اصعب شي ممكن يتعرض اله اي شخص هي الخيانة ومن بعدها الخذلان
واصعب شي تفقده بحياتك هي الثقة والشرف
اما امور الحياة العادية فممكن تتعوض وممكن ننسى او نتناسة
وبكل موقف بالحياة اكو درس وبكل خطوة للامام نجاح وبكل عثرة ترجعنا للوراء عبرة*
ناخذها من اخطائنا ، لكن بعض الاخطاء مانگدر لا نصلحها ولا ننساها
ممكن نتجاوزها بس تبقى محفورة بداخلنا على هيئة جرح مايبرة
.. جنت اسوق بدون وعي... بعد ماعرفت مكان امي قررت اروحلها
*امي الي خذلتنا وخذلت ابوي وخلتنا نعيش بعازتها طول عمرنا.....امي الي بدل ماتحتوينا وتكون النا سند صارت بحياتنا وصمة عار
كل هاي السنين وانا احاول ابرر الها واكول هي ماغلطت (حبت وتزوجت )
شايل ذنبها والوم بنفسي على الي سويته بيها
بس الي سمعته من ليلى خلاني انهدم الف مرة
الطريق طويييل والدنيا ليل وين الگاها هسة
بقيت افتر بالشوارع لحد ماوصلت للسوگ
هدوء وظلمة وبس الحيوانات موجودة
ركنت السيارة قريب على السوگ وقفلتها وبقيت گاعد بيها..... ليلى كاعدة مثل الجماد حالها مو احسن من حالي
بقيت اسأل نفسي
ياترى اذا شافتها شراح تكللها ؟
شراح يكون شعوري اول ما اشوفها ؟
معقولة راح اشوفها ؟
شگللها انا ابنج الي سحلج وذبج بالشارع ؟
شوفيني انا وين وانت وين ؟
راح تفرح من تشوفني ؟
الف سؤال وسؤال ابالي
كلما اتذكر الموقف ينعصر قلبي
وارجع اتذكر كلام ليلى واتخبل
جنت بين نارين
بقيت انتظر لحد ما طر الفجر وبين ضوة الغبشة
قبل كم يوم جان عيد الغدير واكو ناس من هسة بدت تتحضر لمحرم
وانا احس روحي مثل هاي الايام مخلوط بين الفرح والحزن
باوعت على ليلى جانت مغمضة عيونها
بدة السوگ يفتح والشمس ارتفع ضواها
والناس بدت تفتح محلاتها
جنت خايف ومتردد
اريد اشوفها وماريد اواجها
اختنگت فتحت جام السيارة وبقيت اباوع على الرايح والجاي بلكت المحها من بعيد
بقيت ساعة كاعد تالي عطشت
علي ..ليلى . ليلى اكعدي راح انزل اجيب ماي
ليلى .. امم
نزلت وانا بعدني خايف اشوفها وما اسيطر على نفسي خايف اضعف كدامها
من اقرب محل اشتريت مي وعصاير وكم شغلة ناكلها ورجعت
ليلى .. هااا شفتها ؟
علي .. لا....
كعدنا ناكل وليلى تعاتبني على كلامي ويا يمة وجوان
علي .. انا هم تعبت ما اتقبل كلامها على امي تعيرنا بذنبها وهي تعرف احنة مالنا دخل بشي
ليلى .. بعدك تگول عليها امي ؟ ترى ماتستاهل
علي .. ادري
ليلى .. چا المن جايبنا لهني ؟
علي .. نفس السبب الي خلاج تجين وياي
ليلى .. انا جاية اتشمت اريد اشوف حوبة ابوية وقهره اشوف حرگة قلبها ولو هي ماعدها قلب
علي .. حييل كل هذا شايلتة بقلبج عليها ترى كل اسمها امج
ليلى .. هي مو امي هي خلفتني وبس
اما امي الي ربتني وتعبت عليه وعلمتني الصح من الغلط هي يمه التستحق اگول عليها امي
علي .. چا وجوان ؟
ليلى .. جوان عمتي واختي وصديقتي وما الگه منها بكل الدنيا والي سويتة انت اكبر غلط بحياتك
علي .. من احنة زغار وانا اشوف ابوي يفضلها علينا وجانت امي تغار منها وتكرهها جنت اضوج من اشوف اهتمامها بينا اكثر من امي بس جنت ابرر لامي واكول مسؤولياتها جبيرة وماتلحگ علينا
ليلى .. بس ابوي عمرة مافضل جوان علينا منين جبت هل حجي
علي .. كافي سجل كل املاكه باسمها
ليلى .. مجنت اعرفك هلگد حاقد عليها وتفكيرك سطحي لهل درجة
علي .. چا احسبيها حساب عرب... يعني انا وحسام اكبر منها ليش ماسجل شي باسمنا وليش خلاها هي الي تتحكم باملاكنا فهميني ليش ؟ وبعدين ياهو يگول هي رجعت كلشي ؟
أنت تقرأ
عشق الشيخ وقلب الارجوان
أدب نسائي....... .... صعبة يكون حبك من طرف واحد..... والاصعب منه الخذلان لما تأمن لشخص وتالي يطلع غير ماانت جنت شايفة وغير عن توقعاتك.... وكل احلامك.....وامالك.....البنيتها وياه هنا انت على قيد الموت عايش بدون حياة ومدفون بمقبرة الالم قصتنا تحكي عن ابطال...
