قلوب قيدها الضعف

-5-

- الو .. السلام عليكم ماما .. كيفك .. شو اخبارك ..

- اهلين ماما وعليكم السلام ورحمة الله وبركاته .. منيحة الحمد لله .. مشتاقتلك ..
قالت دعاء التي اجابت اتصال والدتها .. لتقول والدتها بنبرة غريبة :

- ماما غالية عندي بالبيت .. بدي منك تيجي لعنا اذا فاضية .. رنيت على هديّة كمان تيجي ..

- خير ماما .. صاير شي ؟

- لا لا ولا اشي .. بس نفسيتها تعبانة وبدي انتي واختك تيجو وتراضوها بكم كلمة حلوات ..

- ماشي ماما ماشي .. لا حول ولا قوة الا بالله .. رح خلص شغلي بسرعة واجيكي ..
قالت دعاء وقد ادركت من صوت والدتها المتحشرج ان هناك شيئا ما لم تستطع قوله في الهاتف .. فاغلقت هاتفها واسرعت بانهاء اعمالها لتذهب فورا الى منزل اهلها ..

دخلت دعاء لتجد غالية جالسة برفقة رنيم شقيقتهن الصغرى وكلتاهما تبكيان .. فارتسم على وجهها الخوف والقلق واقتربت منهن تحيهما بقبلات سريعة ..

- خير!! ليش بتعيطو ..
سالت بتوجس لتجيبها رنيم بضحكة خفيفة متوترة :
- خلي غالية تحكيلك ..

التفتت دعاء نحو غالية فورا لتجيبها غالية وقد اختلط صوتها مع نحيبها :
- تعبت يا دعاء تعبت .. صار عنجد نفسي اموت ..

- ليش بتحكي هيك حبيبتي .. شو صاير ..
سالت دعاء بملامح حزن وقلق لتجيبها غالية بشهقات قطعت احبال صوتها كالسكين :
- طلع .. عندي ... م .. مرض جنسي ..

- شووو ..

- الله ينتقم منه كاين يخونها بالاوتيلات ..
قالت الام وهي تجهش بالبكاء لتلطم دعاء خدها وهي تقول :
- يويلي عليكي ياغالية .. شو هالحظ والنصيب .. ياربي عفوك ورضاك ..

زاد نحيب غالية مع سماعها لكلمات دعاء واخذن جميعا بالبكاء بمرارة .. لتمسح الام دموعها وتقول :
- رنيت عليكي تيجي تواسيها .. وتطيبي خاطرها بكلمتين حلوات ..

- والله ياماما هالخبر نشف الدم من عروقي .. كل اشي توقعتو من عامر الا هالاشي ..
قالت دعاء وهي تمسح الدموع من عينيها لتجيبها والدتها :
- كلنا انصدمنا .. بس شو نعمل .. نصيبها

- ولا اشي ضيعني الا هالكلمة ..
قالت غالية وهي تنظر لوالدتها بقهر ثم اردفت :
- الله قال اعقل وتوكل .. وقال المؤمن القوي احسن من المؤمن الضعيف .. وقت تحكي نصيب بتخليني افكر انه نصيبي الهم والحزن .

- هاد ابتلاء من ربنا .. وحتى لو هم وحزن فهو اشي مكتوب ومافي منه مهرب ..
قالت الام لتجيبها غالية :
- يعني مش تقصير منك ومن بابا ؟ اجاكم شب ازعر طلبني للزواج وانتو وافقتو ؟

- ما كنا نعرف انه هيك يماما ..

- كان لازم تعرفو .. وظيفتكم كأم واب انكم تعرفو .. الله يرحمه بابا حتى وانا خاطبة وقت حكيتله عامر عصبي كتير وبجرحني بالحكي .. حكالي عادي يبابا بكرة بتغير .. بربك هاد جواب ؟
قالت غالية لتجيبها والدتها ببرود :
- وانتي وقتها ليش ما تركتيه .. خطبتك كانت سنة .. ليش ما تركتيه ..