لاتقارنين حبي لك بأي مخلوق انا حتى بغيابك احبك

Part33

سبحان الله وبحمده سبحان الله العظيم ♡

الصباح تحديداً بيت العم محمد ..
متجمعين العائله بالمجلس المفتوح على الدرج وكان تجمع مو عادي ابدا تجمع بناء على "الاعتذارات "
ابو نواف : يام نواف ابوي واخوي وحرمته بيجون يشوفون بنتهم
ام نواف : وويلي يجون ليش؟
ابو نواف : وش هالسوال ! بنتهم ويعتذرون منها
ام نواف قامت : ايه زين اجل بروح اسوي القهوه
ابونواف : تعالي قبل تروحين
ام نواف : خير شصاير؟
ابو نواف بجديه : بتعتذرين للوجد معهم
ام نواف : لايابو نواف وشوله اعتذر البنت اكيد انها نست الي صار بيننا
ابو نواف : انتي اخطيتي بحقها تعتذرين منها بالطيب
ام نواف : يابو نواف الله يهديك وشلون اعتذر من وغد كبر بنتي واصغر بعد خلاص اتعامل معها زين ولعلها تنسى
ابو نواف : افترضي اني اسأت لك فتره طويله وبيوم وليله احسن التعامل معك بتنسين الي صار؟
ام نواف : لابالله ماانسى
ابو نواف : خلاص نفس الشي الي تسوينه مع الوجد اعتذري منها ياالنايفه ولاترى بيصير شي ماهو بطيب
تنهدت ام نواف بقله حيله : زين ان شاء الله
قامت تسوي القهوه والشاهي والخدامه زينب تبخر
بضع دقائق ورن الجرس وراحت الخدامه تفتح الباب ودخل الجد وابو الوجد وام الوجد
ابو نواف وقف : حي الله من جانا اقلطو هنا
الجد : والله يابوك محسسني اني ضيف عندك
ابو نواف : لابالله المكان مكانكم بس تعرف نلطف الجو قبل تجي البنيه
ام الوجد : وينها الوجد؟
ابو نواف ؛ شوي وتجي
ابو الوجد : ورجلها وينه؟
ابو نواف ؛ عندها
الجد ؛ ماودك تصرفه شوي لانه امس عجعج بنا ومشى
ابو نواف : ماش ماقدر يايبه متعلق بالبنت بالمره ومايتركها ثانيه خايف ينعاد عليه الي صار ماينلام الي عاشه مو طبيعي اغلى انسانه الي يحبها ويفهمها وتفهمه تضيع بين يدينه مره ثانيه؟ مستحيل يعيش
ام الوجد : صادق محد يتحمل الفقد مرتين
دخلت ام نواف بجلال الصلاه ومعها القهوه والشاهي : سلام عليكم
الكل رد بالسلام
جلست ام نواف جنب ام الوجد واخذتهم السوالف
نزل فيصل وحاط الجوال على اذنه ويكلم : ايوه تقولي اليوم؟
الكل التفت من سمعو حس فيصل نازل من الدرج
فيصل شافهم متجمعين ونطق : خلاص اكلمك بعدين
قفل الخط وحط الجوال بجيب ثوبه : وش سبب هالتجمع؟
ابو نواف : الله يهديك سلم
فيصل : سلام عليكم بس ماني متطمن
الكل رد السلام ونطق الجد : ابد والله جايين نبي الوجد
فيصل رفع حواجبه بدهشه : الله اكبر ! وش تبون تعطونها بعد ؟ السم وتجاوزته جيتو تجلطونها بكلامكم وافعالكم؟
ام الوجد : يافيصل ياولدي ياحبيبي اسـ...
قاطعها فيصل : لاتقولين ياحبيبي انا ماني حبيب احد غيرها
ضحكت ام نواف بخفه ونطقت : تعال ياحبيبها اجلس وافهم
تقدم فيصل وجلس : بالله ماني امس قايل لكم والله لاكفر فيكم ؟ انتبهو تضرونها
ابو الوجد : وليش اضرها وهي ضناي!
فيصل : كلام قوي بس منت بـ قده انت اذيت بنتك بقول وفعل اجل احد يقول لـ بنته ماتشرف تكونين بنتي؟
ابو الوجد : ادري غلطت بحقها وجاي استسمح منها
فيصل ارخى ظهره على الكنب : تقول بس ماتفعل
ابو نواف بحده : فيصل! احترم وجود جدك وعمك وحرمته جايين ومعترفين بغلطهم رحب فيهم
فيصل ناظر عيون ابوه : يايبه انت ماشفت الحزن بعيون محبوبتي كيف تبيني اسامحهم وارحب فيهم وهم سبب بذبل عيون محبوبتي
ابو نواف : المسامح كريم
فيصل تنهد : مافي كلمه تشرح ضيقها
ام الوجد : ماحنا بمضيقينها جايين نعتذر بالعكس تفرح
ام نواف : قم نادها ي فيصل واكسر الشر
تنهد فيصل وقام وهو بقمه العصبيه
،
الوجد جالسه قبال التسريحه تسرح شعرها
دخل فيصل وهو معقد حواجبه ومعصب
الوجد بهدوء : شفيك معصب ؟
فيصل ابتسم من شافها : اخسي اعصب يشيخه
الوجد ابتسمت وهي تطالع انعكاس فيصل بالمرايه
تقدم فيصل وحط يدينه على كتوف الوجد ونزل وجهه لشعرها : ريحتك تفتنن تجننيني
الوجد ابتسمت : شرايك بس
فيصل : حلوو
الوجد : ليش رجعت ؟مو تقول انتظرك على الفطور
فيصل : ايه شفتك تأخرتي قلت اجيك
الوجد : مارتحت قبل شوي دخلت معصب
فيصل : معليك مني هالحين ابوي يبيك
الوجد : يمه ليش؟
فيصل : بياكلك
ضحكت الوجد ، فيصل مسك يدها يقومها معه نزل من الدرج ويده بيد الوجد وضحكه الوجد مافارقت وجهها وكل ماتسكت يقول لها شي يضحكها عشان يسمع ضحكتها
الكل التفت من سمعو صوت فيصل وضحكه الوجد ويدهم بيدين بعض
سرعان ماختفت ضحكه الوجد من طاحت عينها بعيون ابوها
فيصل زم شفايفه بضيق من اختفت ضحكتها وابتسامتها
ابو نواف ؛ تعالي يابنتي اجلسي
فيصل : امشي
الوجد نزلت انظارها تخبي دموعها : مابغى
فيصل : اجلسي شوي بس عشان خاطر ابوي
الوجد بغصه : عشان عمي بس
فيصل كشر بضيق من ميز نبره صوتها عرف انها تبكي حط يده على خصرها ويمشي بأتجاه الكنب المقابله ابوها وامها وجلس وجلست جنبه وماسكه يد فيصل تلعب بأصابع فيصل بتوتر
ماهي مستعده تسمع تبريراتهم المزيفه الي ماتجبر جرحها
ابو الوجد : ارفعي راسك ياعين ابوك
الوجد لازالت منزله انظارها ليد فيصل الي بيدها : تتذكر وش قلت لك قبل؟ قلت لاتضر روحي يابابا انا مو عدوتك
ابو الوجد بضيق : يشهد علي الله مانسيت هالكلمه من طلعت منك انها تزن براسي بس الشيطان شاطر
الوجد رفعت انظارها وحطت عيونها بعيون ابوها : مافي شي اسمه الشيطان شاطر كيف ماتثق في بنتك الي عايشه معك اكثر من عشرين سنه كيف ترمي كلمه ثقيله بشرف بنتك ليش خليت الغريب يصدقني ويحتويني
الجد : يابنتي انا اسف
الوجد رفعت حواجبها : كلمه اسف تدري متى تنقال؟ اذا ضربت كتف احد غريب بالغلط ذاك الوقت تقدر تقولها لكن تقولها لشخص متضرر نفسياً وجسدياً منك ؟
ام الوجد : حنا ادركنا خطانا !
الوجد هزت راسها بنفي والدموع بعيونها : اذا فات الفوت ماينسمع الصوت ! وش اقول وش اخلي فيك انتي الي شتتيني وحرمتيني من حضنك بأقسى ايامي
اخذت نفس ونطقت بعلو صوتها : ليش ترجعين لي بعد فتره ليشش
فيصل رص على اسنانه وغمض عيونه من صرخت من زود قهرها يمنع نفسه يكفر فيهم
ام نواف : عارفه ان الي مريتي فيه مو سهل لكن زي ماقال ابوك نغزه شيطان !
الوجد التفتت وميلت راسها بضيق : انتي على انك ماضريتيني كثير الا ان جرحك قوي على قلبي انا اعتبرتك امي وسندي بهالحياه من بعد ربي بس قرصتيي الجرح الي يعورني زعلتي علي وسبيتني وحتى انك مديتي يدك علي بدون سبب منطقي مافي شي يشفع لغلطتك ماقـ..
ماقدرت تكمل كلامها وحطت يدها على وجهها وسالت دموعها بغزاره على خدها الناعم
فيصل ضمها على جنب رغم انه معصب من اهله انهم ضايقوها وهو مايحب احد يضايقها
نطقت من بين شهقاتها : ماقدرت اطالعكم زي اول ماني متقبلتكم كل واحد يقول الشر عندي مستحيل انتم انس مستحيل مافي اب وام وجد يضرون بنتهم كذا مافيي
ابو الوجد قام بيعدل خطاه وجلس جنبها وسحبها من حضن فيصل لحضنه
الوجد ماحست بحنان ابوها الا حست بأذى حتى بحضنه فزت منه ووقفت : بعد عني لاتتصنع الحنان خلاص قاعد تعور قلبي وروحيي انت الي اهنتني وحرمتني من فيصل ومن ميلا وحتى ماما الي ماعادت ماما !
التفتت لكل الموجودين وصرخت ببكاء : لاتتصنعون اللطافه والتسامح والطيبه وانتم قلوبكم من حجر قادرين تبعثرون انسان ومتى ماحسيتو نهايتكم قربت جيتو اعتذتو؟ خلاصه الكلام الي بقوله لو تجيبون النجوم من السماء وتحطونه بكفي والقمر بكفي الثانيه والله مااسامحكم لو تعطوني قلب اعز ناسكم ماغفر لكم والله لو تطلعون عيونكم وتحطونها قدامي ماسامحكم وحسبي الله انكم خليتو قلبي قاسي يقسى عليكم هذا صنعكم انتم الي خليتو قلبي من حجر خلاص مو قلتو ماعندنا بنت اسمها الوجد طبقو كلامكم وانسوني من حياتكم انتم تضروني تعبت انام ودموعي تسيل وفيصل يجي يطيب خاطري ويتأسف بالنيابه عنكم انا احب فيصل وبكفتي فيه هو الوحيد الي مااذاني لابكلمه ولا بفعل وهو الوحيد الي استحق قلبي وحافظ عليه
التفتت على فيصل وابتسمت من بين دموعها : اتمنى ماتخذلني عطيتك قلبي حافظ عليه
فيصل ابتسم : ماطلبتي شي يابعد الاوطان
الوجد التفتت وناظرتهم ورفعت كتوفها : بس هذا الي اقدر اقوله
طلعت الوجد من المجلس وهي تبكي وتمسح دموعها بكمام بلوزتها
فيصل تاكد انها راحت والتفت لهم ونطق بحده: انا قلت لكن ان بكت بكفر فيكم بس خليتها تبكي تطلع مشاعرها المكبوته واياني واياكم تجونها ثاني مره خلاص سمعتو الجواب الي تستحقونه
طلع من المجلس ولحق الوجد
،
غرفه العنود
جوري حلفت يمين بالله تنام عند العنود وفعلاً نامت عندها
داهمتهم شيهانه بطرحه رابطتها على خصرها ؛ يامنعنع
العنود فتحت عيونها على الخفيف وشافت رجل جوري عندها ودفت جوري وطاحت بالارض ونطقت : يالله صباح خير بدال لااصحى على صباح النور اصحى على كرعان جوري
شيهانه جاتها طاقه تطلع مهاراتها بالرقص الشرقي وتهز لهم : ابوي كرشني
العنود طلت على جوري الي بالارض نايمه : حيه ولاميته ؟
تقلبت جوري وهي نايمه
رفعت راسها العنود : وليش كرشك؟
شيهانه وهي تهز : يقول امور عائليه ماتخصك
العنود : وانتي يعني مو من العايله؟
شيهانه ترقص قدام المرايه : انا وفهد اشك اننا عيال البطه السودا مالنا وجود بالبيت
العنود : بصراحه يعني لسلامه علوم العايله عشان ماتتسرب اكيد بيكرشونك
شيهانه التفتت بصدمه : شايفتني جوري؟
جوري وهي مغمضه عيونها : شفيها جوري يملا الي سيرتها على كل لسان
شيهانه : من كثر العلوم الي تنقلينها
جوري فزت بعز نومها : اي صح بنات تخيلو طلال يحاول يعرف مين انا !
العنود : بسم الله هذي حتى بالمنام تنقل علوم
جوري : لاصدق ترى ذابحه الفضول يبي يعرف مين انا لكن انا ذهينه اضيعه بالشرق مثل ماوديت جدي للشريقه يوم الوجد بجده
شيهانه : اسطريه على عينه
العنود : ياليل ي شيهانه ترى مو كل شي بالتسطير
شيهانه : معليش يعني الي مايتعدل يتسطر
جوري : ياحظي موب تسذا الي مايتعدل يتبدل
شيهانه بفلسفه : معليه لكن الي مايعرف للصقر يشويه
العنود وجوري بصوت واحد : شدخل !
شيهانه :معلينا بنات وتسبدي خالاتي بيجن
جوري : لاتقولين ام حواجب
شيهانه : ايهه ياحر تبسدي هي حنان
العنود : يبنات مانبي نظلمها ماقبلناها !
جوري : شفتها بعرس خزتني خر بنت الذينا
شيهانه : ومصدقه عمرها ان فيصل يحبها بنات ماجت هنا الا وهي بتحوس بين الوجد وفصيل
العنود : روحي اجلسي بصدر المجلس وكل ماقالت اء الجميها
شيهانه : معليك بس يخلصون نقاشهم المغلق ذا واستقعد لها
جوري : عشتيي
،
دخل فيصل الغرفه وضام الوجد على جنب
الوجد رمت نفسها على السرير وتبكي
فيصل ارخى كتوفه بتعب مايدري هو يخليها تسكت او يخليها تبكي تفرغ مشاعرها !
تنهد بقله حيله وتقدم وانسدح على على السرير مقابل وجهه الوجد وحط يده على خدها ومسح دمعتها باصبعه ونطق بأبتسامه : ماتهون دموعك عليه دموعك غاليه يابنت تركي بقلب محبوبك لاتضيقين على عمرك
الوجد : غصباً عني ابكي مو بيديي والله اني مقهوه على نفسيي فيصل تخيل طول هالشهور اسأت واذيه وكلام بذيئ وكلام ماينقال لبنت ويجيون بارده مبرده يعتذرون ولافوق كذا يزعلون اذا ماسامحتهم والله شي يزعل يخليني ابكي غصب
فيصل : اسمعيني يابوك خلاص هم اعتذرو كثر خيرهم انتي ماسامحتيهم اذا جاء الوقت المناسب بيزول زعلك منهم وبيرجع كل شي لمجراه انتي لاتضيقينها وتصعبينها
الوجد زمت شفايفها بضيق : ماصعبها والله لو بيدي اسامحهم بس الي سوه لي مايغفر مستحيل اسامحهم جرحي ماطاب
فيصل : طز فيهم ي شيخه علهم مايرضون قومي بس خلي عنك الدراما
الوجد : يابرودك عند المشاكل احر ماعندي ابرد ماعندك
فيصل قام : اخر همي وشوله اضيق على عمري عشان سبب اقل من تافه !
الوجد : مو تافه فيصل الموضوع فيه ماما وبابا
فيصل مسك يدها قومها معه : الموضوع خلاص راح مانقدر نرجع الزمن عشان نعيد الموضوع
الوجد تنهدت والتزمت الصمت
فيصل اخذ شال ثقيل وحطها على كتوف الوجد وحط شعرها ورا اذنها ونطق : امشي نروح لشقحى
الوجد ضحكت بخفه : لاتجننينن اسمها ستيلا
فيصل ضيق عيونه بمحارش : شقحى
الوجد بعناد : ستيلا
فيصل شال الوجد بحضنه ونطق : شقحى
الوجد : يوه فيصل لا نزلني خير احس مره لا
فيصل وقف عند باب الغرفه ونطق : افتحي الباب
الوجد فتحت الباب وهي بحضن فيصل وطلعو
: لاتحسين بالله
الوجد تعلقت برقبه فيصل تتمسك لانهم في الدرج : فيصل تستهبلل قبل شوي متهاوشه معهم والحين نازله بحضنك عيب
فيصل : زوجتي وحلالي مالهم حق يتكلمونن
الوجد : فيصل نزلني بليز
فيصل وقف بوسط الدرج وتحت انظار ام نواف وابو نواف الي يشوفون منظرهم : بعطيك عرض
الوجد : ايش هو؟
فيصل : اذا نزلتك الحين بالرجعه مانزلك
الوجد : لا خلاص خلينا هالحين دامها خربانه خربانه
فيصل ابتسم لها ونزل من الدرج
التفتت الوجد على اساس تشوف الطريق بس طاحت عينها بعيون عمها ابو نواف !
بلعت ريقها بأحراج ونزلت انظارها بخجل واحراج
اما عند فيصل الي ولاهمه شافو ولاماشافو بالطقاق
ابو نواف تنحنح ينبهه فيصل عن تصرفاته : ولد وين رايح ؟
فيصل وقف ونزل الوجد : المعزبه متضايقه قلت خل اوديها ل شقحى
ابو نواف : انتبهو على الطريق ترى كثرانات العقارب والديبان
الوجد اتسعت عيونها بخوف : ايش ؟ عقرب؟وثعبان؟
ابو نواف : ايه عمس مازن امس من اليل وهو يتصيدهن
فيصل : وش جاه يتصيد هالعقارب
ابو نواف : وندري عن عمكم المطيوش
الوجد ميلت راسها بحب لمازن : يازينه عمي زوزو يصيد العقارب عشان مايأذوننا
ابو نواف : ياحليلتس يابنتاخي عمتس يصيدهم فضاوه ولامامنه رجا
فيصل : والله فكره حلوه جدول دسم اليله ان شاء الله وانا جايب لكم عقارب
الوجد بهمس: لاالعم صاحي ولاالحفيد اصلاً كل هالعايله مرجوجه
فيصل سمعها ونطق : صح اتفق الكل مرجوج
ابو نواف : هه عاد انا بمشي عشان خالاتك بيجن
فيصل : بيجن اليوم؟
ابو نواف : ايه بعد شوي
الوجد : طيب مالبست ولا تكشخت !
فيصل مسك يدها ولفها تدور حول نفسها ونطق : كشخه كشخه مايحتاج تشدين حيلك انتي كذا تغطين عليهم كلهم
ابو نواف انسحب بهدوء
نطقت الوجد: شيهانه قالت لي انهم ينقدون وانا ماني مستعده اسمع اي كلام لاني وصلت عند حدي وبلعن خيرهم
فيصل: خذي راحتك العني خيرهم ونتفي شوشهم ولااحد يقول لك شي انا وراك واذا عن نقادات فما عليك من كلام شيهانه الفارغ انتي بسم الله عليك قمر والقمر يغار منك
الوجد رفعت يدينها لخدودها ونطقت :كيوتي فصفص صاير رومنسي
فيصل تنحنح :شرايك بس
الوجد: تجنن خلاص حبيتك
فيصل رفع حواجبه ونطق ب:اعقبي
بوقت ماقال الكلمه شالها بحضنه
الوجد: اوت خير اعقب؟
فيصل:يعني تعقبين تحبيني الحين من زمان يعني ياخوك حاولت ارقعها بس ماش ماتترقع مشيها
الوجد قرصت اذن فيصل:اخر مره ؟
فيصل طلع من البيت ونطق: اخر مره اتوب ماعودها خلاص رضيتي؟
الوجد : ايوه رضيت
فيصل : اخسس صعبه المنال رضت بسرعه!
الوجد : يمكن عشانك سبيشل رضيت لكن بمشيها ترى مو من عوايدي ارضى بسرعه
فيصل ضحكت وابتسمت الوجد
،
المكتبه ..
فهد جالس ب الكراسي الي في المكتبه وبما انه فاضي ف قرر يقرا كتاب
اما بجهه اخرى امتنان ساحبه خيال معها وغاصبتها تقرا معها والمعروف عن خيال انها ماتطيق القراءه ولاالتصفح ولاتحب الدراسه بشكل عام
امتنان : افف خلاص خيال خذي اي كتاب واقري
خيال تنهدت : تعرفين اني ماحب ليش تاخذيني معك
امتنان : عشان تغيرين جو
خيال : امحق جو بدال لانروح البوليفارد جايبتني للمكتبه
امتنان : بوليفارد من صباح ربي؟
خيال : طيب نروح نشتري ميكب نسافر نزور جوجي اهم شي ما اقرا !
امتنان دقت جنب خيال ونطق : بنت
خيال فزت : شفيك ؟
امتنان النكبه اشرت على فهد الجالس بحال سبيله : هذا مو فيصل ؟
خيال بفهاوه : مين فيصل؟
امتنان بطفش : ترى طفشت من فهاوتك رجل الوجد
خيال ضيقت عيونها تميز ملامح فهد القريبه من ملامح اخوه فيصل : يشبه بس يقولون رجل الوجد مايحب يقرا وش جابه المثقف ذا
امتنان : انا عارفه ان فيصل رجل الوجد خروف بس ماتوقعت انه مثقف
خيال : على قوله الاردنين نيالك يالوجد بالمثقف هذا
امتنان : مثقف وجنتل مان وطويل ونحيف ورزه وعميد والله ماشاء الله يالوجد احسدك
خيال بفهاوه : منهو العميد؟
زفرت امتنان بطفش من فهاوه خيال : ياليل الليل
التفتت امتنان : احس في غلط بالموضوع احس مو فيصل
خيال : هو ولامو هو بالطقاق
امتنان : لاحبيبتي اذا مو زوج الوجد بشبكك معه
خيال كشرت : انا ؟ انا والرجل خطان مستقيمان لانلتقى حبيبتي
امتنان : سنه الحياه
خيال : اجل اذا نظامك كذا بدعي من الان انه يطلع زوج الوجد ولايطلع احد ثاني
امتنان : ولايهمك اذا فيصل اكيد مابشبكك معه
خيال : اقول يالفتاه المثقفه قومي اقري كتابك بس
امتنان اخذت كتابها ورفعت كتوفها : كيفك بروح اقرا انتي سوي الي تبغين
راحت امتنان ورفع انظاره فهد لـ خيال الواقفه بين رفوف الكتب
خيال ارتبكت واخذت كتاب اميرات ديزني وفتحت وعلى اساس انها تقراء !
شافها فهد وضحك بخفه وبدون صوت وهز راسه بيأس وقام وهو يتقدم لها
بلعت ريقها خيال من شافته متجهه لها وخبت وجهها بالكتاب
فهد اخذ الكتاب من بين يدينها وعدله لها ورجعه : مقلوب الكتاب
خيال رفعت حاجبها ونطقت ترقع الموضوع : ايه عارفه
فهد :يالك من فتاة ساذجة
خيال تخصرت : وشيعني هذا الكلام؟
فهد : لاتهتمي
خيال : فيصل ترى عندك حرمه اسمها الوجد ترى ماتتعوض لاتكلم بنات الناس
فهد عقد حواجبه بصدمه : هل تعرفين أخي؟
خيال بفهاوه: مين اخوك؟
فهد : فيصل وزوجته الوجد
خيال : وي يعني انت مو فيصل انت اخو فيصل؟
فهد :نعم انا فهد
خيال : عاشت الاسامي الصراحه انلخمت مره تشبه اخوك
فهد ضحك :كثير من الناس يشبهوني بأخي، لكن في الحقيقة أنا لا أشبهه
خيال : شوف يعني من بعيد تشبهه لكن من قريب لا في فرق
فهد :بالمناسبة، أنا لا أعرف اسمك
خيال : اسمي خيال صاحبه الوجد زوجه اخوك
فهد :يا لها من صدفة جميلة
خيال : هيه عاد لاتفلها انا متربيه ماكلم رجال غريب يلا باي
فهد :لا تنسى الكتاب
خيال : ماحب اقراه بس مجبوره
فهد : منذ أن رأيتك تقرأين كتابًا مقلوباً ، عرفت أنك لا تحبين القراءة
خيال :لا عاد ترى كنت اعرف انه مقلوب بس في كلمه ماعرفتها قعدت اقلب الكتاب
فهد :حسناً سأصدقك
خيال : بسال سوال يمكن غريب شوي لكن انت متاكد انك اخو فيصل ؟
فهد : نعم انه اخي
خيال : سبحان الي خلق وفرق
فهد : ماذا تقصدين ؟
خيال : ماقصدي شي بس فيصل شوي متهور وانت راكد ومثقف
فهد : اوه لاتهتمي انه اخي الصغير لابد من الطيش والدلع كما يقولون "العنقود"
خيال اتسعت عيونها بصدمه : هاه؟ انت اكبر من المطيوش رجل الوجد ؟
فهد : نعم اني الاخ الاوسط لدي اخ اكبر يسمى نواف
خيال : ايه واضح انك الوسطاني مظلوم حتى مالك ظهور كثير يعني لدرجه حتى الكاتبه ظالمتك بالظهور
فهد رفع كتفوفه : ماذا نفعل؟ نحن مجبرون على القيام بدورنا وفق ما تقوله الكاتبه، والذي بدأت بالخطأ
خيال : نصبر على هالغامضه وش ورانا حسرت في ابطالنا انت متخيل ان كل يوم مشكله
فهد : خيال كأنك خرجتي عن النص؟
خيال : خرجت عن النص صح ولكن انت تغيرت لهجتك رجعها رجعها لاتفضحنا
فهد : اوه صحيح
امتنان جت بصدمه : وجع خيال شبكتي متزوج ؟
فهد : لالا انني غير متزوج ولست بـ فيصل كما تعتقدين انني الاخ الاكبر لفيصل فهد
امتنان : كيف كذا
خيال مسكت يد امتنان ولفت تبغى تروح : خلاص امتنان لاتفضحينا امشي امشي
امتنان غمزت : مسرع حبيته
خيال: وجع مابقى الا هو
امتنان : ايه واضح
فهد الابتسامه مافارقت وجهه الين اختفى زول خيال
ورجع يقراء الكتاب
،
حوض الابل او المراح ..
الوجد جالسه على ركبها وماسكه يدين عبدالله ولد نواف : عبوديي
عبدالله : هلا
الوجد : شلونك وكيف الماما؟
عبدالله : طيبين
فيصل متكتف ويناظرهم والابتسامه شاقه وجهه
الوجد : طيب بسألك
عبدالله : عن وش؟
الوجد : ميمي وينها؟ ومتى اخر مره شفتها؟
عبدالله : ميلا ماشفتها من زمان مره مره
الوجد زمت شفايفها بضيق : طيب وينها؟
عبدالله : عند عمو تركي
غند : عمو تركي يهاوشنا اذا طقينا الباب نبغى ميلا
الوجد عقدت حواجبها : يهاوشكم؟
رفعت انظارها لـ فيصل : فيصل !
فيصل : يبنت الحلال لاتصدقين كلام ورعان ترى كله خريط زريط
عبدالله : عمو فيصل انا وغند مانكذب
فيصل : كيف يعني فهمني
عبدالله : يعيي يطلع ميلا تلعب معانا
الوجد ابتسمت : حبيبي عبودي وغنوده انتم حبايبي خلاص روحو العبو وانا بجيب ميمي لكم
غند وعبدالله هزو روسهم برضى وراحو
الوجد وقفت مسحت على شعرها تقدم فيصل لها ومسك كتوفها : تبيني اخذ ميلا منهم؟
الوجد : ماتقدر بتسبب اضرار كثيره لنا ولهم
فيصل : انتي بس اشري وازهلي الباقي
الوجد هزت راسها بالنفي : لالا فيصل باي وجهه حق ناخدها !
فيصل : اختك
الوجد: عارفهه بس مانقدر
فيصل : بناخذها ولايهمك انتي الحين روحي لـ شقحى ولاتشغلين بالك
الوجد هزت راسها برضى وابتعدت عن فيصل وتقدمت حوض الابل وتتأمل النياق
تقدم فيصل ووقف جنبها وتكى على حوض الابل ومد يده لرقبه "ستيلا " يمسح رقبتها : ماودك تمسحين ناقتك؟
الوجد : لاستوب ماحب
فيصل : ماتقول شي بس المسيها انتي راعيتها لازم تتعود عليك
الوجد : ناقتي بالاسم بس مستحيل المسها والعب معها فيصل مرهه تخوف شوف اسنانها كيف
فيصل مسك يد الوجد ورفع يدها لرقبه الناقه رغم رفض الوجد وتحاول تسحب يدها بس فيصل ماسكها بأحكام
شوي شوي الوجد تقبلت ونطقت : بشرتها جافه
فيصل : يابوك هذا وبر او صوف مو بشره
الوجد : خطاء اسمه شعر ستيلا
فيصل : الي ودك
الوجد : ابغى اسوي لها ميكب كيف اجلسها ؟
فيصل : عيونها حاليها ربي يومنك تحوسينها بالخرابيط ذي ليش
الوجد رفعت انظارها لعيون الناقه: رموشها تجننن بس ولو بحط ايشادو وبلشر بس
فيصل يسايرها : خلاص المره الجايه
الوجد ابتسمت وتحرك يدها على رقبه ستيلا
فيصل : الجو بيمطر ماودك ندخل ؟
الوجد رفعت انظارها لسماء وتشوف الغيوم السوداء : احب المطر
فيصل : تعلميني فيك؟ ابك اعرف انك تحبينه وتخافين من الرعد
الوجد : كفوو فاصولياء يعرفني المهم بحسب خبرتك هذا المطر فيه رعد ؟
فيصل : شوفي هناك برق اكيد بعد شوي بيجي الرعد
الوجد وفعت راسها للغيمه البعيده شوي وتشوف سرعه البرق : يوهه
فيصل : بنجلس شوي تحت المطر ولاتصير بخاطرك
الوجد ابتسمت بوسع ثغرها : وناسهه
بضع ثواني وبدا ينزل المطر بشكل خفيف
الوجد بفرحه ؛ مطر!
فيصل ساكت يتأمل فرحتها بالمطر
جاء مازن وهو يضحك : كولد برو صدق زوجوني ياناس ابي زوجتي تلعب بالمطر قدامي كذا
فيصل ناظر مازن من فوق لتحت : خربت علي لحظه التأمل !
مازن : ايه تتأملها باليل مو هنا
فيصل ضرب راس مازن من ورا : الفاظك عدلها لاقص لسانك
مازن يحك مكان الضربه : يقولون الصمت حكمه لكن صمتي هالمره كتمه
الوجد ضحكت : مازن تستاهل الصراحه بعدين ياحيوان ماسلمت عليك من زمان عنك
مازن بفهاوه : ليش شصاير؟
فيصل : بنت اخوك يالثور طالعه من المستشفى تحمد لها بالسلامه
مازن : اوهه بنتاخيي الحقي بخمتس
الوجد تقدمت وحضنت مازن تحت انظار فيصل : زوزو
مازن : الحمدلله على سلامتس ي شيخه شلونتس شخبارتس
فيصل رص على اسنانه بغيره يبغى الوجد تحضنه هو فقط ماتحضن احد ثاني
الوجد : والله بخير انتم شلونكم بدوني ؟
مازن : حنا بخير لكن حبيبتس ماهو بخير
فيصل يناظر السماء يخفي غيرته لكن طفح الكيل وتنحنح ينبههم
مازن : شف حب التملك ذا الله يعينتس عليه
الوجد : صدق لازم اخليه يجرب التملك
فيصل فكهم عن بعض : اقول خلاص عاد ماصار حضن
الوجد رفعت حواجبها : ابك على قولتك هذا عمي خل احضنه
مازن : خميني خميني معليتس من رجلتس
تقدم مازن يحضن الوجد يثير غيره فيصل مع ام مافي شي يثير الغيره بس شنسوي المخرج عايز كذا
تنهد فيصل وهمس بـ : لاحول ولاقوه الا بالله
تقدم فيصل لهم وحضنهم ثنينتهم
الوجد ابتسمت ماتوقعت رده فعل فيصل
اشد المطر عليهم ونطق مازن : كويس وجيد رجلتس زي الامبريلا مايجيني مطر مغطيني
فيصل امتلى ماء والوجد ومازن ماجاهم شي بسبب ان فيصل حاضنهم ثنتينتهم
فيصل مو قادر يتنفس بسبب غزاره المطر ابتعد عنهم وشعره على وجهه
الوجد : خلاص امشو ندخل !
مازن : تستهبلين؟ البيت بعيد مايمدي
فيصل : امشو امشو بسرعه قدامي
مازن : انا بروح لغرفه حميد عندي شغل انتم روحو
الوجد : اوك
راح مازن وفيصل اخذ شال الوجد وحطه على راسها وضم الوجد على جنب ويمشى معها
الوجد : الشال طويل غطي نفسك معاي
فيصل : لا معليك متعود بس انتي لاتمرضين
مسافه الطريق ووصلو بيت العم محمد ونطقت الوجد : مين سيارته ذي؟
فيصل تفحص السياره بأنظاره وميل شفايفه : والله مدري ماعلينا ادخلي
سحبها معه وفتح الباب والتفو على بعضهم بصدمه من شافو الحريم جالسات
الوجد بصدمه : مين ذول؟
فيصل بلع ريقه : خالاتي
الوجد اتسعت عيونها : كيف نبدل ملابسنا
فيصل : ندخل من الباب الخلفي
الوجد : يلا اوك
لفو بيطلعون من البيت لكن استوقفهم صوت : الحق يافيصل سلم على خالتك
الوجد رفعت انظارها لفيصل بمعنى "تصرف "
فيصل التفت وشاف خالته واقفه حك شعره بوهقه : هلا خالتي ام عبدالاله
الوجد من نطق فيصل بخالتي تخبت ورا ظهر فيصل مستحيه تدخل وتسلم وهي مليانه ماء!
ام عبدالاله : تعال ادخل عن البرد
فيصل دخل وسحب الوجد معه والكل التفت من دخل فيصل وبيده بنت !
نطق يصرفهم : اعذروني مانقدر نسلم عليكم رطبين خل نغير ملابسنا ونجيكم سريع سريع
ام حنان : ابد ابد الي ودك بس عطنا حرمتك بنتعرف عليها
الوجد شدت على يده وهمست : صرفهم بليز
فيصل : نبدل ونجي ماحنا مطولين وبعطيكن ياها بس شوفو رطبه البنت خل تغير ملابسها
قامت حنان ونطقت بسخريه : وليش حرمتك ماتتكلم ؟ صقها؟ امبيه فيصل تارك كل بنات خالاتك عشان تتزوج صقها!!
الوجد شمرت اكمام البلوفر : شكلك ودك تتسطرين هالحين !شرايك استقبلك بكف ؟
ام حنان مسكت حنان ورجعتها ورا : خلاص فكي الشر !
حنان من ورا ظهر امها : عزتي لك يفيصل تارك الانوثه الي ببنات خالاتك ورايح للمسترجله ذي
فيصل : المسترجله الي تتكلمين عنها استوطنت قلبي واخذته بدون لاتتعب نفسها مو مثلك الي حاولتي ولكن بدون اي فائده
الوجد رفعت حواجبها : اوهه طلعتي محاوله تنرحمين الصراحه
ام نواف : فيصل خلاص خذ حرمتك واطلع لغرفتك
فيصل التفت للوجد ومسك يدها : امشي لاتحطين عقلك بعقل جاهل
سحبها فيصل له ومشى معها اما عن الوجد الي ماشالت انظارها عن حنان وتخزها خز
الوجد دخلت الغرفه : قهرتني الحيوانه
فيصل : معليك منها
الوجد : بعدين تعال وش السالفه هي تحبك ؟
فيصل : مدري عنها ي شيخه لاتشغلين بالك بدلي ملابسك وامشي لهم
الوجد : اوك ولا ماودي شويهين وينها؟
فيصل فصخ ثوبه : بغرفتها اكيد ماتداني تقابلهم
الوجد عند الدولاب تدور فستان : اسفه بس مالومها
فيصل اخذ ملابسه: صدقتي المهم باخذ شور سريع سريع
الوجد : تمام
دخل فيصل الحمام "يكرم القارئ " والوجد لازالت واقفه عند الدولاب تدور فستان او جنز يناسبها بس بنظرها مافي شي يناسبها
بضع دقائق وطلع فيصل من الحمام والمنشفه على رقبته وشاف الوجد كابه كل الدولاب بالارض والسرير وبيدها اليمين فستان سماوي ويدها اليسار بلوفر اسود
فيصل : يبوك وش مسويه انتي بالغرفه !دقايق بس اختفيت عن انظارك حستي الغرفه
الوجد تنهدت : اوف فاصولياء ماني لاقيه شي مناسب
فيصل اخذ قطعتين بلوزه وجنز بشكل عشوائي ونطق : هذا حلو البسبه
الوجد هزت راسها بنفي : نو هذا لبسته قبل كم يوم
فيصل ضيق عيونه بممازحه: ابك شلونن قبل كم يوم وانتي قبل كم يوم بالمستشفى يالنصابه
الوجد ضحكت : بس ولو لبسته مرتين
فيصل : وه ياعزتي لك لو تدرين ان هالثوب الي علي كارفه كرف
الوجد : انتم ثوب مايفرق الشكل لكن حنا يفرق ويميزون
فيصل : ماراح يدرون انك لبستيه مرتين لانك اول مره تقابلينهم
الوجد تخصرت : ماراح انزل اجل
فيصل ارخى كتوفه بقله حيله : وراك معييه تنزلين ؟
الوجد : ماعندي لبس
فيصل يناظر الملابس الي بكل مكان : كل هذا وماعندك؟
الوجد ؛ ايوه قد لبستهم كلهم
فيصل ميل شفايفه وهو يناظر الملابس الي اغلبها عليها التسعير يعني ماقد لبستهم : فويسقه ملابس
الوجد : باخذ شور وبشوف بعدها وش البس
فيصل جلس : الي ودك الوكاد اني بنتظرك
الوجد : لا مرهه مطوله باقي شور وباقي استشور شعري واسويه ويفي واحط ميكب وباقي اشياء كثير
فيصل : لاعادي انتظرك
الوجد : اعرفك ماتقدر تستناني كثير روح سلم عليهم واجلس معهم بس هاه لاتجلس جنب التستس ذيك
فيصل قام وتقدم لها وقبل جبينها ونطق : اجل انتظرك تحت عندهم
الوجد ابتسمت وبانت الغمازه ونطق فيصل : احب غمازتك ياشيخه
مسك وجهها وقربه له وقبل الغمازه بقوه الين شنب فيصل عور خد الوجد وسبب لها احمرار بخدها
الوجد حطت يدها على خدها
فيصل : باقي شوط ثاني اعضهم لك بس الحين مستعجل ولاكان طرحتك
الوجد رفعت حواجبها وتخفي ابتسامتها عشان ماتطلع الغمازه ويحدث شي مالمفروض يصير هالحين
فيصل : لاتطولين عاد وتتغلين على قلبيي
الوجد : ابشر على خشمي شرايك بس تعلمت منك
فيصل مسك انفها بخفه : وه يابعد روحي هالخشيم ، عشتي
الوجد ابتسمت واستوعبت واخفت الابستامه وضحك فيصل وطلع
دخلت الوجد تاخذ شور
،
المجلس المفتوح على الدرج
ام حنان : والله ياوخيتي ماهيقيت ان فصيل ياخذ وحده لسانها هالطول
ام نواف ؛ لابالعكس وجيد مقطعه الانوثه تقطيع
حنان : ايه واضح الانوثه
شيهانه نزلت :سلام
الكل رد السلام وقامو وسلمو عليها وجلسو ونطقت ام نواف : لو ماتعرضتيها كان ماجتس
شيهانه :شسالفه ليش الوجد سيرتكم؟
حنان : ابد والله بغت تسطرني
شيهانه ارخت ظهرها على الكنب : اكيد انك متعرضتها
حنان : ماتعرضت احد !
ام عبدالاله : والله ياختتس انها تهبل منا حلوها بس انتس ياحنان شكلتس تطاولتي عليها وهي ماتداني واضح
ام نواف : صدقتي ولا في احد تقولين له صقها ويسكت؟
فيصل نزل : سلام عليكم يلا عاد هالحين اقدر اسلم عليكم سلام زين سلام حارر
ضحكت ام عبدالاله ووقفت : ياحبي لك يافيصل
صافحها فيصل : لاخلا ولاعدم منك ياخالتي
ابتسمت ام عبدالاله تعداها فيصل يسلم على ام حنان وتعدى ام حنان
حنان مدت يدها لفيصل
فيصل وقف قدامها وناظرها بـ اشمئزاز وتعداها وجلس جنب شيهانه
شيهانه : وجيد وينها ؟
فيصل : تجي شوي
ام عبدالاله : الا شلونك يافصيل وشلون الدوام والمدام ؟
فيصل ابتسم وغمز: الدوام زوين والمدام زينه
ام حنان : الحمدلله ان شاء الله متيسر زواجكم
فيصل تنهد بحب : ولله الحمد ربي عوضني فيها
حنان : الله اكبر عاد على وش معوضتك
فيصل تجاهلها ونطق : انتم بشروني ياخالاتي شلونكم
ام عبدالاله : والله على ماتحب
فيصل : الحمدلله
ام نواف : وينها المدام ؟
فيصل : شوي وتجي
بضع دقايق من السوالف والضحك نزلت الوجد
فيصل قطع سالفته من حس بخطواتها والتفت لها وشاف الحسن والجمال ونطق بأبتسامه : يا مرحبا والمرحبا لك وتنقال ترحيبه من عمق زوري وتنصاك
الوجد ابتسمت وخدودها حمرت زود على البلشر الخفيف الي على خدودها ونطقت بهمس : يحياتي
الكل ابتسم من ترحيب فيصل للوجد الا حنان الي كشرت
نطقت الوجد بهدوء وانوثه ماكأنها الي قبل شوي تبغى تسطرهم : سلام
ام عبدالاله قامت تهلي وترحب : وعليتس السلام اقربي ياحرم ولدي فصيل
الوجد تقدمت وسلمت عليهم ومرت من عند فيصل تبغى تجلس جنب شيهانه بس فيصل مسك معصمها وجلسها جنبه على يساره وشيهانه على يمينه
الوجد حطت يدها على صدر فيصل ورجعته : لو سمحت بعد شوي
فيصل من الصدمه وجع ظهره
الوجد : بنت شيهانه
شيهانه التفتت وقربت : هلا
الوجد : كيف نظام عايلتكم ماتتغطون عن بعض؟
شيهانه : لا مانتغطى عن بعض
الوجد : واو حبيتت
فيصل رفع حواجبه وهو يسمع همسات الوجد وشيهانه الي قدامه
فيصل دخل يدينه بينهم وفصلهم عن بعض ورجعهم امكانهم وهمس : بعدين الحش !
الوجد تناظر فيصل بطرف عين : لو سمحت سوالف نسوان شدخلك فيها
فيصل : ايه خلي سوالف هالنسوان بعدين اذا رحت
الوجد : فيصل ابو قلب قاسي ماحبيت ماخليتني اسولف بحطك بالقائمه السوداء
فيصل يعرف كيف يسكتها وحط يده تحت فكه: وجدي ودي اعطيك قبله حب شرايك؟
الوجد اتسعت عيونها بصدمه : استهدي بالله !
شالت انظارها عنه ووقفت واخذت القهوه والفناجين تقهوي الموجودين
ابتسم فيصل على خجلها
ام حنان اخذت فنجان القهوه : ايه اقولتس ياوخيتي رحت لذيتس الحديقه ومامن فعاليات
ان نواف : هو جيتها قبل كمن شهر منا حلوها
ام عبدالاله : وه وحر تسبديي من حديقه الاكتئاب ذيتس
الوجد مدت الفنجان لفيصل واخذه : ادب غصباً عنك تصبين ليي
الوجد نزلت الترمس : خيرر عطني ياهاا
وقف فيصل عشان القهوه ماتنكب على ثوبه ونطق : دقيقه دقيقه
الوجد حاطه يدها فوق يد فيصل حالفه تاخد الفنجان : مافيه دقيقه دقيقه جبه
ام نواف : هو ؟ شفكيم تناقرون تو نمدحكم
شيهانه بعلو صوتها : شكلها عين من حنان
فيصل التفت على شيهانه ونطق : الرهاب الاحتماعي يخاف منك
ام حنان : بسم الله على بنتي عينها بارده
الوجد : عطنيي الفنجان خل هياطك ينفعك
فيصل : يبوك اصبري لاتنثرينها
ام عبدالاله : يالوجد علامتس عليه ترى ماداني عليه
الوجد التفتت وتخصرت : تخيلي صبيت له قهوه ويقول غصب يرضيك ؟
ام عبدالاله : لابالله مايرضيني علامك يافصيل عليها ترى ان تعرضتها قصيت اذانك
فيصل بمحاوش : وانا صادق غصب تصب لزوجها
الوجد ضربت صدر فيصل بخفه : وجع توجع عدوك قال غصب
شيهانه اخذت كاسه حنان : اشربو منها ياربها تروح عين حنان منكم واضح نضلتكم النحوتت
فيصل : اهيب ولاتسدك الا شيهانه ماتستحي
ام نواف : يفيصل لاتحارشها !
فيصل : ماحارشها هذي الحقيقه
الوجد تاكدت ان الفنجان الي بيد فيصل كل القهوه الي فيه انكبت ونطقت : خلاص اشرب مابغى فنجانك
فيصل ناظر الفنجان الفارغ من القهوه ورفع انظاره لها : يوم نثرتيها قلتي مابغى؟
الوجد : اي مابغى فنجانك
فيصل : هيا والله ان تصبين لي
الوجد ارسلت قبله بالهوا : بأحلامك حبيبي
ام عبدالاله سحبت الوجد وجلستها جنبها : انثبري
فيصل : حاس اني دايخ من البوسه
شيهانه : وتقول الرهاب يخاف مني؟ لابالله يخاف منك اجل في احد عاقل يقول هالكلام بوسط المجلس ؟
حنان مستانسه على بالها تهاوشو ماتدري ان هذا مزح ومحارش
الوجد حطت رجل فوق رجل وجالسه بين خالات فيصل وتناظره بأنتصار
فيصل يتعمد يثير غيرتها : اي على راحتك حنان تصب لي
الوجد بغيره : وانت ماعندك يدين؟
حنان ماصدقت انه يطلب منها على طول قامت بتاخذ ترمس القهوه !
فزت الوجد من بين خالات فيصل واخذت منها ترمس القهوه ونطقت : عنك عنك حبيبتيي
حنان : شدعوا خليني اقهويه
الوجد بغيره : عنده زوجه حبيبتي
فيصل : خلي حنان تصب
الوجد التفتت لفيصل ورفعت حواجبها واشرت بيدها تهدده
التفتت الوجد لـ حنان ومسحت خصلات شعرها : حبيبتي حنونه شرايك تروحين تجلسن
الوجد وطت نبره صوتها ؛ لفقع وجهك
حنان شمقت للوجد وجلست وتقدمت الوجد وصبت القهوه ومدتها لفيصل وهي تهدده بعيونها نطق فيصل :حلفت تصبين لي
فيصل اخذ الفنجان ونزله على الطاوله واخذ الترمس منها وبرضو نزله
الوجد عقدت حواجبها بعدم فهم بلحظه فيصل سحبها له وتجلس جنبه وحاوط كتوفها وقربها له اكثر
الوجد ابتسمت بوسع ثغرها والتزمت الصمت من شافت نظرات خالات فيصل
حنان : وجد
الوجد بأبتسامه : هلا؟
حنان : الله يعوضك حبيبتي سمعت ان جنينك طاح الله يعوضك يعني ترى ماقصدي بشي بس احس لالا ماتصلحين تصيرين ام !
اختفت ابتسامه الوجد تدريجياً من تذكرت جنينها الي فقدته مؤخراً واجتمعت الدموع بعيونها الين تغبشت الرؤيه عند الوجد
فيصل رص على اسنانه بعصبيه ولو هي رجل لكان كفخها بس خصمه بنت مايقدر يسوي شي!
حنان : اوه حبيبتييي لاتبكينن عارفه ان الفقد شي صعب بس ولو يعني يع ماتخيلك حامل ايوو لانهائي
شيهانه : ايوو انتي ووجهك الكلح
الوجد وقفت : بروح ارتاح
ام عبدالاله قرصت حنان : بعد وجهه
طلعت الوجد من المجلس تبكي وهذا اثار جنون فيصل ووقف ونطق بعصبيه : انتي من دخلتي هالبيت وشفتيها وانتي تدقينها بالحكي وهي ياغفلين لك الله ساكته لك انا مسكت نفسي هالحين لاقوم افرم وجهك ولكن المره الجايه ماارحمك علي الطلاق مارحمك لافرم وجهك قدام عيون امك
ام نواف : فيصل تراك متزوج لاتقول علي الطلاق ومن هالكلام
شيهانه تاكل شوكلت : البيت بيت ابونا والقوم حاربونا
فيصل : كلامي موجهه للجميع ياويله وياسواد ليله الي ينزل دمعه منها ترى بنزل دموع امك عليك فاهمه ؟
التزمت الصمت حنان وصرخ فيصل : فاهمه يالدرج؟
حنان برعب : ايي خلاص فهمت
طلع فيصل من المجلس ولحق الوجد
ام نواف : حنان كانك بتدقين الوجد بالكلام الباب يوسع جمل !
ام حنان شهقت : تطردين بنتي عشان وحده ؟
ام نواف : ايه وهالوحده الي تتكلمين عندها ترى عاشت اشياء كثير ولاتزودين جرحها البنيه توها طالعه من المستشفى بتريح شوي وتجي بنتك من اقصى الديار تدق البنت بالكلام عشان سالفه لها كم سنه؟
حنان : اييه ولدك ليش يوعدني بالزواج وهو مو قده !
ام نواف : ماوعدك لاتلعبين على نفسك الكلام الي قالته لك شيخه كذب بكذب
شيهانه وقفت: تراك ماخذه بنفسك مقلب تفشلين وع!
ام عبدالاله : شيهانه يامتس خذي حنان واطلعو تمشو وخليني احل الكشكله هذي
شيهانه : امشي
شيهانه اخذت حنان وحطتهت بالمجلس الثاني وسحبت عليها
ام حنان : ماهقيتها منتس ياوخيتي تبدين بنت الغريب على بنتي؟
ام نواف : ماهي بنت الغريب هذي بنت عم عيالي ومن تزوجت وانا اعرف ابوها متى صارت بنت الغريب؟
ام عبدالاله : والله ياخواتي ان استمريتن تخانقن ترى بزعل منكن
سكتن الحريم احتراماً للاخت الكبرى "ام عبدالاله "
،
عرفه فيصل .
الوجد جالسه على السرير ومركي ظهرها وتناظر التسريحه الي قبال السرير ودموعها على خدها
في فراغ وحطام وشعور سيئ بصدرها
دخل فيصل : وجدي
التفتت الوجد ونطقت : لاتعتذر بالنيابه عنها مابغى اسمع اسمها !
فيصل تقدم وجلس قبلها ومسك يدينها بحنان : وجدي ياعين ابوك انتي لاتبكين
الوجد انفجرت بكاء : فيصل انا راضيه بقضاء الله وقدره لكن حاسه بضيقه وعارفه ان خيره وفاه ااجنين بس مابغى احد يدقني بالكلام وتشوف اني مسوي ذنب مابغى اشوف نظره الشفقه بعيون الناس ترى يزعل الموضوع لاتلموني
فيصل سحبها له وحضنها : تعالي لحضني وانسي همومك
الوجد بادلت فيصل الحضن وانهارت بحضنه : تعبتت القاها من بابا ولا من ماما ولا من جدي وست شوشو ولا من هالحنان الي مافيها ذره حنان تعبت وانا ارمي همومي عليك انا اسفه
فيصل يسمح على ظهر الوجد : انا سندك بالحياه وبالعكس يسعدني انك تشاركيني همومك
الوجد : اشقيتك معاي كل يوم ساحبتك بمصيبه وبمشكله وبكل شي ترى قلبي ينحرق اذا شفتك تساعدني بالمصيبه الي اسويها وانت بوجهه سعيد وانا ادري ان داخلك حطام وضيق وادري انك متضايق ان البيبي توفى بس تخفى حزنك عشان مااتضايق بس صدقيني مو بيديي اذا توفى البيبي
فيصل مسك وجهه الوجد يهديها : بنت بنت ركزي انا ماتضايقت ابداً ان الجنين توفى ليش اتصايق وربي معطيني شي احلى من الجنين ربي معوضني فيك انا اشوفك كل شي بالدنيا لاتلومين نفسك على شي خارج عن مقدورك يابوك على ماقيل الضنى بداله ضنى وشفيك انتي تلومين نفسك
الوجد بدموع : وش اسويي اذا كل مالتفت القى انتقاد ! انا وش سويت بحياتي ليش الكل حالف على سعادتي ليش يكرهون يشوفوني سعيده ليش؟فهمنيي عطني سبب مقنع ومنطقيي
فيصل : كلهم يغارون منك حطيها ببالك حسادك والعذال كثير ولامحد يتكلم فيك الا وانتي داقه خشمه
الوجد هزت راسها بالنفي : تعبت
فيصل : قلت لك حلينا نترك المزرعه والي فيها
الوجد تنهدت : يارب يسرها
فيصل:تتيسر
بضع دقائق من الهدوء والحضن نطق فيصل : وجدي بمشي انا الحين عندي كم شغله لامور شيخه وماجد
ارتجفت الوجد بخفه بمجرد ذكر اسمائهم
فيصل ميل شفايفه بضيق : لاتخافين ! الوكاد اني بطلع اوعديني ماتنزل دموعك بغيابي
الوجد ابتسمت : صعبه اوعدك
فيصل : مافي شي صعب اوعديني عشان ماينشغل قلبي وبالي عليك
الوجد : خلاص تمام وعد بس اذا بكيت انا اسفه ماقدرت اوفي بوعدي
فيصل : عادي بس اهم شي تتجنبين حنان لانها خراطه ولاتصدقين وش تقول
الوجد : لاتوصي حريصه روح وقلبك متطمن
فيصل وقف ووقفت الوجد قباله نطق فيصل : كان تروحين للعنود والبنات زين بعد لاتجلسين عندها بتستفزك
الوجد : ايوه بعدل شكلي وبطلع لنودي
فيصل : حاليك ربي يلا استودعتك الله
الوجد وقفت على اطراف رجولها وفيصل فهمها ونزل لمستوها وقبلت خد فيصل
فيصل ابتسم : يالبيه
الوجد : انت الوحيد الي تستاهلها
فيصل قرص خد الوجد بخفه : لاخلا ولاعدم واذا بغيتي شي اتصلي علي
الوجد ابتسمت وهزت راسها برضى
ابتسم لها فيصل وطلع
الوجد تكتفت : افف احبه
تقدمت للتسريحه وجلست على الكرسي وبدت تضبط الميكب الي احتاس من الدموع عشان تطلع للبنات
،
غرفه مازن .
طالع من الحمام يكرم القارئ بعد مااخذ شور وجلس على السرير ويقلب عيونه بطفش : ابوك يالطفش ياهو مافي جدول !
سكت بضع ثواني يفكر كيف يسلي نفسه وسرعان ماابتسم من طرى عليه شروق يبي يجدول عليها واخذ جواله واتصل ونطق : صباح الكادي يالي غلاك مو عادي
ردت شروق : الحمار عند ذكره
مازن بصوت ام صبحي : يعني صدز معجبه فيني وتحتسين عني
شروق : نحش فيك انا وصحباتي
مازن : اكسب حسنات
شروق : لا حنا ماغتبناك وي كذب
مازن ضحك ونطق : يعني خلاص ماعاد فيه ام صبحي؟
شروق : ماعاد فيه ولاتتصل علي
مازن : واي منو هذا المعضل العصبي بشويش عليا
شروق : ياليل يمازن وربي صادق الي سماك خروف
مازن : معك كبير الخرفان يالنعجه
شروق: يحيوان انا نعجه؟؟
مازن : يانعجه انا حيوان؟؟
شروق : ايهه
مازن : جرحك وصل يالخفوق
شروق زفرت بطفش : تحبني باب البيت مفتوح لاتجي من الجوال
مازن : اما عاد تشوفيني لعبه ؟
شروق : ياليل خلك شوي جدي
مازن : بصير سيريس لعيونتس يالخفوق
شروق : فارقيني يالسيريس
مازن : خلاص يالعصبي انت لاتفلها على قلبي
شروق : علاقه محرمه هذي!
مازن قفل الخط بوجهه شروق : اي صح علاقه محرمه

_________________________
انتهى البارت ♡
رضيت بالله ربًا وبالإسلام دينًا وبمحمد ﷺ رسولًا ونبيًا)، ♡
حسابي تيك توك :Ot348285
حسابي انستا انزل فيه الروايه : Ot34828
*اعتذر عن الاخطاء الاملائيه*