لاتقارنين حبي لك بأي مخلوق انا حتى بغيابك احبك

Part 14

سبحان الله وبحمده سبحان الله العظيم ♡

صباح يوم جديد "يوم تنفيذ الخطه "
اليوم الموعود الي بيقفلون على المشكله من غير شر
فيصل : مازن اول شي لازم نتخلص من البنات كلهم
مازن عقد حواجبه : هاه؟ كيف تتخلص منهم؟
فيصل : مازن يرحم والديك ركز ! ابي كل البنات الي بالمزرعه هذي يطلعون منها يروحون للجامعه ولا للسوق ولا اي مكان! اهم شي مايكونون متواجدات لما ننفذ الخطه عليهم ضرر ! واهم شي الوجد وشروق يداومون اليوم!
مازن : اوك طيب شروق اليوم مداومه لكن الوجد؟
فيصل طلع جواله وشاف جدولها ، حافظ جدولها المسكين
فيصل : عليها دوام اليوم محاضره تستغرق ساعتين تقريباً
مازن : حلوو يلا رح صحيها تقوم
فيصل : يلا تمام بصرفها وادبر الباقي
مازن : حلو
وراح فيصل ونطق مازن بعلو صوته : انتبههه لاتخوفها تسطرك مخمس والله ماتسلم من لسانهاا صحيها زين
ضحك فيصل ونطق : ازهلل بكتفها
مازن : تحسبك الجاثوم وترفسك
ضحك فيصل وراح
،
فيصل له نص ساعه متكي عند باب بيت العم تركي ابو الوجد : ياليللل وش فيها ذي ماتفتح الباب
ورجع يطق الباب لكن محد يفتح لا الخدامه ولا ميلا ولا الوجد
وابو الوجد عند ابوه بالمقلط
من كثر ما انه طول وهو واقف صار يسولف مع الباب بأمور تافهه ينتظر احد يفتح الباب
فيصل : اي على ماقال دامك تقدر تمشيها مشها فهمت يالباب؟ ممتاز لاتتاخر بالمنهج يالباب
تنهد وتلفت يدور خطه يدرعم عند الوجد وابتسم من لقى الخطه !
ربط الثوب على خصره وعقاله على راسه والشماغ على كتفه وطلع الجدار ودخل الحوش تبع بيت ابو الوجد لكن الباب الي يدخل للبيت مقفل
كشر : ياليللل السرى ، يلا ماهي بمشكله ندرعم من الدريشه
اتجهه للدريشه وفتحها وشافها نايمه ونطق : بنت قومي وش هالنوم
ماردت الوجد ولاتحركت لانها نايمه
زفر بطفش وطلع الدريشه ودخل غرفه الوجد وتكى : بنت
الوجد تحركت وسمعت صوته وجمدت مكانها وسوت نفسها نايمه
هز راسه بيأس منها وتقدم لها وجلس على طرف السرير قريب عندها
هي توترت زياده من قربه
حط اصبعه على انفها يتاكد انها تتنفس ونطق : اي اشوا حيه لازالت على قيد الحياه
الوجد ودها تضحك واقتلبت للجهه الثانيه عشان مايكشفها ، اعطته ظهرها
فيصل يحسبها نايمه للحين ونطق : وويلي يازينك بس
انصدمت الوجد ولكن من الصدمه ماتحركت ولا طلعت رده فعل
حط يده على كتفها يلفها له ونطق : وجدي
الوجد ماتبغى تقوم وهو عندها فـ استمرت بتمثيلها
فيصل شال شعرها عن وجهها : ماتوقعتك كذا ثقيله نوم وهه
الوجد خلاص ماقدرت تتحمل اكثر من كذا وفتحت عيونها ونطق فيصل : اخيراا يلا قومي
الوجد جلست : خير من وين جيت؟
فيصل قام ووقف عند التسريحه : ابد والله جيت اسقاط نجمي
الوجد عقدت حواجبها : طيب وش تبغى؟
فيصل مسك الفرشه الي على التسريحه : والله حلوه هالبليه تنفع للسياره
الوجد : لا تكفى الا هاذي حقت البلشر يكفي البلشر كسرته بتاخذ الفرشه بعد؟
فيصل حط الفرشه بجيبه : ان كانك قدرتي تاخذينها الله يقويك
الوجد عصبت بطريقه لطيفه بالنسبه لـ فيصل وقامت : عطني ياها
فيصل ابتسم ونطق : ان قدرتي تاخذينها
الوجد تنرفزت منه وتقدمت تبغى تاخذ الفرشه من جيب ثوبه بس هو يحارشها وهي معصبه وهو يضحك وكانت قريبه منه تحاول تاخذ الفرشه
فيصل بشكل سريع طلع الفرشه من جيبه ورفع يده فوق
تنهدت الوجد وصارت تنط وتتعلق فيه عشان توصل لها
فيصل : ماتقدرينن
الوجد : فاصولياء ابغاهاا
فيصل عض على شفته يدري لو قالت بس "ابغاها" يجيب لها الدنيا ومافيها
الخفيف نزل يده عشان توصل لها وفعلا وصلت لها واخذت الفرشه ونطقت : بزر
فيصل يلعب بحواجبه : يلا على دوامك يالطالبه
الوجد جلست على السرير : يوهه مابغى احس ادمنت اجازه
فيصل : خلصت اجازتك يلا قومي
ضحكت الوجد وبانت غمازتها الي بخدها اليمين الي اول مره يشوفها فيصل توه يدري ان لها غمازه طول هالفتره وهي تبكي وحزينه الا هاليوم ضحكت وبانت الغمازه الخفيفه
فيصل : اقعدد يام غمازه
الوجد ابتسمت  : ايي تشوف بس صدق ماحبيتها
فيصل : لا حلوه حلوه
الوجد زمت شفايفها وهزت كتوفها
فيصل : يلا بسرعه بوديك مع شويهين للجامعه
الوجد : لا اروح مع صحبتي خيال قالت بتمرني
فيصل هز راسه : لا قلت مع شويهين يعني مع شويهين
الوجد : شيهانه محاضرتها الظهر
فيصل : ولو تروحين معي
الوجد كشت على فيصل : مالت
فيصل صار مثل حركات الوجد صار يخز ويشمق
الوجد رفعت حواجبها : منين متعلمها ؟
فيصل : من بنت الله يستر عليها ، من عاشر قوم اربعين يوماً اصبح منهم
الوجد تحسست : وش تقصد من البنت ؟
فيصل تكى : مدري ماعرفها في تعرف نفسها
الوجد طالعت فيه من فوق لـ تحت : خير فاصولياء؟ تقصدني؟
فيصل رفع كتوفه : الي على راسه بطحى يتحسس
الوجد كشرت : طيب خلاص اطلع
فيصل : ماراح اطلع يلا خاويني
الوجد : ببدل ملابسي !
فيصل : زين طيب تمام
وطلع من الدريشه وراح وسكرت الدريشه ويدلت ملابسها وحطت ميكب خفيف للجامعه
،
فيصل بوسط بيت جدته : رجاً حضور جميع بنات ال سلطان يحضرون الان
الجده : ابتس انت علامك منهبل ؟
فيصل : ياجده انا افدى خشمتس تكفين طرفي عن الموضوع شوي
الجده : ايا المخنز وش قله الادب ذي
فيصل ابتسم يهدي الوضع : صح ياجديده انا قليل ادب
العنود جت : خير وش فيك من صباح ربي تصرخ ؟
شيهانه جت : وجع فصيل وش هالازعاج
جوري : وش تبي؟
فيصل معه قائمه اسمائهم الاربع : بحضركم يلا ، العنود
العنود : موجوده
فيصل : حلو ، شويهين وينه؟
شيهانه : ماجود شاهين
فيصل : ابو الشباب ماجود طيب جوري
جوري : هنا هنا
فيصل : الوجد وينها ماجت للحين؟
العنود : انت وش تبي؟
فيصل : ابيكم تتمشون وتطلعون وتروحون وتجون
جوري عقدت حواجبها : ويي هذا فيصل الي يلحقنا من وسط الديره عشاننا طلعنا؟
شيهانه : الظاهر الوجد مهكره ولدنا
فيصل : لا خلاص هالمره سمحت لكم
العنود : ماقول الا الله يستر بس تخوف
فيصل ابتسم ونطق : وهالحين اخوف؟
شيهانه : ياليل يا فيصل تقصد افكارك تخوف ماتقصد وجهك
فيصل : اهاا يلا بس عطيتكم وجهه زياده عن اللزوم قومي انتي وياها لاشوف وحده توطوط بالييت
جوري : مدري ليش احس في بلا
فيصل : لاتحسين رجاً
البنات بالبدايه استغربو وحسو ان في بلا بالسالفه بس تجاهلو لان فيصل ماطلب منهم الشي الا عشان مصلحتهم وقررو يتمشون بالديره والوجد المسكينه انحكم عليها من قبل فيصل تروح الجامعه غصب حتى لو ماعليها محاضرات
وراحو تحت نظرات فيصل وكلامه الي كانت عباره عن ( استرح -استدر - شعرك طالع غطيه زين - شرشفك لونه فاقع شوي غيريه - والخ )
طلعو البنات وهم يضحكون على تصرفات فيصل
تنهد فيصل من راحو والتفت على جدته الي تقول : ابتس علامك انت جفلت بناتنا ؟
فيصل ضحك ونطق : لا ياجده بناتتس مو غنم تقولين جفلت
فيصل تتغير لهجته مع جدته عشان يوصل لها الكلام بشكل مبسط يحب جدته حب مايعلم فيه غير رب العالمين صح جاف وعصبي مع الكل لكن مع جدته غيرر يكون لطيفف
الجده : وراك ي فيصل وش انت مهبب عشان تخليهن يرحن؟
فيصل قبل راس جدته ونطق : جديده ابيهن يغيرن جو
الجده : زين ماتسوي ياوليدي الله يوفقك
فيصل ابتسم ونطق : يلا توصين على شي ؟
الجده : سلامتك يابعدي
ابتسم فيصل وراح
،
الوجد لبست عبايتها وشوزها وضبطت شعرها واتجهه للمطبخ تاخذ سناكس بسيط واخذت بسكوت
طق الباب وابتسمت تلقائيا من سمعت حس فيصل وهو ينطق : تاخرتي يلا
الوجد اتجهت للباب وفتحته ونطق فيصل : خلصتي ؟
الوجد : نو باقي كثيرر
فيصل كشر : لا عاد
الوجد ضحكت ونطقت : امزح وشفيك انت
فيصل اخذ البسكوت من يدها واكله ونطق : طعمه لزيز
الوجد : فيصل انت وش فيك متولج اغراضي؟ بلشر وكسرته والفرشه وكنت بتاخذها والبسكوت واكلتها
فيصل يلعب بحواجبه : لانه كيفي
الوجد رفعت حواجبها : دلوع جدي يحبك ويسوي كل شي لك
فيصل ضحك ونطق : ويني ووين الدلع
الوجد : لا لو مو مدلع ماكان مشيت كلمتك على جدي
فيصل استعقعد لها ويبها تقول موضوع الزواج ونطق وهو مضيق عيونه : اي موضوع ؟
الوجد صدت عنه : الموضوع الي تعرفه
فيصل : نسيته اي موضوع
الوجد التفت له : يوم تتزوجني
فيصل ابتسم بخفه ونطق : ايي هذاك الموضوع ايي عرفته
الوجد تخصرت : يعني بتستقعد لي؟
فيصل مسك يدها : اقول امشي امشي بس يلا وراك دوام
الوجد تنهدت ومشت معه وفتح لها باب السياره وركبت وسكر الباب وابتسم وراح للجهه الثانيه يركب السياره ويحرك
: بغيتي فطور؟
الوجد : لا مابغى افطرت
فيصل : حلوو اسمعي ليت تقدرين تروحين بيت صديقتك نسيت اسمهاا ياليل صعب
الوجد : تقصد خيال؟
فيصل : عليك نورر ايه هاذي روحي لها
الوجد : بشوف بس اظن ان اليوم بتروح ل اهلها لاني قلت لها خلاص لاتجين فيصل يجيبني قالت بروح 
فيصل : طيب تمام اذا خلصتي اتصلي علي
الوجد : شدعوا تضرب خط مره ثانيه اتصل على حميد عامل جدي نقال علوم
فيصل : لا نصيحه مني حميد لا تتصلين عليه لان كل شي بينثره عند جدي مصيبه هالحميد
الوجد : وش نسوي هاذا المتوفر
فيصل التفت لها : افا وهذا وانا قايل لك اتصلي علي ان خلصتي
الوجد سكتت لان رقم فيصل مو معها ولا هو معه رقمها
وبعد مده زمنيه من الصمت وصلو الجامعه ونزلها وهمس بـ : استودعتك الله
وحرك ورجع للمزرعه
،
الجد وعياله سوالف وتعلله لكن مازن بينهم يفرقع اصابعه ينتظر فيصل يجي
الجد : ابك ي مازن علامك مرتبش؟
مازن : لا شايل هم الكويز
ابو نواف : شد حيلك ي مازن نبي الدرجات الي ترفع الراس ونوظفك ونزوجك
مازن ابتسم يسلك لهم : ان شاء الله
ابو بتال : اي بالله على ماقال بنزوج مازن ونفرح به
الجد بضحكه : عندي حرمه مازن بنت رفيقي عبد المجيد
مازن اتسعت عيونه بصدمه : لا يبه توي توي على الزواج
ابو الوجد ضحك ونطق : الظاهر في وحده ببال مازن
الجد بحده : ماعندنا زواج عن حب بزوجه وضحى يعني بزوجه وضحى
مازن : يبه استهدي بالله مابي اتزوج خير شر لاحب ولاغيره
الجد : والله هالبنت انها اطيب من الصايعه الوجد
تنهد ابو الوجد ونطق : يايبه على الاقل احترم وجودي بينكم لاتقعد تسبسب بنتي
الجد كشر : امحق بنت
سكتو ابو نواف وابو بتال مايحبون احد يتكلم عن بناتهم سوى الوجد ولاغيرها
دخلت شيخه : سلام
الكل : وعليك السلام
شيخه جلست : ايي شلونكم والله من زمان عنكمم
همس مازن : قصدك من زمان عن المشاكل
دخل فيصل ونطق بصوت جهوري : سلام عليكم
الكل رد : وعليكم السلام يالله حيه
فيصل ابتسم وجلس بين ابوه وبين ابو الوجد ونطق يقطع نقاشاتهم كلها : جاي بقول علم وبمشي
الجد : تهرج ي ولدي
فيصل اخذ نفس وكان مستصعب يقول هالكلمه : بخطب
الجد ابتسم ابتسامه ماقد ابتسمها ابداً بحياته ونطق : الساعه المباركه والله هاذي العلوم الزينه الي تجمد على الشارب ابد اشر على من الي تبيها وابشر بها
فيصل التفت لعمته شيخه : عهود بنت شيخه
قامو الرجال كلهم من الصدمه
احتدت ملامح ابو الوجد ونطق : ماتاخذ على الوجد ياتاخد عهود وتطلق الوجد والعكس صحيح بنتي ماتاخذ عليها وحده !
ابو نواف بعصبيه : اعقب هاذي جزاتي ٢٥ سنه اكد عليك واخرتها تجي بارده مبرده تخطب على بنت اخوي الوجد ! اخس
الجد بأبتسامه : ابد ي فيصل بنزوجك اليوم قبل باتسر
فيصل ساكتت مانطق بحرف وهو مدرك اهميه وصعوبه الموضوع !
شيخه بفرحه : صدق فيصل؟؟
وقامت تركض مثل العقرب تبشرهم ان فيصل يبغى يتزوج على الوجد
ابو الوجد مسك ياقه فيصل : طلق بنتي
ابو نواف بعصبيه : عليك به ياخوي هاذا سود وجهي
فيصل حط عيونه بعيون عمه ابو الوجد ونطق : قد قلتها وبقول لها مره ثاني الوجد على ذمتي ليوم الدين محد يقدر يفصلني عنها! ماانولد الي يفرق بيننا
ابو الوجد بعصبيه : بطلقها منك وباخذها هي واختها واسافر واترك لكم الديار ومافيها
ابو نواف : استهدي بالله ياخوي والي تبيه يصير والوجد عندك اليوم قبل يتزوج فيصل
فيصل احتدت ملامحه ونطق بعلو صوته والتفت يناظر ابو الوجد : لا انت ولا عشره من امثالك تقدر تاخدها مني اذا انت مهملها ٢١ سنه تاركها ماتدري وين هوا دارها واليوم عرفت انها بنتك؟
ابو الوجد : ولو هملتها بتبقى بنتي ومارضى عليها بالاهانه وتحط على راسها اكبر عدوهه للوجد عهود !؟
فيصل : ومن قال انها اهانه؟ الوجد بحطها ببيت وعهود ببيت
ابو نواف صفق فيصل اقوى كف بالتاريخ واقوى كف يجي فيصل من ابوه ونطق ابو نواف : اهخ ياحسافه تربيتي لك
فيصل من قوه الكف لازال صاد
مازن اتسعت عيونه بصدمه ونطق : علقت رقبته من قوه الكف
الجد قام واخيراً حس على نفسه : فيصل بيتزوج على سنه الله ورسوله ويطلق الوجد ويكتفي بـ عهود
فيصل بحده : الوجد مستحيل اطلقها خذ العلم ولاخله
،
الوجد اول ماوصلت الكلاس جتها رساله على جوالها وفتحتها وكان محتوى الرساله "تم الغاء المحاضره إلي وقتً لاحق "
فتحت فمها من الصدمه وكل من هب ودب يشوف شكلها المصدوم بلعت ريقها بصدمه : يراسيي
قرت الرساله ثاني مره تتاكد : لا لا لا خير ضاربه خط واخرتها تلغيها العن ابليسها ي بنت اللذينا امنو وعلمو الصالحات
وقفت بالسيب وكل من مر يضرب كتفها
تذكرت ان العامل حميد ماخذ اجازه مايشتغل والاخ فيصل مامعها رقمه ومازن مايرد والبنات جولاتهم بالبيت مايردون
اتصلت على خيال ونطقت : خيالل تكفين
خيال : عيون خيال وش فيك ؟
الوجد : اهخخ تخيلي الغدره ! الدكتوره الغت المحاضره وانا بالجامعه
خيال : مالها داعي والله تلغيها بوقت متاخر !
الوجد جلست على الكراسي : ايي والله مالها داعي والبلا ان محد يرد علي لا فيصل ولا مازن ولا البنات !
خيال : يوهه ليت اني بالرياض كان جيتك والله اني ماخذه اجازه ومسافره
الوجد : ماشاء الله توصلين يالسلامه طمنيني اذا وصلتي
خيال : تمام يعيوني وانتي طمنيني اذا لقيتي احد يوصلك
الوجد : مالي من بعد الله غير العامل بقردنه
خيال ضحكت ونطقت : حيلك فيه
الوجد ضحكت وسكرت الخط واتصلت على العامل حميد
حميد يتشمس بالشموس الظهريه او بمعنى اقرب بالقايله : كير انتا ؟ انا في اجازه اش مشكل؟
الوجد : اهخ ي حميد ياكرهي لك
حميد متعلم كلمات ومصطلحات جديده وفنون الردود نطق وهو يشرب عصير البرتقال : شعور متبادل
الوجد اتسعت عيونها بصدمه : اخس ي حميد والله صرت تعرف ترد
حميد : اش يبا انتا ؟ مشكل مشكل
الوجد : تكفي ي حميد داخله على الله ثم عليك
حميد ببرود الارض : اي ؟
الوجد منفقعه كبدها منه بس وش تسوي مالها من بعد ربي الا هو : تكفي تعال للجامعه خذني
حميد : انا في اجازه روه تقلع روه
الوجد تنهد : ياكرهي لك صدق افف كريهه ياخي
حميد : يلا باي انا اجازه
الوجد : اسمع حميد وش رايك اعطيك فلوس
حميد جلس : كم؟
الوجد : ١٠٠﷼؟
حميد : لالا ٥٠٠ ﷼
الوجد : خيرر حميد كذا تروح مكافأتي كلها
حميد كان ولا زال المستشار المالي للجد نطق : انتا مكافأه ٩٩٠﷼ تخصص علمي واذا خذينا ٥٠٠ يبى لك ٤٩٠﷼
الوجد : وجع حتى مكافأتي حافظها؟؟!
حميد : تبين اوكي ماتبين بالطاقاق يلا بسرعه ارسل بلوس بلوس
تنهد الوجد : اوك يلا تعال بعطيك كاش
حميد : لالا ارسلي عربون عشان اثق اجي ! 
الوجد : ياليللل طيب
حولت له نص المبلغ ٢٥٠ والباقي اذا جاء
وبسرعه البرق حميد حضر عند باب الجامعه ومتصل : الوو يلا انا موجود تعال
طلعت الوجد وشافت السياره المهدود حيلها واتجهت لها وركبت ونطق حميد : باقي ٢٥٠ ﷼
الوجد : طيب طيب يالبثر
وحولت له باقي البلغ ٢٥٠ وهو ماحرك الا من شاف ٥٠٠﷼ بالبنك
وتطمن وحرك
،
شيخه جالسه بين الحريم وتزيد وتعيد بخطبه بنتها الوهميه !
شيخه : ايي واقولكم جاء فيصل ونطق بطول صوته
تحمست وطولت صوتها وهي تقلد فيصل : ابيييي بنت عمتي شيخه عهود قلبي انا احبهااا واموت فيهااا واكرهه الوجد
محد صدقها يدرون ان السالفه كلها كذب
نطقت الجده : ابتس عيونتس عيون التسذوب الجربا ابتس قومي تقلعي مناتس عن وجهي انتي وعلومتس الي كلها تسذب بتسذب
سكتت شيخه من الاحراج
،
فيصل عمامه الثلاث ماخذينه رايح جاي من كلام ولعن وسب وشتيمه وهو واقف بينهم زي الجبل ماهزه ريح رغم كلامهم الي ماينقال الا انه يستاهل الكلام ! لعنبو ابليسك ادرك اهميه الوجد تكفى يالدلخ !
ابو الوجد : عان ي ولد اخوي انت والوجد ماراح تعيشون مع بعض
ابو نواف : والي يشوفه اخوي انا معه
ابو بتال : ليش وش سوت لك عشان تسوي في ابوها كذا؟
مازن قلب على فيصل ونطق بمزح : حيوان فيصل
الجد : الكلمه الاولى والاخيره يتزوج عهود ويطلق الوجد
ابو الوجد : يطلق وهالحين باخذها
ايو نواف : خسرت ابوك وامك وزوجتك ي فيصل
فيصل كان معقد حواجبه ومعصب وشاد على قبضته وساكت محترم ابوه وعمامه
التفتو من سمعو صوت سياره حميد الهرفانه
ابو الوجد : الوجد جت باخذها وسلام عليكم
فيصل عقد حواجبه وهو متاكد ان الوجد ماراح تجي الحين تجي العصر !
طلع ابو الوجد وبخطوات سريعه واتجهه لسياره حميد وفتح الباب وسحب الوجد
الوجد كانت تجمع اغراضها فجأه جاء ابوها وسحبها ونقطت : بابا شفيك؟
ابو الوجد شد يده على يدها والتفت لـ فيصل : طلقها !
عقدت حواجبها وحست بحرارها بصدرها ورفعت انظارها لـ فيصل
فيصل يعاين عيونها وكأنه يقول لها  " مااتركك ! "
الجد : طلق ي فيصل! وتزوج الي احسن من الوجد !
ابو نواف : يجماعه استهدو بالله الوجد مالها ذنب تتطلق ! مانخطب عهود من البدايه ويبقى فيصل للوجد والوجد لفيصل !
الوجد حست بضيق الارض كلها بصدرها نطقت بضيق : خطبتها؟
مازن عض على شفايفه انه نسى يعلم الوجد عن الخطه
فيصل عقد حواجبه توقعها تعرف الخطه الي اتفقو عليها بس لو نرجع بالزمن يوم اتفقو الوجد ماكانت موجوده !
تنهد فيصل من حاله الي يحل مشكله تطلع له مشكله ثانيه !
الكل ينتظر فيصل ينطق لكن صامد واقف بكل قوه
الوجد : اكلمك!
فيصل بعلو صوته وحده : طلاق ماني مطلق واسوي الي ابيه !
وتعداهم وطلع للسياره ومشى وكان يفكر كيف يوصل للوجد 
لكن كانت نظره الوجد خذلان منه
،
بعد ٣ ايام من خطبه فيصل لعهود الوهميه
الوجد ماسمحت لفيصل ولامازن ولااي احد يتكلم معها مقفله على نفسها وترفض تشوف اي احد !
فيصل صايرهادي وكومه هواجيس كل الي يفكر فيه كيف يكسب الوجد
اما عند الجد مخطط له على شي يخرب بينهم
،
الجد جالس بالمجلس ومستانس ان ابو الوجد مايبي فيصل ويبيه يطلق بنته !
الجد قام والتفت على ابو الوجد : قم ي تركي ابيك
قام ابو الوجد ولحق ابوه : هلا يبه وش بغيت؟
الجد : اسمع يولدي ان كانك صامل تطلق الوجد من فيصل فـ انا معك
ابو الوجد سكت واستوعب انه ممكن اذا تطلقت الوجد من فيصل تتدمر! يمكن تحبه ! يفرق ثنين عن بعض وش جزاه؟
الجد : يابوك انا ابوك واعرف بمصلحتهم لو بيجلسون مع بعض عشر سنين قدام مع بعض ماراح يستقرون !
ابو الوجد : مدري والله
الجد : اسمع عندي خطه تفرقهم عن بعض
ايو الوجد : وش هي؟
الجد بأبتسامه شر : بنجيب ورقه مزوره بطلاق الوجد ونقول لـ فيصل ان الوجد خلعتك !
سكت ابو الوجد
،
الوجد اخيراً قدرت تحدد شعورها اتجاه فيصل ادركت انها تحبه وتحس بفراغ بصدرها بدونه تعلقت فيه !
تعلقت فيه من جاب امها لها بيوم عرسها وتعلقت زياده من عنايتها فيها بيوم اصابتها وتعلقت اكثر واكثر من حنانه وابتسامته لها واخيراً حبته من حضنها وحست بشعور الحب يجتاح قلبها
اخذت نفس طويل ويعبر عن تعبها بدونه وضيقتها : اهخ ي فاصولياء يوم حبيتك اخذتك مني العقرب
طق باب غرفتها ونطقت : مابغى اشوف احد !
ابو الوجد : انا ياعين ابوك
سكتت الوجد ودخل ابو الوجد ولأول مره يشوف حال غرفه الوجد المبعثر بالعاده الوجد مهووسه نظافه مستحيل تحصل شعره بغرفتها لكن وش صار؟ ليش الحين غرفتها مبعثره؟ كل هاذا عشان فيصل؟ معقوله حبته؟
عقد حواجبه من شاف حاله غرفتها ونطق : ليش غرفتك كذا؟
الوجد ماقدرت تكتم صيحتها اكثر من كذا وبكت ونطقت بوسط بكائها : بابا بنتك طاحت بالحب
ابو الوجد احتدت ملامحه بعصبيه : عيب خلاص فيصل راح لغيرك وماعندنا حب وحركات مراهقين ! الحب وهم وهو لو يحبك ماتزوج عليك وانا الزم ماعلي كرامه بناتي !
الوجد ناظرت ابوها الي اول مره يعصب عليها ونطقت : خلوك تعصب على بنتك اول فرحتك بكرك! يبه انا الوجد
تنهد ابو الوجد وهو مجبور يقسى عليها عشان توقف على رجولها وتتخطى فيصل! اذا تركها كذا مستحيل تتخطاه ونطق : يلا جدك يبيك
رمشت الوجد بتعب : ماكفاه ؟ بيكمل علي؟ 
ابو الوجد : ولو هاذا جدك
الوجد هزت راسها بنفي وعيونها دموع : بابا مو بابا حتى انت تغيرت
ابو الوجد : انتظرك عند جدك
وطلع ابو الوجد من عند بنته المقربه لقلبه وش الي صار عشان يقسى على بنته دلوعته رقيقته !كل هاذا عشان تنسى فيصل؟ بس هو كذا يخليها تكره بقساوتها عليها وبتحب فيصل اكثر !
اما عند الوجد الي تسكرت الدنيا بوجهها
حطت يدينها على وجهها وغمضت عيونها وطلع لها قيصل يبتسم لها يطمنها انه بيرجع ياخذها غصب عن الجميع
هي كأنها بدوامه هي واقفه بالوسط تلتفت يمين تحصل جدها وابوها وتلتفت يسار تحصل شيخه وبناتها وقدامها فيصل
قامت وسحبت عبايتها ولبستها وفيها جنون الارض كلها ولو اذاها جدها بتنسى انه جدها وبتمد يدها وبتطول لسانها
لبست شوزها وطلعت تمشي بخطوات سريعه تخاف تشوف فيصل بطريقها
،
فيصل ماكان بالمزرعه كلها ،، كان بالبر
جالس بين صحاري نجد بعد مامردغته الحياه من كل جهه ، جالس بلا هدف وقدامه ضوء النار وبيده سيقاره دخان وجواله وده يكسره مايبغى يتواصل مع احد ومتلطم من الهم والضيق الي فيه لانه حاول يتواصل معها بشتى الطرق لكن ابى بالفشل بكل مره يحاول يتواصل معها تسكر بابها او جوالها !
يحبها يموت فيه ولا يتخيل تكون لاحد غيره نطق بـ
: طيب ي وجدي خذي راحتك بالزعل والتغلي على قلبي لكن والله مااسمح لـ احد ياخذك مني ولو حطو بيني وبينك حواجز وجبال بتعداها واخذك !
لفت انتباهه جواله الي ماوقف رسايل من مازن والعنود وكانت رسايلهم عباره عن "فيصل الحق " " ابوي حاس الدنيا "
فز من مكانه وركب السياره
،
الجد مد للوجد ورقه
الوجد عقدت حواجبها واخذت الورقه ونطق : ايش؟
الجد : عاني
فتحت الورقه الوجد وحست بجمره بصدرها وهي تقرا المكتوب ، طاحت دمعه حاره على الورقه على اسم "فيصل بن محمد ال سلطان "
ورقه طلاقها منه
رفعت انظارها لـ جدها وعيونها دموع : ارتحت؟
الجد : انا عن نفسي الحمدلله والشكر مرتاح ومطمئن
الوجد التفت لـ ابوها : وانت بابا ارتحت؟
ابو الوجد سكتت ونزل راسه من شاف دموعها
الوجد صرخت بعلو صوتها وحرقه وحسره : تكلمم اذا انت فرقتني عنه ليش ماتجاوب ليشش؟
سكتت شوي وكملت كلامها وهي ترجف : ولا وحد منكم يعرف وش اسباب زواج فيصل من عهود!
الجد : هو طلقك ولو في سبب ماكان يطلقك
شيخه : وهو صادق ابوي لو يحبك ويعزك ماكان طلقك
الوجد محروقه وصدرها يغلي حرقوها فيه نطقت : والله ان ماسكتي انسى انك اخت ابوي والله لافرشك بمجلس ابوك
شيخه كشرت : لا احترام ولاتربيه لا شي وجع حتى امك تركتك
الوجد ماتحملت ابدا انها تتكلم عن تربيتها وامها وصفقت شيخه كف خلا شيخه يختل توازتها
الوجد باللحظه هاذي نست كل شي حولها نست انها عمتها ونست وجود ابوها وجدها
شهق للكل بصدمه من قوه وجرأه الوجد قدرت تمد يدها على شيخه!!
شيخه مسكت خدها بصدمه وبقت تطالع في الوجد
الوجد : تتكلمين عن تربيتي وامي اقص لسانك
الجد مسك الوجد وضربها ضرب مو صاحي
حاولو عمام الوجد يفارعون بينهم الوجد تضرب والجد يضرب وكل الطرفين يضربون بعض
او بالاحرى الوجد تدافع عن نفسها
مسكو الجد وابعدوه عن الوجد
مسحت الوجد الدم الي طالع من فمها وطلعت على دخله فيصل الي واضح كان يركض نطق وهو يلهث بتعب وخوف من شاف الكدمه الي بجبهه الوجد والدم الي من فمها وهي تبكي مسك كتوفها : شفيك؟؟ مين مسوي لك كذا !
الوجد دفته عنها ونطقت : ماحل لك بعد عني
وابتعدت عنه وراحت وهي تسمح دموعها بكمام عبايتها
عقد حواجبه من كلمتها "ماحل لك" وش تقصد بكلامها؟
دخل نطق بحده وعصبيه : مين الي مد يده على الوجد!
الجد ضحك بسخريه : ضحكتي
فيصل تقدم وصار مقابل جده : انا احترمتك كثير وسكتت لك كثيرر لكن الظاهر مامن احترام اذا انت حطيت خشمك بحياتي!
الجد ضحك : الوجد خلعتك ماعاد هي زوجتك
فيصل عقد حواجبه بعصبيه : انت تسمع وش تقول؟!!
ابو الوجد : الله الله الوجد ماتبقى على ذمتك وانت خاطب قررت تخلعك
فيصل : باخذها وقدام عيونك وبخيرها ياانا ياانت
الجد : انت زوج عهود انسى الوجد !
فيصل نطق بحده : طيب الايام بيننا
وطلع وحصل وعهود على طريقه
عهود : هايي فيسل
فيصل : والله ان ماتقلعتي ترى بكفر فيك!
عهود : شدعوا فيسلل بتكلم معاك شوي
فيصل : اسمعي كانك تبيني اتزوجك احذفي الصوره
عهود : صدق؟ بس هاذا شرطك؟ من عيونيي
فيصل ابتسم ونطق : ابد بس احذفيها واستري عليهم ولك الي تيين
عهود طلعت جوالها ومدته لفيصل : انت احذفه حبي عشان تتاكد
فيصل اخذ الجوال وحذف المقطع من كل مكان ومستحيل ترجع الفديو واعطى الجوال عهود وضحك بسخريه وراح تاركها بحيرتها
عهود : وايي شكله شاف صوري واعجب فيني زياده

_________________________
انتهى البارت ♡
رضيت بالله ربًا وبالإسلام دينًا وبمحمد ﷺ رسولًا ونبيًا)، ♡
حسابي تيك توك :Ot348285
*اعتذر عن الاخطاء الاملائيه*
النجمه تدعم الروايه✨

اعتذر عن القطعه لكن والله عندي اختبارات وبكرا ان شاء الله اخر اختبار واكتب لكم وانا علي اختبارات الدنيا😔
ليش تشوفون البارت قصير رغم ان مو قصير والله اتعب عليهم؟😔
تبون خطف واكشن وحركات؟😭