لاتقارنين حبي لك بأي مخلوق انا حتى بغيابك احبك

Part 41

سبحان الله وبحمده سبحان الله العظيم ♡

الدكه
تحت ضوء القمر المضيئ وشبه النار الي تتوسط بينهم وجمعهتهم وسوالفهم والحريم والرجال مع بعض بس الكل ملتزم حدوده ومحتشم
الجد عقد حواجبه بأستغراب والتفت على مازن : مازن يولدي هو انت متاكد انك دعيت فيصل وحرمته؟
مازن فك يده من شعر شيهانه "يحارشها " : ايه ناديته قال شوي واجي
الجد : ايه زين قم صب لي قهوه
فهد الي تغير 180 درجه حتى لهجته : عنك عنك انا بقهوي جدي
الكل بأستثناء مازن انصدم من لهجه فهد الي تغيرت ماكان كذا وليش صوته باللهجه العامه ثقيل ورزين احسن من لهجته الفصحى الي مطلعته بشكل غبي اكثر من مثقف !
ابو نواف بصدمه : هو انت متاكد انك ولدي فهيدان اينشتاين ماغيره؟
فهد ضحك بهدوء ونطق بصوته الثقيل : الله الله ي يبه هو انا ماغيره
جوري جالسه على طرف الدكه وبكامل حشمتها : اشك عمي مازن جننه وخلاه يطلع لهجته الحقيقه
شيهانه : لاتشكين تأكدي لان مازن اذا شرحت له يطلعني عن طوري
ام نواف : زين ماسوى هالمازن
مازن دق الصدر : شرايكم بس يلا على كل نفر ١٠﷼
ام بتال : مادي هالولد
مازن : والله ياخاله اذا ماكنت مادي ماراح تسلم من الحياه
ابو بتال : اقنعتني وانا ماداني الماديه
ضحك كل الي بالمكان وقطع هالضحك صوته الرجولي : السلام عليكم
وصوتها الهادي الانثوي : السلام عليكم
التفتو على حضور فيصل وجنبه الوجد المحتشمه : وعليكم السلام
الجد اشر على المكان الي جنبه : ياهلا ويامرحبا اقرب اقرب
التفت فيصل للوجد وحط يده على ظهر الوجد ودخلها الدكه قبله ودخل وراها
الوجد جلست جنب جوري على طرف الدكه وفيصل جلس جنب الجد سلطان
فيصل : ايه قلتو في بشارات وحركات
مازن : يارب بشاير خير عشان اقوم ارقص مشتهي ارقص
شيهانه : فيفي عبده الديره
مازن رفع حاجبه والتفت على شيهانه وناظر فيها من فوق لتحت : كش وجهه وجهه هالجراده
شيهانه ناظرت مازن لثواني تدور ذبه وشافت وضعه الي متكى على المركى ونطقت وهي تضحك : وش ذا اليوكن المنقلب ! ويتكلم يشيخ دق على نجم بدال لاتضحك
مازن تحسس وعدل جلسته ونطق فيصل : اليوكن اشوا متعافي لكن مازن كراسيدا هرفانه
مازن : هيه هيه وش نظامكم ذا انا واخوي على عمي؟ جحده جويجه انتي المحزم الظافي الوافي الكفو المحزم بنت كفو صيري بصفي
الوجد ميلت راسها : زوزو انا دايم بصفك
مازن تنهد وارخى ظهره على المركى : احسدك ي فصيل على هالاسلوب
فيصل شرق بالقهوه وكح ونطق من بين كحاته : ماعطب علاقتي مع الوجد الشهر الفات الا عين مازن اهيب ولاتسدك كل ماتكلمت الوجد قال احسدك تكفون عطوني غساله
الوجد : لاحظت عين مازن حاره تعدم الشخص
مازن كشر : مالت عليكم كنت امدحكم اقول الكولد برو حقي بس الحين بسميكم الغسال حقي
فيصل: امنعنا من اسمائك ذي وقل لنا ياجد وش هالموضوع الخطير الي ملزم نجي عشانه؟
نزل فنجان القهوه السعوديه ونطق بكل جديه : انا جمعتكم من اكبركم لاصغركم بعتذر عن كل غلط سويته بحقكم واولهم فيصل والوجـ...
قاطعته الوجد : ياجدو خلاص الموضوع قفلنا عليه مالها داعي تعتذر خلاص حبيبي
فيصل : وهي صادقه ياجدي الموضوع حلينا بيننا ومايحتاج تعتذر بين بني ادم
الجد بأبتسامه : الله يرضالي عليكم اجل خلنا نبدا بالبشاير
فهد : سم
الجد : العنود وفارس ماشاء الله رجعو من سفرتهم وباتسر جايين ان شاء الله بنستقبلهم
الجده بفرحه : هو انت صادز بنتي عنيد ماغيرها بتجي؟
الجد : ايه ي عميشه بنتس عنيد
مازن كلعاده يقوم ويرفع طرف الثوب ويقول الشيله المعتاده "جتني بشاير خير واصبحت مسرور "
الجده ضحكت ونطقت : ابك ابلشتنا اربض مكانك خلنا نسمع البشاير الثانيه ، كل هذا شوق؟
مازن جلس : ايه صح ماني مشتاق لاختي صح ماني مشتاق
ام بتال : توصل بالسلامه يارب
الوجد : يمامييي مره متحسمه لها احسها بتكون رسميه معانا
فيصل : ايي لاتحسين تاكدي بتجيك خدودها حمرر من الحياء
ضحكت الوجد : تحمستتت
الجد : هه عاد خل نكمل البشاير الثانيه ، نواف وبتال وزوجناهم وفيصل وزوجناه وافتكينا من طيشه
فهد تنحنح وتعدل من عرف ان موضوع الزواج بينفتح ثاني مره وهو اساساً يحب بس ماكون نفسه لاوظيفه ولاشي كيف يتزوج!
فيصل لاحظ توتر فهد الجالس جنبه وحط يده على كتفه يهديه ونطق بهمس : اهدى اقدر احلها لك ونزوجك خيال بدال الي بيخطبها جدي لك
فهد اتسعت عيونه بصدمه من موضوع حبه لخيال : وشدخل خيال ؟
فيصل : لاتنكر ياخوي اسمها لحاله يخليك تفز من مكانك
فهد : طيب لاتعلم احد!
فيصل : لابعلم الكل بحبك عشان حبك مايروح تالف !
فهد : فيصل بلا حركات ورعنه
فيصل : مو حركات ورعان اني اساعدك تخطب خيال البنت بنت ناس واصول ومحترمه وش الي يردك عنها!
فهد : وظيفه ماتوضفت
فيصل : انت خريج السنه الفاتت وحارم نفسك الوظيفه تنتظر تدرس الماجستير؟ خلاص ياخوي قدم على وظيفه وانا بنفسي بساعدك
فهد : اكيد بحرم نفسي الوظيفه اذا انت وابوي مصرين تدخلوني قطاع عسكري وانا ميولي قطاع صحي
فيصل : بس هذه همك؟ اقنع ابوي ولايهمك !
فهد : الله يكتب الي فيه الخير
فيصل بأبتسامه : اللهم امين يارب
الجد : وقلنا نزوج فهيدان ومازن
مازن بلع ريقه : انا ولا الاستاذ فهد ؟
الجد عقد حواجبه : كلكم
مازن : انا صغير توي يايبه
دخلت عهود وهي فاكه شعرها وشايله الطرحه وحاطه ميكب !
العيال نزلو روسهم والبنات طلعت عيونهم من مكانه من جرائتها كيف تدخل على مكانه فيه عيال وهي مو حاطه الطرحه على شعرها وفوقها تلعب بشعرها قدامهم!
الوجد بهمس : بجيحه !
شيهانه : مرهه
الجد لاحظ هدوء العيال ونظرات البنات والتفت وحصل عهود ونطق : عهود ياولدي وراتس ماحطيتي الشيله على راستس عساتس نسيتي؟
عهود نطقت بنبره توضح انها تقل ادبها مع جدها : لا مانسيت ياليت ماتتدخل فيني
الجد : استري نفستس وحشمي هالرجاجيل الجالسين قبالتس شواربهم تعداتس حشميهم واستري نفستس عنهم
تجاهلت كلامه وتقدمت ومرت من جنب فيصل وجلست على اطراف الدكه ورا فيصل قريب منه !
الوجد اتسعت عيونها بصدمه من حركتها : على الاقل اربطي شعرك وامسحي الميكب واجلسي جنب عمامي وعماتي ضاقت الاماكن عشان تتلصقين بالرجال؟
ابو الوجد : وجيد يابابا تعالي عندي اتركي هالمشاكل
عهود ناظرت اظافرها ونطقت بغرور : انتي يالي امك ماتبيك جايه تكلميني؟ انشغلي بنفسك وحلي مشاكلك مع امك
الوجد وقفت ونطقت بعصبيه : على الاقل ماما ماتأذي الناس زي بعض الناس وصلت فيه انه يسممني وقصدي واضح
ام الوجد وقفت : مجلس مافيه احترام لبنتي انا مابيه !
الوجد التفتت لمصدر صوت امه وفتحت فمها من الصدمه معقوله امها تتدافع عنها؟
اكملت كلامها هند : مشاكلي مع بنتي مالك حق تتدخلين فيها ياقليله الحياء عندك شي تعالي تكلمي معي ماتدقين بنتي بالحكي الفاضي
فيصل ومازن وابو الوجد واخوانه والبنات استبشرت وجيههم من دفاع ام الوجد لبنتها الوجد الي بينهم مليون مشكله ومشكله وش الي تغير !
الجده : معليتس يام الوجد بنتس لها احترامها وتقديرها اجلسي مع بنتس وانتي ياعهود ان شفتس توطوطين من عند هالدكه حشيت رجلينتس حش يلا فارقيني بسعه تقلعي الله لايبارتس بعدوتس عطيناتس وجهه وصدقتي يلا من هناتس تقلعي
عهود تخصرت : معليش جدتي تطرديني عشانها؟
الوجد : يمين بالله ماتقلعتي ترى عدلت ديكور وجهك المايل
الجده بلعو صوتها : تقلعي لابوتس من بنت
عهود زفرت بعصبيه وطلعت من الدكه وهي معصبيه
فيصل سحب الوجد تجلس جنبه وهمس بأذنها : يازين الغيوره ياناس قمت اتأمل الغيره
الوجد لازالت معصبه من عهود : مو وقتك فاصولياء
فيصل مستلطف عصبيتها : ومعصبه بعد؟ كثيره كذا !
فضحتها ابتسامتها : فيصل خلاص
فيصل ابتسم : خلاص خلاص يامدام نفيخه لاتنفجرين
الوجد بصدمه : زايد وزنييي؟ اتفاهم معاك بعدين جدي يطالع فيك
فيصل رفع انظاره لجده الي ينتظره يخلص النقاش مع فيصل
: خلصت نقاشك الخاص؟
فيصل : الله الله
الجد : ايه واقولكم نزوج فهيدان ومازن
فيصل : زوجه فهيدان عندي
ابو نواف رفع حواجبه : تخطب لاخوك وابوك حي؟
فيصل : لا يبه ماقصد كذا قصدي يعني الي احس انها مناسبه لهم
ابو بتال : ومنهي سعيد الحظ؟
الوجد : صاحبتي
ابو الوجد : اي وجده؟
الوجد : صاحبتي خيال
ابو الوجد : والنعم الخويه والله انها ادب واخلاق واصل وفصل وابو البنت خويي ابد الروح بالروح وتصلح نناسبها
الجد : تهقى يعني؟ وش شورك يافهد؟
فهد : الله يكتب فيه الخير ان شاء الله دامها بنت ناس واجوديه ليه مانناسبها
ابتسم كل الموجودين وبدت التباريك وسوالف العرس
التفت الجد : وانت ي مازن وليه ماتبي تتزوج بنت الـ....
قاطعه مازن : بكمل دراستي
ضحك فيصل : اخبر البنت تقول كذا
جوري : مالك داعي يمازن بنشوف ورعانك
مازن : اذا جاب فيصل ورعانه ذاك الوقت اجيب ورعاني
الوجد : اطلبهم من الموقع الحين
فيصل : يراسي عيالي ينطلبون من موقع
ضحكت ام نواف : احفادي الاصطناعيين
الجد : لالا عاد انا حاط شروق براسي بزوجها لك
مازن بلع ريقه بصدمه وفرحه بنفس الوقت مشاعره متضاربه نط من الفرحه : يس يس قصدي اوهه لا لا
الوجد شبكت يدينها ببعض: احس احس موافقه بداله
جوري : اقول جنبي عن الموضوع انتي جربتي الموافقه باقي انا وشويهين خلينا نوافق بدال مازن
الوجد : ماقد وافقت فيصل حلف ياخذني وانت مابيه بس شاءت الاقدار صرت انا ابيه
فيصل : يالبيه بس
شيهانه : مازن بتكمل دراستك الحين ولا؟
مازن بممازحه: الرجال ماله الا بيت حرمته وش له بالدراسه
جوري : مازن عاكس كل شي بالحياه
الجد : عاد توظف وابشر ببنت الاجاويد
مازن : ان شاء الله
الوجد قامت وقبلت راس جدها : تصبح على خير جدو
الجد ابتسم : وانتي من اهله يابنتي
ابتسمت الوجد وطلعت من الدكه وبعدها ببضع دقايق جوري وشيهانه طلعو والين اختلت الدكه من النساء وجلسو الرجال سوالف
الجد : فيصل وانا جدك
فيصل يشرب القهوه : سم
الجد : بتصك الثلاثين وعيالك مالعبو قدامك !
تنهد مازن بضيق بدال فيصل لان الموضوع هذا المفروض ماينفتح !
فيصل عقد حواجبه : وش تبيني اسوي اصنعهم صناعه؟
ابو نواف : يايبه الله يهديك حرمته صغيره توها ببدايه العشرين وانت شفت حملت وسقطت الجنين
الجد : لا ماهو بعذر عمرها جدتها جابت جابر وعمرها ١٥ سنه وبعدين الوجد كبيره ٢١ سنه كبيره
ابو بتال : ي يبه كان في فرق بالاجحام زمان اول تجيك الوحده عمرها ١٥ بس زولها زول ثلاثينيه الحين غير غير مو زي اول
ابو الوجد : ي يبه لاتضغط عليهم خلاص الله كاتب بالي يصير محد مننا يقدر يسوي شي
فيصل تنهد وقام ونطق بعصبيه : لاحول ولاقوه الا بالله موضوع الورعان هذا لااسمع سيرته لاعندي ولاعند الوجد
طلع فيصل من الدكه وحواجبه معقده واعصابه تالفه كل مايفتحون سيره الاطفال يتذكر الجنين الي توفى وفتره حزن الوجد مايحب يتذكر ذيك الفتره
مازن ناظر فيصل الين اختفى فيصل عن انظاره ونطق : يبه حرام عليك الولد مر بمرحله صعبه بورعهم الاول ليه تذكرونه
ابو نواف تنهد بضيق : لاحول ولاقوه الا بالله
سكت الجد سلطان ومارد عليهم وقام وطلع من الدكه
،
غرفه فيصل ..
الوجد جالسه على الكنب وبحضنها القطوه وفيصل مو موجود
الوجد رفعت القطوه بيدينها لفوق : تددننين احبك واحب عيونك يالالي تعالي افضفض لك شويه انا وعدت فضفض احط له ميكب بس مو موجود الحين وش نسوي؟
بطبيعه القطوه ماترد اكيد ماردت
الوجد شالت القطوه بحضنها واتجهت لسرير وانسدحت : شرايك ننام؟
شغلت الايباد حقها وانسدحت وشغلت مسلسلها الطويل وهي والقطو يتابعون المسلسل
تثاوبت بنعاس وظلت تطالع في المسلسل الين غلبها النوم او بالاحرى غفوه ادنى حركه تصحيها والايباد لازال مشغل
والقطوه نامت بحضن الوجد
بضع دقائق طويله شرف اخونا في الله الي ناسي انه متزوج دخل وهو يتنهد
شال الشماغ من على راسه ورماه على الكنب وخلل اصابعه بشعره ونطق بصدمه : اوه نايمه؟ اما عاد
تحركت الوجد بأنزعاج من حركه فيصل المستمره وفوقها كلامه مايحترم النايم ابداً !
جمد مكانه لدرجه كتم انفاسه خوفاً من انها تقوم وتفصل عليه عاد الوجد والنوم قصه حب
زفر بهدوء من رجعت نامت : الحمدلله
تقدم لها وقرب وسحب الايباد بهدوء من عندها وقفل الايباد ونزله على الطاوله والتفت لها بلحظه تأمل سرعان ماكشر بغيره من شاف القطو نايم على صدرها !
نطق بينه وبين نفسه : انا وانا رجلها وحلالها ماخلتني انام على صدرها كيف انت يابس تنام تقلع ياشيخ
حس نيران الغيره من قطوه وشال القطوه بطريقه خطاء مما ادى الي مواء القطوه بألم من مسكه فيصل الغلط
الوجد فتحت عيونها من سمعت صوت قطوتها وطاحت انظارها على فيصل الواقف وبيده القطوه وشايلها بطريقه خطا
نطقت بخوف : لافيصللل حرام عليك مو كذا تعورها
فيصل لازال ماسك القطوه : يينت الحلال ارقدي وش هالنطه هذي كلها عشان بس؟
الوجد اخذت القطوه من فيصل : اكيد بنط عشانها اذا مسكتك لها خطا
فيصل بشماته : اللهم لاتجعل همي قطوه
الوجد كشرت ونطقت بممازحه : اللهم لاتجعل همي سياره
فيصل نطق وهو يضحك : رديتي الحركه تحسب لك
الوجد ضحكت وجلست على السرير : بما انك صحيتني بكثره حركتك تعال اسوي لك ميكب وسكن كير
فيصل سكر اذانه ورفع نبره صوته وبدا يغني
الوجد قرصت جنب فيصل : اسكت فضحتنا
صرخ فيصل لان عنده فوبيا اللمس من منطقه الجنب
ضحكت الوجد من صرخه فيصل : كل رجل داخله انثى رقيقه
فيصل وهو يحك جنبه مكان القرصه : ايه داخلي سوسو الي تحشين فيها تحسبينها ماتفهم
اتسعت عيون الوجد بصدمه : اما تعرف ان سوسو انت؟
فيصل : الصدق اني ماستوعبت الا عقب فتره اني سوسو طول بعرض وشنبي يوقف عليه الصقر واخرتها اسمي سوسو؟ والله جرحتي رجولتي بهالاسم
الوجد : اوه ياعمريي والله خلاص احس جاني تأنيب ضمير انا اسفه
فيصل سوى بيدينه كذا 👈🏻👉🏻 ونطق : اقطعي العلاقه دام العلاقه فيه اعتذرار ورسميات !
الوجد رفعت حواجبها ماتوقعت الحركه منه : كيف كيف للحركه؟
فيصل عاد نفس الحركه : كذا
الوجد ضحكت : فيصل فضيعععع مواصل اكيد وش هالحركه الجديده هذي
فيصل : شرايك بس اضبطك انا
الوجد ارخت ظهرها على السرير : والله ثقه ابداع
فيصل جلس قريب منها : تعبانه يابوك؟
الوجد عقدت حواجبها وهزت راسها بالنفي : لا ليه؟
فيصل : الساعه ١٠ اليل وشفتك نايمه قلت اكيد تعبانه بالعاده تنامين ١ ولا ٢
الوجد : اهاا لا عشاني قايمه اليوم بدري وتعبت ونمت شوي واحس صحصحت
فيصل : عودي ارقدي محد يصحصح بنص ساعه غفوه
الوجد : لو قلت لك شي بخاطري بتسويه عشاني؟
فيصل : اكيددد بلا شك لو تبيني اذبح لك واحد ذبحته
الوجد : بسوي لك سكن كير بخاطري والله
فيصل تنهد وقام : امنعيني من هالمواضيع
الوجد بفيس بريئ : فصفوصي بليززز انت قلت ماخلي شي بخاطرك
فيصل تنهد بقله حيله : يرحم والديك لاتطيعني هالوجهه البريئ
الوجد : فصوليي بليزز
فيصل ارخى كتوفه : امري لله
الوجد وقفت ونطت عليه من الفرحه وحضنته : احبكك
فيصل ابتسم بوسع ثغره وبادلها الحضن : ياقلب وعيون وروح فيصل انا الي احبك والله
الوجد قبلت خد فيصل : هذي هديه
فيصل عض على شفايفه : لالا ماقدر كذا كثير على قلبي ارفقي فيني ي ام محمد
الوجد ضحكت : عيون ام محمد انت تعال اجلس هنا انا بروح اجيب السكن كير
فيصل هز راسه بيأس وهو يشوفها رايحه تجيب السكن كير
جت ومعها بوكس من الكريمات وادوات العنايه : يلا اجلس وش تستنى ؟
فيصل : شرايك تكنسلين؟
الوجد هزت راسها بالنفي : نو يلا اجلس !
تنهد فيصل وجلس والوجد نزلت البوكس جنبه وناظرت فيه من فوق تحت وحطت اصبعها على شفايفها وتفكر
فيصل تعوذ من ابليس خايف من افكارها يدري بها تلبسه وردي !
: وردي امنعيني منه
الوجد كشرت : افف مايصير كذا تقفطني قبل ابدا مشروعي كنت بلبسك هيلوكيتي !
فيصل : علي الطلاق مالبس الهيلوكيتي ذي !
الوجد ضربته بخفه : وجع ترى كلها بجامه ليه توصلها للطلاق
فيصل : رميت كل كروتي ومانفع معك غير الطلاق يبنت
الوجد : ايه زين ماينفع اسوي لك سكن كير وانت لابس ثوب
فيصل وقف وفصخ الثوب : ولايهمك يجيك اطلق سروال وفنيله !
الوجد : لااا برضو ماينفع
فيصل علق ثوبه : لاينفع شفيك تحبين الشقى
الوجد : تتذكر يوم سوينا شوبنق بجده؟
فيصل ميل شفايفه : ايه ليه شفيه؟
الوجد ضيقت عيونها : تتذكر البجامه الكاروهات الي طقم معاي بس مالبستها؟
فيصل عقد حواجبه : اي وحده؟
الوجد كانت لابسه نفس البجامه : التيشيرت الاسود والسروال كاروهات اسود وابيض تتذكر؟ زي هذي الي لابستها انا
فيصل : ايي البجامه المروحه هذيك؟ مالبستها شكلها ماعجبني
الوجد : من متى اصلاً لبست بجامه ومن متى تعجبك بجامه يلا قم قدامي طقم معاي
فيصل : اعقبي بس البس بجامه تبين تسوين البليه ذي ولا ارقدي
الوجد نزلت الكريم بيد فيصل : انا اعقب؟
فيصل : ياليل ماقصدك انتي اقصد هذا البليه قومي انجزي علي وخلصي الي تبين تسوينه بوجهي
الوجد قامت من عنده وتخصرت : ماراح اسوي لك السكن كير الا لكن تقوم تلبس بجامه وتطقم معاي
فيصل ابتسم ابتسامه جانبيه : يبوك الي يشوفك يقول ميت على الكريم والخربيط ذي
الوجد تنرفزت منه : فيصل !
فيصل عدل المخده وحط راسه : بنام تصبحين على خير وراي دوام الصبح
الوجد مسكت يد فيصل تقومه : فيصل قوم يلا محد ينام الساعه ١٠
فيصل حط ذراعه على عيونه يحجب ضوء اللمبات عن عيونه : ايه انا انام ١٠
الوجد : خير فيصل؟ قبل شوي تقول عادي والحين بنام؟ وربي حركتك مستفره ترى !
فيصل : نامي يابوك
الوجد اخذت البوكس : انقلع لاتقول يابوك
فيصل سحب اللحاف ونطق يحارشها : يبوك طفي اللمبات
الوجد جلست على الكنبه : مابغى يلا نم ولاتكلمني
ضحك فيصل وغمض عيونه وبضع ثواني من الهدوء نطق : زعلتي؟
مادت عليه الوجد لانه وافق تسوي له سكن كير ليه رفض بعدين الحركه قهرت الوجد وزعلتها
قام فيصل يمثل ان ماهمه زعلها وهو داخله غير عن مظهره : احسن اجلسي هنا بروح لاخوياي
الوجد وفعت حواجبها وماردت عليه ولاناظرت فيه
فيصل استغل فرصه ان الوجد معطيته ظهرها واتجهه للدولاب بهدوء وسحب البجامه ودخل الحمام يكرم القارئ
الوجد اخذت الايباد : كريهه !
بضع ثواني وطلع فيصل من الحمام وهو لابس بجامه الكاروهات الطقم مع الوجد
الوجد ماناظرت فيه ابداً تمثل انها مركزه مع المسلسل وبخاطرها تسطر فيصل على حركته المستفزه
فيصل جلس على ذراع الكنبه ونطق : ياحلو طالع فيني
مادرت الوجد
: عطنا وجهه ياحلو
الوجد بدون لاتناظر فيه : رح لاخوياك !
فيصل مسك انف الوجد ونطق : الحلو زعلان؟
الوجد صدت عنه وابعدت يده عنها : بعد عني
تنهد فيصل وجلس بالارض على ركبه ويدينه على فخوذ الوجد : شوفي ضحيت برجولتي عشانك
الوجد ناظرت فيه وكان لابس البجامه : مالها دخل بالرجوله
فيصل بأبتسامه : ابد كل شي لعيونك يصير انا ضد البجايم ولبست وش تبين اكثر من كذا
الوجد تكتفت : مابغى منك شي رح لاخوياك الي اغلى مني بنظرك
فيصل : افااا؟ تقارنين حبي لك بـ اخوياي؟
الوجد : ايوه بقارن اذا انت زعلتني ورايح تسمر معهم !
فيصل جلس جنب الوجد وحط يده على كتف الوجد وحضنها : وان قلت لك سهرتي اليوم معك؟
الوجد حطت الايباد بحضنها : مايهم انا بتابع المسلسل رح لاخوياك
فيصل اخذ الايباد من حضنها وقفله وحطه على الطاوله : ي صعبه المنال يرضيك اروح زعلان؟ طيب يمكن مارجع!
الوجد : ويادلوع جدو انت رضيت اتابع مسلسي وانا زعلانه منك
فيصل : طيب انا اسف وحقك علي وش يرضيك؟ لحظه دقيقه اصبري
قام فيصل واتجهه لثوبه المعلق ودخل يده بجيب ثوبه وطلع لوح شوكلت صغير جايبه لها وناسيه بجيب ثوبه
التفت عليها وهو يضحك : ذايب يابوك شقليطه عليها ديون واقساط
الوجد لاارادي ضحك بحب له : مو صاحي والله
حط الشوكلت قبال المكيف لعل وعسى ترجع تجمد وناظر لها : معليه اصلاً هي هديه مسروقه
الوجد رفعت حواجبها : سارقها من مين؟
فيصل : من شويهين
ضحكت الوجد : وتقول ليه وزني زايد وهي تطفح بالشوكلاته
فيصل انسدح بالسرير: لاتصدقين شويهين اذا قالت بسوي دايت
الوجد : مستحيل اصدقها
فيصل ضحك ونطق : يلا تعالي حطي بوجهي
الوجد عقدت حواجبها : متاكد ؟
فيصل : ايي
الوجد وقفت : ياويلك تسوي حركتك قبل شوي !
فيصل : لا معليك صامل
الوجد اخذت البوكس : نشوف
فيصل استسلم للامر الواقع وغمض عيونه ينتظرها تحوس بوجهه
تربعت الوجد بالسرير عنده قريب لوجهه والبوكس بحضنها
مدت ربطه الراس ونطقت : البسه
فتح عيونه واخذ منها الربطه وقعد يقلب فيها : وش ذا؟
الوجد : صابونه ترى ربطه شعر
فيصل : ماعجبتني شيليها من القائمه
الوجد : فيصل لازمم عشان شعرك مايصير الكريم يجي شعرك
فيصل لبس الربطه بطريقه عشوائيه : لاحول ولاقوه الا بالله انا وش مسوي بحياتي عشان تعاقبيني انتي
الوجد حطت ماسك الفحم على وجهه فيصل : شكلك متصدق او داعي ان يجيك العوض وجيت انا
فيصل : لا بالله شكلي ماكل مال اليتيم
الوجد تدلك وجهه فيصل : انت اكلت اليتيم بكبره
فيصل ضحك من قلب : الله يقطع ابليسك
الوجد : خلك كذا خمس دقايق لاتتحرك ولاتتكلم ولاتضحك الين ينشف الماسك وتغسله
فيصل : طيب شسوي ؟
الوجد : هوجس سو اي حاجه
فيصل الرجل المطيع طبق كلامها وسكت وانتظر 5 دقايق على ماينشف
الوجد : ايوهه قم معاي على الغساله
فيصل : ليلنا طويل الظاهر
الوجد قامت ومسكت يد فيصل وقومته معها ووقفته عند المغسله
: نزل راسك شوي
فيصل نزل راسه شوي وبدت الوجد تفرك وجهه فيصل على الخفيف والين نظف وجهه تماماً
لمس وجهه وتقشعر جسمه من ملمس وجهه الي يظن انه ناعم !
الوجد : شفيك؟
فيصل : وتسبدييي وش هذا احس اني خكري بشرتي ناعمه
الوجد بضحكه : مافي بشره بيوم وليله تصير ناعمه تراك تتوهم
فيصل : يبوك خلصنا ؟
الوجد : نو نو باقي كثيرررر
رجع فيصل يطالع نفسه بالمرايه متعجب من شكله "يتوهم انه تغير "
الوجد : ي فيصل يماما محد يتغيير بيوم وليله العنايه اقلها شهر على مايبين الفوق
فيصل حط يده على خده يتحسس الملمس : اخيه بكرا وش يقولون عني الرجال لمني سلمت عليهم يبنتي خدي ناعم كأنه مخده ساتان
الوجد : انا طول عمري احط كريمات واعتني بوجهي ماوصلت مرحله مخده الساتان تتوهم
فيصل حط يده على خد الوجد ييده الثانيه على خده : لعنبوك مافي فرق بيني وبينك خليتيني بنت !!
الوجد : فيصل لاا مو بنت انت ولد ولد !
فيصل مسك راسه بصدمه : لاحول ولاقوه الابالله سوء المنقلب فيصل صار ناعم صار بنت لااله الا الله
الوجد : فيصل باقي فيك شنب لازلت ولد ولد
فيصل: سوء المنقلب بيجي يوم وتطلبيني احلق شنبي انا ادري لعنبوك وش هالمنتج السحري الي خلا بشرتي مخده ساتان اقلعيه عني لابارك الله فيه رجعي بشرتي المغبره الان
الوجد بضحكه : فيصلل يرحم والديك تتوهم باقي خشن
فيصل من صدمته قاعد يصرخ : يامصييتي ابك وش الله بلاني
الوجد : فيصل بدون صراخ الناس نايـ...
قاطع كلام الوجد من طق الباب ٣ طقات ودخل ابو نواف وام نواف
ابو نواف تنهد براحه من شافهم عباله صاير فيهم شي وام نواف مسكت ابو نواف الي من خوفه على عياله رجوله عورته
فيصل : بسم الله دوريات اخر اليل داهمتنا ليه؟
الوجد تقدمت تركض ومسكت عمها وساعدته يجلس : بسم الله عليك عمو شفيك شصاير؟
ام نواف : جيبي ماء بسرعه
الوجد هزت راسها برضى وراحت تركض تجيب ماء
فيصل الي صدق انه قلب بنت تقدم وحط يده على خصره : شفيكم حبايبي؟
ام نواف : فيصل؟ استرجل !
فيصل : يايي مامي بابي شفيه؟ ابك يايمه قلبت بنت احس سيطرو علي قبل تسيطر علي الوجد
ابو نواف تعب زياده من شاف فيصل بالمنظر هذا
ام نواف : صراخك وصلنا وقلنا اكيد صاير بكم شي وجيناكم
فيصل حط يده على فمه : وانا ولد بابا !
ابو نواف قام وهبد فيصل خلا فيصل يستوعب حركاته
تنحنح بخشونه : استرو على ماوجهتو
جت الوجد ومعها كوب ماء ومدته لام نواف تعطي ابو نواف
فيصل بهمس : حسبي الله عليك خليتي ابوي يهبدني
الوجد : تستاهل ليش هالمياعه ومصدق انك بنت بعد
فيصل : ٢٦ سنه ماطب بوجهي كريم تجين انتي وتحطين كريم صدمتي عيشتي
ابو نواف : وجيد وانا عمتس فيصل اليوم لازم ينام بالمقلط
الوجد : ليش ياعمو كنت بكمل التتوريال
ابو نواف ضحك ونطق بممازحه: وهذا بلانا يبنتي انتي صرتي تشكلين خطر على شخصيه ولدنا
الوجد : ماهقيتها منك ياعم تاخد فاصولياء مني
ابو نواف : يبنتي بنرجع ولدنا رجال بعد الي شفته اليوم بكفخه كف كفين ويرجع لك رجال
فيصل سجد سجود شكر ان ابوه بياخذه ولايكمل السكن كير !
الوجد : لاياعم لاتاخذه خله هنا انا يروح لبيت بابا عندي موضوع بقوله لهم
فيصل : وين وين ماعندنا بنات يطلعون من البيت
الوجد اخذت جوالها : معليش بس ضروري يلا باي
ابو نواف : وجيد وانا عمتس امزح معاتس خذي الولد وسوي به الس تبين انا مابيه
فيصل : لايبه انا ابيك
الوجد ضحكت : عموو عارفه انك تمزح بس والله صدق طرى علي موضوع ضروري بسألهم واجي
ابو نواف : ايه زين الي ودتس وانتبهي على نفستس ولاخلي فيصل يوديتس
الوجد : لا وين يوديني كلها خطوتين واوصل ان شاء الله
فيصل : لاتتأخرين ترى انتظرك!
الوجد : ترى ان رجعت بكمل التتوريال عليك
فيصل : لا خلاص امزح شرايك تجلسين عند اهلك اليوم؟
الوجد : بجلس اسبوع
فيصل : لاتفلينها عاد ساعه وارجعي
الوجد : ان شاء الله

________________________
انتهى البارت ♡
رضيت بالله ربًا وبالإسلام دينًا وبمحمد ﷺ رسولًا ونبيًا)، ♡
حسابي تيك توك :Ot348285
حسابي انستا انزل فيه الروايه : Ot34828
النجمه تدعم الروايه
*اعتذر عن الاخطاء الاملائيه*

بارت لعيون الوطن🇸🇦🇸🇦 كبرت سعوديتنا الله يديم الامن والامان يارب 😢🇸🇦
اسفه بارت قصير 😢👎🏻