၍ အကောင်းဆုံးထမ်းဆောင်ခဲ့၏။ သူ့ကို အကြီးအကဲများအားလုံးက ချစ်ကြသောကြောင့် လူကြီးများဟာ ဆုတောင်းနယ်မြေတွင် သူ့အတွက် တောင်းပန်ပေးခြင်း၊ အာမခံပေးကြခြင်းများလည်း လုပ်ပေးကြသည်ဖြစ်ရာ နောက်ဆုံးတွင် နယ်မြေစက်ဝန်းက အက်စ်အား အိပ်မက်ဆိုးများမှ လွတ်မြောက်ခွင့်ပေးခဲ့လေသည်။

ထို့ကြောင့် ယခု၌ အက်စ်နိုးလာရခြင်းမှာ အိပ်မက်ဆိုးများကြောင့်မဟုတ်ဘဲ အိပ်ရေးဝသွား၍ ဖြစ်၏။ သို့သော် သူ၏မျက်နှာက အနည်းငယ်ရှုံ့မဲ့နေပြီး တစ်ခုခု မသက်မသာဖြစ်နေသည့်အလား ဖြစ်သည်။

အကြောင်းမှာတော့ သူတုပ်ကွေးမိနေသည်မှာ သည်နေ့အပါအဝင်ဆို သုံးရက်ရှိပြီဖြစ်ပြီး ယခုထိလည်း မသက်သာသေးသောကြောင့်ပါပေ။

အက်စ်တစ်ယောက် မှုန်ကုပ်နေသောမျက်နှာဖြင့် အိပ်ခန်းပတ်ပတ်လည်ကို လိုက်ကြည့်လိုက်၏။ သို့ပေသည့် မြင်ချင်သူအား အရိပ်ပင်မမြင်ရသောကြောင့် မျက်နှာက ပို၍ပုပ်သိုးလာတော့သည်။

နွေအကုန် မိုးအကူးကာလမို့ ပြင်ပရှိရာသီဥတုသည်ကား အနည်းငယ် အုံ့မှိုင်းမှိုင်းဖြစ်နေ၏။

အက်စ်သည် စိတ်မကြည်၍ ပြတင်းပေါက်ဆီသို့သွားကာ ပြင်ပကိုကြည့်လိုက်မိကာမှ ပို၍စိတ်မကြည်မလင် ဖြစ်သွားရပါသလို။

ထို့ကြောင့် လိုက်ကာကို ပြန်ဆွဲပိတ်ပြီး အိပ်ခန်းပြင်သို့ထွက်ရန် ပြင်လိုက်သည်။ သူက အနက်ရောင် ပိုးသားညအိပ်ဝတ်စုံကို ဝတ်ဆင်ထားပြီး နေမကောင်းဖြစ်နေသောကြောင့် မျက်နှာအသားအရောင်က အဖျားသွေးတို့ သိသိသာသာရဲနေလေ၏။ မီးခိုးရောင် လှိုင်းတွန့်သဏ္ဌာန် ဂုတ်ထောက်ဆံပင်တို့သည်ကား အိပ်ရာထကာစမို့ ခပ်ပွပွဖြစ်နေကြရာ အဆင့်မြင့်အယ်လ်ဖာကြီးအား အနည်းငယ် ဖရိုဖရဲဆန်စေသည်။