لاتقارنين حبي لك بأي مخلوق انا حتى بغيابك احبك

Part 40

سبحان الله وبحمده سبحان الله العظيم ♡

بعد مرور شهر ..
العصريه بيت العم محمد تحديداً الحوش .
الكل مستبشر بالخير بعد رجوع الوجد وفيصل وكأن الحياه رجعت لبيتهم ماكانو مدركين ان البيت بدون الوجد طافي مافيه حياه وشغف
نواف من بعد زواج العنود اخذ زوجته وعياله وراحو لبيتهم بسبب المدراس
فهد عند مازن يذاكر ويشرح لمازن الي يعيش اقسى مراحل الندم
فيصل جالس بالكراسي وجنبه الوجد وحاضنها على جنب وبحضنها القطوه
شيهانه الي تركض بالحوش تنزل وزن بسبب تخصصها
ابو نواف وام نواف يتقهوون ووجيههم مستبشره
وقفت شيهانه واخذت الحلقه وحطتها على خصرها وبدت تلعب فيها ومهدود حيلها : الله حسيبها هالدكتوره من هالتمارين
ضحك ابو نواف : لياقه وانا ابوك
شيهانه اخذت شهيق زفير : لياقه بالاجبار
ضحكو الكل وهمس فيصل للوجد : وش سميتها؟
الوجد زمت شفايفها بتفكير : ممكن لالي
فيصل : اقولك اسمها رطنه خلي عنك بس
الوجد ضحكت : مقدرر وجهها كيوت ماينفع اسمها كذا
ضحك فيصل : بمشيها عشاني مشتاق ! حرمتيني من شوفتك اسبوع لكن بقيت مشتاق شهر رغم انك جنبي بس مشتاق
الوجد عضت على شفايفها بأحراج ودقت جنب فيصل بخفه بمعنى اسكت
ام نواف مدت صحن الفواكه لفيصل : خذ واعط الوجد
اخذ صحن الفواكه : اختاري الي انتي عاوزه "رياكشن "
الوجد ضحكت ونطقت من بين ضحكاتها : مش عاوزه حاجه
فيصل اخذ البرتقاله ونطق : كيفك يابوك فاتك
ابو نواف : فيصل ياولدي فيهدان ومازن مالهم حس
فيصل : اينشتاين عند البقره مازن يشرح له
ام نواف : اي زين ماسوى فهيدان ياربه يمسك هالمطيوش
جت شيهانه مهدود حيلها : وين برتقاله هقي؟ "رياكشن"
الوجد : حقتك اكلها اخوك
شيهانه تخصرت : هذي حقتيي حقتي عطني ياها
فيصل يتلذذ بطعم البرتقال ويناظر شيهانه ويحارشها
شيهانه التفتت على ابوها : يبه عان فيصل اخذ برتقالتي
ابو نواف تنهد بتعب من عياله الي يحارشون بعض : ابك عاني قدامتس خمس طعش برتقاله مازانت لتس الا الي بيد اخوتس ؟
الوجد : معليش ياعمو البرتقاله حقت شيهانه انا شفتها حطت مناكير على البرتقاله
فيصل غص بالبرتقال من صدمته : وش نظامك انتي معهم معهم عليهم عليهم؟
الوجد رفعت كتوفها : يمكن نظام النساء للنساء
شيهانه : صح صادقه وجيد انا وسمت البرتقاله بمناكير احمر عشان الثور يشوف وماياكل البرتقاله
فيصل : تستهبلين انتي وياها ؟ في احد يوسم برتقاله ليه ناقه؟
الوجد كانت تشرب القهوه السودا ومن قال فيصل ليه ناقه ضحكت والقهوه بفمها والتفتت على فيصل وهي تضحك وبفمها قهوه
فيصل ناظر الوجد المكتومه بالقهوه وناظرها فجأه صار وجهه مهرج
فيصل حس بالغدره يدري الحين الوجد تكب كل القهوه عليه تدارك الوضع ومسك وجهها ولفه ومن سوء حظ شيهانه
الوجد ماتحملت وطشرت كل القهوه الي بفمها على ملابس شيهانه
شيهانه شهقت بصدمه : وجعوه استغفر الله
فيصل ماتحمل يمسك نفسه اكثر من كذا وانفجر ضحك من منظر شيهانه المصدوم ومنظر الوجد الي تحاول تتنفس من الضحك
ابو نواف : ان لله وانا اليه راجعون
ام نواف وقفت بصدمه من شافت مخدات كراسي الحوش انعدمت من القهوه ونطقت بعصبيه : فيصل يملا الي ماني بقايله وش هالعمل !
فيصل : مالي دخل
الوجد : الا هو
شيهانه : فيصلوه يحيوان وش حركات هالاطفال !
فيصل : والله لااستغفرالله بدون حلف بس مو اناا
ام نواف تخصرت : لاوالله؟ الجني الازرق الي اعدم المخاد
فيصل : ي يمه لاتشيلين هم عندك بدال الشغاله ثلاث شغالات
اشر على شيهانه والوجد ويقصدوهم بكلامه
الوجد : ي عمتي عندك عامل ينظف بسرعه سريع سريع هذهو قدامك حيلك فيه اكرفيه
فيصل رفع يده يشوف الساعه كم : اوهه الدوام بدا
تعداهم بيطلع لكن شيهانه والوجد تعلقو بيدينه يستوقفونه
الوجد : والله ماتروح بدوني
شيهانه : ياتنظف يامافي روحه
فيصل : وانا ماني بجالس ادري امي الحين تمسكني البيت تنظيف
الوجد : رجلي على رجلك فيصل تكفى لاتخليني بيكرفوني
ام نواف : ابك تعالو انتم الثلاثه تقول تلتبيز
فيصل التفت على الوجد ونطق: وش هم تلتبيز؟
الوجد سوت بأصبعها كذا "🤏🏻" : ناس صغيره قد كذا
فيصل رفع حاجبه والتفت على امه واشر على طوله ونطق بممازحه : طول بعرض اخرتها تشبهيني دمن طول الوجد؟
الوجد ضربت فيصل بخفه : وجعع وش تقصد بالدمن؟ شيهانه وش معناها؟
شيهانه كاتمه الضحكه : مانصحك تعرفينها
ام نواف : احترم نفسك يافيصل الوجد ماهي بدمنه
الوجد ماهي فاهمه معنى الكلمه : انت الدمنه
فيصل : حقك علي ست وجيد بشري رضيتي؟
الوجد حطت يدها تحت فكها : امم احس باقي في بقلبي زعل جيب لي كرسي جابر
شيهانه : يحق لها !
فيصل : ادعي ان الصايغ عنده تمارا او تابي اشتريه لك اقساط
الوجد كشرت ببمازحه : يالطفران بشوف ميمي وينها
فيصل : لا مافي ميمي راجعه من المدرسه توها نامت لاتروحين لبيت اهلك
ابو نواف الي فاقله معه من الصبح وهو يحجر لفيصل : وش بعد نهايه تربيتي تحرم البنت من شوفه اهلها ؟
فيصل رفع ييدينه يبرر لهم : لا يايبه هي لمنها راحت لبيت اهلها راحت ولاعاد تجي يكفي لعنبو ابليسها اسبوع قطعت قلبي
شيهانه : جو الرومنسيات ذا مايعجبني بروح اخذ شور
راحت شيهانه وام نواف راحت تنادي العامله تنظف القهوه الي انكبت
ابو نواف : اي زين فارقني بالسعه
فيصل جلس على المركى عند ابوه : وليه القائد اليوم قافله معه ؟
ابو نواف : انا زعلانن عليك
الوجد عليهم عليهم معاهم معاهم : حتى انا زعلانه عليه ياعمو حمودي
فيصل التفت للوجد ورفع حاجبه : شنب ابوي ابيض من الشيب اخرتها حمودي؟
ابو نواف : اتركها يامسلم تقول الي تقوله
فيصل : ايه تقولي يالقايد زعلان قل لي وش مزعلك هو انا اخذت كورس كيف اراضي الناس بنت اخوك اجبرتي اراضيها اسبوع وماورانا شي مانراضيك يالوالد
ابو نواف : اعقب مانبي هالمراضاه الماصخه خلها لحرمتك
فيصل حط اصبعه على خشمه : على هالخشم بس وش مزعلك؟
ابو نواف : لعنبوك البل لها اسبوع مامريت عليها بتموت جوع لولا لطف الله فيها ! حميد غشيم مايعرف يتصرف بهن وغاثن هالموضوع
فيصل : لاتشيل هم يابو هالحين نطلب برسيم مخصوص للبل
الوجد : تحطون بيرسنق لستيلا ؟
فيصل ماهو فاهم وش تقصد : اييي
الوجد ابتسمت واخذت القطوه : الله وناسه !
ضحك ابو نواف وفيصل على فهاوه الوجد
فيصل وقف وهو يلبس الزبيريه : بروح امر الحلال واجيكم
الوجد : ابغى اروح معاك بشوف ستيلا
فيصل لبس الطاقيه المذهبه : والله شغل بعيد ونياق وملعنه خير ورجال وعمال
الوجد نزلت القطوه : طيب وحشتني ستيلا
فيصل : يبوك اجيبها هنا ادخلها للحوش بس المسافه طويله عليك
الوجد : نو مستحيل تاكل لالي
فيصل : معليك شقحى ماتاكل رطنه
الوجد تنهدت بضحكه : بليز عدل اسمائهم
فيصل : افكر بالموضوع يلا توصون على شي؟
الوجد هزت راسها بمعنى "لا" وابو نواف نطق بـ : سلامتك
طلع فيصل وزفرت الوجد بطفش تبغى ستيلا وقام ابو نواف وطلع لاخوانه
ثواني عديده ورجع فيصل : وجدي قومي ماهان علي اتركك هنا
الوجد عقدت حواجبها : مو تقول في رجال؟
فيصل مد يده : صرفتهم لعيونك قومي
الوجد : فيصل اذا مقلب لاتحمسني !
فيصل ابتسم : لاوالله تعالي
الوجد قامت ونطقت : طيب ثواني بجيب شال
فيصل تقدم ومسك يدها : يبنت الحلال تعالي مامن احد
الوجد ابتسمت ونطقت : شكرا مره
فيصل شد على يدها : افاا مابينا شكر اسوي كل شي لعيونك
الوجد نزلت انظارها ليد فيصل الي ماسك يدها بقوه وحب : احبك
فيصل كان مكشر من الحر وضوء الشمس القوي ولكن سرعان ماابتسم تدريجياً ارتخت ملامحه بحب : لا يابنت ان قلتيها ثاني مره بيصير شي اقوى من قبله الحب
الوجد اتسعت عيونها بصدمه وبلعت ريقها والتزمت الصمت
فيصل حس بهدوئها وتوترها وضحك لوهله ونطق يضيع الموضوع : نتسابق من هنا لمراح النياق؟
الوجد : ترى جسمي رياضي يساعدني بفوز عليك لاتتحداني
فيصل زم شفايفه يستلطفها : الميدان ياحميدان
الوجد : اوكِ انا بعد لين الثلاثه ونبدا تمام؟
فيصل ميل راسه بثقه : تم دندني وغني
الوجد : ون تو ثـ
ماكملت عدها الا وهي تركض باديه بمختصر فنانه بالغش
فيصل لازال واقف مصدوم من غشها وابتسم وركض وراها
الوجد وهي تركض وتهايط : نجوم السماء اقرب لك مني
فيصل بعلو صوته عشان تسمعه : ترى ان مسكتك بعطيك اقوى قبله حب
الوجد : هذا اذا مسكتني
فيصل تحمس وزاد من خطواته شويه شويه قرب لها
هي حست بقربه وصرخت ليه صرخت مدري المخرج عاوز كذا
ضحك من بين تعب الركض وحضنها من ورا ووقفها والاخ استغلالي وهو حاضنها من ظهرها عطاها قبله الحب على خدها
الوجد شعرها يلعب فيه الهوا وفيصل حاضنها وهي تضحك
فيصل وقف جنبها وحط يده على كتوفها ويمشي معها : ي غشاشه
الوجد : وي مين قال ؟
فيصل مسك انف الوجد : ثاني مره انا الي اعد
الوجد رجعت وجهها تبعد يد فيصل عن انفها : انت غشاش مايصير
فيصل : امنا بالله غشاش بس مو بغشاش علنياً مثلك مجاهره بالغش بعد
الوجد ضحكت : ياحلوك تضحكني
فيصل رفع حاجبه : بس اضحكك؟
الوجد : كثير اشياء مو بس اضحكني
فيصل ابتسم وكملو طريقهم وطول الطريق وهو يهبد للوجد شعر وهي ماتقهم فيه
اخيراً بعد بضع دقائق وصلو حوض النياق ونطق فيصل : عاني شقحى جالسه
الوجد شافت ستيلا الجالسه بالارض وكشرت : افف ستيلا حماره توسخ نفسها كذا بالتراب ! لازم تاخذ شور
فيصل وقف عند ستيلا : بعد شوي نروشها
الوجد تتلفت : منين لها مكان تتروش فيه؟
فيصل : هنا مكانها ترشها بالماء
الوجد : حياتهم سهله
ضحك فيصل وقرر يونس الوجد وقوم ستيلا وقامت ستيلا واتجهت للوجد بما ان الوجد صاحبتها
الوجد جمدت مكانها من شافت ستيلا مقبله عليها
فيصل : لاتتحركين ولاتركضين
الوجد غمضت عيونها : فيصل بعدها عنيي
فيصل ضحك وتقدم وصار ورا ظهر الوجد وحط يدينه على خصر الوجد ورفعها وعلق الوجد على رقبه ستيلا! تعليق تعليق مو ركوب يعني الوجد على ركبه ستيلا زي العبايه
اقوى مراحل الحب
الوجد ماكانت تشوف شي غير الارض ورجول ستيلا وصرخت بـ : نزلنييي
فيصل مشى ستيلا وفعلاً ستيلا تمشي والوجد على رقبتها تحس الدم كله براسها
الوجد زاد خوفها من تحركت ستيلا : فيصل تكفى نزلني الحين اطيح وتدعسني
فيصل : المفروض تضحكين وناسه وانا اخوك
الوجد تشوف اظافر رجول ستيلا : يع فيصل يع نزلني اظافرها وسخه
فيصل تقدم وهو يضحك ووقف ستيلا ونزل الوجد
الوجد ابتعدت عن فيصل ورفعت شعرها : افف بغيت اموت
فيصل : الي يشوفك يقول انها باركه عليك
الوجد : نفس الشي عورت بطني
فيصل لازالت انظاره على شقحى الي رجعت تجلس : ناقتك لازم تتعودين عليك
الوجد : تخوف
فيصل مسك يد الوجد وتقدم اكثر لستيلا : مسحيها
الوجد عانقت كتف فيصل : مو الحين
فيصل ابتسم : ليه مو الحين ولاخايفه يالخوافه؟
الوجد قررت تتظاهر بالقوه وحطت يدها على ستيلا وتمسحها اخيراً الوجد سوتها بعد عنا طويل
ابتسم فيصل وهو يشوفها مبتسمه بأنجازها
: تبين تركبينها ؟
الوجد : لامستحيل
فيصل : اجل الي ودك بنسرحها الحين خليك ورا ظهري بيطلع حميد لايشوفك قصيت راسك وراسه
الوجد : وين انا وحميد اعز الاخوياء ماتغطى عنه
فيصل : اعقبي احش رجولك انتي وحميد ، وش انتي يوم متغطيه وثلاث ايام فاتشه حددي موقفك
الوجد : على حسب يعني بعض الاحيان وجهي مفقع بكاء البس نقاب
فيصل : اهجدي والبسي نقاب عاد عطيتك وجهه
الوجد : اندري ابو طبيع مايخلي طبايعه
فيصل : بعد شهر بنتهاوش الحين لا ماني مهاوش لاني مابي حيل ابداً ازعل واراضي اجلي الهوشه لشهر
الوجد : اوكِ بعد شهر بنتهاوش علم المتابعين
فيصل : ي متابعين ترى انا مسالم مير ان الغامضه ووجدي يحبون المشاكل بس تسريب خفيف مافي مشاكل انتهينا من المشاكل
الوجد : خربت السيناريو !
قاطع حديثهم صوت حميد
فيصل مسك عضد الوجد وسحبها ورا ظهره يخبيها عن حميد
اما الوجد الي ميته ضحك على غيرته هي وحميد كل صبح يتهاوشون ، اعز الاخوياء
فيصل بغضب : حميد يرحم والديك تنحنح
حميد : مافي مشكل المره الجايه اتنحنح
فيصل : سرح النياق ساعه ساعتين وردهم لاتطول بهن بنروشهن
حميد : سرحت النياق الظهر
فيصل الي لازال ماسك الوجد ورا ظهره : اي سرحهن مره ثانيه
حميد هز راسه برضى وراح يسرح النياق
الوجد بضحكه : بموتتت فيصل كل صبح طالع بوجهي يوديني الجامعه
فيصل التفت على الوجد : البخي كان يوديك الجامعه الحين مافيه
الوجد : حافظ وجهيي اطلع عليه بماسك بعد
فيصل تنهد بغيره : حرقتي قلبي من الغيره لاتقولين فلان شافن وعلان اطلع له
الوجد رفعت حواجبها : وزين القلب المحترق
فيصل بغيره: المره الجايه ماتطلعين الا بشرشف !
الوجد : عيني بعينك انت الي قلت مافي احد تعالي بدون شرشف
فيصل زفر : مو كل شي اقوله تطبقينه
الوجد : شدراني يعني ان حميد بيجي
فيصل حط يده على راس الوجد ونطق يغير الموضوع : الشمس ضاربتك تعالي بالظل
الوجد : ايوه صدق شعري ريحه شمس
فيصل : ريحه شمس؟ شلون تجي ذي
الوجد : ايوهه ريحه شمس تشبه ريحه الاستشوار شعرفكم انتم
فيصل ضحك وشال الوجد بحضنه ، رومنسيات القايله شعرفكم انتم هذي اقوى شي
الوجد ابتسمت وهي تناظر وجهه فيصل القريب منها وواضح التعب بوجهه والحر الي ذبحهم
نزلت انظارها لتفاحه ادم الي برقبه فيصل البارزه ، مقدرت اكمل اسكب للجزئيه ذي اسفه والله بس مقدر استحي
نزلت الوجد من دخلو منطقه النخل الطويل والظل وجلس فيصل بالارض على التراب وتكى ظهره على النخل واخذ نفس بتعب : ضميان
الوجد عقدت حواجبها : وش تعني ؟
فيصل بتعب : يعني عطشان
الوجد : بروح اجيب لك مويه دقايق بس
فيصل مسك يدها وسحبها لحضنه : بس ماعاد ابيه اذا شي يتعبك
الوجد ابتسمت من حركته اللطيفه : بس هو مايتعب بجيب ماء واجي
فيصل ضم الوجد بحب : روحتك وجيتك ومسافه الطريق والشموس والقيض كلها ذي تتعبك وتخرب بشرتك
الوجد : حطيت سنس كريم يوم قالو لي اننا بنجلس بالحوش
فيصل خلل اصابعه بشعر الوجد : مدري وشهو لكن واضح انه شي يحمي بشرتك من الشمس
الوجد : ايوه صح عليك وضروري احط لك لان حرامم بشرتك تعبانه من الشمس
فيصل : يبوك لي فوق ال ١٦ سنه وانا اكد واكرف بهالبل ماعادها تفرق معي
الوجد زمت شفايفها بزعل على عمها محمد : يعني وانت نونو صغير تكرف؟ حرام عليه عمو محمد
فيصل دفن وجهه بشعر الوجد ونطق : المراجل كايده مو كل من نبت له شعر بوجهه قال رجال لا يبوك يبي لها كرف وقوه وتحمل
الوجد : مالي دخل بالرجوله بنرجع للبيت وبحط لك ماسك وكريم وماتطلع الا وانت حاط سنس كريم
فيصل ضحك : حلم ابليس بالجنه ٢٦ سنه ماطب بوجهي كريم حتى الفازلين تبيني الحين احط؟ ماتجي
الوجد : وريني شطارتك اذا حطيت الماسك عليك
فيصل غمض عيونه وهو يشم ريحه شعر الوجد : لاتحاولين وتتعبين نفسك خرابيط البنات هذي مالي فيها
الوجد مسكت يد فيصل وشافت يده الجافه وجابت موضوع جديد : يدك برضو تحتاج عنايه
فيصل تنهد : مصممه انتي على هالموضوع؟
الوجد : فصولي طيب بيننا الموضوع محد بيدري انك حطيت ماسك بس برسله ستريك يعني
فيصل : نكته اليوم بس برسله ستريك لعنبو ابليسك الستريك به بنات مجره الدرب التبانه ماخليتي بنت وماخذيني سنابها
الوجد : ايوه عادي امون عليهم كلهم
فيصل : تمونين عليهم بس لاترسلين ولاتحطين ولاتسوين شي
الوجد : نشوف من ينتصر على الثاني
فيصل : نشوف
'
بعد مرور شهر من زواجهم الفخم والكل كان يتكلم عن طله العروسه وفخامه العرس وتكاليف العرس كان فخم بشكل مبالغ فيه لدرجه ان اهل الديره شكو ان بينهم علاقه سابقه جاهلين ان كل حبهم تحت العادات والسنه
راجعين من شهر العسل الي كان زي العسل بالنسبه للطرفين
كانو عايشين حياتهم الخاليه من المشاكل بسبب ان الغامضه حاطه حيلها بالمساكين الوجد وفيصل ومتجاهله العنود وفارس
فارس شال الشنطه : عنك عنك يالحب
العنود ابتسمت : شدعوا فروسيي ماهي ثقيله عطني
فارس نطق بحب : ياعنود قلبي انتي انا كوني رجل وانتي على ذمتي انا مسؤل عنك اشيل واتعب واشقى لعيونك حبيبتي
العنود : فروسي حبيبتي تحرجني كذا مقدرت ارد
فارس مشى جنب العنود : هذا واجبي
العنود بأبتسامه : يابعد قلبي! بكرا نروح الديره ولا؟
فارس : هو خلينا نريح هاليومين عقبها فكري منهد حيلي ويني ووين الديره ي شيخه
العنود : منجدد خلينا نريح
دخلو الفندق ونامو بتعب
،
غرفه شيهانه
اخذت شور وعيونها بتقفل تنود تعبانه مهدود حيلها من الرياضه واختبارها العملي
رمت نفسها على السرير بخمول وتعب ومسكت جوالها وتقلب فيه الين جتها رساله من رقم غير مسجل بجوالها
عقدت حواجبها بأستغراب وتوقعت انها وحده من طالبات الجامعه
دخلت المحادثه وردت برسميه : هلا مين معي؟
: بعدين تعرفيني انا احمل بقلبي مشاعرر لك !
شيهانه تنهد : حركات اعجاب بنات عشان شعري قصير فكيني منها ماني بويه
: لالا انا مو بس معجب فيك انا احُبك !
شيهانه : يبوييي فارقيني بعدين تعالي لهجتك جداوية مين انتي؟
: ماعرفتيني؟
شيهانه : ترا ماني وحده من عايلتك اعرفك تهرجي من انتي؟
: انا احُبك قد البحر وسمكاتو !
شيهانه : وانا اكرهك قد البر وسحلياته
: اح تعور بس تهون حبيبي
شيهانه زفرت بطفش : عطيني اسمك ي بنت ووش تبين مني !
: بديك اسمي بس اوعديني ماتوصلين الموضوع لاخوك فيصل؟
شيهانه عقدت حواجبها وفوق راسها مليون علامه استفهام أسأله كثيره تدور ببالها : وعد بس شدخلك انتي بـ فيصل ؟
: انا بأختصار احُبك وانا ندمان اني جيتك بدي الطريقه بس انا ولد
شيهانه : وجد ! مقالبك فكيني منها
: بس انا مو زوجه اخوي فيصل
شيهانه : ياهوو جننتيني مين انتييي ؟ وليش الوجد تصير زوجه اخوك ؟
: فيصل اخوك بيديني كف اذا قلت اسمها
شيهانه : ياهوو جاني ايرور اختصر الموضوع
: انا يزن صاحب فيصل
شيهانه شهقت بصدمه وحطت يدها على فمها : ايشش؟
يزن : هذي الطريقه الوحيده الي توصلني لكِ
شيهانه لازالت تحت تأثير الصدمه : خلاص خلاص قفل على الموضوع وربي لو يعرف فيصل لايكفر فيني وفيك تحبني بيبان ابوي مشرعه تعال اما تجي وتعترف لا يلا مع السلامه
طلعت من المحادثه وهي مصدومه وتحس بشعور غريب بصدرها اول مره تحس فيه ماهي عارفه اذا هو حب او لا مشاعرها متضاربه
،
تحت ظل الشجر غربت الشمس وهم لازالو على نفس وضعهم سوالف وضحك وفضفضه
فيصل جالس تحت الشجره ومتكي ظهره على الشجره والوجد حاطه راسها على صدره ومعها الجوال توري فيصل كشختها بالعرس
فيصل يسلك لها او بالاحرى يجاملها لانه مايفهم بالاوتفت: ابداع ابداع تقييم عشره من عشره
الوجد ابتسمت : حبيتك
فيصل : اح! توك تحبيني؟
الوجد بضحكه : لاا خير من زمانن بس كذا قلتها كتعبير من حبي لك
فيصل : لاخلا ولاعدم المهم قومي نشوف حميد جاء ولا
الوجد : تو ستيلا ماشبعت من الدجه
فيصل : ايه شقحى مثل راعيتها تحب الدجه
الوجد ناظرت فيصل ونطقت بممازحه : ايش تقصد؟
فيصل رفع جواله وحطه على اذنه : ماقصد حاجه ، الوو
الوجد بهمس : اقوى ميوت
فيصل ابتسم من سمع همسها واكمل كلامه : ولد انت جيت ولا باقي ؟
حميد : شقحى باقي تعلف
تنهد فيصل : ياليل منها هالشقحى الوكاد خلها تشبع لاتنحرنا راعيه شقحى
حميد ضحك : لاتشيل هم
فيصل : يلا توصي؟
حميد : سلامتك
:الله يسلمك
قفل الخط وتعدلت الوجد وجلست قبال فيصل : فصولي
فيصل حط الجوال بجيبه : عيون فصولك
الوجد اخذت نفس بضيق وغصه بحلقها ورفعت نظراتها لسماء تمنع دموعها تنزل
فيصل عقد حواجبها بأستغراب ومسك يدين الوجد ونطق : شفيك ياوريد فيصل فضفضي لي بالتفاصيل وتاكدي اني البير وغطاه مايطلع الكلام !
الوجد : فيصل احس متضايقه ببكي
عض على شفايفه بضيق وسحبها لحضنه وشد على الحضن ومسح على شعرها بحنان : من مضايقك بلعن خيره !
الوجد بضيقه : ماحب افضفض بس انت غير ، تعبت من نظرات الندم بعيون بابا وتعبت من نظرات الكره بعيون ماما وتعبت ومن نظرات الامل بعيون ميلا الي تشوفني قدوه لها !
فيصل : خذي الموضوع من الجانب الايجابي علاقتك مع ابوك زانت وللافضل بعد والله يديمها وجدي بعد نفس الكلام واذا عن ميلا فأنتي اختها الكبيره لازم تكونين لها قدوه وسند وامل لها لاتوضحين لها ضيقتك وتعبك بعد كم سنه ميلا تصير مراهقه وبيتغير تفكيرها ونفسيتها لاتخلينها بفتره مراهقتها تضيع منك صيري لها قدوه من الحين عشان تشوفين نفسك القويه وشخصيته القويه بميلا ولاتشيلين همها واذا عاد الموضوع عن امك وكرهها لك فالموضوع ماله دخل بالكرهه هي بس انها ماعرفت شخصيتك بالضبط وهي بعد هالعمر كله بتشكل شخصيتك بعد هالعمر
الوجد نزلت دموعها من كلامه : فيصل انا اعرف افرق بين نظرات الكرهه وبين نظرات الي وده يمتلكك ماني جاهل ماعرف وش مقصد ماما بحركاتها
فيصل مسح دموع الوجد :امنعيني من الدموع يابوك وتجاهلي هالموضوع واصبري زي ماصبرتي على ابوك الين زانت علاقتكم مثل مازانت علاقتك مع عمي تركي وجدي بتزين مع امك بس هي مسأله وقت
الوجد : طيب انا تعبت اول شي من بابا الين انهد حيلي ماعاد لي حيله ابداً اعاتب واهاوش وازعل وفعلاً بعد فتره رجع بابا لمن الحين انا ماعندي قدره ابداً اتحمل فتره على ماترجع ماما
فيصل قرص خد الوجد بخفه ونطق بابتسامه : شرايك نرجع لجده ونسترجع ذكرايات البدايات ؟ وش شورك منها نستانس ومنها تغيرين جو وتبتعدين عن الي يأذونك
الوجد تنهدت : ماعرف محتاره اترك الي هنا واروح؟ او اجلس بالهم هنا عشان الناس الي احبهم
فيصل : يبوك عاني فيني انا وياك بنروح لجده ونستقر فيها وبقول لك شي بس لايطلع من بيننا
الوجد تعدلت بأنصات : معليك مايطلع ماتدري قد ايش افرح اذا بادلتني همومك يالكتوم
فيصل ابتسم ونطق : يزن خويي الجداوي تعرفينه؟
الوجد : الي يقول اشبك ياواد؟ الكتكوت ذاك
فيصل رفع حواجبه : شنهو؟
الوجد ضحكت بوهقه : اقصد الجداوي
فيصل : ايه هو الوكاد ان قبل شهرين جاني وملامحه مهمومه وهو مو من عوايده يوضح الضيق لنا هو فرفوش
الوجد زمت شفايفها بعبره : افف احس ببكي يحزنن
فيصل : لاتبكين ، المهم سالته شفيك وكنت شاك انه طايح بالحب وماسمى لانه نفس حالتي يوم خذيتي قلبي يهوجس هل حبيبته تبادره نفس الشعوره ولا ؟
الوجد : احسب ماعندكم مشاعر
فيصل : افاا ، قال انه يحب شويهين ونيته نيه خير وبياخذها بالحلال زعلت عليه لان كيف يقول لي احب اختك!
الوجد ضربت فيصل بخفه : خير لاتبالغ ولاتزعل حرام عليك الولد جاي يقول لك عن مشاعره وانت تزعل عشانه حب اختك؟ المفروض تفرح !
فيصل : عيب يقولها لي زين ماكسرت سنونه يوم قالها
الوجد : اوفر والله مابغى اظلم يزن بس حرام تزعل وترفضه
فيصل : مارفضته ابي الخير ل اختي وقلت له بعد اسبوع زعلان عليه وشايل بخاطري ان كانك تحب اختي توظف واستقل عشانها
الوجد : فيصل ابو قلب قاسي !
فيصل : مو مسأله قساوه اكيد اني بغار على محارمي والعن خير من يقول احب فلانه وين حنا عايشين
الوجد : تستهبل؟ انا يوم خيال قالتي عن موقفها مع فهيدان قلت حلالك اعطيتها ياه
فيصل عقد حواجبه : فهيدان اخوي؟
الوجد حطت يدها علو فمها من تذكرت انه سر من اسرار خيال انها حبت فهد : بالغلط اسفه قلتها كان سر !
فيصل فطين ربط وفهم السالفه كلها وعرف ان فهد وخيال بينهم حب بس محد صارح الثاني بحبه بسبب العادات والتقاليد فهم كل حاجه وسوى نفسه مافهم شي : اها طيب دامه سر لاتقولينه
تنهدت الوجد براحه على بالها مافهم الحب : ايوه تقولي يزن شفيه؟
فيصل شبك اصابعه ببعض ونطق بحيره : توظف واستقل مادياً الله يبارك فيه بس خايف على اختي اخاف ماتبادله الشعور
الوجد مسكت يدين فيصل وابتسمت تطمنه : فيصل حبيبي انا وياك تزوجنا وحنا نكره بعض مانجتمع ببيت واحد الا وحنا متهاوشين وكره وحقد بيننا خذتنا الايام شوف وين وصلنا ! لاتخاف على اختك ولاتوقف بنصيبها انت اجلس معها وصارحها بالموضوه واذا كانت ماتبغاه خلاص كنسل الموضوع والله يستر على يزن
فيصل تنهد : لااله الا الله يشهد على الله اني مستانس لوظيفه يزن حتى اننا زي السمن على العسل بس مدري احسه بيضيع اختي هو شوي متلكع وشيهانه خشنه شوي
الوجد : عاديي بيصيرون عكسنا
فيصل مد يده حطها ورا راس الوجد وسحبها له وقبل جبينها : الله لايحرمني منك ولامن حلولك
الوجد ابتسمت : ولامنك
فيصل : ايه اقولك نروح انا وياك نستقر ب جده بعيداً عن ضجه الديره وان شاء الله الله يكتب النصيب بين شيهانه ويزن ويستقرون ب جده وجوري الله يوفقها ويستر عليها والعنود نفس الشي بتعيش مع رجلها ولاهي شايله همك انتي لاتشيلين هم احد لانك بتطلعين بولا شي طيعي شوري وخلينا نستقر بجده وحتى النياق ابشري انقلهم بدينه لجده من حدى القرى الي حول جده
الوجد ميلت شفايفها : طيب وبابا وعمامي وجدتي عمشه؟
فيصل : ماحنا بقاطعين صله الرحم بنزورهم كل فتره وفتره
الوجد رفعت كتوفها : ماعرف احس محتاره !
فيصل : عيوني انتي معك وقتك فكري فيه لو تبين نستقر بجده بعد سنه سنتين من التفكير انا معك معك ولاني بضغط عليك
الوجد ابتسمت وهزت راسها بالرضى
'
مقلط الاكتئاب الي كل اختبار يذاكر فيه
فهد رابط راسه بقماش من الم راسه : يا إلهي! لقد سئمت من هذا الغباء المتراكم! من فضلك ركز قليلاً
مازن عاض القلم وغارق بالحب : فهيدان بسألك تحس يعني تحس انها تبادلني الحب؟
فهد :اسكت لقد أرهقتني بالأسئلة الكثيره والمتعلقه بالحب
مازن : شفيك ياخوي الوضع حبي ترى يعني وش تحس؟
فهد : أنا هنا لتعليمك المنهج فقط وأريد منك أن تسأل سؤالاً يتعلق بالمنهج لا اريد سؤلاً عن الحب
مازن زفر بطفش : ياليل والله منت بوجهه حب خل اقوم اسأل فصيل وش يحس هو الي مجرب الحب
فهد : اجلس! في الدرس القادم أريد منك أن تشرحه لي حتى أتمكن من اختبار فهمك.
مازن : الموديل مو نفس الموديل موديلك مو نفس موديل فيصل في غش بالموضوع واحد ستيمه والثاني اينشتاين
فهد تكتف : اشرح لي
مازن : اطلب ايش شي الا هالطلب انفداك
فهد خرج عن صمته ورمى الاوراق : سردب بس انت لو اتكلم معك واشرح من هنا لعشر سنين ماتفهم
مازن اتسعت عيونه بصدمه من جمال صوت فهد باللهجه العامه !
: يولد الفصحى ظالمتك مخليتك هطوفه
فهد قام بطفش : عطيتكم وجهه والله
مازن بضحكه : اموتت على العصبيين انا
فهد : وخر بس لاارنك مخمس
مازن رفع حواجبه : اخس اخس والله وطلعت تعرف تتكلم مثلنا
فهد : تراني منكم وفيكم ماني بنقالي مافهم عليكم
مازن : بس والله ابداع اللهجه خلك عليها
فهد : افكر ان شاء الله يلا سلام وراي اشغال
مازن : مع السلامه احس حبيتك اكثر من فيصل
ضحك فهد وطلع من مقلط الاكتأب وظل مازن مصدوم من فهد الي ظالم نفسه بالفصحى والكتب وهو كشخه حق كوفيهات ولاينات الرياض وحركات وحبيب اخوك
: يالبيه ياحظ خيال بس احسدها
الوجد معلمه مازن عن سالفه خيال وفهد ماتسكت لسانها يحكها
،
قبل مدخل المزرعه بمسافه بسيطه ماشيه بأمان الله بعد ماخلصت اشغالها ومشاريعها واستلمت الفلوس من كل زبونه تطلب منها معلومات وكانت مشغوله تحسب ربحها اليومي من نقل العلوم
: خمس ميه وحـ....
سكتت من حست بيد شخص تسحبها معه التفتت بصدمه وشافت كابوسها الي لو عرف سرها ومين هي بنته بتنتهي مسيره "ام جابر لجلب العلوم والاخبار " !
نطقت برجفه ورعب : وخر عني وشتبي ي مريض!!
طلال : تستهبلين جوري؟
اتسعت عيون جوري بصدمه وانكرت شخصيتها :مين جوري؟ غلطان ياخوي
طلال : زي ماطلعتي معلوماتي اقدر اطلع معلوماتك !
جوري سحبت يدها بقوه : وخر بس اخر همي وش يعني نهايه الدنيا اذا عرفت مين انا؟
طلال : وش قصتك معي وليش مصره تطلعين معلوماتي وماضيي لامي؟
جوري : لان امك طلبت مني كذا وبيننا عقد ومبالغ شغلي واترزق فيه
طلال : طيب اختلت ميزانيتنا من كثر ماامي تعطيك عشان تعرفين ماضيي
جوري : تصدق يالمخنز للحين ماحصلت بماضيك شي؟
طلال : ماضيي وحاضري نظيف بأذن الله !
جوري : ايه خلك كذا ولاتتعبني معك ولابتختل ميزانيتكم
طلال : خلاص يرحم والديك فكيني شرك حتى بأحلامي تطلعين لي!
جوري : اذا امك رجعت المبلغ الي اتفقنا عليه انا اتفقت معها يكون اقساط
طلال : اعطيك ياه كاش بس فكيني شرك
جوري : نو نو شغلي واسترزق فيه قطع الاعناق ولاقطع الارزاق
طلال : تخصصك اعلام وش نرجي منك
جوري : وجع وش تقصد؟
طلال : ماقصد شي قصدي نقاله علوم
جوري : ايه زين الوقت تأخر وبوسط الديره وربي يفضحوننا هيا فارقني بالله
طلال : نفسيه
جوري : ايه نفسيه وش عليك يلا من هناك
كشر طلال وراح وتنهدت جوري بضيق لانه كشف هويتها الغامضه
،
بعد غروب الشمس
فيصل قام ومد يده : قومي نشوف الحلال جاء ولا
الوجد مسكت يده وقامت : اوكِ
يدينهم ماسمه بعض والابتسامات مافارقت وجيههم ومتجهين لحوض النياق وفعلاً شافو ان النياق بالحوض وحميد رايح يكمل باقي اشغاله
الوجد : ستيلا تعبانه ياعمريي
فيصل : شقحى ماتتعب قويه قويه
الوجد ضحكت : الا شوفها تعبانه
فيصل : عاني بها زين واوجسي وش توجس به
الوجد عقدت حواجبها تحاول تفهم الكلام : ايش؟
فيصل : مشكله الدلوعين حتى الكلام مايفهمونه
الوجد : مو مسأله دلع كلامك مو مفهوم
فيصل : يبوتس ابك مفهوم مير انتس ماتوحين وش انا اتهرج به
الوجد : فيصلل خلاص ارجع لزي اول ماني فاهمه كلامك
فيصل : على خشمي تعالي عاونيني على الي
الوجد تقدمت ورفعت لي المويه عن الارض
نطق وهو يربط الثوب على خصره : عاني ي بنت ابوك الزميه زين وانا بشغل الماء
الوجد مسكت لي المويه كويس : اوكِ يلا
فيصل شغل المويه والوجد شافت جريان الماء وتدفقه من فتحه الي وبدون تفكير التفتت على فيصل الي مقبل عليها ورفعت لي المويه ورشت عليه المويه
فيصل حط يده على عيونه يمنع المويه تجي عيونه لان الوجد ماقصرت بللته مويه من ساسه لراسه
: لا ي بزر
الوجد بضحكه : هذي جزاتي ابرد عليك
تقدم لها فيصل وهو حاط يده على عيونه : ياليل
رجعت خطواتها لورا وهي تضحك جاهله الصخره الي عند رجولها
فيصل شاف الحجر عند رجولها: وقفي وقفي
فات الاوان وطاحت بالارض وهي تضحك ولي المويه طاح معها
تطمن فيصل انها تضحك واستغل فرصه سقوطها واخد لي المويه
الوجد حطت يدينها على وجهها : لا تبللني وربي اعلم بابا عليك ترى ازعل
فيصل رفع حاجبه : ي سلام؟ حرام علي حلال عليك؟
الوجد : ايوه لاني بنوته مايصير تمزح معاي كذا
فيصل تخصر : والبنوته هذي لازم تاخذ جزاها
الوجد : مايصيـ...
قطع كلامها من وجهه فتحه لي المويه على وجهها عشان تسكت وبللها بالمويه
الوجد حطت يدينها على وجهها وصرخت : فيصل ي حيوان لا خلاص !!
فيصل سحبها وحضنها وقاعد يبللها بالمويه : باقيي ماشبعت
الوجد حطت يدينها على صدر فيصل تبتعد عنه : اشرقتني خلاص
ضحك فيصل وتركها ووجهه فتحه لي المويه على الارض
: خلاص تعادلنا انتي رطشتيني وانا رطشتك
الوجد تنفض نفسها : لا مو تعادل انت غرقتني مابللتني
ضحك فيصل ورفع لي المويه على الناقه : يبوك انتي غرقتيني بدموعك يعني تعادل !
الوجد : لا غش شوف ملابسي رطـ...
فيصل كل ماطفش من حلطمتها يسكتها برشه مويه
الوجد صدت عشان المويه : بزر وربي
فيصل كان يضحك بشكل هستيري ومن قلب وكان بلحظتها اسعد انسان
قاطع هالضحك واللحظات الحلوه صراخ : لابوكم لابو الي جمعكم يهالحمير المجمع ابك وش هالاسراف
فيصل تنحنح : هلا هلا الله يسعدك ويبعدك
الوجد كتمت ضحكتها وشبكت يدينها ببعض تعلن برائتها من هذا الموضوع
الجد اشر على الوجد : لعنبوك وش مسوي ببنت الناس حنا زوجناك عشان تلعب بحسبه البنيه؟ وش مهبب انت
فيصل التفت للوجد : ي جد كنت امزح معها
الجد : ي ولد حشم الحياه الزوجيه تراها موب بأختك ترطشها بالماء
الوجد تقدمت ووقفت جنب جدها ورفعت كتوفها : صادق جدو ماني اختك
فيصل اتسعت عيونه بصدمه : وش نظامك الي بريالين جحده عيني عينك
الجد : اقول البخ احترم وجودي جنبها
فيصل تنهد ببمازحه : افاا ي جد بعد ماكنت الحفيد المفضل استبدلتني ؟
الوجد : ايوه خلاص اوت فيصل دلوع جدو الحين جوجي دلوعه بابا وجدو وفاصولياء
الجد ابتسم من شافت علامات الرضى بالوجد هل قبلت اعتذار الجد؟ علامه واضحه وقويه : لاتبردين ادخلي
الوجد ضحكت : باخذ حقي من فيصل بكب عليه المويه
فيصل : هيا تعالي وريني كيف
الجد تنهد بقله حيله : لاحول ولاقوه الا بالله قالو نزوج الوجد وتعقل مع فيصل لكن الواضح ان فيصل انجن مع الوجد
الوجد : افا ي جدو انا مجنونه؟
الجد : محشومه بس ان عليك حركات مطيوشه وزوجناك ياربك تعقلين
فيصل بممازحه : الله بلاني في مجنونه الله يجازيني في مصيبتي
الوجد تكتفت ونطقت بممازحه : زين حاصله لك انا
الجد : لاتختشون من البرد ادخلو خلو النياق حميد يروشها
فيصل : بس رشه بسيطه ونرجع لاتشيل هم
الجد : زين فمان الله
: فمان الكريم
راح الجد والتفت فيصل للوجد وتقدم لها وقرص خدها بخفه : وش جحدك هذي ؟ لو ان جدي مسطرني تراه يسويها
الوجد : ودي انك تتسطر
فيصل : الي ودك انتي كل شي اتفق معك
الوجد ضحكت : ياخيي احبك
فيصل في حاله ذوبان : ياوجد حالي يبنت ترفقي بقلب معشوقك !
الوجد ابتسمت : ي حياتيي كلامك منمق كذا كيوت
قاعده تشرح له بيدها ان كلامه كيوت
بوسط شرحها رمى لي المويه ومسك يدها وسحبها معه وابتعد شوي عن حوض النياق تحت اللمبه الضعيفه
: اجلسي
الوجد عقدت حواجبها : ليش شفيك تعال وين بتروح !
فيصل وهو رايح : لاتتحركين ثواني وجايك
الوجد رفعت كتوفها وتكت على الجدار وتكتفت ورفعت اصابعها تشوف اظافرها
بضع دقائق قليله رفعت انظارها شافت فيصل من بعيد جايها ومعه حطب
ميلت راسها بحب مع ابتسامه وهي تشوف الجنتل مان تبعها مقبل عليها ومعه حطب وخايف عليها من البرد تنهدت بحب وهمست بـ : فصوليي احبك
فيصل والابتسامه شاقه وجهه من شاف وجهها المبتسم : طولت عليك؟
الوجد هزت راسها بالنفي : لا
فيصل نزل الحطب بالارض : زين اجلسي تدفي
الوجد جلست بالارض وفيصل طلع الولاعه من جيبه وشغل الضوء
الوجد من شافته طلع الولاعه من جيبه نطقت : من ناوي تبطل؟
فيصل وهو ينفث على الضوء عشان تشتعل : ابطل ويش؟
الوجد : فيصل لاتستهبل عارف ايش اقصد !
فيصل رفع انظاره عليها وناظرها وعقد حواجبه : قوليه طيب عشان افهم !
الوجد كشرت : لا اسمه مو حلو انت تعرفه
فيصل استقعد لها وهو عارف انها تقصد الدخان : مافهمت من هو الي مو حلو ؟
الوجد : الي بجيبك
فيصل تحسس جيبوه وطلع مسواك : مافيه الا مسواك انتي تقصدينه؟
الوجد ضحكت : لالاا الي اذا زعلت او تضايقت تحطه بفمك
فيصل زم شفايفه يمثل انه مايعرف : وش هو طيب قولي اسمه ؟
الوجد : فيصل لاتستهيل ادري انك تفهمني
فيصل : افهمك بس هالمره مافهمت وش تقصدين
الوجد رفعت حواجبها : تسوقها علي يافيصل؟
فيصل قام وجلس جبنها وسحبها لحضنه : يينت الحلال اتركي هالموضوع الحساس شوي على جنب وقولي لي انتي بردانه؟
الوجد تنهدت لانه بقدرته يقفل على الموضوع ولو انه موضوع قابل للنقاش : لا
فيصل عقد حواجبه وحط يده على انفها : زعلتي يالزعول؟ خشمك بارد !
الوجد : لا
فيصل ابتسم مستلطف زعلها : تدفي يابوك
الوجد مدت يدينها على الضوء تتدفى بس الوجد مقربه يدها مرهه من الضوء فكانت حراره الضوء تألم يدها سحبت يدها : تعور!
فيصل ضحك ومد يده للضوء : الله يهديك انتي قلطتي يدك على الضوء اصبري خليني اوريك كيف
بقت الوجد تناظر يدين فيصل الي عند الضوء
فيصل التفت للوجد ومسك يدينها يدفيها بيدينه الساخنه بسبب حراره الضوء !
الوجد ابتسمت بوسع ثغرها من فهمت مقصده من الحركه ذي
فيصل ناظر شعر الوجد : شعرك رطب قومي قومي
الوجد : وين اقوم ؟
فيصل قام ومد يده لها : قومي ننشف شعرك
الوجد مسك يده وقامت ونطقت : بتجيب استشوار يعني؟
فيصل هز راسه : لا قربي
الوجد عقدت حواجبها : مافهمت؟
فيصل : قربي انجزي عشان ينشف
الوجد ميلت شفايفها بأستغراب وسوت زي ماطلب منها فيصل
فيصل خلل اصابعه بشعر الوجد ويحركه يمين ويسار "ينشف شعرها "
ابتسمت الوجد ورفعت نظراتها لفيصل وتتأمله
فيصل لازال مشغول بشعر الوجد لمح نظراتها : غمضي عيونك الشعر لايدخل عيونك
الوجد ضحكت وغمضت عيونها وفيصل لازال يحرك شعر الوجد عشان ينشف ونشف شوي : اجلسي خلاص هو ينشف
الوجد جلست : باخذ شور يعني بالحالتين مستخدمه الاستشوار
فيصل : ولو الحين هوا يضرك
الوجد : صح
جاهم مازن يلقط انفاسه بتعب ووقف عندهم ومسك صدره بتعب
فيصل قام بخوف على مازن ومسك كتوف مازن : ولد علامك؟ تهرج!
الوجد : شفيك زوزو؟
مازن بتعب من الركض : اصبر خل اخذ نفس
فيصل تنهد براحه : حسبت بك شي
الوجد : ي حيوان خوفتني
مازن : انا اسد اسد
فيصل : ايه يالاسد وش عندك ؟
مازن : جوالك وين؟
فيصل تحسس جيبوه : صامت
مازن : لاوالله؟ جوالك ي ولد لاتحطه صامت !
فيصل : معليك من جوالي انت ليه جاي تركض؟
مازن : ابوي يبي يقول بشاره فـ يبيكم الان على العشاء
فيصل : كم الساعه الحين؟
الوجد : قريب لادان العشاء
فيصل التفت للوجد ومسك يدها يوقفها جنبه : خلاص بشوف عطنا نص ساعه واجيكم
مازن تخصر واستقعد لهم : لا الان تجي انا متحمس للبشاره
فيصل : يولد تستهبل؟ ادرعم عليهم وانا ومرتي اشكالنا مبهذله ؟ خلاص نتجهز ونجي
مازن كشر وكش بوجهه فيصل بممازحه : كش زين
ضحك فيصل ونطق : يلا سردب
مازن : بسردب بس لاتتأخر
الوجد : معليك انا اتله من اذنه اجيبه لك
مازن : عاشت عاشت بنت خال الحب انتي الحين يالوجد صرتي سبيشل بقلبي اغلى من فيصل بعد
الوجد غمزت : عشاني ولاعشان بنت خالي؟
مازن شتت نظراته وواضح اجابته غلط : عشانك شفيك لايكون مشككه؟
الوجد : لاماشاء الله عليك تحب بنت اخوك
مازن ضحك وممازحه : ياخي الوضع احتراج خلاص استحي
فيصل : مكثر صويا وانا اخوك؟
مازن خشن صوته : اعقب يلا سج ابوي يبيكم
خزهم مازن كلعاده ومشى وضحكو ولحقوه ولكن اتجهو لبيت العم محمد
،
بسام الي كان حالف يمين بالله ان مازوج اخته خلال اسبوع بيصير شي محد يرضاه لعدوه وام حنان دبرت اقرب عريس وزوجته حنان وبكذا نقدر نقول قفلنا سيره حنان
،

_______________________________
انتهى البارت ♡
رضيت بالله ربًا وبالإسلام دينًا وبمحمد ﷺ رسولًا ونبيًا)، ♡
حسابي تيك توك :Ot348285
حسابي انستا انزل فيه الروايه : Ot34828
النجمه تدعم الروايه
*اعتذر عن الاخطاء الاملائيه*

التنزيل رح يكون كل اثنين وخميس ان شاء الله 🌷
تحسون الروايه على  ابواب النهايه؟😔