قلوب قيدها الضعف

-4-

- طمنيني عنك يا غالية .. كيف حياتك هلأ من بعد هداك اليوم ؟
قالت دعاء شقيقة غالية الكبرى بينما هي جالسة تحتسي الشاي برفقتها على شرفتها لتجيبها غالية بانزعاج :
- متل ما أنا .. مقهورة وبدي اخلص من هالحياة بس مش عارفة كيف

- لا حول ولا قوة الا بالله .. طولي بالك يا اختي .. يعني بعد ما ضربك الله يكسر ايديه وكمان لسا ما تغير ؟

- هه وكيف يتغير واهلي ساكتين على افعاله ؟ ولك كلمة عتاب صغيرة أمي ما حكتلو .. وخالي بدل ما يعاتبه هاجمني أنا ..

- هاجمك !!!

- اه .. مسكني من رقبتي وثبتني عالكنبة جنبو وصاح فيني قدامهم .. وحكالي عادي خليه يضربك .. وحكا لعامر اضربها .. حتى حماتي شمتت فيني .

- لا حول ولا قوة الا بالله .. مش حلوة من خالي يعمل هيك .. يعني بدل ما يرفع من شأنك يقوم يهينك ؟ .. دخيل الله .. أمي اخدته سند الك يقوم هو يبيعك قدامهم ؟ ..

- طيب انا شو اعمل بحالي ؟ احكيلي ؟ تعبت والله تعبت ..

- والله ما بعرف يا اختي .. ياااريت الاقي حل لوضعك ..

- وهيني كمان تعبانة وعندي اوجاع بجسمي وخايفة احكي ..

- لاااا يا غالية كلو الا صحتك .. صحتك اهم اشي بالدنيا ..

- منتي عارفة حماتي يا دعاء .. بس تسمع انه في دفع مصاري بجن جنونها ..

- تجن وتموت كمان .. مين يعني رح يعالجك .. تطلعي تشحتي!! ..

- ههه ما بتفرق معها .. تخيلي .. بحكيلها مرت عمي تعبانة بدي اروح لدكتور بتحكيلي ما معنا مصاري روحي خلي امك تعالجك .. ابني عليه ديون ويا دوب يدفع للناس ..

- الله ينتقم منها .. يعني ماما مسكينة منين تجيب مصاري ؟ لا بتشتغل ولا عندها بالبنوك متلها هالحرباية .. بعدين ابنها رافض توخدي من امي مصاري .. تروح تحكي مع ابنها .

- ولك خليها لله .. حاسة رح انجلط .. ابنها ضيع مصاريه بالاوتيلات والطلعات والمطاعم والسكر .. وكل مرة بتحكيلي انا صرفت مصاري ابنها .. والادهى والامر انو معها مصاري بالبنوك واسهم بالشركات ورافضة تبيعهم وتخلص ابنها من الديون ..

- وعلى شو صرفتيهن يا حسرتي !!
سالت دعاء بتهكم

- على الدهب الي واصل لكوعي .. او على الاواعي والاكل ..
قالت غالية بسخرية وتهكم

- يعني بتفكري هي مش عارفة ؟ عارفة بس قاصدة تقهرك .. وانتي لا تعطيها مجال ولا تبينيلها انك مقهورة ..
قالت دعاء وهي تسكب المزيد من الشاي في كأس غالية لتجيبها غالية بحزن  :
- بعرف ياختي .. والمشكلة دايما برد عليها بنفس الكلام .. ياما حكيتلها اني بعت دهبي ودهب اهلي اول ما تزوجنا مشان ابنها .. ورغم انه كان يلعب بالمصاري لعب بس ولا مرة طلبت منه لبس غالي ولا اكل فخم ولا سفرات .. كان يسافر لحاله ويعيش بالاوتيلات ويروح عالبحر والمطاعم وتاركني مع امه تعذب فيني وتحاسبني عالاكل وعلى كل صغيرة وكبيرة .. ودهبي لهلأ ما رجعلي .ياه ..