لاتقارنين حبي لك بأي مخلوق انا حتى بغيابك احبك

Part 42

سبحان الله وبحمده سبحان الله العظيم ♡

طلعت الوجد من بيت العم محمد متوجهه لبيت ابوها تركي كلها كم خطوه وواصله بيت ابوها
ضغطت زر الجرس وعدلت الشال الي على كتوفها بسبب برود الجو
ثواني عديده وفتح الباب ونطق بحب : وجيدد ياعين ابوك ادخلي يابعدي عن البرد
ابتسمت الوجد ودخلت : شلونك ؟
ابو الوجد يمشي جنب بنته : والله على ماتحبين يابنتي انتي قولي لي شلونك وليه جايه لايكون متهاوشه مع فيصل
الوجد : بخير والله ، لاوين ماتهاوشت معاه بس جيت بشوف وش وضع ماما معي هي معي ولا ضدي وليش تدافع عني اليوم
ابو الوجد خاف ان حرمته ترفض بنته وتكسر بخاطر بنته : شرايك تأجلين الموضوع لان امك منهاره نفسيتها
الوجد عقدت حواجبها : ليش شفيها؟
ابو الوجد تنهد وجلس بالكنب : والله مادري يبنتي شفيها بس تبكي ولاتاكل ونفسيتها ماش ماني عارف وش فيها
الوجد بخوف :يمه بسم الله عليها طيب بشوفها
ابو الوجد : رافضه تشوف احد حتى انا
الوجد : وينها هي الحين ؟
ابو الوجد : مقفله على نفسها الغرفه ولاتبي تقابل احد يالله يالله اليوم جت معي يوم يجمعنا ابوي
الوجد اخذت نفس بضيق : ايوهه شفت ملامح وجهها اليوم تعبانه
ابو الوجد : ايه والله صدقتي تعبانه ولاهي الي سامحه لي اتدخل بحالتها ماتبي لاشيخ ولادكتور يكشف عن حالتها
الوجد بضيق : يالله ضاق خاطري عليها ليش مسويه بعمرها كذا بتكلم معها شوي يمكن تسمع مني
ابو الوجد وقف : اجل امشي معي نشوف
قامت الوجد ولحقت ابوها ومتوجهين للغرفه المتواجده فيها هند
الوجد طقت الباب ونطقت : ماما تسمحين لي ادخل؟
ام الوجد من ورا الباب : ياوجد يرحم والديك روحي اطلعي
عقدت حواجبها ونطقت : ليش اطلع بشوفك طيب بتكلم معاك!
ام الوجد : لاتكبر السالفه ويزود فيها الكرهه اطلعي من البيت
الوجد : لحظه دقيقه اي سالفه واي كرهه؟
ابو الوجد بهمس : يوم تتهاوشين انتي وياها ذيك السالفه
الوجد : ي ماما الموضوع مافيه كرهه اطلعي خليتي اشوفك واتكلم معاك
ام الوجد بصراخ : مابغى اشوف احد خلاص !
الوجد غمضت عيونها من شده علو صراخ هند
ابو الوجد : قلت لك اجلس الموضوع هي الحين بحال مايسمح لها تعالي العصريه بكرا
الوجد نظراتها كلها انكسار من رفض امها لها نطقت بصوت خافت وماينسمع : تمام
مشت طالعه من الييت وهي تناظر خطواتها الثقيله تعبت من صدود امها رغم محاولات الوجد المستمره الا انها بكل مره تحصل رد وصد
طلعت من البيت وسكرت الباب وطاحت بالارض على ركبها تبكي بقوه وحرقه وانكسار وخذلان بكت مثل بكاء طفل ضايع من حضن امه
خافت احد يسمع صوت بكائها حطت يدها على فمها تمنع صوت بكائها
قامت عن الارض وجلست على عتب البيت ونزلت راسها والدموع تنزل بغزاره خبت وجهها بيدينها
بعز انهياراتها ماحصلت حضن يطبطب عليها
ارخت ظهرها على الباب وعيونها متورمه من البكى وراسها يألمها
تناظر ولاشي قدامها مجرد مزرعه مليئه بالظلم والحقد والحسد
اخذت نفس طويل عريض يعبر عن ضيقتها ومسحت دموعها
رفعت يدينها تهوي على نفسها ووقفت راجعه بيت العم محمد وخايفه احد يشوف عيونها المورمه وخصوصاً خايفه فيصل يشوف عيونها وانفها
همست بـ : لااله الا الله بدخل والي يصير يصير ان شاء الله يكون نايم ولايلعب سوني
حطت يدها على مقبض الباب واخذت نفس تهدي نفسها وتوترها ودخلت بهدوء وسكرت الباب وراها وتمشي على اطراف رجولها خوفاً من احد من اهل البيت يشوفها بالمنظر والدموع والضيق الي فيها !
شيهانه نازله من الدرج ولابسه سماعه الراس ومعها الايباد تتابع فيها ورفعت راسها وناظرت الوجد الي واقفه على اطراف رجولها : بنت شفيك ؟ جتك لعنه الشياطين؟
الوجد تتجنب النظر بعيون شيهانه : لا شدعوا بس عطشت ونزلت اشرب مويه والحين راجعه
شيهانه ماشكت بوضع الوجد وتجاهلت : اها بالعافيه على قلبك
الوجد ابتسمت ومرت من جنب شيهانه بسرعه ونطقت وهي تمشي : الله يعافيك
شيهانه ميلت شفايفها ورفعت كتوفها وراحت والوجد طلعت من الدرج بخطوات سريعه
وقفت عند باب غرفه فيصل ووقفت لثواني عديده تتاكد هل فيصل صاحي ولانايم ولايلعب؟
الغرفه هدوء والمتوقع انه نايم لان بتفكير الوجد اذا كان يلعب سوني بيصرخ ويلعن واذا كان صاحي مايجلس بالغرفه
تنهدت ودخلت بهدوء وسكرت الباب والتفتت على السرير وشافت فيصل الي لازال لابس البجامه الكاروهات وعليه ربطه الراس ونايم وكأنه كان ينتظر الوجد واخذه النوم
الوجد ميلت راسها بحب وابتسامه : اوهه كيوت
تقدمت له وسحبت البطانيه تغطيه فجاه فيصل نط بوجه الوجد وصرخ يخوفها
صرخت الوجد بخوف من نطه فيصل عليها
ضحك فيصل : يالخوافه
الوجد حطت يدها على صدرها بخوف : خوفتنيي مالك داعي والله تخوفني
فيصل حط يده فوق يدها : بس الله على القلب وراعيه وعـ..
سكت بوسط كلامه وعقد حواجبه بأستغراب : وش فيهم عيونك؟
الوجد صدت وجهها عنه : مافيني شي
فيصل مسك عضودها وسحبها له ونطق : بنت اتكلم معك بجديه وش فيهم عيونك منتفخه وخشمك وخدودك ورديه ليش باكيه مين مبكيك؟ احد قايل لك شي؟
الوجد ناظرت عيون فيصل ونطقت : فيصل حبيبي مافيني شيي
فيصل زفر بطفش : لاحول ولاقوه الا بالله ابك بتتكلمين بالطيب ولا شلون؟
الوجد اضطرت تكذب عليه : شدعوا عاد مسخنه شوي مافيني شي
فيصل ترك عضودها ورفع كفه وحطه على جبهه الوجد ونطق : حراره جسمك كويسه تخبين علي شي؟
الوجد : لاماخبي شي بس سخنه عاديه
فيصل : ياوجدي لاتجحدين علي بشي تهرجي
الوجد : فاصولياء مافـ....
قطع حديثهم المتواضع اتصال جوال الوجد
عقد حواجبه فيصل : من يدق اخر اليل
الوجد ميلت شفايفها : ماعرف
دخلت يدها بجيبها وطلعت الجوال وعقدت حواجبها : اهلين خيالي؟
خيال : بنت وينك من المغرب وانا احاول اتواصل معك
تنهد فيصل براحه من عرف انها صاحبه الوجد واحترم خصوصيتهم واخذ جواله وطلع من الغرفه
الوجد : ليش وش صاير
خيال : الدكتوره ابتهال جحفلنتنا وانتي مقفله جوالك ماعرف ليه
الوجد : هالدكتوره من زمان ماني متطمنه لها وش مسويه
خيال : تخيليي وش سوت حطت بكرا الكويز !
الوجد شهقت بصدمه : تستهبلين خيال؟
خيال : لاوربي ماستهبل من اليوم وانا اتصل عليك بس ماتردين علي
الوجد مسكت راسها بصدمه : يبنتي وش اسوي مايمدي اسوي حاجه مايمدي اذاكر مادتها دسمه
خيال : وهذا بلانا انا مثلك تجحفلت قلت لماما باخذ قيلوله ساعه ساعتين وصحيتي وزي ماتشوفين توي صحيت ومتوهقه !
الوجد : ببكي ياربي وش نسوي
خيال : اسمعي يالبكايه لاتفكرين بالوقت ذاكري وانا بذاكر والي ماعرفته بسالك وانتي برضو الي ماعرفتيه اساليني
الوجد تغيرت نبره صوتها بغصه لان الموضوع يبكي : ماقدرر خيالي متخيليه اني صاحيه من امس الفجر متى يمدي اذاكر متى يمدي انام !
خيال : جوجي قاعده توتريني مرهه ابدي الحين ان شاء الله يكون سهل والله ي جوجي لو ان الوقت مو متاخر كان قلطت عندك بس زي ماتشوفين الوقت متاخر ومستحيه من رجلك
الوجد : معليه خيره يلا بروح اقلب بالسلايد لين ربي يفرجها
خيال : بالتوفيق ياعيوني
الوجد : حبيبتي وياك
قفلت الخط ورمت جوالها على السرير وجلست بحيره والتفكير والتعب ياكلها كيف بكرا عليها كويز وهي ماذاكرت والدكتوره ابداً ماهي متساهله معهم
كل الي بدر منها ان عيونها تدمع بغبنه !
فيصل دخل : سلام
الوجد بدون لاتطالع فيه : وعليك السلام
فيصل ميز نبره صوتها المتغير وتقدم وجلس جنبها
حط يده تحت فكها ورفعه وناظر عيونها المدمعه : افااا شفيه الحلو يبكي
الوجد بحلطمه ودموع : فيصلل تخيلل علي كويز بكرا
فيصل غارق بعيونها ولاهو لم حلطمتها وحضنها ومسح على شعرها : معليه ومعليه
الوجد عقدت حواجبها بغرابه من حضن فيصل المفاجئ : وش معليه انت الثاني اقولك علي كويز بكرا والدكتوره ماش
فيصل : سهله هونيها تهون
الوجد تأفأفت وابتعدت عن حضن فيصل: افف شسويي
فيصل : يبوك بدال هالحلطمه جيبي اييادك وتعالي نقلب فيه انا وياك يمكن اعرف له
الوجد قامت واخذت الايباد الي على الطاوله ورجعت وجلست قبال فيصل
فيصل اخذ الايباد وفتح السلايد والقى نظره سريعه على المنهج ونطق يبسط لها الموضوع : بيسطه يبوك
الوجد : فيصل انت شايف المنهج كيف دسم !
فيصل : يبنت الحلال انتي اتركي هالحلطمه وركزي معي خلينا نقرا ونفهم وسهالات ان شاء الله
الوجد كل شغلتها تتحلطم وفيصل يهدي فيها مايدري كيف يصارحها انه متوهق مثلها مايعرف المنهج
فيصل مد الايباد : اشرحي لي على فهمك
الوجد بعد ماهدت اخذت الايباد وحست ان الوضع سهل بس هي متوتره وبالها مشغول ومو قادره تركز
فزت بفرحه : ايييي ايي هذا اعرفه اعرفه بشرح لك
فيصل بأبتسامه : يلا سمي بالله وابدي اشرحي لي
تربعت الوجد وسمت بالله وحطت الايباد بحضنها وبدت تشرح لفيصل بيدينها وهذي طريقه من طرق المذاكره الفعاله
فيصل انسدح وحط يده تحت خده يتأمل ويهز راسه يسلك لشرحها وهو مشغول يتأمل
الوجد : زي ماقلت لك هذي العوامل فاهم؟
فيصل : ايه معك معك
،
في غرفتها اللابتوب بحضنها والفشار بيدها وتاكل وتضحك وتتابع فلم كوميدي ترفهه على نفسها
لفت انتباهها رساله على جوالها ، عقدت حواجبها بغرابه لان الوقت متأخر مين صاحي يرسل اخر اليل !
سحبت جوالها وناظرت الحساب جديد !ميلت شفايفها بحيره
: السلام عليكم ، مرحبا جوري
خوفها ودقات قلبها مو طبيعي لدرجه انها ماقدرت ترد على الحساب مين هو وليش يعرف اسمها !
: جوري ؟ موجوده؟
جوري : عفريت انت ؟ رسايل اخر اليل صاحي؟ مين انت
: معك طلال
اتسعت عيون جوري بصدمه : ماتستحي على وجهك
طلال : الا استحي على وجهي
جوري : لو انت تستحي على وجهك ماكان جيتني لكن ماش وجهك مغسول بمرق
طلال : يالبيه مرق ايدام ؟ شهيتيني !
جوري : خف علينا يالحامل المتوحمه اخلص وش تبي؟
طلال : مدري الصراحه وش ابي لكن وش تحسيني؟
جوري : احسك المغرب يوم السبت وش وش احسك صاحي انت؟
طلال : ومشاعيري؟
جوري : ابوها من مشاعر فارقني وش تبي من كبدي حتى بالاحلام طالع لي كأنك رجل الاحلام
طلال حط يده على خده : صدق؟ تحلمين فيني؟ لدرجه مهووسه فيني؟
جوري : وش مهووسه فيك شايف وسع وجهك كأنه مقلط جدي
طلال : اح عاد مقلط العم سلطان كبير ليش جرح المشاعر
جوري : وش جرح مشاعره وانت كلك سيقان ويدينك طوال كأنك اندرمان يشيخ استح على وجهك
طلال بضحكه : مشاعري جرحيتها !
جوري : خيطها يلا قل الي عندك وش تبي؟
طلال : مابي شي
جوري : اجل تقلع
طلعت من المحتدثه وتحاول تخفي ابتسامتها تحس بمشاعر فراشات متطايره بصدرها بس تنكر !
،
قبل شروق الشمس بربع ساعه
فيصل نايم والوجد على صدره نايمه والقطوه مناشبتهم ونايمه على صدر فيصل من الجهه الثانيه "فيصل راعي الحرمتين "
رن المنبه وفتح عيونه فيصل لان الجوال عند اذنه كشر وناظر الساعه وقفل المنبه وناظر وضع الوجد والقطوه وابتسم بوسع ثغره ونطق بينه وبين نفسه : كملي النومه ي شيخه اختبارك لاحقين عليه
رجع نام دقائق ورن المنبه مره ثانيه
فتح عيونه وسحب الجوال ونطق : الله يعطيك الصجه واللجه
قفل الجوال ورجع غمض عيونه وحس بتأنيب الضمير وتنهد ونطق : وجدي
الوجد تحرك بأنزعاج ونطقت بصوت مليان نوم : هاه
فيصل : ابك ودي ودي اخليك ترقدين بس عندي ضمير يقول قومها وراها مستقبل
الوجد بنوم : فيصلل خلاص خمس دقايق
فيصل : مافيه ولاترى بقوم والبس لبس الدوام وادزها لدوام وانتي اقعدي به
الوجد زفرت وقامت : طيب
فيصل قام : بروح اشوف امي وش مسويه للفطور وانتي قومي البسي
الوجد مغمضه عيونها وراسها مايل وتعبانه تنود : تمام
فيصل: ماني متطمن احس بترجعين ترقدين الوكاد عاني رطنه جويع ماعندها اكل اكليها
الوجد فتحت عيونها وناظر للقطوه وابتسمت : لالي ياعيون جوجي
فيصل كشر : مالت علي وعليك وعلى رطنه
الوجد ضحكت : لالي اخذت مكانك وحبك بقلبي
فيصل سوى بيده كذا "🤌🏻" : اوريك برميها ولاتاخذ مكاني
الوجد حضنت القطوه : لا والله ماترميها
فيصل : صدقت يلا بروح ازعج الاهل واجيك
الوجد وقفت : تمام بتجهز
فيصل ابتسم وطلع من الغرفه والوجد تتجهز وهي كلها توتر من الكويز
،
عند طاوله الطعام
ام نواف والخدامه يحطون الاكل على الطاوله وشيهانه مسنده راسها على طاوله الطعام ونايمه
فهد وابو نواف بالمجلس يتناقشون عن موضوع وظيفه فهد
نزل فيصل وناسي تماماً ربطه الراس الي على راسه وبجامته الكاروهات ونطق بعلو صوته : سلام عليكم
فهد وابو نواف عقدو حواجبهم وناظرو فيصل بنظرات صدمه ونقد نوعاً ماء : وعليكم السلام
ام نواف ماهتمت : ياهلا ويامرحبا ب عنقود العيال حياك الله تعال اجلس
فيصل تقدم ونطق : الله يحييك ي نيوفه
فهد : مؤسس ووزير العقوق
فيصل ماله خلق يتناقش: حاضرين ي اخوي الكبير اوامر ثانيه؟
ابو نواف : يوليدي الظاهر تأثير الوجد بدا يظهر
فيصل : اهم شي من الوجد ولا من غير الوجد
ام نواف ضحكت : تعالو افطرو وانت يفيصل وين حرمتك
فيصل وقف عند شيهانه النايمه وضرب رقبتها من ورا : حرمتي تسعى للعلم وبنتك تسعى للمسلسلات اخر الليول
شيهانه فزت من غفوتها وحطت يدها ورا رقبتها : يبه شوف فيصلل
ابو نواف جلس على الكرسي : يولد اترك اختك
شيهانه ناظرت فيصل : مكثر صويا على الريق وش هالربطه انا وانا بنت مالبستها
فيصل : سردبي وانا اخوك
ام نواف : لايكون عليها اختبار ولا شي؟
فيصل جلس ياكل الزيتون : للاسف الشديد طلع عليها كويز وماذاكرته زين
شيهانه : اجل تسعى للعلم؟
فيصل التفت لشيهانه : تسعى للعلم من امس وهي تبكي عشانها ماذاكرته
ابو نواف : ياحبيِبتي ياهي
نزلت الوجد من الدرج : حبيبي فيصل
فيصل ذاب : عيونه ي لبيه
الوجد عضت على شفايفها بأحراج من وجود اهل فيصل
ابو نواف عرف انها انحرجت من الموقف : تعالي يبنتي الحقي افطري
الوجد رفعت كاب البلوفر على شعرها احترماً لوجود فهد بين اهله
تقدمت وجلست جنب فيصل وهمست : الربطه ي فيصل
فيصل بفهاوه : اي ربطه؟
ابو نواف : بمناسبه هالجمعه الحلوه في بشاره فهيدان بيقولها لكم
شيهانه : انطق ي مختبر دكستر
فيصل : امااا عاد فهيدان مختبر دكستر يعني انتي ديدي
شيهانه : لا هني ستوب!
فهد تنحنح ونطق بثقه : انا توظفت
فيصل فز بفرحه وحضن فهد : ياشيخخ وش هالبشاره الحلوهه ! الف الف مبروك هالوظيفه يلا عاد وظيفه وجت بقى بنت الحلال
فهد بضحكه : الله يبارك فيك ، متحمس لزواج ياخوي
فيصل بممازحه : بيني وبينك بتزوج على وجدي ٣ نسوان بعد مين مايحب النسوان لبى النسـ..
فيصل قطع كلامه بصرخه : اححح قرصه عقرب ماهي قرصه بنت
الوجد :احسن تستاهل القرصه
فيصل يحك مكان القرصه : قرصه امهات
ام نواف : الف الف مبروك ياوليدي فهد وانت ي فيصل تستاهل هالقرصه
شيهانه حضنت فهد : الف الف مبروك ي مختبر دكستر حقنا
الوجد : الف مبرك ياخوي
فهد : الله ييارك فيكم جميعاً
فيصل تخصر واستقعد للوجد : نعم اختى السعيده ؟ ماحترمتي وجودي وتباركين لخوي ؟ ماقد سمعتي بغيرتي على اخوي؟
الوجد ذكيه وقلبت الطاوله عليه : مين جودي؟؟
فيصل اتسعت عيونه بصدمه من حركتها الذكيه : قصدي وجودي وجودي
الوجد : وتعيدها بعد مرتين؟؟ مين جودي صدق ابو طبيع مايخلي طبعه
فيصل : يبنتي اقصد وجودي يعني بحضوري
ابو نواف : ان لله وانا اليه راجعون وش بلاك مستجن اليوم الناس تبي تبارك لاخوك وانت تحارش
فيصل : امتعكم في تغيير الجو
الوجد : فيصل يرحم والديك اخلص فطور ورح البس بنتأخر ترا !
فيصل اخذ صحن الزيتون وطلع من الدرج
شيهانه : مكثر صويا
فهد : ذبه مستهلكه جيبي غيرها
شيهانه : كش عطني على جوي
ضحكت ام نواف : كولو غميضه الاكل
رجعو لطاوله الطعام
: عاد يولدي قدك كبرت لازم نخطب لك هالبنيه الي تمدحها الوجد وعمك تركي
فهد : والنعم فيها والله ابد تم
ابتسمت ام نواف ومانطقت بشي ماغير تتأمل عيالها وبناتها
اكملو فطورهم وسوالفهم عن وظيفه فهد الي توظف دكتور مع العم تركي "الـدكـتـور فـهـد بـن مـحـمـد آل سـلـطـان "
نزل فيصل لابس لبس الدوام ويلعب بالمفتاح : ها وجيد مشينا؟
الوجد قامت : ايوه بس تعال افطر مافطرت
فيصل : والله اني طفحت من اكل الزيتون انتظرك بالسياره البسى عبايتك وتعالي
الوجد هزت راسها برضى وفيصل طلع وهي راحت تلبس عبايتها
،
اخونا في الله جتيي سماعه ومشغل "لايازمن وش باقي اكثر ماخذيت " ومفعل وضعيه المضيوم والمظلوم من الدراسه وهو غايب اغلب الترم وكويس مالقم حرمان
متكي على المركى ويمينه ويساره اوراق ويغني لايازمن
شغل جواله وشاف اخر مكالمه بينه وبين شروق وتنهد
: تنهيده يبي لها ١٩ رئه ياعيشتن قشرا
دخلت الخدامه ومعها عصير لمازن لعل وعسى يركز
مازن : مابي عصير ابي عصفر بعد هالمنهج
الخدامه كشرت بعدم فهم
مازن اخذ العصير : زين شكرا سوي دعاء اقول من النوم احصل شروق تجيب لي العصير
الخدامه : الله كريم الله كريم
مازن هز راسه بيأس وهو يشرب العصير : الله كريم
،
متكى على السياره ويقلب في جواله وينتظرها تجي
جت الوجد : ليش مادخلت بالسياره؟
فيصل فتح الباب والابتسامه ماتفارق وجهه : ادخلي يابعد الاوطان انتي
الوجد ركبت ونطقت بأبتسامه : ي حياتي
فيصل مسك يدها ونطق : توكلي على الله ولاتشيلين هم الكويز انا واثق فيك
الوجد : احس بجيب العيد فيه ماذاكرت كويس
فيصل عقد حواجبه بأنزعاج من كلامها : يبوك ماحب الي يقول كذا تفائلي بالخير
الوجد رفعت اصبعها وحطتها بين حواجب فيصل: ان شاء الله بس فك عقده الحواجب
فيصل ابتسم : ابشري
سكر الباب وركب السياره من جهه السايق وحرك السياره وهو ماسك يد الوجد بحب والوجد متوتره من الكويز

__________________
انتهى البارت ♡
رضيت بالله ربًا وبالإسلام دينًا وبمحمد ﷺ رسولًا ونبيًا)، ♡
حسابي تيك توك :Ot348285
حسابي انستا انزل فيه الروايه : Ot34828
النجمه تدعم الروايه
*اعتذر عن الاخطاء الاملائيه*

بشخصنها مع اي وحده ماضحكت على ذبه اندرمان ومختبر دكستر😭