لاتقارنين حبي لك بأي مخلوق انا حتى بغيابك احبك

Part 35

سبحان الله وبحمده سبحان الله العظيم ♡

صباح يوم الجمعه .. بيت العم محمد تحديداً المجلس
جالسات الحريم ام نواف وخواتها الثنتين وبينهم القهوه والتمر
ام نواف : هو فيصل راح المسجد مع ابوه ؟
حنان بلقافه : ايه شفته طلع بعدين معليش خالتي مزوجه فيصل وحده لاتطبخ ولاتعرف شي بالحياه وفوقها تنام للوقت هذا بيجي العصر !
ام نواف : اول شي يابنتي لاتدخلين خشمتس بحياه غيرتس هذا اول شي لازم تعرفينه ثانياً الوجد صاحيه من الصبح وجالسه عند شيهانه ولاتزعلين مني لان من تدخل في مالا يعنيه لقي مالايرضيه
ام عبدالاله نزلت الفنجان على الطاوله : علامتس حاطه دوبتس بدوب البنت! خلاص انسي فيصل يابنت
حنان : ماراح انساه ترى الي سواه وعلقني فيه شي ماينسى
ام نواف : يابنتي والله ان كان فيصل هو جاتس ومرسل لتس انه يبيتس كان انا زوجته لتس بس فيصل مايبيتس ولاهو حاط فكره الزواج بباله ابد ان كانه ارسل لتس بزوجتس ياه ماني بواقفه بطريقتس بس خلاص اختار الوجد
حنان : ولو ماارسل بس يحبنيي !
ام عبدالاله : مافي شي اسمه يحبني الولد طاير بحرمته ولاهو بيمتس لاتلعبين على نفستس
تتهد ام حنان من ادركت موقفها مع خواتها المحرج والتزمت الصمت
نزلت الوجد وشيهانه يسولفون مع بعض : احس بطلب الفستان مرهه بخاطري
شيهانه : ماراح تستفيدين منه هالحين خليه بعدين
ام نواف : ياهلا ويامسهلا تعالن تقهون
الوجد : انا بروح لماما بتكلم معها بموضوع
شيهانه جلست : اقولك تعالي تقهوي وعقبها اروح انا وياك
الوجد : صحه والله ماني مشتهيه
ام نواف : افطرتي ؟
الوجد مضطره تجاوب على ام نواف رغم انها زعلانه عليها لكن مضطره عشان كلام الناس : ايوه مشكوره
ابتسمت ام نواف وهي تدري ان الوجد باقي بقلبها زعل
طلعت الوجد من البيت
ام حنان لاحظت برود ردود الوجد مع ام نواف ونطقت : صاير بينتس وبينها شي؟
شيهانه بسرعه جاوبت : لا مابينهن شي
ام عبدالاله : والله يامي زعلانه مننا
ام نواف : افا ليش؟
ام عبدالاله : حالفه تشوف حرم فيصل وتبينا نجيبها لها تغذرت ان الوجد تعبانه قالت لا بسوي عشاء اليوم وتجيبون حرم فيصل هالي ترك بناتنا وتزوجها شكلها مزاوينه
ام نواف ضحكت بخفه : اي بالله مزاوينه هالبنت خلعت قلب ولدي الجاف القاسي خلته حنون غصب
ام عبدالاله : عاد شرايكن هاليله صدز ناخذ الوجد معنا ونمشي لـ امي
شيهانه : خذو راي فيصل لانه لازال خايف احد يأذي دلوعته
حنان كشرت : دلوعتهه؟
شيهانه ابتسمت تستفز حنان : اوه اقصد حبيبته وزوجته وحلاله وقلبه وروحه بعد
ام نواف : بنات خلاص عينن من الله خير استغفرن وسبحن بظهر هالجمعه
دخل فيصل واول مانطق يناديها : يالوجد
ناظرهم واشر بيده بمعنى "وينها؟"
ابو نواف دخل من ورا فيصل : لاحول ولاقوه الا بالله الناس تسلم مو يدورن حريمهم
فهد : أعتقد أن أخي لم يكن مركز في خطبه الجمعه، بل كان يفكر في زوجته
فيصل التفت : لااعقب الدين خط احمر
ام نواف قامت والحريم تغطو : يالله حيهم تبون الغدا هالحين ؟
فيصل حط يده على بطنه : اي والله اني جويع وانود بعد
ابو نواف : اكيد سهران
فيصل : لاوالله بس بنت اخوك ماودعتني ارقد مثل هالمسلمين تقومني من عز نومي عشان سالفه
ابو نواف ضحك : لازم تقوم هذي زوجتك تسولف لك اذا ماسمعت لها من يسمع لها
فيصل : طيب والي سوالفها كثيره؟
حنان : تبدلها
فيصل التفت لفهد : بالله وكلها سلح
فهد : ايتها الفويسقه ابتعدي عن اخي
فيصل حط يده على كتف فهد : عاش اخوي كثر خيرك
شيهانه : كلام غوي
ابو نواف : تغدو انتم وخالاتكم وانا بتغدا مع ابوي
فيصل : بروح معك بس من مسوي الغداء؟
شيهانه : نودي
فيصل كشر بممازحه : لاالعنود ماتعرف تطبخ اجل بتغدا مع امي
شيهانه : هينن انا اعلمها !
فيصل : لاتكفين صراخها لحاله يخرق اذني لاتقولين لها بتعطيني محاظره عن احترام العمه
طلع ابو نواف ونطقت ام عبدالاله بضحكه : احترمها مردها عمتك
فيصل جلس على الكرسي تبع طاوله الطعام : ماهي وجهه عمه ورعه
فهد : من يراك يظن أن عمرك أربعون سنة! لايوجد فارق عمر بينك وبين العمه عنود
شيهانه : لاتتعب عمرك ي فهيدان راسه يابس يحسب نفسه اكبر واحد بالمزرعه
فيصل : اي اكبر واعقل واحد عندك اعتراض؟
ام نواف حطت الاكل على الطاوله : العاقل مايروح يفحط
فيصل : اح ضربتني بنقطه ضعفي
ام نواف فقرتها تعطي نصايح لفيصل بس فيصل يسمع من هنا ويطلع من هنا : بعطيك نصيحيه ياوليدي مايصير تفحط وانـ...
فيصل حط يده على اذانه ونطق بعلو صوته: يالالا ياللا لالا
سكتته ان نواف بضربه على راسه خلته يسكت : نشاز يوليدي صوتك
شيهانه جلست : والله يايمه عطاك ميوت !اسطريه ولد عاق
فيصل تكى : والله علمتكم تبون تقولون لي وجدي وينها بسكت
ان عبدالاله جلست عند طاوله الطعام: والله طلعت الوجد مهجدته
ام نواف : ماني بقايله وين هي وش بتسوي؟
فيصل رجع سكر اذانه وصرخ : تخرجت دلوعه البيت ياناس
ام نواف صدع راسها من صوت فيصل ونطقت : بس بس ازعجتنا الوجد عند اهلها
فيصل بلع ريقه : لايكون زعلت علي عشاني ماسمعت سالفتها امس !
شيهانه تهول السالفه : ايهه قالت لي فيصل متغيرر ماهو زي اول متخيل ! جتني تبكي وقطعت عمرها بالبكاء
فيصل اتسعت عيونه بصدمه وقام : تبكي؟ اعقب يافيصل ماقشرك مبكي هالبنت
ام نواف جلسته : اجلسس هالبنت مازعلت راحت تحلها مع اهلها
فيصل : ييمه بروح معها
ام حنان : اجلس ماهي ببزر وماينخاف عليها الوجد
فيصل : صح ماعليها خوف بس بروح !
فهد مسك راسه : ان لله وان لله راجعون
بعد معاناه لدقائق اخيراً اقتنع فيصل يجلس يكمل الغداء
فيصل التفت لشيهانه وهمس : والله قلبي ناغزني احسها متضايقه !
شيهانه : اهجد يالام الي تحس بورعانها ترى عند اهلها واهلها اعتذرو مايسوون لها شي وثاني شي تعود اذا رضت على اهلها تلقاها كل عصريه مسيره عليهم
تنهد فيصل والتزم الصمت ونطقت ان نواف : فيصل وفهد تجهزو ترى اليله امي وابوي عازميننا
فهد : حسناً
فيصل : والله ي يمه ان كان تتعذرين لي من جدتي عندي اشغال
ام عبدالاله : يولدي اجل هالاشغال عشان هاليوم امي زعلانه مننا عشانها ماجت معنا رح انت وحرمتك وطيبو خاطرها
فيصل : كان سلام بس واعود
ام نواف : لايفصيل خل الوجد تستانس يمكن انها تلقى الي مثل جوها من بنات خالاتك
فيصل حط يده على خشمه : ابشري على خشمي
همست شيهانه : ماظن كلهم نفس الطينه
فيصل تنهد : الله يعين
،
عند باب بيت العم تركي اخذت نفس طويل تجهز نفسها بتواجهه ام واب بالاسم فقط عمرهم ماكانو لها ام واب ممكن ابوها دلعها بحياتها وماكان ينقصها شي بس تغير عليها والام الي ناسيه بنتها عشان كلمه الجد ماتنكسر؟ حرمت بنتها حنان الام !
رنت الجرس وسرعان مانفتح الباب ونطقت ام الوجد بأبتسامه : يالله حيها
الوجد ميلت شفايفها ؛ بعد وش يالله حيها؟بعد ماحرمتيني من حنانك وحضنك وخليتيني الجئ لغيرك
ام الوجد : حاولت فيك يابنتي بس انتي مو راضيه تقتنعين اننا اعتذرنا
الوجد ؛ فوق اغلاطك كلها ذي تقلبين الطاوله علي وطلعتيني غلطانه ؟
ام الوجد : مانتي بغلطانه يابنتي بس ترى مردنا امك وابوك مايصير ترفضين اعتذارنا !
الوجد : اها يعني الحين موضوعنا ليش ماقبلت اعتذاركم ؟ طيب حبيبتي خليني اعلمك ليش ماقبلته
ام الوجد: طيب ادخلي وخلينا ندردش
الوجد : ماني داخله
ام الوجد : خلاص يابنتي الـ....
قاطع كلامها ابو الوجد: من عند الباب ي هند؟
تقدم ابو الوجد وشاف بنته توقف قدامه ؛ هلا ببنتي
الوجد اجتمعت الدموع بعيونها : بنتي؟ ليش ماصنت بنتك دامك معترف انها بنتك !
ام الوجد : يامك حنا معترفين انك بنتنا ادخلي خلينا نحل الموضوع
الوجد بدموع : قلت لك ماني داخله بجاوب على سؤالك وبقول الي عندي وبمشي ويمكن ماعاد تشوفوني !
تكلمت بدموع وحرقه : تقولين لي ليش ماقبل أعتذاركم؟ لانكم حرمتوني من حنانكم وحرمتوني من حضنكم لان ابوي الي مفروض يكون سندي صار يقول لي ماتشرف تكونين بنتي وامي الي المفروض تكون ملجئي صارت تتجنبني عشان مين؟ عشان جدي الي دمر نفسه ودمر الي حوله والحين يعض اصابع الندم ! ارتحتو يوم طفيتو نور قلبي؟ ارتحتو يوم خليتوني اتعلق بشخص المفروض ماتعلق فيه ! فيصل الي طول عمري اكره وجوده اجبرتوني اتزوجه وكرهته وحاولت بشتى الطرق ابتعد عنه عشان اعيش مع امي وابوي حياه جميله لكن خذلتوني وتعرضت لخيبه امل كبيرهه محد يتحملها اخذني فيصل بأحضانه يطبطب علي وهو يكرهني شفتو كيف خليتو الغريب يطبطب على ظهر بنتكم ؟ حبني فيصل وماانكر اني حبيته من كل قلبي حاسه انه عوضني حنان الام وسند الاب الي المفروض انتم الي تكونون سند لي !
ابو الوجد تنهد بضيق : يابنتي اذا عن الكلمه الي قلتها لك لاتلوميني بوقت غلط قلتها لك ولو غيري اكيد بيقولها ويذبحك بعد
الوجد مسحت دموعها بقوه :لو غيرك؟ غيرك فيصل وعمي محمد وقفو معي وماسمعوني كلام بذيئ زي الي سمعته منك يابابا ماني قادره اتقبل ان الي قال لي هالكلام ابوي! بابا الي كنت ادافع عنك عند فيصل عشان ماينهي حياتك بضغطه زناد لكن الحين والله لو يقول لي فيصل بنهي حياه ابوك اني مانطق بحرف
ام الوجد عقدت حواجبها بعصبيه : بنت ! مايصير تقولين هالكلام لـ ابوك مهما سوى مهما فعل يبقى ابوك
الوجد صرخت بوجهه امها بدموع : مالك حق تصارخين وتعصبين علي انتم تستحقون الكلام الجارح لكن مافي كلمه بالحياه توصف حرجي وخذلاني منكم !
ابو الوجد تنهد : لاترفعين صوتك عشان ماامد يدي عليك
الوجد تقدمت لـ ابوها ونطقت : اضرب كانك تبي تطفي عصبيتك اضربني وخليني اكرهك فوق كرهي لك
ام الوجد رفعت يدها وصفقت الوجد كف على خدها الناعم : احترمي ابوك
الوجد حطت يدها على خدها وتحس بالدموع حاره على خدودها : الله عليك يالزوجه المثاليه الي تربي بنتها عشان زوجها مايتضايق الله الصراحه يعجبني تمثيلك ولاكأنه هجرك سنين طويله
ابو الوجد : عندك كلمه زينه اهلا وسهلا ماعندك روحي
الوجد : ليش اشوف الخوف بعيونك اذا فيصل واقف وراي ؟ تخاف منه وماحصلته معي ورجعت لعادتك
ابو الوجد : مارجعت لعادتي وباخذك من فيصل
الوجد : ماتقدر نجوم السماء اقرب لك
ام الوجد : بناخذك وان ماقدرنا نجبر فيصل يطلقك
الوجد ضحكت : تضحكوني الصراحه
ابو الوجد : اخلصي وش تبين جايه؟
الوجد : ميلا
ام الوجد : ترجعين للبيت اهلا وسهلا ميلا ماتطلع من البيت
الوجد عقدت حواجبها : ليش ماتبون بناتكم سعيدات ليش تحبون تشوفون الدمعه بعيونهم!
ابو الوجد : حنا نبي بناتنا يعيشون معنا
الوجد ؛ من الاخر ابغى ميلا
ام الوجد : اتركي فيصل وعيشي معنا
الوجد : اذا شفتي نجوم القايله ارجع لكم
لفت الوجد راجعه بيت العم محمد بعد مافقدت الامل دخلت تبكي شافتهم ياكلون عضت على شفايفها بوهقه تدري ان شافها فيصل تبكي بيروح يكفر فيهم نزلت راسها ونزل شعرها على وجهها ومشت بخطوات سريعه
فيصل شافها وناداها : وجد
الوجد ماردت عليه وهي تمشي
لحقها فيصل ومسك يدها ولفها لها وشاف دموعها : شفيك يابوك علامك تصيحين؟
الوجد نزلت وجهها : مافيني شي بس تضايقت وبكيت
حنان : وع مو لايق عليك الدلع
فيصل التفت وصرخ بوجهه حنان : مالك دخل اطلعي منها وان توفر بعد اطلعي من البيت
ام حنان : فيصل !
فيصل تجاهلها والتفت للوجد وحط يده على فكها ورفع وجهه الوجد : عانـ..
سكت من شاف طرف خدها وردي والوجد مخبيه اثر الكف بشعرها
لف وجهها ورفع يده الثانيه يبعد الشعر عن وجهها ونطق بحده : مين الي مد يده عليك ؟
انهارت الوجد وبكت ماقدرت تمسك دموعها اكثر من كذا
فيصل رص على اسنانه بعصبيه ونطق : تهرجي من ؟
الوجد : فيصل عورتني بعد يدك عن فكي
فيصل شال يده عن فكها ونطق بعصبيه : الوجد يرحم والديك ان مانطقتي ترى بروح احرق بيت اهلك وبالي فيه تهرجي !
ام نواف : ي فيصل خوفت البنت ابعد عنها
فيصل مسك عضد الوجد: ماني مبعد وتتكلم من الي مد يده ولا عاد اتصرف تصرف ثاني تهرجي يالوجد بالطيب لاوالله اسوي شي اندم عليه
الوجد مسحت دموعها بأكمام بلوفرها : تهاوشت مع ماما كنت ابغى ميلا وصارت مشاده بالكلام بيننا
فيصل رفع حواجبه ونطق بتهديد : طيب
لف ومتجهه للباب بيطلع لكن قبل مايطلع نطق بـ :امسحي دموعك وانا بمسح الي بكاك
الوجد لحقت فيصل وطلعت من البيت: تعال تكفى لاتسوي حاجه
فيصل يمشى بخطوات سريعه : لاتجين !
الوجد بدموع : لاتروح فيصل وتتهاوش معهم
وقف فيصل والتفت والوجد كانت تركض ووقفت قدامه مسكها فيصل من عضودها وشدها له ونطق : انا محذرهم وقلت لهم لكن مايفهمون !لاتلحقيني
تركها فيصل ومشى بأتجاه بيت العم تركي زفرت الوجد بضيق ولحقت فيصل
فيصل طق الباب بقوه وفتح ابو الوجد
فيصل قلبه مليان كرهه لعمه تركي واول ماشافه جن جنونه ومسك ياقه ابو الوجد وصرخ بوجهه : علمنا علمنا وفمهنا بس ال** يبقى **
دخلت الوجد وهي تبكي ونطقت ؛ فيصلل
ابو الوجد دف فيصل ونطق : بنتي وانا ادرى بها
فيصل بعلو صوته وغضب : ماهي بنتك
الوجد دخلت بين ابوها وزوجها ونطقت : يكفيي خلاص !
جت ام الوجد ومعها ميلا : شصاير ليش صراخكم واصل لغرفتي؟
الوجد ناظرت امها : ارجعي لغرفتك لايفكر فيك !
فيصل التفت وصفق بيدينه : شرفتي
ام الوجد ؛وش قومك يافيصل؟
فيصل اتقدم لها ونطق بحده : تدرين لو انك رجال كان دفتك اليوم قبل بكرا ؟
ام الوجد : ليه
فيصل صرخ بعصبيه : تمدين يدك عليها وتحرمينها من اختها الي ربتها على يدها وتسالين؟؟
ابو الوجد ؛ فيصل اطلع!
فيصل التفت وهز راسه بخفه : بطلع لكن بخليكم تبكون شوق لبنتكم بحرمكم ريحتها وقولو فيصل ماقال !
الوجد جلست على ركبها وفتحت يدينها : ميمي
ميلا ركضت بأتجاه الوجد : خذيني معك مابغى بابا والي معاه مايخلوني اطلع من البيت
فيصل ميل شفايفه بضيق من كلام ميلا والتفت ونطق : حتى بنتكن الصغيره اذيتوها وماعرفت امها
الوجد مسحت على وجهه ميلا : باخذك معليك لاتخافين
ميلا تعلقت بالوجد وتبكي ماتبغى تجلس بالبيت
فيصل: كلامي انتهى بس فعلي ماانتهى انتبهو على حركاتكم لااولع بالبيت ومن فيه
التفت فيصل ومسك الوجد وطلع معها متجاهل تماماً تهديد العم تركي بأسترجاع ميلا !
طلع من البيت وهو يسمع شهقات الوجد والتفت لها واخذ ميلا وشالها وحط يده على كتوف الوجد وضمها على جنب : لاتبكين وبقول لك بعد عرس العنود بنطلع برى السعوديه
الوجد التزمت الصمت وعيونها دموع
دخلو بيت العم نواف
نزل ميلا ونطق : روحي الغرفه ولاتناقشين احد خذي ميلا معك
الوجد هزت راسها برضى ومدت يدها لميلا واخذت ميلا وطلعت للغرفه
فيصل ناظر شيهانه : الحقيها
شيهانه لحقت الوجد
فيصل بجديه: يمه انتي تعرفيني اني ماعرف انعامل مع الحريم بالله وصلي كلامي لام الوجد لاتجي الوجد لااحرمها من بناتها
ام عبدالاله : لا لا ماهو بزين هالحتسي مايصير تحرم ام من بناتها
فيصل تنهد : بلاتس ماتعرفين الي حصل
فهد : اتصل على عمتي العنود تأتي لكي تؤنس زوجتك
فيصل طلع جواله : زين ، الوو
العنود : هلا فصيل
فيصل : العنود بالله اذا تقدرين تجين انتي وجوري للبيت تعللن عند الوجد
العنود : ليش شصاير؟
فيصل : هي تعلمك انتي تعالي بس
العنود : يلا تمام
قفل فيصل الخط ورفع انظاره : فهد امش للرجال
فهد طلع مع فيصل وراحو للرجال بضع ثواني وجت العنود وجوري : وين وجيد؟
ام نواف : تدلن الدرب بغرفه فيصل
حنان : عيب ياخالتي يدخلون غرفه فيصل!
جوري رفعت حاجبها : اعقبي مابقى الا انتي تعلمينا العيب والحرام!
ام نواف : ماعليتس منها انتي روحي لها
العنود ؛ تمام
طلعت العنود وجوري
،
غرفه فيصل
الوجد على السرير ضامه رجولها وتبكي وميلا جالسه عند التسريحه تلعب بالميكب
دخلت شيهانه ومعها سلطه فواكهه وشافت الوجد تبكي : افاا جويجه علامك تصيحين
الوجد رفعت راسها وناظر شيهانه : الظاهر اني خسرت ماما وبابا للابد
شيهانه تقدمت وجلست على طرف السرير عند الوجد ونطقت : واعتذاراتهم وين راحت؟
الوجد مسحت دموعها: ماعرف وين اعتذاراتهم الي قبل كم يوم شفتهم قبل شوي وجيههم بارده كانهم مايبون يحاولون يراضوني
شيهانه حطت بفم الوجد شريحه تفاح ونطقت : معليه ياروحي انتيي بتزين وانا اختك صدقيني انتي بس فضفضي لفيصل
الوجد : ماقدر افضفض له
شيهانه عقدت حواجبها : ليش ؟
الوجد ؛ ينفعل لو قلت له فلانه مضايقتني راح وتهاوش معهم انا مابغى ادخل فيصل مشاكل
شيهانه : والله انك ظالمته حرام عليك يسوي كل شي عشانك ويبي ياخذ حقك
الوجد : عارفه قصده واحبه واحب فزعته بس بيني وبينك يعني ماما كفختني قبل شوي راح بيسطرها
شيهانه : لاعاد ! فيصل مايضرب حرمه
الوجد : تضارب مع بابا
شيهانه تنهدت براحه : طمنتيني خفت تغير فيصل
ضحكت الوجد بخفه وطق الباب ونطقت : ادخل
دخلت العنود ووراها جوري ونطقت شيهانه : حياكم الله
العنود تخصرت بممازحه : لاوالله ؟ ليش ماتعزمونا على صحن هالفواكه
جوري : ايه والله كود الغريب يعزمنا
شيهانه بممازحه : من عازمكم بفقع عيونه
العنود : اخوك كثر خيره
الوجد : فضيحه هالفيصل لو هو قايل لي كان طلعنا بالحوش هنا حوسه
جوري جلست : لاشدعوا عاديي يابنت الحلال
شيهانه : العنود اجلسي هنا تعالي
جلست العنود جنب شيهانه ونطقت : بنات العرس ماباقي عليه شي
الوجد : خلصتي اغراضك؟
العنود : حجزت الارتست والهير ستايل والمصوره وفارس خلص امور القاعه كلها وضروري نشوف لنا يوم نطلع انا وياكم نشتري الفساتين لاني للحين ماحصلت فستان حلو !
شيهانه تنهدت : ياليلل يعني كود البس فستان؟
جوري : لازم ياويلك تلبسين جنز بسطرك
شيهانه : تخيلي شكلي بوي وفستان
الوجد : ماعليك بيطلع حلو المهم نودي انتي متاكده من الارتست شغلها حلو ؟
العنود : اشوف شغلها على الزباين حلوه
الوجد تاكل الكرز : كويس الحمدلله اهم شي حلو شغلها ونظيف
رن جوال شيهانه وطلعته من جيبها وردت : هلا
فيصل : وين جوال الوجد ليش ماترد ؟
شيهانه ناظر الوجد ونطقت : ي وجد فيصل جوالك وين؟
الوجد تلفتت تدور جوالها : مدري وينه
شيهانه : ماتدري وينه
تنهد فيصل : زين يلا تجهزو كلها من ساعه وجايكم باخذكم
شيهانه : وينن
فيصل : مو تقولون جدتي مسويه عزيمه ؟
شيهانه : الا
فيصل : ايه خلاص تجهزو وقولي للوجد ماقلت لها
شيهانه : تمام
فيصل يحارشها : يلا دزي
شيهانه حطت سبيكر ؛ يحيواننن انا دزي؟ يالوجد تراه يقول لك دزي
فيصل : لالا ماقلت لها
الوجد : انا ادز يافاصولياء؟؟
فيصل : لاا تكذب يابنت
شيهانه ردت الحركه : يلا دز
وقفلت الخط بوجهه وضحكو البنات ونطقت شيهانه : الوجد بصدمك
الوجد : وش بعد
شيهانه : في عزيمه الليله عند جدتي من امي
شهقت الوجد بصدمه : تستهبلين اليله؟؟ متى يمدي !
العنود : وه ياحظك الردي
شيهانه : يبنت الحلال هالحين بيذن العصر معك وقت
الوجد : مابغى اجي خير والله مايمديي
شيهانه رفعت كتوفها : والله تفاهمي مع رجلتس
جوري : عادي حنا نساعدك تخلصين بدري
الوجد : ياهو شفيكم اقولكم مايمديي يعني حتى نفستي منعدمه
العنود : ماعليك اكشخي واكحلي عيونهم
الوجد : مابغى اروح وين جوالي
قامت الوجد تدور جوالها وحصلته على التسريحه عند ميلا حاطه "عدم الازعاج" اخذت الجوال واتصلت على فيصل وحطه الجوال على أذنها
سرعان مارد فيصل بـ : لبيه
الوجد جلست على الكنبه ؛ فيصل تستهبل ليش ماقلت لي ان في عزيمه الليله
فيصل : شسوي فيك رجعت من صلاه الجمعه ومالقيتك
الوجد : يوهه الحين وش اسوي فيصل مايمديي تكفى دور لي اي عذر
فيصل : اتصلي على الغامضه الي اعذارها اكثر من البارتات تدبر لك عذر
الوجد : الغامضه استهلكت ظلام ماسمع دور غيره
فيصل : مافيه عذر قومي اكشخي وتجهزي بدال هالحلطمه
شيهانه التفتت للبنات ونطقت : قومو لغرفتي بيقوم ديربي بينهم امشو زينو الايلاينر حقي
قامو البنات وطلعو من الغرفه ونطقت الوجد : كم الساعه تمشون ؟
فيصل : على المغرب
الوجد حصلت عذر : تمشي المغرب والمغرب ماباقي له الا ٣ساعات متى يمدي اجفف شعري الي يبي له ساعتين وغير الميكب مابغى اروح صرفني
فيصل : يابوك عاديي لو مانمشي الا العشاء اهم شي تخلصين
الوجد قلبت عيونها بوهقه : ماقدر حتى العشاء مايمدي اخلص
فيصل تنهد : لاحول ولاقوه الابالله ابك اتركي هالجوال وهالحلطمه وتجهزي
الوجد ضيقت عيونها بتحدي : بتجهز واذا تأخرت لاتزعق فوق راسي اوك؟
فيصل : بشيلك على كتفي ان تاخرتي عاد علمتك
الوجد : ياربي يافيصل بليز مابغى اروح
فيصل : جدتي تبيك وش بيدي انا ؟
الوجد : تتعذر عني تقول تعبانه ولاعند اهلها ولا اي شيي
فيصل : يابنت انتي ماتعرفين جدتي تحجر لك ماتقدرين تكذبين صعبه جدتي تعرفك من اثرك
الوجد : يوهه طيب لاتكذب قول الحقيقه الوجد عند اختها ميلا
فيصل : بقول الوجد ماتبي تجي وتقول اكذب على جدتك
الوجد : لالا عيب تقول لها كذا
فيصل : كلمه اخيره تجهزي واتركي هالحلطمه شوي وجايك
ماسمح لها ترد وقفل الخط تأفأفت ونطقت : ابوك يالعزيمه الي وقتها غلط
ميلا : اروح معك؟
الوجد اتسعت عيونها بصدمه وهي تشوف الميكب الي بوجهه ميلا : ميلااا وش مهببه بوجهك
ميلا تجاهلت الوجد واستمرت تحط بلاشر على وجهها كله !
الوجد نفذ صبرها واخذت الميكب من ميلا وحطته بالدرج ونطقت : اجلسي بمسح وجهك
اخذت قطن وحطت عليه مزيل ميكب وتمسح وجهه ميلا
دخل فيصل ونطق: خلصتي ؟
الوجد : فيصل ترى شوي وابكي مابغى اروح ماني مستعده اسمع كلام
فيصل رمى شماغه على السرير وتقدم للوجد الجالسه على ركبها ونزل لمستواها ونطق : لو دقوك بالكلام دقي خشومهم
الوجد : طيب لو حرمه كبيره ؟
فيصل : قولي لي انا اتصرف
الوجد : تسطرهم ادري بك
فيصل : عشان يتوبون
الوجد مسكت يد فيصل وحطت فيها القطن ونطقت : مسح وجهه ميمي باخذ شور
رفع حواجبه فيصل : الله وكيلك حسبتك بتعطيني قبله حب
الوجد اخذت الروب ونطقت : بوسه باليد؟
فيصل : لا يعني قبله الحب بالتدريج تمسكين يدي وبعدين تعطيني قبله الحب بالوجه اهم شي شفت فلم امس الصراحه لازم تشوفينه
الوجد : فيصل لاتشوف فلم ثاني مره تأثرت فيه بالمره
فيصل : والله مالك داعي الصراحه قلبي صار فراشات لوهله وعطيتني هالقطنه صار ذبان بقلبي
ضحكت الوجد : صاير تضحكنيي انت والذبان الي بقلبك
فيصل التفت لميلا واعطاها القطنه وقام للوجد ونطق ؛ بشخصنها معك ليش واول نفسيه؟
الوجد : اول اول ولا بالفتره الاخيره ؟
فيصل : اول اول
الوجد : والله بدايه زواجنا كنت دايم معصب ولكن الحين كتكوت
فيصل : كتكوت مهو بصوص الدجاجه؟
الوجد: الا بس يعني شي كيوت وكذا يارب فهمت
فيصل : انا اقول اجهزي
ضحكت الوجد ودخلت الحمام يكرم القارئ التفت فيصل وشاف ميلا وجهها وردي من البلاشر ونطق : بسم الله الرحمن الرحيم انت جن ولا انس؟
ميلا : انا عويي
فيصل حط يده على قلبه : يمه
ميلا : انا ميمي لاتخاف
فيصل : تبين مكياج؟
ميلا ببرائه : ايوهه
فيصل : وينه ؟
ميلا : الوجد حطته بالدرج
فيصل تقدم وفتح الدرج وطلع شنطه ونطق: هذي؟
ميلا هزت راسها : ايوه
اخذها فيصل وتربع بوسط الغرفه واشر لميلا تجيه وفعلاً جت ميلا
فتح فيصل الشنطه وشاف اشكال وانواع من الميكب والالوان : طبي وتخيري يالنسيبه ابك انتي اخت الوليفه لازم نعاملك بطيبه
ميلا : حط لي
فيصل : وه ماطلبتي الا اني ماعرف بس عشانك يالنسيبه هالبشري
فيصل القى نظره سريعه على الشنطه واخذ المسكره ونطق : هذا ويش
مسك وجهه ميلا وفتح المسكره وبدا يرسم حواجب ميلا بالمسكره !!
خلص من المسكره ونزلها واخذ ايشادو ويحط على خدود ميلا بالايشادو ويهبد من الميكب على وجهه ميلا الين طلعت ميلا تخوف!
فيصل : يازينك زيناه اصبري بحط لمعه لتس
اخذ الهايلايت ويحط بوجهه ميلا وبلحضه هذي طلعت الوجد من الحمام وهي تشوف ظهر فيصل ووجهه ميلا الملون ويد فيصل الي على وجهه ميلا
فيصل كان معطي ظهره للوجد
صرخت الوجد : فيصل !
اتسعت عيون فيصل من سمع صوتها وجمد مكانه
اي بنت بالعالم تخاف على ميكبها ويمكن توصل انها تبكي وهذا الي صار مع بطلتنا من شافتهم عادمين الميكب نطقت والغصه بحلقها ؛وش بينك وبين البلاشر اول يوم تزوجتك كسرت البلاشر وهالحين وش مسوي فيه
فيصل ابتسم من اذكر اول يوم تزوجها كسر البلاشر وكان يسميه فلشر ونطق : اوهه الله يهديك ي ميلا ليش تخربينه
الوجد بدموع : بتقنعني انها ميلا
فيصل ماتوقعها تبكي ووقف قدامها : يابوك شفيك تبكين والله ماتوصل قولي لي انتي بخاطرك شي
الوجد بكت من الضيقه الي فيها من الظهر وبكت على اتفه سبب : مافيني شي
فيصل التفت لميلا ونطق : ميلا بابا روحي لشيهانه
ميلا قامت وطلعت وسكر الباب فيصل : قولي لي من مضايقك بغيابي؟
الوجد : فيصل اقولك مافيني شي بس زعلتوني بالميكب
فيصل مسك يدها ووقفها عند المكيب ونطق : محد خربه ولاكسره بس اننا حطينا لميلا مكياج وبس مير ان خاطرك ماش اليوم
الوجد بدموع : متضايقه اليوم
فيصل سحبها لحضنه : تعالي يابوك وطلعي كل الي بخاطرك
الوجد كانت تحتاج حضن يخفف عن ضيقتها اليوم بسبب امها وابوها الي عكرو مزاجها وبكت بحضنه بدون لاتنطق بحرف
فيصل احترم رغبتها انها ماتبغى تتكلم
الوجد بدموع : فيصل انا ثقيله عليك؟
فيصل عقد حواجبه : لابالله مثل الغيمه على صدري
الوجد : طيب ليش يحسسوني اني ثقيله عليهم ليش يقولون لي كلام مو زين ليش يتعمدون يأذوني ليش دايم يهددوني فيك ليش بيقولون بنخلي فيصل يطلقك
رص على اسنانه بغضب من فهم انها تقصد ابوها وامها معقوله قالو لها كذا وحسسوها كذا ؟
: تعالي اجلسي وتكلمي معي
اتجهه فيصل للكبنه وجلس والوجد جنبه
مسك يدينها بحنان وابتسم لها يطمنها : وجدي انتي تدرين احبك واغليك وغلاك ماهو بعادي وتدرين اني مصدقك مهما كذبوك ووقفت معك بالمواقف الصعبه كيف تفكرين اني بتخلى عنك واصدقهم ؟ تدرين اني حتى شيخه ماصدقتها جيتك وسألتك وصدقتك انتي
الوجد رفعت كتوفها : ماعرف فيصل يمكن يسوون اشياء تخليك تصدق وتكرهني وقتها
فيصل تنهد بضيق لانه يكرهه انها تقول له "تكرهني" : لايمكن اني اصدقهم انا احبك كيف اصدق الغريب وانتي وعدتيني اي شي يصير بحياتك تقولين لي وانا واثق فيك مهما سوو بوقف معك
الوجد حضنت فيصل : الله لايحرمني منك والله اني احبك وماقد حبيت احد كثرك
فيصل : عاني فيني وقولي لي الكلمه
الوجد : مستحيل بتجيب العيد ادري بك خلنا كذا
ضحك فيصل بخفه ونطق : يلا قومي تجهزي واذا صدق ماودك بالروحه بسوي كل الي اقدر عليه
الوجد : طاح الفاس بالراس خلاص نروح فضيت الي بخاطري
فيصل : ثاني مره علميني اذا انتي متضايقه !
الوجد : افكر بالموضوع
فيصل : لاتفكرين
الوجد ضحكت بخفه : ان شاء الله
فيصل قام : بروح اجيب ثوبي من المغسله
الوجد : تمام
ابتسم فيصل وقبل خد الوجد وطلع من الغرفه
وقفت الوجد واتجهت تاخد الميكب وشافته فعلاً ماكسروه ولاخربوه بس حط لميلا ميكب عليه ضروف
دخلت الميكب بشنطه الميكب وحطتها على التسريحه واخذت مجفف الشعر وبدت تضبط شعرها
،
غرفه شيهانه
شيهانه منسدحه بالسرير ويمينها العنود جالسه ومعها ايلاينر ويسارها جوري جالسه ومعها كونسيلر
يسوون ميكب ل ابو الشباب
شيهانه زفرت بطفش : ياليل ابو لمبه خلاص مسكره وتخب بعد
العنود : شيهانه اسكتي ياحمارهه ضبطت الايلاينر بس حستيه !
جوري ضربت خذ شيهانه بخفه : ارفعي عينك الكونسيلر تكتل
دخلت عليهم ميلا : خاله شيهانتي
شيهانه وهي منسدحه ؛ ابوك يالتربيه تقول لي خاله !انا عيال اخوي ماقالو لي عمه يسعد جوك يالوجد على هالتربيه
اتسعت عيون العنود بصدمه وهي تشوف وجهه ميلا
جوري : وش مهببه بوجهتس انتيي من سوالتس تسذا!؟
ميلا زمت شفايفها بزعل ماخده من طبايع الوجد : لاتصرخين
شيهانه قامت : بسم الله وش ذا ؟!
العنود : ميمي حبيبتي مين سوا لك كذا؟
ميلا ؛ عمو فيصل
شيهانه : ياويلك يافصيل من وجيد
جوري : ابك شوفو فيصل هو حي ولاميت
ميلا : الوجد هاوشت عمو فيصل
العنود : يستاهل عساها سطرته
ميلا : مدري طردوني
شيهانه غمزت : يطلع ميلا عشان ماتروح هيبته والوجد تهاوشه
جوري ضحكت : تكفيننننن مقدر تخيلت شكل فيصل ينطنط والوجد تسطره
العنود : اقول بس الوجد اعرفها خفيفهه بيعطيها بوسه وترضى
شيهانه : تقولك البنت فيصل حايس ميكب الوجد وكلش الا مكياج الوجد يشيخه تحب مكياجها اكثر مني
العنود قامت ومسكت يد ميلا: جوري كملي ميكب شيهانه وانا بمسح وجهه ميلا
جوري : على خشميي
العنود : بنت شويهين ميلا بتروح معكم ؟ البسها؟
شيهانه : ايه اختها ماتتركها
العنود : حلو اجل بروح اضبطها
العنود اخذت ميلا وراحت وجوري لازالت بالكونسيلر
،
على صلاه المغرب
فيصل رافع يده لان معه ثوبه دخل الغرفه وريحه العطور والبخور ماليه المكان نطق : الله
الوجد التفتت وهي تبخر شعرها : شرايك بشعري ؟
فيصل علق ثوبه ونطق : شلع قلبيي لدرجه ودي ادفن وجهي بشعرك
الوجد ابتسمت : والله مدحك اسطوري بس ادري انك تجامل مو عاد ذاك الزود
فيصل تقدم ولف خصلات شعر الوجد على اصابعه بخفه : لاوالله ماجامل يازقنك زقناه ي شيخه
اتسعت عيون الوجد بصدمه : سبه ذيي؟
فيصل : مدحه مدحه الله يخلف
الوجد : مدحه تثير الشكوك طيب وش تعني؟
فيصل : يعني يازينك زيناه
الوجد ابتسمت : ادري
فيصل : لبى الثقه بس المهم خلصتي؟
الوجد : وي لا باقي الميكب
فيصل اتسعت عيونه بصدمه : ويشش! ابك انتي صادقه ولا ؟
الوجد : باقـ..
قاطعها فيصل : لحظه قبل تجاوبين لسلامتك يعني قولي ماني حاطه خرابيط بوجهي لسلامتك يعني
الوجد : شفيك فيصل انت قلت خذي راحتك
فيصل : صح قلت خذي راحتك بس مو عاد تفلينها
الوجد تجاهلته وجلست على كرسي قدام التسريحه وسحبت المرطب وترطب بشرتها بكل برود
فيصل من صدمته تخصر : احر ماعندي ابرد ماعندك
الوجد تطالع فيه بالمرايه : خصرك منحوت وش تمارينك ؟
فيصل تعدل وتنحنح : ابك ماتشوفين شنبي
الوجد تطبطب على بشرتها توزع المرطب : عمي زوزو يقول فيصل قال بابا
فيصل : تسذوبن اجرب بعد هالمازن !
الوجد ضيقت عيونها بممازحه ؛ مايكذب مازن الي بقلبه على لسانه
تنهد فيصل بقله حيله سيره هالبابا تمشي على كل لسان ومسكوها عليه : بلبس ثوبي واتمنى تخلصين بسرعه ماعندنا وقت جدتي تتوعد بي
الوجد ابتسمت وهي تشوف انفعاله وكان معصب عليها بس مو موضح لها وواضح انه معصب من سحب الثوب بعصبيه ولبسه
الوجد : فصولي زعلان؟
فيصل بفهاوه او مو مستوعب الدلع الي يجيه هو متعود على الجفاف "فاصولياء" : هاه؟
الوجد رفعت حواجبها : شفيك حبيبي؟
فيصل يسكر ازار ثوبه : الظاهر عليك حراره
الوجد : افا ي فصولي افا صدق ماتوقعتها منك
فيصل : ابك انتي عيون فصولك بس مستغرب يعني
الوجد خربت الجو الرومنسي : لاتصدق ي فاصولياء
فيصل ابتسم : ايي كذا متعودين حنا
ام نواف بصراخ : يافيصللل يافهددد ياشيهانهه ياوجددد
فيصل : امي تنادينا يلا اخلصيي
الوجد : يالولد العاق رح لامك تناديك
فيصل : بروح وبقول لها تمشي وبتلك
الوجد ؛ ماتقدر
فيصل طلع من الغرفه : اي اوريك بس ارجع
راح فيصل وضحكت الوجد
،
ام نواف عند الدرج تنادي عيالها الي مالهم ظهور
ام عبدالاله : خلاص ياوخيتي امشي هم عندهم سيارات يلحقوننا
ام حنان : وهي صادقه امشي معنا
ام نواف : اصبري انا اعرف عيالي حمير مجمع مايمشون الا وهم قدامي
فيصل وفهد وشيهانه ببدايه الدرج واقفين : هلا يمه
ام نواف : شرفتو يلا استعجلوو مشينا !
شيهانه : ماخلصنا بروح مع فهيدان
فيصل : وجدي ماخلصت
ام نواف تقلد فيصل : وجدي ماخلصت ، انجز
فيصل : روحي يايمه مع خالاتي وحنا بنلحقكم
ام نواف ؛ بمشي لكن خمس دقايق ماشفت سيارتكم تتبع سياره سواق خالاتكم ياويلكم
فهد : لاتقلقي
ام نواف : يلا فارقوني عيال الفلس
حنان : امم خالتي حتى انا باقي اعدل ميكبي خلاص روحو انا بلحقكم
فيصل سكر اذانه ونطق : ماسمععع احد يقول بمشي معكمم
فهد : تعطلت السيارة
شيهانه : وانا بروح بسيكل ماش مايمديك تجين روحي مع امتس
حنان : سياره فيصل وش زينها
فهد : متعطله كذلك
ام نواف فهمت قصد عيالها ونطقت : خلاص حنان امشي معنا
تأفأفت حنان ورحت مع خالاتها والتفتو عيال محمد على بعض وسوو" كفك "
شيهانه : باخذ ميمي معي وبمشي مع فهيدان فيصل يرحم امك لاتتأخر ترى امي وجدتي متوعدات فيك انجز
فهد : أنا في السيارة، إذا انتهيتي تعالي إلى هناك انتظرك
شيهانه : ايه يلا خلصت خذ ميلا وبلبس عبايتي واجيك
طلع فهد ونطق فيصل : بنتأخر شوي
شيهانه وهي تلبس عبايتها : تستهبل اقول ترى الطريق طويلل يمدي تخلص الميكب بالطريق
فيصل : يلا تم شوي والحققكم
شيهانه: العنود اخذت ميلا ومدري وين اختفت بروح ادرورها
ابتسم فيصل وراح للغرفه يشيل الوجد ضروريي يطلعها من الغرفه
وشيهانه راحت للعنود تاخذ ميلا وخذتها وراحت مع فهد
فيصل دخل الغرفه ونطق : بنت واحد ثنين ثلاثه ماخلصتي ترى بتصرف معك تصرف ثاني
الوجد : باقي شويي فيصل اصبر
تقدم فيصل لها ونطق : مالبستي قومي البسي بعدين حطي مكياج يلا قومي قومي
مسك يدها فيصل يقومها
الوجد : فيصل البس اخر شي
فيصل فتح الدولاب : لا الحين البسيي
الوجد : وش مخطط عليه انت ؟
فيصل مخطط على خطه تكمل مكياجها بالسياره لان الطريق طويل بين ديرتهم وديره خالاته تقريباً ساعه : مافي شي شرايك بهذا الفستان حلو البسيه
الوجد طلعت فستان صيفي: لا ماحبيت ابغى هذا
فيصل مسك الفستان ويشوفه ومو معجبه : برد ترى وبعدين وش ذا خايس ماحبيت
الوجد بعناد : مالي دخل حبيته وبلبسه
فيصل رجع الفستان بالدولاب : ماش ماهو بحلو مفصخ وش يستر
الوجد طلع فستان ثاني : اجل هذا
فيصل : ضيق مو حلو غيري
الوجد : ماعندي
فيصل رفع حواجبه : الله وكيلك كل هالفساتين وماعندك؟
ضحكت الوجد ونطقت : صدق ماعندي هذا لبسته وهذا على قولتك مفصخ
فيصل تكتف : طيب وش الدبره؟
الوجد ضحكت : امزح معك فستاني جاهز
فيصل تنهد براحه : يلا البسيه
الوجد : بحط ميكب قبل
مسكها فيصل يمنعها تروح للمرايه تحط ميكب : لالا البسي عشان المكياج مايروح مع اللبس وكذا
الوجد : ماني مرتاحه على اصرارك هذا
فيصل : طيعيني نصيحه البسي قبل
الوجد : اوك مو مشكله بلبس اوردي مايفرق
فيصل : ياويلك ان طلع ماهو محتشم ترى هناك الوضع غير عن هنا
الوجد : ستوب فصفص الا فساتيني ماسمح لك تتكلم عليهم ترى احبهم
فيصل ضحك : الحمدلله والشكر قومي البسي بس تأخرنا
الوجد اخذت فستانها وراحت تلبسه
فيصل جلس على السرير وجاه اتصال وبلع ريقه : هلا يمه
ام نواف : يالتسلب الاجرب وينك ماشوفك بالطريق؟
فيصل يحك شعره بوهقه : شسمه ذاك
ام نواف : وشهو تهرج زي الاوادم
فيصل : حنا بالمحطه اعبي بانزين
ام نواف : ايه زين توقع للطريق ولاتسرع
فيصل : سمي على خشمي
ام نواف سكرت الخط ورفع انظاره وشاف الوجد طالعه ولابسه فستانها وتعدل شعرها
تخدر فيصل من جمالها وصفر بحب : صاروخ لعنبوك وش هالزين !
الوجد تقدمت لفيصل ونطق : شرايك صدق حلو؟
فيصل مسك يدها وخلاها تدور حول نفسها : حلو هو لكن تحسينه حق بيت
الوجد زمت شفايفها : ليش؟
فيصل رفع اكمام الفستان على كتوفها ونطق : برد يابوك برد عليك مايصير تلبسيه هذا
الوجد : مو برد داخل عند الحريم
فيصل : طيب خذي شال احتياط
الوجد : بختار شال بيج شرايك؟
فيصل : الي يعجبك
الوجد اخذت الشال حطته على السرير ورجعت جلست تكمل ميكب
اما عند فيصل الي ارخى كتوفه بقله حيله متأخرين مرهه والديره بعيده والوجد تحط ميكب وامه تهدد وتتوعد
وقف وراها ونطق : بس هذا المكياج الي تستخدمينه
الوجد : ايوه الشنطه ذي كلها بعدين تعال اول مره تسألني
فيصل : لابس قومي شوي بشوف طول الفستان
الوجد عقدت حواجبها بغرابه من تصرفات فيصل وفعلاً قامت
فيصل نزل لمستوى فخذوها وشالها على كتفه ووقف
الوجد تضرب ظهر فيصل : تستهبلل نزلنيي ماخلصت نزلنيي
فيصل فتح الباب وطلع من الغرفه : عطيتك وقتك لكن طلعتي بارده و بطيئه
الوجد بصراخ : نزلني تبغاني اروح وماحطيت ميكب !؟
فيصل ينزل من الدرج : حاليك ربي بمكياج ولابدون
الوجد : فيصل نزلني خربت تسريحه شعريي
فيصل سكت ولارد عليها
الوجد : نزلني والله احس الدم كله تجمع براسيي
طلع فيصل من البيت وكانت سيارته بالحوش ، فتح باب السياره ودخل الوجد بالسياره
حط يده على كتوف الوجد يمنعها تنزل وهو يزين باب السياره عشان ماتنزل "امان"
الوجد تحاول تنزل : بعد عني فيصل خلني اكمل مكياجي
فيصل : ثواني بسس اهجدي
الوجد : وش تسوي انت؟
فيصل سكر الباب : ياكثر اسالتك ياوليدي
الوجد حاولت تفتح الباب بس ماقدرت وحطت يدها على البوري وازعجت سابع جار لهم
فيصل واقف عند باب مدخل البيت ويأشر لها تسكت وترفع يدها عن البوري
بس الوجد معطيتها وضعيه ارى لكن لااسمع وهي قاعده تشوف فيصل وفاهمه عليه بس ماتبي تسمع وش يقول
فيصل فقد الامل ودخل البيت يركض ودخل الغرفه وجمع الميكب بشكل عشوائي بشنطتها وعبايتها ونقابها ولاينسى الشال ورجع يركض وشوي ويطيح وهو خايف لو طاح بينكسر ميكب الوجد وتزعل منه
فيصل فتح الباب وحط اغراض الوجد بحضنها : ازعجتي جيرتنا
الوجد : تستهبل فيصل وش هذا؟
فيصل : مكينه سياره ، اغراضك
الوجد : ايوهه عارفه بس ليش جبتهم
فيصل تنهد : استيعابك هالفتره ماش
سكر الباب فيصل وركب من جهه السايق وحرك السياره
اخذ شنطه الميكب ورجعها بالمرتبه الثانيه ونطق : البسي عبايتك
الوجد مو مستوعبه شي ولبست عبايتها
: تغطي اذا مسكنا الخط اكشفي وكملي مكياجك
الوجد تغطت : كان مخليني بالبيت اخلص ميكبي اشوا
فيصل : لعنبو ابليسك من العصر وانتي على شعرك
الوجد : لازم ياخي بعدين ترى انت مستعجل متى يمدي اخلص ميكبي؟
فيصل : بعيد بيت جدتي يبي له ساعه ارتاحي
الوجد : اهاا حلو والله يمدي اخلص ميكبي
فيصل : الله الله يمدي
مسافه الطريق وطلعو من ديرتهم ومسكو الخط المظلم
الوجد حطت طرحتها على كتوفها وفتحت مرايه السياره وبدت تحط الكونسيلر
فيصل نظره للطريق ونظره للملاك المشغول يحط ميكب جنبه
فيصل حط شيلات على ذوقه وحان وقت الهواجيس ماسك الطاره وباله مشغول بدون سبب ! مو صاحي انقذوه
شيله ورا شيله والوجد من كونسيلر لـ ايشادو : فصولي حبيب قلبي
فيصل فز من وسط هواجيسه : لبيه
الوجد نزلت الفرشه بحضنها والتفتت لفيصل ونطقت : تحس الايشادو مدموج؟
فيصل مايدري وش هو الايشادو وسلك لها : منتاز
الوجد : كويس الحمدلله
ابتسم فيصل والتفت يركز على الطريق
اتصل جوال فيصل ورد : لبيه يايمه
ام نواف ؛ لعنبو ذا الراس وينك ؟ جدتك تحراك
فيصل : مسافه الطريق وحنا واصلين
ام نواف : خمس دقايق ماجيت ترى مالي دخل بالي يصير من جدتك
فيصل : يلا معليه كم ضربه واطلع سليم
ام نواف ؛ استعجل والله لو انها صنعه صاروخ
فيصل: اكتشفت ان المكياج اصعب من صناعه الصاروخ
ضحكت الوجد : بلا شك
ام نواف : اهم شي توصلون بالسلامه
فيصل : توصون شي ؟
ام نواف : نبي راسك انت وحرمتك
فيصل بأبتسامه : دقايق وحنا واصلين
ام نواف ؛ اتحراكم
ابتسم فيصل وقفلت الخط ام نواف
: كم باقي ونوصل؟
فيصل ؛ تقريباً نص ساعه
الوجد : تونا
فيصل هز راسه بمعنى "ايه"
استمرت الوجد تحط ميكب وفيصل بهواجيسه
تقريباً الوجد خلصت الميكب بس باقي كذا خطوه وهي الان بأصعب خطوه "الايلاينر " تحتاج هدوء وتركيز وعدم حركه والسياره ابداً ماتساعد انها ترسم الايلاينر
الوجد : لو سمحت وقف شوي على يمين
فيصل عقد حواجبه : فيك شي؟تعبانه؟
الوجد : لا برسم الايلاينر
فيصل هز راسه بيأس : اما عاد ! اوقف عشان ملوي ؟
الوجد : ايوه وهالملوي له اسم
فيصل : مايهمني اسمه
الوجد : كيف تبيني ارسم الايلاينر
فيصل : ماهي بسياره ذي حصه فنيه
الوجد : حاولت اضحك بس ماش يلا بليز وقف
فيصل يحارشها : عشانك ماضحكتي مافيه
الوجد : نظامك كذا ؟ اجل ماني نازله مسلمه على جدتك
فيصل غمز : اشيلك على كتفي واذا امكن بحضني بعد شرايك بس
الوجد ارمشت رمشات ورا بعض : فاصولياء يلا
تنهد فيصل بقله حيله وفعلاً وقف على جنب وتكى ويطالع فيها بيشوف وش تاليه هالوقفه
الوجد اخذت المرايه واعطتها فيصل : امسكها كذا
فيصل مسك المرايه ورجع تكى يعاين فيها
فتحت الوجد الايلاينر واخذت شهيق زفير وعدلت وزنيه المرايه الي مع فيصل وبدت ترسم الايلاينر
فيصل ميل شفايفه بأستغراب معقوله هالايلاينر صعب لهالدرجه؟
الوجد ضبطت العين الاولى بس الثانيه عجزت تضبطتها وتأفأفت بطفش ؛ افف
صارت تمسح وترسم وفيصل يراقب تصرفاتها
الوجد رفعت انظارها وطالعت بفيصل : لاتطالع فيني وترتني
فيصل : معليك كملي بغمض عيوني
الوجد ابتسمت ورجعت لتركيزها بالايلاينر واخيراً بعد بضع دقائق ضبطت الايلاينر بكل عيونها
ابتعدت عن المرايه وسكرت الايلاينر ورفعت انظارها وطاحت عيونها بعيون فيصل
فيصل شاف عيونها الي مجملتها بالميكب الناعم الخفيف وفهى بذوبان : لعنبوها عيونتس تذبح بدون سلاح ماتمهل المذبوح نطق الشهاده
ابتسم الوجد بوسع ثغرها : ياحياتيي والله احس استحيت عجزت ارد سوري
فيصل خفيف مايقدر يمسك نفسه اذا شاف ابتسامتها وغمارتها : اقربي بشوف مكياجك زين
الوجد بكل برائه قربت وعلى بالها صدق بيشوف الميكب بس نيته غير
حط يده ورا راسها وقربها اكثر ونطق : اسف ماتحمل جمالك
حدثت قبله الحب
ابتعدت الوجد بحياء ونطق فيصل : ليتك ترخين نفسك لكن الظاهر عادك تخافين من قربي لك
الوجد شبكت يدينها ببعض بحياء وخجل : مو مساله اخاف بس مدري والله بس مو خوف
فيصل حرك السياره : ماقتنعت بس بمشيها
الوجد التزمت الصمت وعضت اصبعها تخفف خجلها
فيصل شافها بطرف عين وفهم حياها مو معقوله احد يستحي من رجله؟ معليه هذا نادر ماتلقونه الا عند الغامضه
من خجلها نست تحط مسكره وروج !
فيصل تكى وتنهد : خلي عنك الاحتراج وكذا خلاص تهرجي ياحلالي
الوجد خرجت عن صمتها : خلاص فيصل على زق لاتصير رومنسي
اتسعت عيون فيصل بصدمه : ارجعي خجوله خلاص
الوجد طلعت المسكره : صاير رومنسي وحنا ناس نستحي شوف شوف وجهه القارئه مستحيه متخبيه تحت البطانيه من الحياء
فيصل التفت وشاف القارئه المستحيه "انتي الي تقرين البارت" : والله مستحيه بالحيل
الوجد حطت الروج ونطقت : متى نوصل ؟
فيصل : شوي بس
،
بيت الجده
ام عبدالله : هه عاد يمه جبت لتس بنتس القاطعه
الجده : الله يسامحتس وراتس قاطعتنا
ام نواف : والله لو بيدي سكنت عندتس بس ماش العيال مسؤليه
الجده : ماجبتي عيالتس ليش؟
ام نواف : هذي شويهين وفهد عند الرجال
الجده : ابي فصيل ونواف وينهم
ام نواف : فصيل بالطريق ونواف هالحين اتصل عليه
قامت ام نواف تتصل على نواف
الجده التفتت لام حنان : وين خواتس الباقيات ؟
ام حنان : والله عزمتهن وقالن زين بس ماشوفهن للحين
ام عبدالاله : انتي تخبرين ام لمياء تتأخر ماتجي الا اخر اليل والباقيات يجن ان شاء الله
جت ام نواف : قلت لنواف وقال تم جايينكم
الجده : الله يسعد هالوجيه
جت ام لمياء وعيالها ونطقت بعلو صوتها : ارحبن ياخواتييي عسى ماتأخرنا
ضحكو خواتها لانها معروفه بخفه الدم : لاماتأخرتي الا وين عيالتس وبناتس ؟
ام لمياء ؛ لمياء وباسل يتذابحون بالحوش من يدخل قبل ولينا بعد مع اخوها عزيز جننها
ام نواف : اجل بروح ادخلهم الي تغطى تتغطى
قامت ام نواف وطلعت للحوش وشافهم يتهاوشون ونطقت : ياهلا ويامرحبا بعيال اختي ادخلو
لمياء ؛ اسفه خالتي استري على ماوجهتي
باسل : معليك منها خالتي هي الي بدت
ام نواف : ياحبي لكم تعالو سلمو
تقدمت لمياء وهي في قمه الاحراج من اخونها الي بس يتهاوشون وسلمت على خالتها ام نواف واعتذرت منها
لمياء معروفه بالخجل لكن ذربه وتهبل اما اخونها باسل وعزيز ٢٤ ساعه ضحك ماعندهم جديه بحياتهم رغم انهم كبار المفروض يتحملون مسؤليه بس ماش ولينا خويه شيهانه نفس الشكل والاخلاق
دخلت لمياء واخونها يسلمون على خالتهم ودخلو ورا لمياء وسلمو على الباقين
لمياء ولينا جلسو عند شيهانه وباسل وعزيز سلمو وطلعو للرجال
لمياء : بنت شويهين وين حرمه فيصل جيت عشانها !
شيهانه : قلت لهم يجون بسرعه بس ماشوفهم جوو
لينا : شكلها مسيطره على اخوك
شيهانه : يبنتي مو بس مسيطره على اخوي الا مسيره على البيت كله يحبها حتى فهيدان معتبرها اخته
لمياء : منجد اصلاً تدخل القلب مع اني ماشفتها بس سيرتها على كل لسان ذوق واخلاق
شيهانه ضحكت : ترى يالله يالله جابها فيصل ماتبي تجي
لينا : وراها علينا ماتبينا
شيهانه بضحكه : اسف لكم خوفتها قلت لاتعطينهم وجهه مثل طبع عهود بنات شيخه
لمياء ضربت فخذ شيهانه : حيوانه تخوفين البنت ليش
شيهانه : اغار عشان ماترقمكم هي كل من هب ودب اخذت حسابه
لمياء : هين تجي جمان اعلمها عليك تعرفين جمان جديه
شيهانه : جمان امنعيني منها تعطيني محاظره طول بعرض
لينا : بنات حنان ليش نظراتها كذا؟
لمياء : حنان هي كذا لاتهتمين لها
شيهانه : تتوقعون تجي عشيرتها رحاب؟
لينا : اكيدد تجي ماتوفر ذيك
شيهانه تنهدت بضيق : لاحول ولاقوه الا بالله
لمياء عقدت حواجبها : عسى ماشر شويهين شفيك؟
شيهانه : ادري بهن يضايقون وجيد
لينا : مين وجيد؟
لمياء : اظن زوجه فيصل
شيهانه : ايه الوجد
لينا : واو اسمها خطيرر يجنن
لمياء : منجد ، تسكتهم بكف
شيهانه : ماتسكت الوجد تضرب وتسب وتهاوش بس اخاف عليها من كلامهم
لينا : لاان شاء الله ماعليها خلاف بصير محامي لها
لمياء : بنحطها بعيوننا
دخلت ام جمان ووراها ام رحاب وسلمو على بعض
ام رحاب تتلفت : وينها حرم فيصل؟
ام نواف : مابعد جت
ام جمان : هو! ابك حنا جايين عشانها وراها مابعد جت
ام عبدالاله : بالطريق وانا اختس
جلست ام جمان وقامت لمياء تقهوي خالاتها واخذتهم السوالف
،
مدخل بيت الجده الكبير الي بوسط مزرعه ونخل
فيصل وقف سيارته ولبس الكاب بما انه يمون على خواله مايرسم عندهم
والوجد عدلت ميكبها
فيصل نزل ونزلت الوجد ومسك يدها ويمشي بأتجاه باب البيت : يابوك لاتهتمين لكلامهم
الوجد هزت راسها : اوك بحاول اتجاهل لكن لاتلوميني اذا صار شي
فيصل شد على يدها : الله يلوم الي يلومك انتي بس حاولي وسوي الي تقدرين عليه واذا عاد ماقدرتي انا معك
الوجد ابتسمت ودخلت البيت ويدها بيد فيصل
تنحنح فيصل ينبه الحريم انه جاي والوجد زاد توترها
البنات قامو يركضون من سمعو تنحنح رجال الي اخذت شرشف والي اخذت مخده وتغطت فيها وتركض طالعه من المجلس وحتى شيهانه معهم
ماعدا حنان الي جالسه لاحياء لرجل متزوج !!
ام نواف : ادخل
دخل فيصل ويده بيد الوجد : سلام عليكم
الوجد من توترها شدت على يد فيصل وهمست ب: السلام عليكم
الكل قام يسلم على فيصل والوجد الا الجده الي جالسه من تعب رجولها وتهاوش فيصل من اقبل عليها
الحلو بالموضوع ان فيصل رغم سلامه الا انه ماترك الوجد يدري انها متوتره
الجده : الحق الحق يالقاطع يالي ماني بقايله
فيصل تقدم لجدته وسلم على جاسها : حقك علي ياحده
الجده هبدت فيصل بعصاتها : يملا الي وينك مختفي لاتصال ولا شي
فيصل : ياجده بيني وبينك طايح بالحب
الجده : الله اكبر ياعنتر بن شداد وين حرمتك الي تركت بناتنا وخذيتها
فيصل سحب الوجد للجده ونطق : عاني ياجده هذي حرمتي
الجده ضيقت عيونها تتفحص جسم الوجد ونطقت بكل صراحه بدون مجامله : ابك ضلوعتس شاقات بطنتس من النحف
الوجد ابتسمت : رياضه هذي
الجده : ماهي بنافعتس لاجبتي دزن ورعان
الوجد ضحكت بخفه "تسلك لها" : لاوين طفلين ويكفون
الجده : لالا فيصل واعدني يجيب لي خمس بنات وخمس عيال
الوجد بلعت ريقها بأحراج والتفتت نتاظر فيصل الي يناظر السقف يبعد الشكوك عن نفسه!
الجده : عاني اول ولد لتس سميه على اسم ابو فيصل
ام لمياء بضحكه وبممازحه : لاييمه الجيل هالتالي مايبي الا ورع وان كان ورعين
الوجد : صح طفل ولاطفلين وواجد كمان
فيصل : احس ١٠ ورعان ولا١١ ورع قليل بعد
الوجد اتسعت عيونها بصدمه : فيصل !
الجده : عاني يابنتي لازم تجيبين لفيصل فوق الثمان ورعان ولا فيصل مايصبر ويتركك
الوجد ارخت كتوفها تضايقت من تفكيرهم اول مادخلت استلموها بموضوع الاطفال هي باقي ماتخطت طفلها الي فقدته مؤخراً !
فيصل : معليك ياجده بدبسها بورع
الوجد سكتت ماعندها رد عن هذا الموضوع الحساس
فيصل فهم تعابير وجهها المتضايق من الموضوع ونطق يغير الموضوع : ايه وشلونكم شخباركم؟
ام جمان : والله على ماتحب انت قل لنا وشلونكم وشخباركم وكيف الزواج معكم
فيصل جلس والوجد جنبه ومسك يدها ونطق : والله احمد ربي مليون مره على هالنعمه ربي عوضني فيها وجدي عوض لي
حنان كشرت وقلبت عيونها بقهر
الوجد ابتسمت : ياحبيبي والله
ابتسم الكل من علاقتهم الحلوه مع بعض والكل كان يتوقع ان زواجهم عن حب جاهلين تماماً عن حقيقه زواجهم
فيصل قام : انا بروح اسلم على خوالي لاوصيكم عاد الوجد لاتضايقونها ترى مايرضيني أبداً ضيقتها
ام رحاب : لا ابدد عيوني لها
ام لمياء : وهي صادقه ام رحاب ابد الوجد بنتنا
ام نواف ابتسمت : رح ياوليدي وانت متطمن
فيصل لمح نظرات الحقد والغيره من حنان للوجد بدون سبب وابتسم والتفت للوجد وقبل جبهتها وهمس لها : اذا تضايقتي اتصلي علي
الوجد بهمس : من عيوني
فيصل ابتسم وطلع من قسم الحريم متجهه لقسم الرجال
سرعان ماراح فيصل جو البنات يركضون متشوقين يشوفون الوجد الي يسمعون عنها ولاشافوها
وقفت لمياء:حظ فيصل الصراحه فيك
لينا :سنابس يالمزيونه
جمان : واووو بيرفكت ولاغلطه متزنه انوثتك
شيهانه : هيه عاد لاتحتكون فيها
وقفت الوجد بأبتسامه : ياحياتيييي انتو تجننون عسولات والله
تقدمو البنات يسلمون على الوجد وجلسو حولها ويسولفون معها معجبين فيها وفي انوثتها وجمالها
الوجد تنهدت : افف بنات مقدر حاولت اكون برستيج بس ماقدر احس ابغى حساباتكم
شيهانه : قلت لكم ماتترك الترقيم
لمياء : خلي عنك بس ترقم بنات عاديي
لينا : سجلي عندك
ضحكت الوجد واخذت حساباتهم

____________________________
انتهى البارت ♡
رضيت بالله ربًا وبالإسلام دينًا وبمحمد ﷺ رسولًا ونبيًا)، ♡
حسابي تيك توك :Ot348285
حسابي انستا انزل فيه الروايه : Ot34828
*اعتذر عن الاخطاء الاملائيه*

تحسون فيصل والوجد من زمان ماتهاوشو؟
تعويض عن القطعه جايبه لكن هديه وبشاره البارت الجاي ان شاء الله الوجد وفيصل بيتهاوشون وحركات بركاتتتت🫣
شرايكم بالهديه حلوه صدق ماتحصلون هالمشاكل الا عند الغامضه