لاتقارنين حبي لك بأي مخلوق انا حتى بغيابك احبك

Part34

سبحان الله وبحمده سبحان الله العظيم ♡

فيصل طالع من غرفته بعد ماهدى الوجد وكان يمشي بخطوات سريعه يبغى يطلع من البيت بدون لايناقش احد
استوقفته ام عبدالاله ؛ فيصل ياولدي
فيصل اخذ نفس والتفت : هلا
ام عبدالاله تقدمت لـ فيصل : يولدي لاتزعل من خالتك ام حنان تراها تحب بنتها وتمشي ورا كلامها ماتدري ان كلام بنتها غلط تسويه
فيصل : ياخالتي انا مايهمني كلام بنتها او هي ليش تمشي ورا كلام بنتها انا تعبت احط اعذار للناس تعبت وانا اشوف دموع الوجد تعبت وانا اشوف الوجد تلوم نفسها!
ام عبدالاله: تصبر ياولدي ولاتتعب كلها كم شهر وتخطى وفاه جنينكم الوجد رقيقه وحساسه وانا ام وعارفه شعور الفقد وادري بوجعها وادري ان الكلمه تزعل
فيصل : يشهد علي الله اني راضي بقضاء الله وقدر وادري ان وفاته خيره بس ماني راضي ابداً بلوم الوجد ! رجاً لحد يلومها بموت الجنين مالها دخل شي خارج عن مقدورها
ام عبدالاله :ابد ابد محد بيلومها الله يلوم الي يلومها وادري بك ماتداني على الوجد وادري انك ودك تسطر حنان بس عشانها بنت ماقدرت بس ولايهمك لو تنطق كلمه بقص لسانها
فيصل ابتسم بمجامله : تسلمين ياخاله توصين شي؟
ام عبدالاله : سلامتك يابعدي انتبه على طريقك ولاتسرع تذكر ان في انسانه تنتظرك
فيصل تقدم وقبل راس خالته من باب الاحترام : ابشري ماوصيك ياخاله وجيد لاتنزل دموعها بغيابي
ام عبدالاله: بحطها بعيوني
فيصل ابتسم وطلع وتنهدت ام عبدالاله واتجهت للمجلس وجلست
ام نواف لاحظت شرود اختها ونطقت : عسى ماشر ياوخيتي علامتس متضايقه ؟
ام عبدالاله : بقول كم كلمه لوخيتي ام حنان
ام حنان : اذا عن موضوع حنان وفيصل فـ رجاً احتفظي بكلامتس
ام نواف : يام حنان عيب هذا الكلام اختس الكبيره هذي بحسبه امنا
ام عبدالاله : والي خلقني وخلقتس الوجد وحنان معتبرتهن بناتي ومافرق بينهن وغلاهن واحد حنان بنت اختي والوجد حرمه فيصل الي بحسبه ولدي وماميزت احد على احد لكن اما ان حنان تدق الوجد بالكلام لابالله مابسكت وابلع لساني الا بفشلها قدام البنيه الوجد عيب عيب تقول لمره توها مجهضه جنينها هذا الكلام عيب ماتدرين وش وجع الوجد وقتها ودايم ذكري بنتس ان الدينا دوراه وبتدور عليها او على خواتها او على حتى بناتها بعيد الشر
ام حنان : انا مربيه حنان احسن تربيه مير ان ولدكم فيصل لاعب بمشاعر بنتي
ام نواف : امنا بالله فيصل واعترف بخطاه ولعب بمشاعر بنتس لكن سالفه قديمه وتزوج ونسى السالفه وحب الوجد بطهر نيه حتى انه مافكر يأذي الوجد ولاتخرببن بينهم بعد مازانت حياتهم طالبتس طلبه ياختي
ام حنان : انا عن نفسي ببلع لساني وبسكت لكن اذا عن حنان ماردها هذا من زود قهرها
ام عبدالاله : اي قهر الله يسلمتس هي كلمتن وقالها فيصل بوقت ضيقق ولازم ينقذ نفسه ونقلوها عاد لبنتس حنان وبنت حياتها مع فيصل وفيصل مايفكر فيها
ام نواف : شيخه ونقله هالكلمه لبنتس ولكن تصدقين شيخه الي نهايتها بين السجون؟ استغفر الله ماتشمت لكن اذت عيالي كثير
ام حنان : ماعندي كلام الصراحه
ام نواف : ي مره اعقلي وهجدي بنتس معتس ولاتخربين بين فيصل والوجد !
نزلت الوجد من الدرج وسمعت "لاتخربين بين فيصل والوجد" عقدت حواجبها ونطقت : مين الي تفكر تخرب بيننا؟
ام عبدالاله : ياهلا ويامرحبا بعروستنا الوجد
الوجد : تسلمين ، بطلع انا مع البنات توصون على شي؟
ام نواف : وجيد يابنتي شرايتس تقولين لحريم عمانتس وامتس يجن هنا ونتعلل ؟
الوجد شايله بخاطرها عن ام نواف ونطقت : زين
ام حنان ؛ خذي حنان معتس
الوجد : ان جت ترى بعطيها كف على عيونها
ام عبدالاله : بنت عيب تو حنا نتكلم عن تربيتس الحسنه
الوجد : تربيت على ان الي يوطى علي بطرف اتواطاه واتوطو الي جابه كمان
ام حنان : وتقولون حنان ماهي متربيه شوفو كلام حبيبتكم حرم فيصل
الوجد بللت شفايفها ونطقت : الي تربت ماتحط عينها على واحد متزوج ويحب زوجته
اتسعت عيون ان نواف بصدمه وام عبدالاله بلعت ريقها وام حنان التزمت الصمت لان الوجد سددت لها وحده قويه الجمت ام حنان
الوجد ارسلت قبله بالهوا : سيو اشوفكم باليل ان شاء الله لنا لقاء اخر
وابتسمت لهم وراحت وهي تتمخطر تقهر ام حنان بدلعها وغنجها
التفتت ام عبدالاله بصدمه : العن شكلها ساطيه
ام نواف : اخبرها بكايه مدري شصار صاير لسانها يطول اذانها
ام حنان ؛ يطول لسانها
ام عبدالاله : يومنتس تدقينها بالحتسي ليش؟ من تدخل في مالا يعنيه لقي مالايرضيه
جت حنان وجلست جنب امها : شفيكم؟
ام عبدالاله : سوالف حريم اطلعي منها
،
ساحه المفحطين يظهر لنا "المفحط المجهول " جالس فوق السياره ويدخن وجنبه مازن الي داق اللثمه ويعزز للمفحطين
فيصل يعدل اللثمه : والله اني قايل للبنيه ان عندي شغل
مازن : يويلك عاد لو تدري الوجد انك هنا بتزعل منك
فيصل حط الزيقاره بفمه : ماتدري ان شاء الله اذا ماقلت لها
مازن دق جنب فيصل : ولد عان هالجثه الي مقبل علينا
فيصل رفع انظاره وشاف واحد مقبل عليه : حياه الله
حط يده على كتف فيصل : معك مهند اذا ماتعرفني اسأل العيال عني
فيصل شال يد مهند عن كتفه : معك ولد محمد مهجد الحواري
مازن : معك زوزو الله يستر عليه
فيصل بهمس : فشلتنا
مهند بغرور : تواجهني؟ مع ان ماظن بتفوز بس نجرب مع الهطوف وش ورانا
فيصل نزل من كبوت السياره وتقدم لـ مهند : نشوف من الهطف
مهند مد يده : تم
فيصل صافح مهند بقوه وشد على يده :تم
مازن : حاس انها بتقب بينكم
فيصل سحب يده من يد مهند وفتح باب السياره وركب : مازن لاتجي منافسه قويه
مهند ضحك بسخريه وراح
مازن : معليش انا وراي شروق احبها مابي اموت
فيصل تجاهله وشغل السياره ونزل على الساحه
ضحك مازن : قادح على الرجال وهو خروف عند شفايف الوجد
اتجهه مازن للمشجعين وركب فوق كبوت السياره وصرخ يعزز لفيصل او بالاحرى "المفحط المجهول"
صرخو الشباب يعززون للمفحط المجهول لانه ولد ديرتهم اما مهند مايعرفونه
كان مهند متمرس بالتفحيط واداء فيصل كان رهيبب بضع دقائق وانتهى التحدي وكان الفائز؟
نزل من السياره وسكر الباب بقوه وصرخ بأنتصار : يقولها ويطولها ولد محمد ابو محمد
صرخ مازن بتعزيز : عاش البناخيي
فيصل يهايط على مهند ويسوي حركه "انا لا اراك"
نزل مهند وكان مقهور
التفت فيصل ونطق : اما توردها مواريد الابطال ولااسترح خل المراجل لـ اهلها
مازن يزيد النار حطب : اففف قويهه حي عينك يابو محمد
الكل يتسأل مين ولد محمد واي محمد في مليون محمد بالديره المفحط المجهول ولد اي محمد ؟
تنرفز مهند من تعزيزهم لـ فيصل وشد قبضته ومع الاسف ماتمالك نفسه وضرب فيصل على خشمه
فيصل حس بالدم ينزل من انفه بعد الصفقه وفيصل كان محتاج احد يضربه يفرغ عصبيته وضغوطه وتقدم لمهند ومسك ياقته :قدها؟
ماسمح لـ مهند يتكلم وتلفت اعصابه ماقدر يتمالك نفسه قدام مهند المدلل المستفز السايكو الي ماتحمل هزيمته وصار الي صار فيصل مسك مهند وحك وجهه بالزفلت الين اختفت ملامح مهند من ضرب وشتيمه
مهند كان يضرب وفيصل يضرب وتضاربو
محد كان قادر يفك فيصل لانه مدرب تدريب عسكري مو اي تدريب
مهند بيموت ومحد قادر يفكه من يد فيصل ومالهم الا حل وحيد يبلغون الشرطه
مازن يحاول يمسك فيصل : ولدد اتركه وراك عايله خلاص!
فيصل : اوريه ابن الكلب اجل يمد يده ؟
ثواني وهم يسمعون صوت صفارات الشرطه المشجعين هربو ولكن الدلخ اخونا فيصل ماهرب لا استمر يضرب
الشرطه مسكتهم ثلاثتهم مازن وفيصل ومهند وعلى المركز
،
غرفه العنود
البنات متجمعين كلهم ماعادا الوجد الي قالت انها بتجي ولاجات
شيهانه : ابك وينها هذي
جوري : بتصل عليها
اتصلت جوري على الوجد وماردت : تعطيني مشغول!!
دلال : شكلها عن الحبيب
شيهانه : لافيصل راح متاكده
دخلت الوجد وجوالها على اذنها تتصل : ايوه ي عمتي ام بتال اذا ماعليك امر عمتي ام نواف تبغاكم وبالله انتي تعرفين الي بيني وبين ماما مريها بطريقكم
ام بتال : ولايهمتس يابنتي
الوجد ابتسمت : مشكوره ماتقصرين ياروحيي
ابتسمت ام بتال وقفلت الخط وتقدمت الوجد للبنات
مها وبحضنها سهم : ليش تأخرتي؟
الوجد : الله وكيلكم خاله فيصل ام حنان ناشبه بحلقيي الا تبيني اجيب بنتها معي
شيهانه وقفت : نعم نعم نعم؟؟ تجي وين ياروح امها غرفه برايفت لعمتنا نودي تجي بأي حقق!
جوري : اهخخ ليتها جت كان فقعت وجهها
شيهانه ؛ ماقصرت جويجه
العنود فتحت فمها بصدمه : وش مسويه؟؟
الوجد جلست ؛ ماسويت شي لها كنت بكفخها لولا الله ثم ام عبدالاله كان انا فارشتها
جوري : زين ماتسوين هوشي لها ياربها تهاب منتس
شيهانه : طقوع حنان
العنود : ماعلينا منها بنات
الوجد : بنوتات اسمعو انا قبل اجي تاكدت ان مافي رجال بالمزرعه كلها
دلال : هو؟ وين راحو؟
الوجد : ماعرف والله والمهم خططت على شيي خطيرر ويونس
شيهانه : معك معك
العنود : هيه اهجدي وشلون معك معك وانتي ماتعرفين وش مهببه الوجد !
شيهانه غمزت ؛ انا مع فيصل ودلوعته دايم ولو على خطا
مها ؛ بديت اخاف من الوجد
الوجد : لا والله شي عاديي المهم بنات شرايكم نروح الكوفي
ضحكت جوري : كوفي بالديره؟ ديوانيه شياب ترى
الوجد : لااا شفت كوفي بنات انا متاكده والله مشتهيه قهوه
دلال : فعلاً يوم اجي مع نواف شفت كوفي واضح جديد
العنود : كوفيات الديره ماثق فيها
شيهانه : بناتت عاد خربوها كلها كم يوم وتخلص الاجازه ونبدا الكورس الثاني ومها ودلال يروحون والوجد بعد سمعت فصيل بياخذها ويمشي
العنود وجوري التفتو للوجد بصدمه : ايش؟ بتتركيننا؟
الوجد شبكت يديها : مو اترككم لا مستحيلل قال لي فيصل هالفكره ورفضتها وفيصل ادري به مايسمع كلامي وبيمشي الي براسه وقلت خل اجرب شهر اجلس هنا عساه يرتاح
جوري : مستحيل اترككم رجلي على رجلكم ترى بطفولتنا مانعرفك كنتي بنت المدينه وجيتي هنا لما دخلتي الثانوي مايصير بعد تتركينا
العنود : والله مع ان ماودي تتركيننا بس انا اتفق مع فيصل لاتجلسين هنا الكل حالف على سعادتك والكل ملاحظ والله يسهل عليكم انا بتزوج ومها ودلال بيرجعون للرياض وجوري وشيهانه بعد ماهم بجالسين هنا طول عمرهم روحي انقذي عمرك
الوجد ميلت شفايفها بضيق والتزمت الصمت
نطقت دلال تلطف الجو : صيري جارتنا بالرياض
الوجد ضحكت بخفه ونطقت ؛ ليت يودينا الرياض بيطلع من السعوديه
مها ؛ لاوين رايحين نبيكم تعالو استقرو بالرياض او جده
شيهانه ؛ بشتاق لك ياجويجه
العنود : احس غيرت رايي يابنت لا مستحيل اصبر عنك برى البلاد
جوري متكيه : اهخ بس متى يجي رجلي ويطلعني من هالديره الدايخه
الوجد : بنات موضوعكم قابل للبكاء خلاص مابغى ابكي قطعت وعد قومو نتمشى وندج بشوارع الديره !
مها : انا عن نفسيي بجلس عند سهومي مقدر
دلال : برضو انا ماقدر عيالي بسم الله عليهم حركين بزياده
الوجد ؛ مو مشكله بنات بروح اجيب من البقاله مفرحات واجي ونفلها هنا كذا كويس؟
جوري : اي حلو ومناسب روحي مع شيهانه واشترو ولاتبطون
شيهانه : ازهلونييي
مها : شويهين ياويلك تجيبين مشروبات طاقه وغازيه
دلال : منجد بطني صار كله غازات اذا جلست عند شويهين
شيهانه : ياليل ياازمه الثلاثينيات
مها : لاخيررر توي ٢٨
الوجد بممازحه : سعيلهه
جوري : الله يجلعك دايم سعيده
ضحكو البنات وقامت شيهانه : بنات عشان اتجنب ملعنه الجدف الي بتعرض لها بعد مااشتري من البقاله اي شي تبونه ارسلوه للوجد
الوجد جتها ساله من مها محتواها "حليب سهومي "
الوجد ضحكت : مهاويي ماتفقنا كذاا حليب سهومي
دلال : جيبو لورعها حليب وانتم ساكتين
شيهانه التفتت للوجد ونطق : كانها تأمرنا؟
الوجد : حسيت لحظه اوريك فيهم يلا بنات ادفعو فلوس البقاله
العنود : جنيتي علينا يادليل كان ساكته ناكل مجاني
شيهانه : لاتلومون دليل هو انا والوجد مطفرين وصرفنا مكافأتنا كلها وفيصل راس المال مايرد علينا وفهد الحمار صارف كل فلوسه على كتب وانا والوجد ماكلين خرا
الوجد اتصلت على فيصل عشان تأكد للبنات انه مايرد : شوفو مايرد عليي
دلال : وه وه خلاص يابنات شوي وتبكون معليكم بحول لكم
الوجد قفلت الخط والتفتت لشيهانه وابتسم وشيهانه غمزت للوجد بأنتصار
طلعت الوجد وشيهانه من الغرفه وعليهم شرشف احمر
التفتو كل البنات على جوري الي منسدحه وماسكه بطنها وميته ضحك
مها: شفيك ؟ بنت !
جوري وهي تضحك : تكفوننن ساقوها عليكمم
دلال : تكلمي زين مافهمتت
العنود ؛ امس نازله المكافأه وهم قالو مطفرين وهم كذابات عندهم
مها : اجل اصبريي اتصلي عليهم خل يجيبون حليب سهم
جوري : سهم بيجيه مغص من الحليب الي تجيبه شيهانه والدلخه الي معها الوجد
دلال : وويليه مصروفيي راح
العنود : معليه معليه نواف مايقصر معك
مها ؛ الوجد ماشاء الله صايره تهبل وجهها فيه حياه !
جوري : فيصل حلو معها
العنود : منجد حلو معها وحنون ومايقسى عليها يعمري علهم كلهم
دلال : بصراحه بنات فيصل اعرفه من تزوجت نواف وانا اعرف فيصل دمه دايمم حارر ويوم اجبروه يتزوج الوجد توقعت انه يعامل الوجد بقسوه بس صدمني بتعامله الحنون معها
جوري : اي صدق صدمنا كلنا وشيهانه تكلمت معه وقالت اتركها ان كانك بتقسى عليها بس اصر ياخذها
العنود : مو متاكده لكن فيصل حب الوجد قبل يتزوجها بس يكابر
مها : احس الا يحبها من زمان ولاليش حلف ياخذها
دلال : صدق كل افعاله توضح حبه لها بس حنا وقتها مافهمنا على فيصل
،
شيهانه : ي صديق بالله جيب فشفاش وحمضيات
الوجد : لالا جيب بسكويت وشوكلت
شيهانه كشرت : اقول اصبحي بس وش هالطلبات الي ماتشبع
الوجد : يبنتي انتي وش تبغين بمشروبات الطاقه والغازيه دايت امشي على الدايتت
شيهانه : وش دايته الله يهديتس بس دايت وطالبه شقليطه؟
العامل ؛ وش تبون من الاخر؟
تهاوشت الوجد مع شيهانه والعامل يناظر فيهم ينتظرهم
الوجد التفتت للعامل ونطقت : يرضيك تمشي رايها عليي؟ تخيل انا طول عمري محد يقول لي لا تزعل والله تزعل
العامل : صح تزعل بس حاسبو
شيهانه التفتت للعامل : ي محمد يرضيك هذا الكلام ؟ شقليطه وبساكيت بسس؟!! مايشبع
العامل : صح اتفق طيب شرايكم تهدون
الوجد تخصرت : هديت
العامل : خذو الي كل الي تبونه بدون لاتخانقن !
شيهانه : الميزانيه لك عليها
الوجد : تعرف يعني مديونين
العامل مد الدفتر : خلاص ادفعو الي تقدرون عليه والباقي سجلوه بالدفتر
الوجد ناظرت لشيهانه وشيهانه ناظرت للوجد وضحكو بشر واخذو كل الي بخاطرهم
العامل يحاسب : ادفعو
الوجد؛ تعرف فيصل؟
العامل ؛ فيصل ولد محمد؟ ايه اعرفه
الوجد ؛ عليك نور بالله سجل عليه انا حرمته
العامل : لتاكيد بس ممكن تعطيني رقمه؟
الوجد طلعت جوالها : ايوه مو مشكله
اعطته الرقم وتقاسمو الاكياس وطلعو
الوجد : شيهانه اخوك خوفنيي
شيهانه تشرب مشروب الطاقه : ليش وش هو مسوي لتس؟
الوجد : مايرد على اتصالاتي!
شيهانه ضحكت : اول مره صح ؟
الوجد : ايوهه بالعاده يرد علطول
شيهانه : تعودي عليه ترى جواله مرمي دايم وشكلك ماجربتي يرد عليك ويتفل ويقفله
الوجد : فيصل طلع بجيبح مع اخته بسوي له اوت
شيهانه : لالا خليك معه تراك مهجدته هالفتره
الوجد : بنت شوفي
رفعت انظارها شيهانه وشافت "مشاري" واقف بأخر الشارع ويده عليها جبيره : علام يده مكسره؟
الوجد : الله يسلم يد فيصل سبب له تمزق بالاربطه
شيهانه : حي عينه هالفصليي المهم شلون نتجاوزه هذا؟
الوجد : على قوله اخوك الي يجي على دربي مارحمه وخليه يفكر بس يجي
مشاري شاف الوجد وتجنب طريقها وراح
شيهانه : واضح فيصل يطلع بأحلامه حتى
الوجد : ماتوقعت يمشي بهدوء شكله تاب
شيهانه : الله يثبته المهم وجيد خليك هنا والله خلص مشروبي بروح اجيب واحد خليك هنا
الوجد : اوك استناك لاتطولين
شيهانه : ثواني بس صد رد
راحت شيهانه وطلعت جوالها الوجد تتصل على فيصل لان مو من عادته مايرد عليها لكن مارد عليها اضطرت ترسل له خاص : فيصل وينك ؟
الرساله ماوصلته وهمست بـ : استودعتك الله
حست بأحد يراقبها ورفعت انظارها وكما توقعت مشاري
تنهدت بطفش
تقدم مشاري : وينه الحلو مختفي؟ فيصل ماعنده رجوله يخليك تفرفرين بالحواري لحالك! تدرين لو انك زوجتي كان ماطلعك من البيت من زود غيرتي
الوجد : الحمدلله ماني بزوجتك والله يعين زوجك وفيصل ارجل منك بمرات مايكلم بنات ويحب بنات مكتفي
مشاري : ايهه وين فيصلك عنك ؟
عقدت الوجد حواجبها : وش مسوي لفيصل !!
مشاري : انا اسالك وينه ؟
الوجد نزلت الاكياس بيدها ونطقت : ان لك يد بموضوع فيصل والله ماتركك حي
مشاري رفع حواجبه : اوهه كلام قوي من وين جايبه هالقوه ؟
الوجد ؛ فارقني لااغير ديكور وجهك !
مشاري قرب وجهه لوجهه الوجد ونطق : وش بتسوين ترى مردك بنت !
الوجد : البنت تسواك وتسوى عشره من امثالك
وجهه مشاري كان قريبب بشكل مقرف والوجد ماتحملت وصفقت راس مشاري براسها من تذكرت حركات فيصل
مشاري مسك خشمه وصرخ بالم ماتوقع ان الوجد صارت تدافع عن نفسها بهاذي القوه !
الوجد اخذت الاكياس ونطقت : متدربه على يد عميد لاتستغرب
شيهانه جت تركض ودفت مشاري : وجعع توجع هالفره شجابك عندها !
التفتت للوجد ونطقت : سوا لك شي؟
الوجد : اوبس مشاري لايكون تعورت؟ يحرامم الدلوعه مشاري تعورتت
مشاري ماسك خشمه ؛ الله ياخذك وياخذ الي معلمك هالحركات
الوجد : اقول هيه كلمه وحده قصيت لسانك لاتخليني اسدحك هنا
شيهانه بصدمه : اما ! انتي مكفخته ؟
الوجد : ماسويت حاجه له بس قلت انت مو رجال وبكاء الدلوعه
شيهانه : امشي امشي خليه
الوجد شالت الاكياس ونطقت : وجهك يقول تعالي كفخيني سبحان الله سيماهم في وجوههم
مشاري : مافيك ذره انوثه من تزوجتي هالعميد !
الوجد : خليت الانوثه لك ، باقي ماشفت شي من الانوثه تعرضني ثاني مره بوريك الانوثه على اصولها ، الخلا
شيهانه : فارق يلا ي فسوه جدي
راح مشاري وهي يخز الوجد والتفتت شيهانه : يمه ماني مصدقه انك كفختيه !
الوجد : بس دغدغته
شيهانه : والله كفوو وخليك دايم كذا تعجبينييي
الوجد بضحكه : ايي خلاص صرت قاتله لازم اعيش الدور
شيهانه : شنهوو؟ قاتله ويش؟
الوجد : انسان اجل قطو؟
شيهانه : ماصدق!
الوجد : صدقي بس فيصل يقول لاتقولين لـ احد بس ترى صدق مايمسى قتل يسمى الدفاع عن النفس
شيهانه تنهدت براحه : خوفتيني عبالي قاتله بلا حق
الوجد : لاوين ماسويها
شيهانه : ايه رد عليك المصيون فيصل؟
الوجد : لا مدري ايش فيه مايرد
شيهانه : غريبه عاد باقي ساعه على اذان العشاء ورا ماجاء!
الوجد : مدري وينه الله يستر
اتصلت العنود ودت الوجد : هلا نودي
العنود : لعنبو بليسك ساعتين وينكم
الوجد : تهاوشت انا وشيهانه بالبقاله وتونا نخلص
العنود : ايه بسرعه تعالو يلا لاتتأخرون الدنيا اظلمت
شيهانه : شدعوا ترانا العشاء عاديي
العنود : راح ليلنا وحنا ماستنانسنا تعالو
الوجد : اوك جايين
،
التوقيف .
فيصل ومازن ومهند كلهم بغرفه وحده وفيصل لازال متنرفز ووده يقوم بصفق مهند لكن مازن بينهم ماسكهم يدري بهم شوي ويتكافخون
مازن : خلاص عاد افلمتو ببعض عانو وجيهكم ماعاد فيها ملامح !
مهند : لانه يستحق
فيصل تقدم بعصبيه واستوقفه مازن نطق فيصل : امسك لسانك لاتخليني امسح وجهك بالارض هالحين !
مازن ماسك فيصل : اهجد اهجد ياولدد
دخل الظابط واتسعت عيونه بصدمه من شاف العميد فيصل بالتوقيف : فيصل؟ شجابك هنا رح لمكتبك
فيصل : انا الي اسال شجابني هنا وليش حاطيني مع هالدلخ
مهند : الدلخ انت
فيصل : فارقيني يالخيخه
مازن : اسمع يالضابط انا مالي دخل دخلت افارع بينهم بس مادري شجابتيي هنا
الظابط : الي موضح لي ان في ساحه تفحيط غير قانونيه وغير نظاميه وتضاربو شابين فيها الي هم
الظابط رفع الورقه يقرا اسماء المتضاربين وبلع ريقه بصدمه : مهند بن نادر وفيصل بن محمد
مازن بفرحه : انتصر الحق وزهق الباطن انا مالي دخللل
الضابط عقد حواجبه : فيصل هم غلطانين ولا ؟
فيصل يمسح على حواجبه : صادقين
الضابط خاف على سمعه فيصل بما انه عميد : طيب اسمعو شرايكم تتسامحون ولاتوصلونها للنيابه وتطول اموركم
مهند يأشر على وجهه : ياعسكري شف وجهي كيف منعدم
فيصل متكتف ويناظر منهد : محد قال لك تغلط
مازن واقف بينهم ويشوف وجهه فيصل المجروح ومهند المنعدمه ملامحه
الضابط : يامهند ترى ان وصلت للنيابه بيشيب راسك وانت ماخلصت من القضايا
مازن : شف ياعسكري انا اشوف اننا نسامحهم ونعطيهم فرصه
الضابط التفت لمارن ونطق : انت وشدخلك ؟
مازن : يعني اطلع؟
الضابط : لا انت معزز للتفحيط اذا ماتنازلو عن بعض بتروح معهم
مازن : ياليل الزقاقه تنازلو خلاص
فيصل راسه مصدع واعصابه تالفه ويادوبك يمسك نفسه : مع انه مايستاهل التنازل بس بتنازل
الضابط : وانت ي مهند؟
مهند زفر ؛ تنازل
الظابط : طيب دورو احد يكفلكم ويطلعكم
طلع الضابط تاركهم
فيصل يناظر منهد من فوق لتحت : وش ذا اللبس
مازن جالس ويناظرهم نطق بهمس : القبله وراك يابو محمد تراك نفس لبسه
مهند : وخر بس بروح اتصل على احد يطلعني
راح مهند والتفت فيصل : من نتصل عليه ؟
مازن : على قولتك ندق على البابا حقك
فيصل كشر : ياليل الليل ياولد اعتقني خلاص قلتها بالغلط
مازن : قلها ثاني مره بالله حسيتك ولد نعمه يوم قلتها
فيصل : اعقبب ماقولها ثاني مره !
مازن بمحارش : بابا
فيصل : ترى افرك وجهك هالحين البخ
مازن: زين زين يالنفسيه
فيصل : عان لو اتصلنا على ابوي بيمسح وجهي بالبلاط واذا جدي لالا مستحيل وفهد دلخ ماقدر
مازن : مالنا الا اخوي تركي
فيصل : مستحيل بيذلني ذل عشان بنته ويمكن يحصل الفرصه بشرط شرط اطلق الوجد ويطلعني وقتها
مازن : اجل اخوي جابر
فيصل : فكنا منه هذا مااردى من عصبيه ابوي الا عمي جابر لالا عصبي هذا
مازن : نواف او بتال
فيصل : هذولا اعرفهم بيعلمون العايله كلها
مازن : بس بس لقيتها
فيصل : من ؟
مازن ؛ الوجد
فيصل : ورعه ذي صغيره وش تكفل
مازن : ياليللل وش نسوي ؟
فيصل : بنتتظر لـ اخر اليل اذا ماهذا عاد ندبرها
مازن : بجلس هنا لاخر اليل؟؟
فيصل : هالله هالله
مازن زفر: لاحول ولاقوه الا بالله
،
مدخل المزرعه ..اذان العشاء
دخلت الوجد وشيهانه ومشو بأتجاه بيت الجد تحديداً غرفه العنود ومهدود حيل شيهانه والوجد لان المسافه طويله
الوجد طاحت عيونها على سياره سواق خالات فيصل ونطق : للحين ماراحو؟
شيهانه : يجلسن لبكرا
الوجد : الله يعين
دخلت شيهانه ومعها الوجد بيت الجد وقابلهم الجد : ماشاء الله منين جايات ؟
الوجد ماقدرت تبقى واقفه قباله وراحت متجاهله نداء الجد لها
الجد: الوجد !
مادرت الوجد واختفت عن انظارهم رايحه لغرفه العنود
التفت الجد لشيهانه : منين جايات؟
شيهانه بكذب : من بيتنا
الجد : وهالباغات ذي وشنهي؟ "باغات=اكياس"
شيهانه : من البيت
الجد : ايه زين صلن العشاء
شيهانه : سم ياجد
راح الجد للمسجد وشيهانه اتجهت لغرفه العنود ونطقت : وجيد ياحماره ليش تسحبين على جدي كسر خاطري !
الوجد نزلت اكمام البلوفر : ماقدرت اواجهه كسر فيني شي قوي
جوري زمت شفايفها بضيق ونطقت تلطف الجو : تعالو نصلي عقبها نلعب
قامو البنات يصلون وخلصو وبدت السهره والضحك واللعب والسوالف ولابد من القليل من الحش "لاتحشون حرام"
،
منصف الليل 12:52 -بيت العم محمد
الوجد جالسه جنب شيهانه وحنان وابو نواف واقف وام نواف واقفه مع ابو نواف وخالات فيصل جالسات
ابو نواف بعصبيه : وينه هالولد لااتصال لاشي؟
ام نواف : يمكن طالع مع اخوياه !
ابو نواف : لو طالع يقول لحرمته
التفتت ام عبدالاله للوجد ونطقت : هو قالت لتس شي قبل يطلع؟
الوجز هزت راسها : لا ماقال غير ان عنده شغل
طق الباب ونطق ابو نواف ؛ حديكن تفتح الباب
قامت الوجد واتجهت تفتح الباب وشافت العم جابر وابوها
ابو بتال : وجد وين عمتس محمد؟
الوجد : بناديه
راحت الوجد تنادي ابو نواف وفعلا جاء : بشروني وينه ؟
ابو الوجد : مازن بعد مختفي ومايرد
ابو بتال : سرايبت مجمع هم ماختفو ثنينتهم الا ووراهم بلا
ابو نواف : انا ارسلت العيال نواف وبتال وفهد يدورونهم
ابو الوجد : اتصل عليهم
ابو نواف اتصل على فهد : فهيدان لقيته ؟
فهد:بحثت عنه في كل بقعه لكن لم أجد أخي
ابو نواف : لاحول ولاقوه الا بالله وين دوا هالولد خلاص تعال للبيت انت وعيال عمك
فهد : حسناً
قفل ابو نواف الخط وجلس مع اخوانه وين ممكن فيصل ومازن يروحون له مو طبيعي اختفائهم المفاجئ
الوجد زفرت بضيق : يالله
حنان: ترى كلنا ندري ان فيصل يتهرب من مقابلك
الوجد : تكفين اسكتي لااعطيك كوع على عينك
ام نواف : خلاص ياحنان حنا وين وانتي وين !
انتظرو بضع دقائق وساعات ولكن لازالو ماحصلو اي اشاره من فيصل او من مازن !
الساعه 2:17 صـ رن جوال ابو نواف ورد بـ : الو؟
: ولدك فيصل بالتوقيف وهو رافض يتصل عليك بس انا ماودي فيصل يصير بالتوقيف اذا تقدر تتفضل تاخذ ولدك
ابو نواف شهق بصدمه : تقولها صادق؟ فيصل بن محمد؟
الضابط : العميد فيصل بن محمد ال سلطان ولاغلطان؟
ابو نواف : لالا منت بغلطان شويات وجايك
قفل الخط ابو نواف ورجوله مو قادره تشيله من هول الصدمه عميد وبالتوقيف ، جلس بالكنب ومسك راسه
ابو بتال : وش صاير يابو نواف
ابو نواف قام ورغم ان السكر والضغط ارتفعت الا انه قام على رجلينه : الولد بالتوقيف
ابو الوجد : لااله الا الله وش هو مسويي ؟
ابو نواف :مادري مادري بروح اجيبه وواحد منكم يجلس هنا عشان الحريم لاحتاجن شي يجن
ابو بتال : اجلس يابو الوجد وانا بروح مع محمد
راح ابو نواف مع ابو بتال وجلس ابو الوجد بمجلس الرجال ببيت ابو نواف مع فهد ونواف وبتال الي توهم يجون
،
المركز
ابو نواف الي ماسك اذن فيصل ومطلعه من المركز وابو بتال الي ماسك رقبه مازن من ورا ومطله من المركز
ابو نواف بعلو صوته : وغدان باخر زمن تجرجر ابوك تالي هاليول يطلعك من التوقيف يملا الي ماني بقايل ابوك انا ابوك يومنك تسوي بي تسذا ليش وش انا مسوي لك !
ابو بتال بعصبيه : هذا وانا اقول العم العاقل الي بيهجد عيال اخوانه طلعت افسق منهمم !
فيصل : لحظه يبه اصبر
ابو نواف ضرب راس فيصل : مافيه صبر امش قدامي لااتوطاك
مازن : ياخوي والله مالي دخل كنت افارع بينهم
بطبيعه ابو نواف وابو بتال الي يحلف يعني صادق ف تركو مازن واستفردو باخونا المسكين فيصل
كف جاي وسب رايح
ركبو السياره وطول الطريق وهم يهاوشون فيصل وكل مايبي فيصل يتكلم يسكتونه ويقولون له عاق
ابو نواف بصراخ : اذا تكلمت تسكت يالي ماتستحي
سكت فيصل يلبي طلب ابوه نطق ابو نواف : تكلمم معي فاهم ولا مانت بفاهمم الكلام؟؟
فيصل : فاهم بـ..
قاطعه ابو نواف بصراخ : وترادد ابوك بعد؟ شين وقوي عين
وصلو اخيراً البيت بعد مالقم تهزيئ وكرهه التفحيط وكره مهند وحتى مازن من كثر ماهزئوه
نزل فيصل يمشي في امان الله بيدخل البيت وهو يحس بيد ابوه على رقبته من ورا
ابو نواف ؛ وش انت مسوي؟
فيصل : تفحيط ومضاربه بس
ابو نواف تلفت اعصابه فوق السكر والضغط الي لعبو فيه : بسس؟ وببرود الارض تقول بس
فتح ابو نواف الباب ودخل هو وفيصل ودف فيصل من زود عصبيته : فارقني
فيصل كان عند الباب ومن دفه ابوه صار جنب الوجد ونطق : مرحبا وجدي
الوجد شافت وجهه فيصل المليان جروح وشهقت بخوف : فيصلل وش هذا الي بوجهكك !
ام نواف ضربت فيصل : وش انت مسوي بعمرك
فيصل يحك الضربه ويضحك : مافي شي لاتخافون
ابو نواف جلس على الكنب وفك ياقته : ويضحك بعد، شيهانه روحي جيبي لي ماء
شيهانه راحت تجيب له ماء نطقت ام عبدالاله : اجلس يفصيل واضح مهدود حيلك
جلس فيصل وجنبه الوجد الي ماسكه يده وتشوف اثار البوكس على يده وواضح ضارب احد
جت شيهانه بكوب المويه : سم يبه
ابو نواف اخذ الكوب وطلع من البيت متوجهه لاخوانه
حنان : شفيك فيصل وش صاير عليك ؟
تجاهلها فيصل والتفتت للوجد الساكته وتلعب بأصابعه وهمس : علامك هاجده ؟
الوجد التفتت لفيصل : ليش تتضارب معهم وليش مافكرت فيني وبـ امك وابوك لما تضاربت
فيصل : افكر فيكم ماتغيبون عن بالي بس لعل اعصابي تلفت
ام نواف جلست ونطقت : طيب قل السالفه نسحب منك تسحيب تهرج زي الاوادم
فيصل حط يده على كتف الوجد وضمها له وارخى ظهره على الكنب ونطق : سالفه تفحيط
شيهانه : يالبيه جوي ليش ماخذيتنيي
ام حنان: وويليي
ام عبدالاله مسكت راسها : حمار انت؟ عندك حرمه وام واب واخوان واخت وفي كل الي يعزونك تروح للتهلكه ليه
فيصل : ياخالتي مو بيدي هذي هوايه
الوجد : مو هوايه هذي تهلكه !
فيصل ابتسم للوجد لانها معصبه منه : صح اتفق
حنان : طيب ليش وجهك ويدينك جروح ودم
فيصل ببرود : وش دخلك ؟
شيهانه اتجهت لحنان وهمست ؛ احشمي نفسك طول اليوم وانتي تحاولين تسولفين معه وهو يتجاهلك احشمي نفسك !
سكتت حنان
وقف فيصل ومسك يد الوجد معه : والله اعذروني اني خوفتكم لكن المره الثانيه لاتخافون تصبحون على خير
تقدم فيصل وقبل راس امه : اعذريني
ام نواف : معذور ياوليدي مير انك اعتذر من الوجد هي الي خافت عليك
فيصل ابتسم واخذ الوجد وراح
تنهدت ام نواف براحهه : الحمدلله
ام عبدالاله : والله اني ارتعت خفت عليه
شيهانه : والله انكم مكبرين الموضوع فيصل من قبل لايتزوج وهو يرجع اخر اليل وانا الي افتح له الباب
ام نواف : قلتيها قبل يتزوج لكن الحين الموضوع يختلف
شيهانه : الي ودك يايمه المهم تصبحون على خير بنام
الكل : وانتي من اهله
راحت شيهانه وبضع دقايق وراحت ام عبدالاله وام حنان لغرفتهم ينامون
تنهدت ام نواف وقامت راحت تنام
،
دخلت الوجد الغرفه قبل فيصل ومعصبه منه وفيصل وراها ومبتسم مستلطف عصبيتها يبيها تهاوشه هو كذا مشتهي تهاوشه ويتأمل عصبيتها
سكر الباب وراه ونزل المفاتيح الي بجيبه على الطاوله ورفع انظاره شاف الوجد واقفه قدامه ومتخصره وحواجبها معقده همس بـ : يالبيه
الوجد اشرت على السرير : اجلس هنا بسرعه
فيصل رفع حواجبه بتعجب : اوهه يالشخصيه
الوجد بعصبيه : لاتكلمني اجلس وانت ساكت
فيصل ابتسم وحط اصبعه على خشمه : على خشمي
تقدم وجلس على حسب طلبها وهي اتجهت للدولاب وطلعت اسعافات اوليه ونطقت بزعل : المفروض ماعالج جروحك اخليك بألمك بس وش اسوي قلبي طيب
فيصل بأبتسامه : اهخ ياهالقلب الرهيف الي معذبني
الوجد تخفي ابتساماتها لان فيصل مو مخليها تعصب على راحتها تقدمت وحطت الاسعافات جنب فيصل واخذت القطن والمعقم ووقفت قبال فيصل ونطقت : اذا عورك قول لي
فيصل حاوط خصرها وهي واقفه قدامه : رجلك قوي مايوجعه شي
الوجد : حلو
مسكت فك فيصل ورفعت وجهه لها وحطت القطن على خد فيصل المجروح وتطبب كشرت بألم بداله : تشوف تعورت كلها من تهورك
فيصل ضحك : وش قومك تألمتي بدالي؟
الوجد : منظره يعور هذا الجرح قوي اكيد مو يد انا متأكده
فيصل : لابيد
الوجد : اجل كيف وجهه الثاني اكيد معدم وجهه!
فيصل طلع جواله من جيبه : والله عمك مازن مصور حتى نيه الرجال
وراها صوره مهند وشافت وجهه المعدوم وارتجفت من المنظر : يعمري وجهه راح! فيصل ياقاسيي
فيصل شد على خصرها بغيره وقربها منه : مين ياعمري؟
الوجد : يوه فيصل مين عمري غيرك؟ ترى محد غيرك سكن هالقلب صحيح اني زعلانه هالحين بس لاتغار
فيصل ارتخت ملامحه : لاخلا ولاعدم
الوجد ابتعدت عنه ونطقت : خلصت يلا نام عشان بتقوم بدري وبتحب على راس عمي محمد وتعتذر منه
فيصل ؛ ابشري
اخذت الوجد الاسعافات الاوليه وراحت متوجهه لدرج تحطهم فيه وفيصل قده منسدح بينام
الوجد ناويه تحش معه تقدمت وجلست على السرير وفيصل منسدح
فيصل ابتسم: وش ناويه عليه بعد ؟
الوجد : في سوالف بسولف فيها احس مقدر لازم اسولف
فيصل يحب سوالف الوجد فـ تكى ونطق : اسلمي
الوجد : ايوهه صح زي ماوعدتك ماتزل دموعي بغيابك ونفذت وعديي
فيصل : عشتي
الوجد رفعت حواجبها : بس عشتي؟ مافي هديه ؟
فيصل جلس ونطق : الا فيه اقربي
فيصل ناظر عيونها : تدرين اني اشتقت لك
الوجد ضيقت عيونها بممازحه : كذاب ماوحشتك
فيصل ميل شفايفه لتحت ؛ افا اثبت لك
الوجد فهمت وش يقصد ونطقت : لالا خلاص صدقتـ..
قاطعها بقبله حب من ثغرها
استحت الوجد والكاتبه زامت كبدها من هالرومنسيه المجبوره تكتبها المهم استحت الوجد وابتعدت عن فيصل ونطقت : فاصولياء واضح مانمت نام نام
فيصل كشر بممازحه : هذي جزاتي اعطيتس اجواء وتسذا
الوجد : نام نام فيصل
فيصل انسدح : بنام وياويلتس تقعديني تبربرين على راسي
الوجد رفعت حواجبها بصدمه ورفعت يدها تعدد لفيصل : اول شي نبرتك قاسيه ثاني شي اللهجه تغيرت ثالث شي بسوي لك ميكب رابع شي ابغاك تطقم معي هيلوكيتي
فيصل : ويش ويش؟ شايفه شنبي الي طولك
الوجد تكتفت : مالي دخل بالشنب بسوي لك ميكب ولابزعل
فيصل يحارشها : ازعلي
اعطاها ظهره ونام ! تكتفت الوجد ونطقت : اوت
رفع حواجبه فيصل وهو معطيها ظهره وابتسم يدري انها زعلت
الوجد وقفت : البس بجامتي وانزل للبنات وانت خلك نايم هنا
مارد فيصل عليها والوجد اخذت بجامتها الحرير ولبستها ولفت شعرها : مالي الا البنات اسولف وانت مطنش بروح اشكي للبنات
فيصل وهو مغمض عيونه : ياويلك تطلعين من باب الغرفه
الوجد فتحت فمها بصدمه ولاول مره يمنعها : نعم نعم ؟
فيصل تلحف : نامي ولاتطلعين تالي هاليول
الوجد : فوق مانك مطنشني تمنعني؟
فيصل : ترى ان قمت ياويلك
الوجد تخصرت : قم ورني عرض اكتافك
فيصل قام واتجهه لها ووقف قبالها قريب منها
بلعت ريقها الوجد ورفعت راسها تناظر وجهه فيصل :هاي فصولي
فيصل مسك عضدها بخفه ويمشي بأتجاه السرير : لاهاي ولا فاي انتي مثل الورعان كود نقفل البيبان امشي قدامي ارقدي مع المسلمين
الوجد تحاول تفك يدها : فيصل اصبر في سالفه ماقلتها لنودي
فيصل رفع البطانيه : نودي ماهي بطايره بكرا تقولين لها
الوجد : بس سالفه وحده
فيصل مسح على وجهه : لاحول ولاقوه الا بالله ابك انتي ماودك ترقدين مع هالمسلمين ؟
الوجد : قررت اسهر اليوم طيب !
فيصل تكتف وبقى يناظرها
تعدته الوجد : السكوت علامه الرضى
مسكها فيصل : لاماهو برضى نامي
الوجد تنهدت : شايب مستقعد
فيصل انسدح ونطق : نامي
الوجد جلست بالسرير وتكتفت وتناظر اظافرها رفعت انظارها تناظر فيصل تشوف اذا هو نايم ولا لا حصلته نايم وهذا الشي مايرضي الوجد ولايرضيكم !
تنحنحت الوجد : فيصل
فيصل بصوت كله نوم : هاه
الوجد : في سالفه ماقلتها لك
فيصل بنوم : قولي
الوجد تعدلت : تخيللل اليوم وش صار!! بعد ماطلعت انت قابلت حنان والصراحه كنت بفقع وجهها وجهه البطه المهم وتجاهلتها ورحت للبنات وقالو جيبو اكل من البقاله شوكلت وكذا ورحت انا وشيهانتي للبقاله وتهاوشنا انا وياها على المقاضي لان الميزانيه الي معنا قليله وانت ماترد علينا وسجلناها بالدفتر عليك وطلعنا وشفت مشاري تخيللل !
الوجد توقعت ان فيصل بيتفاعل معها بس فيصل نايم بوسط سالفتها !
بالحقيقه فيصل صاحي بس مغمض عيونه ودايخ من كثر سوالفها وهو يدري انها تسولف بس من زود تعبه مو مركز معها
الوجد تأفأفت : افف حتى انت متغير علي
ركز فيصل بالكلمه وسحبها لحضنه وصار ظهر الوجد على صدر فيصل
ضمها فيصل ودفن وجهه بشعرها وهمس بـ: انا اسف ماني متغير لكن مهدود حيلي
ابتسمت الوجد والتزمت الصمت لان هي بالمواقف الرومنسيه تبلع لسانها
نام فيصل وبضع دقايق ولحقته الوجد وغاصو بالاحلام ..

_______________________
انتهى البارت ♡
رضيت بالله ربًا وبالإسلام دينًا وبمحمد ﷺ رسولًا ونبيًا)، ♡
حسابي تيك توك :Ot348285
حسابي انستا انزل فيه الروايه : Ot34828
*اعتذر عن الاخطاء الاملائيه*

يمه بطني ينبض انا اكتب رومنسي؟ الظاهر اختفاء الغامضه اثر عليها