لاتقارنين حبي لك بأي مخلوق انا حتى بغيابك احبك

Part 48

سبحان الله وبحمده سبحان الله العظيم ♡

ابتسمت الوجد بأنتصار وطلعت من المصعد متوجهه لغرفه الموظف يزن لكن ....
سمعت صوت من وراها تعرفه زين صوته الرجولي الخشن وهو ينطق بـ : الوجد!
بلعت ريقها بخوف من عرفت صوته ويناديها بعد! جاك الموت ياتارك الصلاه
نزلت النظاره على عيونها وهي في كامل الثبات والهدوء وناظرت وراها بطرف عين وشافته ببدله الدوام !
جاء موظف من موظفين الشركه ووقف بيننه وبين الوجد وحجب رؤيه فيصل عن الوجد
الموظف : لو سمحت اخوي انت ظابط؟ سم امر ياخوي وش بغيت
الوجد استغلت وجود الموظف بينهم وطاحت عينها على ديكور الشجر الصناعي الطويل وماترددت ولاثانيه تدخل بين ديكور الشجر وكان شجر كبير وطويل وكثير يفي بالغرض ويخبي الوجد ،جلست غشان ماتوضح
فيصل يناظر ورا الموظف هو متاكد انه شاف عبايه الفيونكه وعارف زولها من ورا واضحه بس وين اختفت هنا المشكله !
فيصل تجاهل تساؤلات الموظف وتعداه وشتت انظاره بأرجاء المكان الي لمح عبايه الوجد فيها
الوجد كتمت انفاسها من التوتر وهي قاعده تشوف رجول فيصل واقفه قدامها ويدورها
جوري : وجد كاني اسمع صوت رجلتس؟
الوجد بهمس : اسكتي شوي
سكتت جوري وتعدلت بأنصات
الموظف : تدور على احد انت؟
فيصل : ياخوي قبل شوي شفت وحده لابس عبايه وعليها رسمات ورديه او ورد والله مدري وش هن لكن ورديات
الموظف عقد حواجبه يتذكر : لا ماشفتها تتوهم ياخوي
تنهدت الوجد براحه لكن سرعان مارجعت كتمت انفاسها من حست ان التنهيده لها صوت !
فيصل :يولد انا متاكد شفتها بعيوني هنا !
الموظف : منهي تقدر تزودنا بمعلومات عنها؟ ترى عندنا موظفه تلبس عبايه زي وصفك
فيصل : موظفه؟ وينها اذا تقدر توريني ياها
الوجد بينها وبين نفسها : يامصيبه حلت علي
الموظف : تعال معي
الوجد شافتهم يختفون عن انظارها رايحين للموظفه خافت تطلع ويرجع ويشوفها واختارت انها تجلس هنا لين يطلع فيصل من الشركه
الموظف طق الباب
الموظفه : تفضل
دخل الموظف ومعه فيصل ونطقت الموظف : هذي الي تقصد؟
فيصل ناظرها وناظر اكمام عبايتها الي رسمتها وردات ورديه لكن مو فيونكات
فيصل ناسي وش اسم الفيونكه وقال وردات اقرب مثال : لا مو هي
الموظفه : اقدر اساعدك وش بغيت؟
فيصل تذكر ان الوجد ترقم اي بنت بالحياه ونطق : في بنت جتك اليوم واخذت رقمك او حسابك؟
الموظفه تذكرت ان في بنت اليوم اخذت حسابها ونطقت : ايوه اخذت حسابي ليش شفيه؟
فيصل رفع حواجبه من تاكد انها الوجد : طيب اختي كيف شكلها؟
الموظفه : تهبل تهبل لسانها معسول وشعرها لكتفها وحواجبها مرسومه وحاطه ميكب خفيف
فيصل : لها غمازه بخدها اليمين؟
الموظفه : لا مالها غمازه على انها ابتسمت كثير بس مالها غمازه
تنهد فيصل براحه انه يتوهم ، الوجد بالبيت مو بالشركه ظن لوهله ان كثر تفكيره فيها توهم شكلها
: زين مشكورين وين مكتب يزن؟
الموظف : شفت ديكور الشجر الصناعي الكثير هذاك؟ عنده مكتب يزن
فيصل هز راسه بالرضى وطلع من الغرفه وفيه ذره شك ان الوجد بالشركه لان شاف بعيونه عبايتها ومتاكد لانه حافظ تفاصيلها
طلع جواله واتصل على الوجد لكن تعطيه مشغول !
ميل شفايفه بحيره وقرر يسلم على يزن ويرجع للدوام ويبصم حظوره ويطلع للبيت يشوف الداجه الوجد وينها
قفل جواله ودخله بجيبه ومر من عند ديكور الاشجار الصناعيه
فيصل بينه وبين نفسه : ادري بك انك هنا انا عيوني ماتكذبني شايفك ويمين بالله ماطلع من الشركه الا وانا قافطك
الوجد عضت على شفايفها من شافته واقف قدامها وساكت ظنت انه قفطها ورجعت كتمت انفاسها !
فيصل تعوذ من ابليس ودخل مكتب يزن
الوجد بخوف : جوري تكفين خايفه
جوري : وجد يرحم والديتس الان ترجعين البيت !
الوجد : مايمدي يبنتي لو اوصل البيت احصله عند الباب سواقته متهوره
جوري : يمديتس ترجعين الحين ! قومي
الوجد : والله ماروح تبينه يقفطني ويطلع عيوني ؟
جوري : لاحول ولاقوه الا بالله الاجابه قدامتس مير انتس غشيمه
الوجد : ماراح اطلع الا لمن اغسل شراع يزن
جوري : انقذي عمرتس وخلي يزن!
الوجد : يانروح كلنا للبرزخ ولاكلنا نجلس بالدنيا
جوري : وين انتي جالسه طيب لدرجه ماشافتس
الوجد : مكتومه جالسه بين ديكور الشجر الصناعي وماشم غير ريحه بلاستيك
جوري : طيب اذا تخلصتي من فيصلوه اتصلي علي
الوجد : وين وين رايحه تخليني!
جوري : جوالي بيطفي
الوجد : تمام لاتتاخرين علي
جوري : معليتس
قفلت الخط وتنهدت والتزمت الصمت
،
مكتب يزن
دخل فيصل ونطق : السلام عليكم
يزن غارق بين الاوراق ومضغوط من العمل بما انه مستجد رفع راسه وابتسم بوسع ثغره من شاف خويه : وعليكم السلام اشتقنالك ياهو لا اتصال ولا رساله
فيصل حضن يزن : ياهلا بأخوي وعضيدي وشلونك
يزن بردت ملامح وجهه من استوعب كلمه فيصل "اخوي وعضيدي " وهو يكلم اخته !
رد وهو يتصنع الابتسامه : بخير
فيصل عقد حواجبه من ملامح يزن الي يخبي شي عن فيصل : علامك؟
يزن يحاول قدر المستطاع يخفي توتره : تعرف الشغل ضغط
فيصل مشى الموضوع رغم ان توتر يزن واضح : الله يعينك ياخوي ، جيت اتطمن عليك لكن ضني انك مشغول استودعتك الله
يزن : لالا ماني مشغول افضى لك
فيصل : لا ياخوي لاتضغط على نفسك انا طولت عليك فمان الله
يزن : فمان الكريم
ابتسم فيصل وطلع من المكتب وهو مستغرب من غرابه الي حوله يزن اذا شاف فيصل توتر والوجد نفس الكلام ليه كلهم يتوترون اذا شافو فيصل ؟ كل هالتساؤلات بمخيله فيصل !
يزن تتهد براحه من خروج فيصل
جلس على الكنب وحط يده تحت فكه بتفكير عميق من غرابتهم وتوترهم
طلع جواله من جيب بدلته وفتحه وانشغل فيه
اما الوجد الي شافت فيصل طلع من المكتب ومن فهاوتها طلعت من بين الاشجار جاهله الانسان الي جالس على الكنب ولاهي بجواله !
ووقفت قدام فيصل معطيته ظهرها وجاهله وجوده اخذت جوالها بتتصل على جوري
فيصل رفع انظاره وطاحت عينه على بنت يعرفها زين يعرف عبايتها وطولها وشكلها حتى من ورا حافظها حفظ !
كان حاس انها هي وماخاب ضنه يوم شافها قدامه مشغوله بجوالها
رص على اسنانه بغضب من شافها بشركه الي يشتغل فيها يزن وهي من امس واسم يزن على لسانها
تقدم بغيره ونوعاً ماء غضب ومسك عضدها ولفها
الوجد طاح الجوال منها والتفتت للي مسك عضدها وكانت ناويه تتهاوش لكن بلعت لسانها من شافت عقده حواجبه
نطق بحده : وش تسوين هنا !؟
الوجد بلعت ريقها بخوف من نظراته الغاضبه : ماسوي شي
فيصل بعصبيه ونفاذ صبر : وش تسوين هنا سؤالي واضح !
الوجد نزلت انظارها لـ يد فيصل الي شاده على عضدها : ماسويت حاجه
فيصل بعصبيه وصوت خافت : وشلون ماسويتي شي والقاك عند باب يزن وانتي لك يوم واسم يزن على لسانك
الوجد ارمشت ببطئ من صدمتها وتفكير فيصل : فيصل لا تفهمني غلط
فيصل يحاول قدر المستطاع يتمالك نفسه ويوطي صوته ولايصارخ ينفضحون : امشي قدامي
الوجد بخوف : مابغى اروح اذا انت بتهاوش وتصرخ
فيصل عقد حواجبه بغضب : قدامي لااسمع حسك
الوجد خنقتها العبره لانه عصب عليها نزلت للارض واخذت جوالها وقفت
فيصل ماسحبها وجرجرها بين العرب وفشلها لا بالعكس رغم عصبيته عاملها بلطف
حضنها على جنبه الايمن ومشى طالع من الشركه وملامحه مليانه غضب
وصلو للسياره وابتعد عنها وركب السياره ، تنهدت الوجد وركبت وجلست بهدوء وماكأنها مسويه شي قعدت تقلب جوالها تشوف اذا انكسر بتخلي فيصل يشتري لها جديد
فيصل زفر بغضب وحرك السياره : لاحول ولاقوه الا بالله ليه سويتي كذا؟
الوجد شبكت يدينها ببعض : طيب لاتعصب
فيصل بعصبيه : لابعصب اذا حركاتك مع من يحبك كذا!
الوجد مقدرت ابداً صراخ فيصل عليها واجتمعت الدموع بمحاجر عيونها : طيب كنت بروح لصاحبتي
فيصل : خوياتك كل ابوهم بالرياض لاتحاولين تكذبين علي!
الوجد سلاحها الوحيد دموعها : خويتي ليش مو مصدقني امش شوفها اذا مو مصدق
تنهد فيصل من حس بنبره صوتها تغيرت : امنعيني من الدموع يابوك
الوجد بدموع صدت عنه وتكتفت والتزمت الصمت
فيصل ارخى ظهره على المرتبه ويمسح على شنبه ويناظر الطريق ويفكر هو ميقن وعارف ان وراها بلا بس مو قادر يثبته كل مالقى شفره صغيره تهزمه دموعها وترجعه لنقطه البدايه
في جانب من فيصل يقول لا الوجد جايه تقابل يزن وفي جانب اخر يقول تعوذ من ابليس يمكن صدق البنت تزور خويتها
طول الطريق ساكتين
الوجد تفكر اذا مشت عليه الكذبه وفيصل يحاول يقنع نفسه انها صادقه
مسافه الطريق ووقف السياره عند البيت ونطق بهدوء : انزلي
الوجد مسحت دموعها وضيقت عيونها بتفكير ونطقت بينها وبين نفسها : لو نزلت بيروح للشركه وبيحقق مع يرن ويسطره
فيصل يناظرها ساهيه : الوو ؟
الوجد مدت يدها بمعنى "اسكت " ونطقت : اسكت بفكر
الغريب ان فيصل سكت ينتظرها تفكر ! ابطال الفلس
فكرت الوجد وفكرت وفكرت وتوصلت لحل : مابغى انزل
فيصل : يبنت انزلي وربي ماني رايق لك
الوجد تكتفت ومسكت معها تعانده : مابغى انزل سو الي تبغى تسوي
فيصل مسح على وجهه ونطق : اللهم اجرني في مصيبتي شفيك انتي اليوم متولجتني بعنادك
الوجد : شئت ام ابيت نزله ماني نازله لو تسوي الي تسويه
فيصل : فوق ماانك طالعه من وراي ومكذبه علي وباقي لك وجه تعانديني؟
الوجد رفعت حواجبها : وش تقصد بباقي لك وجهه؟
فيصل تنهد : يبوك انزلي ذبحنا الحر
الوجد : مابغى
فيصل ناظرها بصدمه ونطق : بتخاويني يعني للدوام؟ شرايك بعد احط لك رتبه جندي؟
الوجد : ابغى رتبه كذا كيوت فهمت علي؟
فيصل هيبته راحت قبل شوي يصرخ ويهاوش والحين مجلوط من برودها وعنادها : لعنبو ابليسك انزلي تاخرت على الدوام
الوجد رفعت كتوفها : مافي روحه الدوام اليوم
فيصل غمض عيونه واخذ شهيق زفير واستهدى بالله ونزل من السياره ومتوجهه للوجد
فتح الباب ونطق : انزلي
الوجد : قليل ادب ماتستحي على وجهك احد يعامل زوجته كذا؟
فيصل بطفش: وجد يرحم والديك انزلي دام النفس عليك طيبه
الوجد ناظرته وخزته : مابغى
فيصل باقي معصب وهي ماعطته فرصه يعصب عليها : اوريك من مايبغى
تقدم لها اكثر وشالها بحضنه : مايمشي معك الا كذا
الوجد : عيب عيب نزلني مو كذا قدام الجيران !
فيصل فتح الباب برجله ودخل ومارد عليها ونزلها على الكنب ونطق بجديه وهدوء : انثبري بالبيت ولاتدوجين يمين ويسار الين اجيك وبحقق معك !
الوجد لاحظت ان نبرته جديه وفيها نوعاً ماء من الغضب : طيب وين رايح!
فيصل : للموت وش عليك ؟
اتسعت عيون الوجد : صاحي انت؟ فيصل صدق اسالك
فيصل : ليش شايله هم لدرجه انك شوي وتصيحين؟!
الوجد : شوي وتصيحين وانت قايل بتروح للموت !
فيصل : بسالك وجاوبني اذا تبيني اجاوبك
الوجد تنهدت وناظرت فيه تنتظر السوال
: وش غايتك تروحين للشركه؟ وش وراك انا بساعدك ماني ضدك ابداً !
الوجد : وين بروح اكيد لصاحبتي انت وش مفكر !
فيصل جلس على ذارع الكنب ونطق : يبوك لو غيري شافك بشركه خويه والله يدفنك بالشركه نفسها هذا اكبر دليل اني واقف معك وبعاونك بس لاتخبين عني شي وتندمين بعدين
الوجد : بس انا مارحت لشركه صاحبك انا رحت لصاحبتي
فيصل بصراخ : تستهبلين علي انتي ؟ وش شايفتني؟ بزر؟ ولا هطف؟ ولا وش! منين لك خويه بجده لعنبو ابليسك انتي بكيتي على صدري تشكين انك ماتعرفين احد بجده واليوم تجين وتقولين عندي خويه بجده؟
الوجد : فيصل باقي ماعرفتني ؟ تعرف اني اجتماعيه واحب الصداقات اكيد اني كونت صداقه بجده واريحه اسلم عليها
فيصل رفع حواجبه : وش هالثقه تروحين تسلمين عليها ومالك يومين متعرفه عليها؟ وجد لاتجلطيني !
الوجد حطت يدها على راسها : فيصل تراك قاعد تضغط علي تبغاني اتكلم بس ماعندي شي اتكلم فيه
فيصل قام ونطق : طيب نقطع الشك باليقين ونقول انها خويتك وبسكت وبصبر وبشوف وش تاليه هالصديقه الي ماني متطمن لها
الوجد : صاحبتني وش بتسوي يعني
فيصل : بتغاضى عن حركتك وبروح للدوام وانتي فكري زين وش عقوبه الي يكذب علي
ماسمح للوجد ترد وطلع من البيت ، غمضت عيونها من سكر الباب بقوه
زفرت بضيق انها كذبت عليه بس مالها خيار ثاني ابداً مضطره تكذب عليه وتخبي عنه
اتصلت جوالها والتفتت على امل انه فيصل لكن شافت اسم جوري وردت : وينك بغيت اروح وطيي
جوري : وش صار شلت همتس اتصل عليتس ماتردين
الوجد : قفطني
شهقت جوري : يراسي يمه وش صار عليكم
الوجد : مجبور يغاضى عن اغلاطي
جوري : صحح لازم يتغاضى لكن عاد صدز تغاضى ؟
الوجد : تهاوشنا شوي وقال ان مرده بيعرف واخذني تحقيق وكذبت عليه وقال انه بيتغاضى
جوري : كش عنده نظره ثاقبه
الوجد : لا مو كش حرام عليك
جوري : طيور الحب مشكله الوكاد دامتس سليمه بروح اهمز ظهر ابوي توصين على شي؟
الوجد : سلامتك وسلمي لي على الي حولك
جوري : يوصل
قفلت الخط واسندت ظهرها على الكنب وضيقت عيونها بتفكر
الكل يعتقد ان الوجد بتهجد بعد تهديد فيصل لها لكن حدث العكس
قامت بما انها ضامنه ان بحدود الساعه فيصل مايكون موجود اخذت شنطتها وحطتها على كتفها وطلعت من البيت وعادت نفس الحركه
،
بيت العم جابر
جوري تهمز ظهر ابوها وصابره عشان بر الوالدين
ابو بتال : همزي هنا هنا
جوري تهمز على الي اشر ابوها: يبه خلاص؟
ابو بتال : خمس دقايق بس
ام بتال تضحك وتصور : ماسكها نص ساعه تهمزه وللحين ماسك الجوري
جوري بممازحه وبنفس الوقت جديه : يبه ترى الموضوع فيه فلوس كل مازاد مده التهميز زارت الفلوس
ضحك ابو بتال ونطق : هذا بر ولا تجاره؟
جوري : تقدر تقول تبادل منفعه انا اهمزك وانت تدعمني بالفلوس وبكل نكون كسبانين كلنا
ابو بتال قام ودف جوري عنه بخفه وممازحه : دام البر بفلوس فـ تقلعي عن وجهي
جوري : معليش يعني عطني حق الساعه الي راحت وانا اهمز
ابو بتال طلع من جيبه 50﷼ : دونتس، إن لله ماديه هالبنت
جوري تشوف الخمسين كانها مليون وقامت وهي تضحك بفرحه : يلبيه
ضحك ابو بتال وام بتال على بنتهم الماديه بحت
،
اول مادخلت بالشركه قابلت موظف الاستقبال الي تهاوشت معه
لمحها وعطاها وضعيه من اول نظره قلبي هديتو ليك حبها من اول نظره !
الوجد شافته وكشرت : وع وش تبغى
الموظف تكى ويحاول يفتح موضوع : شفت العسكري اخذك قلت مهببه شي مايعلم فيه الا الله وش مهببه
الوجد : ياليت تركز بشغلك اكثر من تركز بحياه الناس
الموظف : اقولك شرايك اضرب لك العسكري كانه تجراء ومسكك؟
الوجد رفعت حاجبها ونطقت بسخريه : وش رايك اجيب لك العسكري الي تتكلم عنه؟
الموظف : ماعندي مشكله خليني اواجهه واتهاوش معه ليش يتمادى ويمسكك ويطلعك من الشركه!
الوجد تكتفت : اوه العين بصيره لكن اليد قصيره كان فيك حميه ليه مادافعت يوم شفت العسكري الي تتكلم عنه ماسكني؟ ليه تكلمت يوم راح وانتهت السالفه هذا دليل انك رخمه
الموظف : مو مساله رخمه ولا مـ...
قاطعته الوجد : تعرف مين العسكري قبل تتكلم؟
الموظف : صراحتاً ماشفت وجهه شفت مقفاه
الوجد : وان قلت لك بتصل على هالعسكري الان وتشوف وجهه زين الزين
الموظف : لاتدقين ولا ادق لانتهاوش
الوجد : اذا بتتهاوش مع العسكري بعطيك اسمه فيصل بن محمد ال سلطان تعرفه
الموظف بلع ريقه بخوف من ذكرت اسم العميد فيصل : الله يحفظه
الوجد ناظرته بنقد وكملت سيرها
طقت الباب بكل هدوء وثبات عكس الي داخلها تخاف يداهمهم فيصل
يزن : تفضل
فتحت الباب ودخلت وفز يزن بترحيب : اهلين بزوجه اخوي وسـ...
قاطعته الوجد : فيصل مو اخوك ولاسندك لاتوهم نفسك بأنك قد الاخوه والصداقه
يزن عقد حواجبه : ليش ليش كل هالكلام
الوجد : يزن لاتسوي انك مانت فاهم حاجه وانت طابخ الطبخه ومخلص !
يزن يستغبي: فهميني حبه حبه
الوجد بجديه : شوف يزن انا انسانه ماعندي وقت ولاني فاضيه اسمع تبريرات مو منطقيه جايه اقولك كلمتين وبسالك كم سوال وبمشي ماني مطوله وياليت يعني تبدا بالموضوع بدون مافهمت ولا وش السالفه !
يزن فهم وش تقصد من كلامها ونطق: طيب اجلسي وخلينا نتفاهم
الوجد : ماني جالسه ولاني متفاهمه الموضوع بيدك ياتسكر الموضوع مع شيهانه وتنهيه بالخطبه والزواج ولا والله ليوصل العلم لفيصل وانت ادرى بصاحبك واخوك على قولتك
يزن : يمكن مافهمتي الموضوع من البدايه لكن انا برجولي تكرمين جيت لفيصل وقلت له اني احُب اختك ! لكن ماسمع مني وتهاوشنا ويالله يالله تسامحنا
الوجد تخصرت : لاوالله؟ تجي لرجال يغار على محارمه وتقول احُب اختك؟ صاحي تقول هالكلام لفيصل وتنتظره يستقبلك ويرحب ويهلي فيك ؟ فيصل ماعنده موضوع احب فلانه وعلانه !
يزن : ماكنت عارف ان رده فعله سيئه اذا قلت احُب اختك
الوجد : طيب عرفت الحين ان رده فعله سيئه يوم عرف انك تحب اخته طيب مافكرت فيها اذا عرف انك تكلم اخته ؟ وش بتكون رده فعله ياوحده من الثنتين ياانت ياشيهانه
يزن تنهد : عارف وساكت
الوجد : كلنا عارفين وساكتين مابيدنا حيله اذا فيصل عرف
يزن : تمام يعطيك العافيه نصايحك مفيده
الوجد انغبنت من رد يزن : اللهم لاتختبر صبري فيك ! شفيك انت من وين تفهم اقولك لو عرف وش بيصير تقول نصايحك مفيده
يزن : ياوجد انتي فاهمه نيتي غلط انا احب شيهانه وماقصد اني ااذيها !
الوجد : لو تحبها ماكان دخلتها علاقات محرمه وغير شرعيه لو تحبها خفت عليها وجيت طقيت باب ابوها
يزن التزم الصمت وماله وجهه يرد
الوجد من زود قهرها وغبنتها على اختها وصاحبه عمرها قالت كلام جارح : انت قادر تجي من البلاعه لكن عاجر تجي من الباب صدق الرجال قليل
قالت هالكلام وطلعت من المكتب تاركه يزن يقلب الكلام براسه
عدلت الوجد حجابها لانها شدت حيلها بالنقاش واول مره تقسي قلبها على شخص وتجرحه بالكلام
عورها قلبها على الكلام الي قالته ماتحب تجرح احد سواء بفعل او بكلمه
طلعت من الشركه وهي متضايقه ماتدري ليش تضايقت حست ان اسلوبها شوي قاسي المفروض انها تنصحه بأسلوب لكن من كثر تفكيرها وقهرها قالت كلام جارح
سرعان مااختفت الضيقه وتحولت لخوف من تذكرت فيصل اذا ماحصلها بالبيت بتشوف نجوم القايله
ركبت الاوبر بسرعه وقالت له مكان البيت وهي في قمه التوتر والرجفه
مسافه الطريق وقربو من البيت
الوجد : بس بس وقف وقف هنا
نزلت الوجد من السياره ومشت بأتجاه البيت لكن الطامه الكبرى من شافت فيصل نازل من السياره ويسكر باب السياره
تجمدت مكانها ماتعرف شلون تتصرف وكيف تتخبى وكيف تجيب عذر !
وقت مافيصل متوجهه بيفتح الباب الرئيسي للبيت الوجد جتها فكره تدخل من الباب الخلفي
نست البرستيج وقعدت تركض عشان مايلمحها
مع التوتر والخوف والركض طاحت على ركبتها بالشارع
ماهتمت ابداً لطيحتها قامت ونفضت نفسها واكملت الطريق
فيصل دخل البيت وقعد ينادي الوجد : يالوجد
الوجد اخيراً بعد صراع بينها وبين ركبتها المجروحه دخلت البيت وسمعت صوته يناديها
دخلت احد المجالس واول ماحست ان صوته قريب لها وواضح متجهه لها كبرت
دخل فيصل للمجلس واستغرب انها لابس عبايتها وواقفت ومعطيته ظهرها : بسم الله واقفه بنص المجلس وش تسوين
ركعت الوجد وفهم فيصل انها تصلي لكن الغريب ان مافيه سجاده
التفت واخذ السجاده وفرشها عندها
استغرب انها تصلي بعيايتها بالعاده الوجد تصلي بشرشف الصلاه
جلس ينتظرها تخلص صلاه بعد بضع ثواني سلمت الوجد
فيصل : وش تصلين بهالوقت؟ وليش بدون سجاده واول مره تصلين بعبايتك
الوجد تسوي نفسها طبيعيه وتتجاهل الم جرح ركبتها : اصلي الضحى واصلي بعبايتي لاني عاجزه اطلع اجيب الشرشف
فيصل : اها تقبل الله الوكاد امشي معي للمجلس بنقفل على موضوع الشركه وتوعديني
الوجد ماقدرت تقوم من ركبتها : شرايك تخلص الموضوع هنا لاني عاجزه اقوم
فيصل : عجزتي بدري توك حتى الورعان ماجبتيهم عشان تعجزين
الوجد : رجولي تعورني مقدر
فيصل : افا شفيهم وريني منين يوجعنك
الوجد : ماعرف خلاص مايحتاج
فيصل قام ومد يده : اجل قومي معي
الوجد تضيع الموضوع : رح انت للمجلس انا بفصخ عبايتي واجيك
فيصل : الي ودك اجل اتحراك بالمجلس
طلع فيصل مع ان قلبه ناغره ان وراها بلا كايد بعد لكن مابيده حيله يستجوبها
تنهدت الوجد براحهه واخذت نفس طويل عريض تبعد التوتر عنها
قامت بألم من ركبها وماتوقعت ابداً ان الجرح يألم لدرجه هذي
ماكلفت على نفسها تشوف الجرح
لمت العبايه ونزلتها وطلعت متوجهه لفيصل وهي تهدي نفسها من التوتر
فيصل رفع انظاره عن جواله وشافها مقبله عليه نطق بابتسامه مزيفه : ياهلا بالشيخه الي جننتني ووراها علوم وبلاوي بس احبها ودك تجـ ...
سكت من لاحظ مشيتها الغريبه ونطق يتطمن عليها : وشفيك يابوك يوجعك شي؟
الوجد كانت مبتسمه من الترحيب لكن تحولت الابتسامه الي وهقه : ليش ؟
فيصل ميل شفايفه : وش ليش وانتي تمشين مثل البطريق
اتسعت عيون الوجد من التشبيه : فيصل!
ضحك فيصل من صدمتها ونطق : تعالي جنبي وعلميني وش يوجعك
ابتسمت الوجد بفرحه انه نسى سالفه الشركه جاهله ان هذي خطه من فيصل يستدرجها ويقفطها
جلست الوجد وثنت ركبتها وكشرت بألم وبسرعه ابتسمت عشان مايلاحظ تكشيره الالم
اما فيصل الي مراقب حركاتها بكل دقه وملاحظ توترها ومشيتها وحتى تعابير الخوف والتوتر والالم الي تطلع على وجهها وعارف انها تسوي شي من وراه لكن مايدري وش الشي الي تخبيه الوجد
لاحظ لما ثنت ركبتها كشرت بألم ونطق : طايحه؟
الوجد ناظرته وعقدت حواجبها بصدمه من سرعه الملاحظه : اءء...
فيصل قاطعها ونطق : خلي عنك البربره الزايده والكذب وقربي بشوف جرحك
قرب لها اكثر وسحب ساقها وحطه بحضنه ورفع البنطلون فوق الركبه وشاف الجرح ونطق : كيف طحتي ومنين ووين
الوجد : طحت بالمطبخ
فيصل : مستعد احلف انك تكذبين وماطحتي بالمطبخ انتي طايحه على شي خشن زي الحصى او الزفلت
الوجد بلعت ريقها بوهقه : طحت بالشارع
ابتسم بأنتصار من قدر يستجوبها حبه حبه وهذا دليل ان الخطه ناجحه : وش مطلعك بالشارع؟
الوجد : طلعت للمندوب طالبه اكل
فيصل هز راسه بالمجامله وهو يدري انها تكذب : ايه زين وش طلبتي ماشوف اكل هنا؟
الوجد : اكلته
فيصل وهو يفحص جرح ركبتها : وش نوع الاكل؟
الوجد : حلا وقهوه
فيصل : والدايت الي مسويته؟
الوجد : اليوم مفتوح
فيصل : بس اليوم المفتوح يكون يوم الجمعه والسبت واليوم الثلاثاء
الوجد تنهدت : فيصل ليش تحقق معي
فيصل رفع انظاره عن الجرح وناظرها : لاني اكره الكذب واكره الكذبين واتمنى ماتكونين منهم
الوجد : بعد عني خلني اقوم انت قاعد تدقني بالكلام
فيصل : اركدي يالوجد وخليني اكمل فحص تعرفين يعني اخوي دكتور ويطبق علي وانا اطبق عليك
الوجد بزعل : خلاص شفت الجرح وارتحت خلني اروح
فيصل هز راسه بالنفي : اجلسي وماني بتاركك
تكتفت الوجد والتزمت الصمت
فيصل يستذكر شروحات فهد وتطبيقه عليه وكيف يتعامل مع الجروح البسيطه
: بسيطه يابوك بسيطه
الوجد ادركت لو جلست عنده اكثر من كذا بيسحب منها الاجوبه وتكب العشاء وتقول له كل شي
سحبت رجلها ونزلت البنطلون وقامت بهدوء وراحت !
فيصل ناظرها الين اختفت عن انظاره ولانطق بحرف تنهد واسند ظهره على الكنب وظن انها زعلت منه
،
غرفه مازن
جالس في امان الله لاشغله ولامشغله ويرسم احلامه اذا توظف وتزوج شروق وحقق احلامه واماله كلها
قطع حبل افكاره السعيده دخول شيهانه بعد ماطقت الباب
: فاضي ادخل؟
مازن عقد حواجبه بأستغراب من ادب شيهانه : اي فاضي فيتس شي؟
شيهانه تنهدت وتقدمت وجلست والتزمت الصمت
زاد فضول مازن عن هدوء شيهانه : متهاوشه مع احد؟
شيهانه : بصراحه؟ ماعندي احد افضفض له
مازن تعدل بأنتصات : انا اسمعتس تكلمي بس قبل كل شي بسالتس وين البنات ؟
شيهانه نزلت انظارها : العنود مشغوله مع رجلها وشروق تعرف مامون عليها وجوري والوجد زعلانات مني
مازن : دقيقه دقيقه وش الي الكايد الي زعل البنات منتس!
شيهانه : اهخ ي مازن لو اقدر اقول لك كل شي وينتهي همي
مازن : اسمعتس تكلمي وكلامتس مايطلع من الغرفه
شيهانه بضيق : لو اقدر اتكلم كان تكلمت مع فيصل بس فيصل وين وانا وين
مازن : طيب نقول فيصل مشغول بهموم الوجد فضفض لي اعتبريني اختس شوفي ضحيت برجولتي عشان تفضفين لي
شيهانه سكتت لثواني تفكر لكن مقدرت تقول شي غير انها تستمر بالكذب: خويتي
مازن : ايه وش به خويتس عشان نقدر نساعده
شيهانه : دخلت علاقه الكترونيه محرمه مع خوي اخوها
شهق مازن بصدمه ومسك راسه : لااله الا الله ياكبرها من مصيبه
زاد خوف شيهانه من معرفه اخوانها عن الموضوع : لاتخوفني عليها عطني حل
مازن : الحل الوحيد هو انها تترك العلاقه وتتوب وتصلي ركعتين توبه وصل الله وبارك ولااحد شاف ولا احد دري
شيهانه : اقولك خوي اخوها لو تركت حبيبها اكيدد يبي يهددها ويعلم اخوها عاد اخوها نفس فيصل عصبيي ومايتفاهم !
مازن حط يده تحت فكه بتفكير : شوفي من هالناحيه هذي تتكلم مع حبيبها على قولتس وتتكلم معه وتفهمه انها علاقه محرمه وهالعلاقه اذا بدايتها ماترضي الله نهايته ماترضيك واذا عاد حبيبها بهيمه مايفهم تتكلم مع اهدى والمتفهم من اخوانها واكيد بيساعدونها بالنهايه اختهم
شيهانه : تهقي لو تكلمت مع اخوانها بيساعدونها؟
مازن ؛ اذا الموضوع مافيه صور وفويسات اكيد يساعدونها
شيهانه : لا نظيفف مافيه صور وفويسات بس سوالف
مازن : رايي انها تتكلم احسن من تكتم وتبلش بعدين لمن صار به صور وهالخرابيط
شيهانه : لو انا مكانها وش رده فعل فيصل اذا درى اني اكلم يزن؟ فقط مثال لايروح بالك بعيدد
مازن رفع كتوفه : انتي ادرى بأخوك وجنونه يتوطاتس انتي ويزن ومايخلي فيكم عظم صاحي
شيهانه بلعت ريقها وسكتت
مازن بفلسفه : بس يعني تعرفين انا دايم مع فيصل واعرف اتصرف معه هو يكره الكذب والاستغفال والي يكذب عليه ويستغفله ماعنده مشكله يذبحه لكن ان جيتي برجولتس لفيصل وقلتي له السالفه من الطق طق لـ السلام عليكم مستعد احلف لتس انه مايسوي حاجه بس يعصب شوي
شيهانه : بس الوجد كذبت على فيصل بمشكله ماجد واصرت تخبي عنه ويوم عرف بنفسه ماسوى لها شي
مازن : اوهه ي شيهانه الوجد موقفها غيرر عن موقف خويتس الوجد مشكلتها مع ماجد ماكانت بأرادتها لا كانت غصباً عنها لكن خويتس بكامل إرادتها وبكامل قواها العقليه دخلت العلاقه فـ في فرق بين المواقف فيصل ماصفقها يدري انها خايفه منه وماتعرف وش تسوي وحتى كان يقول لي البنت ترجف اسبوع كامل بعد المشكله واقول لتس شي؟
شيهانه : قول
مازن ؛ صح ان فيصل يموت ويعشق ويحب الوجد لكن ان عادت الحركه وكذبت عليه واستغلت حبه وثقته فيها تدرين يمكن يقبرها ؟
انقبض صدر شيهانه بخوف من تذكرت ان الوجد تدري بسالفه يزن وساكته ومخلبه عن فيصل : تمام تصبح على خير
طلعت شيهانه بتوتر وخوف من الغرفه وماسمحت لمازن يكمل كلامه
مازن ميل شفايفه بلا مباله : عموماً تلقين خير
،
جالس بالمجلس على وضعه من بعد ماقامت من عنده حط رجوله على الطاوله الي قدامه ويدينه ورا راسه وساكت لكن عقله يتكلم
معقوله زعلتها الكلمه؟ معقوله زعلت!؟ ليش زعلت ؟ ياليل وش سويت يفيصل ! بس لحظه دقيقه في غلط بالموضوع ليش زعلت اني استجوبت منها معقوله تخبي شي كايد؟ اكيدد مارتبكت وقامت الا انها خايفه احشرها بالسؤال !
كل هالاسأله يسألها نفسه وينتظر جواب منها
ماتحمل ابداً يجلس مكتف اليدين وقام ومتوجهه طالع للدور الثاني
اما عند الوجد جالسه على طرف السرير وماسكه جوالها وتراسل جوري
الوجد : بموتت جوري تكفين الوضع يخوف احسه عرف
جوري: لااله الا الله كيف عرف!
الوجد : ماعرف ماعرف قعد يستجوبني وانا مثل الخبله اجاوب
جوري : وجد تكفين الزمي لسانتس ولاتنكبينا كلنا نروح به
الوجد : مقدر اسكت اكثر من كذا احس بيعرف اليوم قبل بكرا
جوري : وربي ي وجد لو تكلمتي بتدمرين نفستس وبتدمرين شيهانه وفيصل واخوانه بعد !
دخل الغرفه بهدوء وشافها معطيته ظهرها وجاهله وجوده تقدم وجلس جنبها
الوجد فزت من حست فيه وقفلت الجوال وحركتها هذي اثارت شك فيصل
عقد حواجبه ونطق : من تراسلين؟
الوجد : جوري
فيصل ميل شفايفه: وش تبي؟
الوجد : تتطمن علينا
فيصل بعدم تصديق لكلامها : اها زين
الوجد : نبرتك مو مصدقتني
فيصل ضم الوجد على جنب : يبوك حديتيني اشك بنفسي حتى لاتلوميني لامني شكيت وسألتك اسأله واجده ترى هذا من خوفي عليك
الوجد : ترى كل الشك والاساله الي مالها نهايه مالها فايده لاتتعب نفسك
فيصل : دامك ماتبيني اتعب وراك لاتشقيني وعلميني بكل شي لاتسكتين وتكبر السالفه
الوجد : مافي سالفه تهاويل
فيصل : ليش راسمه ببالك اني وحش وعصبي واهاجم بدون ماافهم السالفه ليش تخافين تقولين لي مشاكلك ليش ماتثقين فيني!
الوجد : لا تفكر كذا انا راسمتك ببالي انك رجل وسند وزوج واب واخ وماخاف منك واحب افضفض لك واثق فيك
فيصل : لاتوهميني بالكلام الفاضي وجد كانك تحبيني لاتستغلين حبي لك وتسوين اشياء من وراي !
الوجد : فيصل والله احبك ليش مو مقتنع
فيصل : يوجدي اتعبتيني وانا بعز شبابي شيبتي فيني ! ابي اسالك وجاوبيني بكل صدق وامانه عشان تنتهي شكوكي نهائياً
الوجد هزت راسها وناظرت فيه تنتظر السؤال
فيصل : تراني فاهم واعرف ومراقب كل تحركاتك وتصرفاتك وش مقصدك تخبين الجوال اذا جلستي جنبي ووش مبرر وجودك بالشركه اليوم ووش سر المكالمات مع جوري الانهائيه وليش تتوترين اذا جلست جنبك او حولك
الوجد تعابير وجهها مصدومه من قوه الملاحظه الي ب فيصل بلعت ريقها : مافي سـ...
فهم انها تبغى تدور وتلف بالاجابه قاطعها : دام اجابتك كذب فـ لاتجاوبين وخلي الشك والظن يذبحني
،
عصر اليوم الثاني تحديداً بيت العم محمد
ريحه البخور ماليه المكان وصوت ابو نواف يصارخ ويهاوش فهد
شيهانه نازله من الدرج يالله تمشي وبالها مشغول ومانامت كويس تفكر بكلام مازن
ام نواف وابو نواف يتبخون والابتسامه مافارقت وجيههم
نزل فهد وهو لابس الثوب الابيض والغتره وريحه العطر الرجال ماليه المكان
ام نواف : الله يحفظك ياقره عيني ان شاء الله اشوفك عريس وان شاء الله اشوفك ماسك يد ولدك اما فيصل فقدت الامل فيه ماحصل يجيب ورعان
ضحك فهد وتقدم وقبل راس ابوه وامه: ان شاء الله
ابو نواف : مشينا؟
فهد : توكلنا على الله
طلعو من البيت وركبو السياره وحركو للرياض
مسافه الطريق ونزلو قدام بيت ابو خيال
طلع ابو خيال يرحب ويهلي فيهم ودخلهم البيت الحريم بقيم والرجال بقسم
ابو خيال مد الفنجان : يالله حيهم
ابو نواف اخد الفنجان : الله يحييك ويبقيك وشلونك وشلون الاهل
ابو خيال : والله بخير جعلك تسلم الا ماقلتو لي من انتم عياله؟
ابو نواف ؛ حنا من ال سلطان كانك تعرفهم
ابو خيال عقد حواجبه : سامع فيه بس مدري وين اذا تذكروني؟
ابو نواف : تعرف بنت تركي؟
ابو خيال : الله الله اعرفها بنت تركي الوجد خويه بنتي لكن وش فيها؟
فهد : حنا عيال عم بنت تركي وابوي عمها
ابو خيال : ياهلا ويامرحبا ارحبو تراحيب المطر والسيل والله اعذروني ماعرفتكم الا تو
ابو نواف : عاد جايين انا والولد ماودنا نطول عليك طماعنين في نسبك
فهد : وبنتك ياعم بالقلب وبالعين لاتخاف عليها وجيناك من الباب وبكمل نص ديني
ابو خيال بفرحه : خير مانناسب انشهد بس والله الراي الاول والاخير للبنيه
فهد : ابد ياعم معها الوقت تفكر فيه وتستخير وترد لنا
،
ام خيال : ياهلا ويامرحبا وشلونكن وشخباركن؟
خيال شافت شيهانه وعرفتها وحضنتها : شيهانه اخيراا شفتك وينك اختفيتي عننا
شيهانه بممازحه ؛ تعرفين يعني سيده اعمال وكذا ماعندي وقت
ضحكت خيال : الله يقلع ابليسك
ام نواف ماشالت عينها عن خيال من شافت الجمال والانوثه والاخلاق : ماشاء الله
جاء صوت ابو خيال من ورا الباب : يام خيال
قامت ام خيال وتوجهت للباب : سم وشبغيت؟
ابو خيال : بنتنا انخطبت من دكتور قولي لها تستخير وترد لنا معها اسبوع
انرسمت الابتسامه على وجهه ام خيال وزعرطت : ماشاء الله الف الف مبروكك
اما عند خيال الي تسوي نفسها ماتعرف شي لكن الحقيقه تعرف كل شي من الوجد
،

_________________
انتهى البارت ♡
رضيت بالله ربًا وبالإسلام دينًا وبمحمد ﷺ رسولًا ونبيًا)، ♡
حسابي تيك توك :Ot348285
حسابي انستا انزل فيه الروايه : Ot34828
النجمه تدعم الروايه✨

اهلين بنات كفيكم شخباركم طمنوني عنكم وكيف الاجازه معكم؟🥹
اسفه تاخرت 😢