لاتقارنين حبي لك بأي مخلوق انا حتى بغيابك احبك

Part 46

سبحان الله وبحمده سبحان الله العظيم ♡

وقت شروق الشمس ..
فيصل دخل الفندق ومعه الفطور
نزل الاكل على الطاوله وتقدم وعقد حواجبه من شافها نايمه ظن انها تعبانه لان مو من عوايدها تتاخر بالنوم
جلس على طرف السرير وحط يده على جسدها يهزها بخفه : وجدي
تحركت الوجد بأنزعاج : هاه
فيصل : قومي يابوك افطري نبي نمشي
الوجد نطقت بصوت مليان نوم : وين نروح ؟
فيصل : للمريخ قومي بس افطري معي يلا عاد
الوجد هزت راسها وهي نايمه بالرضى او بالاحرى تسلك له
فيصل قام واتجهه للكنب وجلس : قومي ولاباكل اكلك
الوجد لازالت مغمضه عيونها : صحه
فيصل هز راسه بيأس :قومي تاخرنا
الوجد تنهدت بتعب وخمول وجلست وراسها مايل : قمت
فيصل ناظر وضعها وضحك : متى نمتي انتي ؟
الوجد راسها شوي ويطيح قدامها : معك
فيصل : ماصدق انا تركتك تتابعين جوالك ونمت وخليتك
الوجد غمضت عيونها ونطقت : ماعرف متى نمت لاتسألني
فيصل تنهد ووقف واتجهه لها ومسك يدها وقومها عن السرير : قومي غسلي وجهك تصحصحين
الوجد : بنام خمس دقايق بس
فيصل فتح باب الحمام يكرم القارئ : مافيه غسلي وجهك
الوجد تنهدت ودخلت وغسلت وجهها وناظرت شكلها بالمرايه ورتبت شعرها المبعثر من النوم
فيصل رجع تكى بالكنب
الوجد طلعت وهي تنشف وجهها : متى نروح؟ بخاطري اروح للبنات اودعهم
فيصل وهو ياكل : مايمدي بعد نص ساعه الرحله يالله يالله نلحق بعد
شهقت الوجد : تستهبل! ترى مطار الرياض مدينه ماشاء الله مو مطار كبير متى يمدي نوصل
فيصل : راحت نص ساعه على ماتقومين تعالي افطري وبنمشي
جلست الوجد قبال فيصل وهي متعجبه من برود فيصل وشاكه انه يكذب عليها يبغاها تخلص وتستعجل
فيصل غمس قطعه الخبره الصغيره بالعدس ومدها للوجد : سمي بالله
الوجد سمت بالله وفتحت فمها واكلت قطعه الخبر من يد فيصل
،
غرفه مازن ام صبحي
نايم في امان الله وبراد الغرفه ومخلص اختباراته كلها اخيراً انتهى من فتره زنقه الكلاب واطلق نومه بدون هموم وتفكير
دخلت شيهانه ولابسه قبعه الاحتفالات ومعها هذي "🎉"
والعنود لابسه قبعه الاحتفالات ومعها كيكه وجوري برضو لابسه قبعه ومعها الشموع
صرخت شيهانه بفرحه وفجرت هذي 🎉 على مازن : صباح الخير يالخريج
العنود : احلى من يتخرججج
جوري : قلوليششش الف الف مبروككك
مازن صحى من النوم ومو فاهم شي ويفرك عيونه : وش السالفه
شيهانه : نتايجك طلعو يالخريج
مازن فز : قولي والله !
جوري بممازحه : نحتفل فيك بما انك جايب العيد
مازن اخذ الابتوب الي على الطاوله وفتحه : شفتو الدرجات؟
العنود : لا ماشفناها بس واثقين انك جايب الفل مارك
شيهانه : بشرنا يلا كم
مازن دخل الموقع وشاف الدرجه وفتح فمه بصدمه وبنفس الوقت فرحه !
جاب الدرجه الي يطمح لها سنين نط وصرخ بفرحه : جبت ال 4
شيهانه مو مصدقه: كذاب مازن! معقوله جبتها!
العنود صرخت بفرحه وحضنت مازن : حبيب اخته الف الف مبروككك
جوري الابتسامه شاقه وجهها :يحياتي والله اخيراً تخرجو المعمرين بالجامعه
مازن عطاهم رقصه خاصه للنجاح وشيهانه ترقص معه وتهز كتوفها والعنود تصور وجوري تغني وتطبل على الطاوله
مازن وهو يرقص يغني :،جتني بشاير خير واصبحت مسرور
شيهانه تصفق بيدينها وتغني: تخرج دلوع البيت ي ناس
جوري تزغرط : ايوه ايوه عاش
العنود وهي تصور : الف الف مبـ....
قاطع كلامها مداهمه الجد سلطان للغرفه : انتم لاترقدون مع المسلمين ولاتقومون مع المسلمين انتم مخاويين؟ لعنبوكم امس ارسلت عمشه اخر اليل تكرشكم وهالحين انا بنفسي اجيكم ! ماتستحون؟
مازن : بس يـ....
قاطعه الجد : اقطع واخس وقم عاوننا بمجلس الرجاجيل
مازن : سم
طلع الجد من الغرفه وكشر مازن للبنات ولحق ابوه
شيهانه ارتخت كتوفها بضيق : اهخ ياربي تعبت من جدي بكل لحظه يشوفنا فرحانين يخربها ي بهاوش او ياخذ فرد من افراد الجلسه !
جوري : انا عن نفسي ملاحظه حركاته خصوصاً مع جوجي المسكينه
العنود تنهدت بضيق واخذت الكيكه وطلعت بزعل وضيق من ابوها وبحكم انه ابوها ماتقدر تتكلم عنه
شيهانه ناظرت العنود الين اختفت عن انظارها : شكلنا زعلناها
جوري عضت شفايفها : يوهه حنا حمير نحش بجدي وناسين انه ابوها ليش تفتحين الموضوع!
شيهانه : وش دراني تعودت احش عند الوجد والوجد ترقع الموضوع
جوري : الله يعين صدق ايي على طاري الوجد تهقين وش صار ؟
شيهانه : مادري بتصل على فيصل بسأله
جوري وهي طالعه من الغرفه : تمام امشي معي نشوف العنود
،
المطار
يمر في ممر السعاده وماسك يدها وهو في قمه السعاده والفرح مو مصدق ان هذي اول سفره لهم وهم يبادلون نفس الشعور من الحب والموده
تذكر الماضي لما كان يمشي بنفس الممر والوجد جنبه تبكي من سوء حالتها وحياتها
التفت يتأمل الابتسامه مافارقت وجهها يتأمل سوالفها ويتأمل حماسها وتصويرها للبنات
قاطع لحظه تأمله اتصال تنهد وطلع جواله من جيب ثوبه ورد : ياعدو السعاده وش تبي
مازن : هالمره انا حبيب السعاده مو عدو السعاده
فيصل لاحظ السعاده بصوت مازن وتلقائياً فرح لفرحه مازن : بشرني ي حبيب السعاده وش عندك
مازن : والله يعني حول لي حق النجاح
فيصل ضيق عيونه بتحدي : اجل النتايج؟ طيب لك الف ريال سعودي اذا جبت معدل 5
مازن : دافور الجامعه ماجاب 5
فيصل : يلا ننزل جب 4 وابشر بالالف
مازن : تعرف رقم الايبان صح؟ حول لي مقدماً
فيصل : نص ثقتك واملك العالم
مازن : لاتملك العالم بس حول لي يلا
فيصل استوعب وابتسم بوسع ثغره : تسوقها علي يمازن؟ انت صادق جبتها؟
مازن بأبتسامه : جبتها لعيون شروق
فيصل بفرحه : الله يبشرك بالجنه الف الف مبروك تستاهل والله مليون ريال على هالبشاره الحلوه ايهه زين جبتها ياخوك من زمان ننتظر هالدرجه
مازن : الله يبارك فيك لاداعي لاداعي
ابتسم فيصل : توصي على شي ؟
مازن : سلامتكم وين وصلتو؟
فيصل : اخطي خطوتي الاخيره للطائره
مازن رفع حاجبه : عشتو اللهجه تغيرت
ضحك فيصل ونطق : تلايط عطيتك وجهه يلا سلام
مازن بممازحه : دز امها سردب
ققل الخط مازن وابتسم فيصل وهم يركبون الطياره
الوجد لاحظت ابتسامات وضحكات فيصل ظنت انه يغازل لانه يطالع قدام ويبتسم
دقت جبنه : وش تشوف؟
فيصل يحارشها : اشوف لي صاروخخ
الوجد تناظر قدام تدور اي بنت بس ماحصلت عقدت حواجبها : وينها باخذ حسابها
فيصل كشر بممازحه : ياليل مافيك ذره غيره
الوجد : ادري بك ماتطالع غيري شرايك بالثقه بس
فيصل : ابداع والله ثقتك انتي وعمك مازن تخترق طبقه الاوزون
ضحكت الوجد وجلست بالمقعد وجلس فيصل جنبها ونطق : تدرين؟
الوجد : الله يستر عن وش ادري؟
فيصل : اليوم نتايج اختبارات مازن تهقين جاب الدرجه ؟
الوجد : احس جابها لان ماشاء الله عليه قرابه الشهر يذاكر ماده وحده بس اخذ عليها شهر ولكل مجتهد نصيب مستحيل يضيع تعبه وسهره وبيني وبينك كل تفكيره يعيش شروق بخير ونعمه
فيصل : طيب والي يقولك ان مازن ناجح وبيتوظف ان شاء الله ؟
فزت الوجد بفرحه وهي تنطق بـ : كذاب!
فيصل رفع حواجبه : اما عاد كذاب مره وحده؟
الوجد : مو كذاب بس يعني ماني مصدقه
فيصل : والله جابها ولد ابوه جاب الدرجه
الوجد : والله يستاهل
فيصل : ايه والله يستاهل
ابتسمت الوجد براحه واسندت ظهرها على المرتبه وراحت لعالم الخيال والتفكير بمفاجأه مازن ناويه تزوجه
بعد مرور ساعه ونصف بالضبط قطعو المسافه بين الرياض و جده توقفت الطياره وامروهم بالنزول من على متن الطائره
فيصل قام ومسك يد الوجد وسحبها قدامه تمشي الين خفت الزحمه وصارت تمشي جنبه
وقف فيصل ينتظر شنطه الوجد تجي
الوجد : فيصل بسألك
فيصل : اسألي
الوجد : ليش ماجبت لك شي من الرياض ؟ لاغيار ولاشي شفيك !
فيصل : به ملابسي بالبيت الي هنا
الوجد : ايه صح
فيصل اخذ شنطه الوجد ونطق : امشي للبيت نريح وخلي عنك الاسأله
الوجد هزت راسها بالرضى ومشت مع فيصل
،
المطبخ
العنود دخلت المطبخ والدمعه بعيونها ،نزلت الكيكه على الطاوله وجلست على الكرسي وقالت بينها وبين نفسها : ليش ي ابوي تصير انسان سيئ الكل يكرهك ويتكلمون عنك بالسيئه وانا الي اتضايق من كلامهم عنك صح انك سيئ التعامل بس تبقى ابوي مارضى عليك تـ...
قاطعت حبل هواجيسها من نطقت بـ : نودي انا اسفه
العنود رفعت انظارها وطاحت عينها على شيهانه الواققه عند الباب ومشبكه يدينها وملامحها متضايقه وجنبها جوري الي نظراتها ندم انها تكلمت بالجد سلطان
العنود تخفي شعور الضيقه : شدعوه ماتوصل للاعتذار
شيهانه تقدمت وسحبت كرسي وجلست مقابل العنود ونطقت : بس يحق لتس تزعلين علي انا وجوري نبقى غلطانين بحقتس
جوري وقفت ورا شيهانه الجالسه ونطقت : لاصدز عنيد حنا اسفين مره مره وماعاد نعيدها ابداً اصلاً مهما كان مايصير نحتسي بجدنا
العنود تنهدت ونطقت : خلاص بنات لايصير بيننا معاتب ماحبها اصلاً مازعلت عليكم زعلت على مازن من خربت فرحته
جوري : خلي عنتس مازن البريعصي نبي نسوي حفلته لاجت وجيد نفرح سوا هالحين وش تفيدنا فرحه مازن اذا وجيد وفيصل ماهم بفرحانين ؟
شيهانه : اقضبي لسانتس ي جويريه وخلينا نفرح بالولد هاليوم قبل باتسر حرام عليتس هو تعب وشقى وتبينا نحتفل بعد ماتزين من هناك مو منطقي ! صح اخوي وزوجه اخوي وخويتي واختي واحبهم بس ولو مالكن داعي اننا نأخر فرحه مازن
العنود : كلنا نحب مازن زي حبنا لفيصل والوجد بس ولو ي شويهين نبي نفرح مع مازن والوجد وفيصل
شيهانه رفعت كتوفها : مدري عنتس انتي وجويريه بس اشوف ان تأجيل حفل مازن ظلم بمازن
جوري : ماحنا بظالمين الولد احتفلنا به اليوم كثر خيرنا باركنا له الله يكتب اجرنا بنأجل حفل مازن كم يوم لين تزين وتستقر اوضاع الوجد وفيصل ويقدرون يجون ويحتفلون معنا
شيهانه قامت : الوكاد عاد سوو الي تبون بروح اتطمن على فيصل والوجد وش صار عليهم
العنود : اجلسي خلينا ننطمن معاك
دخلت ام بتال ومعها كميه من الصحون المتسخه ويبغى لها غسيل : سلام ي ينات
البنات : هلا وعليتس السلام
ام بتال : وش تسون ؟
شيهانه جلست : ابد ي خاله مانسوي شي بس سوالف المطبخ تعرفين غير
ام بتال نزلت الصحون بالمغسله والتفتت للبنات : يبنات والله ان قلبي منشغل لفيصل وينه وش صار عليه وليش مايرد هو طلع من عند جدكن ولاعاد شفناه خايفتن صايرن له شين
ضحكت العنود ونطقت بممازحه : والله ي ام بتال ان الي يشوفك يقول ان فيصل ولدك تخافين عليه اكثر من جوري
ام بتال : وهذا الصدز فيصل ولدي مربيته مع ولدي بتال
جوري بممازحه ؛ لا ماهو بأخوي
شيهانه ببمازحه : زين حاصل لتس
ام بتال ضحكت ونطقت : ماهو اخوتس لكن بحسبه اخوتس لاحتجتي شي وماحصلتي اخوتس بتال تلقين اخوتس فيصل
جوري تهز كتوفها بفرحه : صار عندي اخوين ثنين بدال واحد يس يس قصدي اوهه لالا
شيهانه طلعت لسانها تحارش جوري : مستوى عندي ثلاث حمير
العنود : حتى انا عندي ثلاث صقور
ام بتال : خلن عنكن الهرج الفاضي وقلن لي وينهو فيصل وحرمته ؟
جوري : اوهه قد هو غاطس بالبحر الاحمر
ام بتال عقدت حواجبها بعدم فهم : تهرجي زي الاوادم وش دخل البحر ؟
العنود : تقصد انه راح لجده
شهقت ام بتال : تقولينها صادزه؟ الولد امرح بجده وماحتسيتن لي؟
شيهانه : ي خاله هذا مجرد تحليل انهم وصلو جده هالحين بندق على الوجد ونشوف
دخلت ام نواف وهي تنطق : الكاسات الي هنا وينـ...
سكتت من شافت الاجتماع ونطقت : شبلاكن؟
جوري ماتمسك علم ابداً : شويهين بتتصل على اخوها او وجيد بنتطمن عليهم
ام نواف تقدمت ونطقت : الله يبشرتس بالخير اي بالله اتصلن
شيهانه فاقده الامل بفيصل تدري ماراح يرد فـ اتصلت على الوجد
سرعان ماردت الوجد : شيهانتيييي وحشتينيييي
ام بتال بفرحه : وشلونتس ي بنتي عساتس بخير
الوجد :والله ي خاله الحمدلله بخير وصحه وسلامه انتي وشلونك انتي والبنات والحريم ؟
ام بتال : والله على ماتحبين يبنتي كلنا الحمدلله بخير
الوجد : الحمدلله دوم
جوري : وياتس خلاص ندري انتس بخير قولي لنا وصلتو؟
الوجد : ايي وصلنا الحمدلله يجننن الجو اجواء صيفيه على رطوبه يجنن الجو
شيهانه : اجل حنا ذبحنا البرد
الوجد بممازحه : انتي البسي بلوفر وانا بلبس توب من الحر
جوري بممازحه : بتلحف عند الدفايه وانتي اقعدي عند المكيف
ام نواف : وشلون فيصل يالوجد؟
الوجد : كويس مافيه شي تبغين تكلمينه؟
ام نواف بشوق ولهفه لولدها الي طلع من عندهم معصب : اي بالله عطيني ياه
الوجد : تمام ثواني بروح له
ام نواف اخذت الجوال من يد شيهانه وحطته بأذنها وانتظرت الرد
: فيصل خالتي تبغاك
فيصل اخذ جوال الوجد ورد : لبيه ي يمه
ام نواف : وشلونك يولدي عساك بخير
فيصل : والله اني بخير انتي شلونتس وابوي شلونه؟
ام نواف : ابوك متضايق
فيصل عقد حواجبه : افا علامه؟
ام نواف : تضايق انك طلعت من عنده زعلان منه
فيصل : لا ييمه عيني من الله خير ماني بزعلان على ابوي
ام نواف : عاد أبوك طول عمره مايمد يده على عياله الين جيت انت وشيبت براس ابوك شف حظك يولدي
ضحك فيصل ونطق : حظي ردي انا الي لقمت الضرب والتربيه القديمه رغم اني عنقود العيال بس وش نسوي اذا الحظ اعوج
ام نواف : يبدغك واجد لكن انه يغليك اكثر من عيالي الثانين
فيصل بأبتسامه : الله يطول بعمره هه عاد طولت عليتس سلمي لي على الي عندتس وابوي
ام نواف : الله يسلمك يوصل ، استودعتك الله
قفلت الخط ونطقت : يسلم عليكم فيصل
الكل : الله يسلمه
،
فيصل والوجد وافقين قبال بيتهم الي بجده متوهقين لان اخونا في الله مضيع المفتاح !
فيصل يتحسس جيوب ثوبه : ماحصلت شي ياليل شكلي ضيعته
تنهدت الوجد : لاعاد قول غيرها
فيصل : شوفي ماني متاكد بس تتذكر اني حطيته بشنطتك
الوجد فتحت شنطه اليد : شطنتي؟ وش جابه اي هذا هو
فيصل اخذ المفتاح من يدها : عشتي ، داري اني بغدي المفتاح قلت احطه بشنطتك احفظ
الوجد تركت كل كلامه وركزت على جمله وحده : بغدي؟ جوعان فيصل مشتهي غدا؟
فيصل عقد حواجبه وهو يحط يده ورا ظهرها يدخلها البيت : ليش جيعان؟ لا ماني جيعان
الوجد دخلت البيت ونطقت : مدري انت قلت بغدي او شي زي كذا
ضحك فيصل ونطق : ي حليلك بس المقصد اني اضيع المفتاح
الوجد : مريب
فيصل : زين روحي بدلي ملابسك وتلقيني هنا
الوجد هزت راسها واخذت الشنطه معها وطلعت لدور الثاني وبدلت ملابسها واخذت نفس براحه ماتدري وش سر راحتها بجده !
فتحت الدريشه وميلت راسها بتأمل لجمال البحر ولشوق لبدايه علاقتها بفيصل وكيف انه حبها وبادر لها بس ماعطته رد لحبها
قطع حبل افكارها اتصال وعت على نفسها واخذت الجوال وقرت الاسم وفزت بفرحه : شيهانتيييي وحشتينيييي
وزي ماتم ذكر المكالمه بالتفصيل الين ام نواف طلبت منها فيصل
نزلت من الدرج وهي تنطق : فيصل خالتي تبغاك
تقدمت ومدت الجوال له واخذه ورد بـ : لبيه ي يمه
الوجد احترمت خصوصيه الام وولدها وراحت للمطبخ تغبر فيه اي حاجه بالحياه تسويها بأختصار "تحوس "

_________________
انتهى البارت ♡
رضيت بالله ربًا وبالإسلام دينًا وبمحمد ﷺ رسولًا ونبيًا)، ♡
حسابي تيك توك :Ot348285
حسابي انستا انزل فيه الروايه : Ot34828
النجمه تدعم الروايه✨

مازن جلس على كرسي المقابله وتنحنح ونطق : ياهلا ويامرحبا ويامسهلا فيكم حلفت عليكم تحضورن حفله تخرجي ي المتابيع
رمى شماغه عليكم طالبكم بحضور حفلته لاتردون الولد🎉🎉🎉