لاتقارنين حبي لك بأي مخلوق انا حتى بغيابك احبك

Part 37

سبحان الله وبحمده سبحان الله العظيم ♡

الساعه ١٠:٣٤ الضحى
بعز القايله الوجد صاحيه وجالسه بالكنب وعاضه اصبعها وتهز رجلها ومحتاره تروح لفيصل تاخذ جوالها منه او تخليه هو والجوال
قالت بينها وبين نفسها : ضروري تاخذين الجوال عشان المندوب تبع الفستان!
اخذت نفس بحيره ورفعت انظارها تشوف العنود النايمه ميلت شفايفها بقله حيله مابيدها شي غير انها تروح تاخذ جوالها !
اخذت نفس ووقفت واخذت شرشف وطلعت من غرفه العنود بهدوء
،
بيده الزيقاره ولابس بدله دوامه ومتجهه لسيارته وعلى امل ان الوجد تجي تاخذ جوالها ومنها يتكلم معها
فتح باب السياره الثاني يبغى جاكيت دوامه وطاحت عينه على شنطه الميكب الي على المرتبه
اخذ الفرشه ويقلب فيها وابتسم بوسع ثغره من تذكرها وهي تحط ميكب وتوزع الميكب بالفرشه
اختفت ابتسامته من ادرك انه مجرد ماضي نزل الفرشه واخذ جاكيت دوامه وسكر الباب وركب من جهه السايق وشغل السياره شغل المكيف لانه مات حرر ومضطر يجلس بالحر ينتظر الوجد هي تجي ولا ماتجي!
عدل تيشيرته الاسود وارخى ظهره على المرتبه ويدخن ويحاول يسوي اي شي يضيع وقته لبس النظاره الشمسيه وناظر شكله بالمرايه وعدل شعره والي ينتظرها مابعد جت
تنهد بأمل : تعالي تكفينن
فقد الامل وتنهد ومد يده بيسكر الباب خلاص بيمشي لكن جمد مكانه بحب من شافها من بعيد مقبله عليه ابتسم ابتسامه جانبيه وهمس : اني داري ماتقدرين تصبرين عن الجوال
تقدمت الوجد ووقفت عند باب السياره او بالاحرى عنده ونطقت بكل رسميه : جوالي؟
فيصل نفث الدخان بوجهه الوجد بممازحه : بعت الجوال بالحراج يابلاش
الوجد كشرت من ضايقها الدخان ومدت يدها : عطني جوالي وبلا حركات اطفال !
فيصل رمى الزقاره : وش ناويه عليه انتي؟ ناويه تذبحين قلبي؟
الوجد : موضوع مافيه نقاش هات جوالي وانتهينا !
فيصل : وان قلت لك ماني بمعطيك جوالك؟
الوجد ناظرت فيه بدون اهتمام : عطني بسرعه
فيصل عقد حواجبه : بيوك وليه تغيرتي ماكانت نظرتك لي كذا! بنظراتك كميه برود ماكأننا امس حبايب
الوجد ناظرت عيون فيصل : ياحبيب الامس وياجريح اليوم عطني جوالي
فيصل فتح الدرج وطلع جوالها ومده لها وهو بخاطره يناقشها ويحلها معها بس ماعطته فرصه !
الوجد اخذت جوالها وماتحركت من مكانها دخلت على الواتس تشوف رساله المندوب يبغى اللوكيشن وارسلته له بس المندوب مايفتح رسالتها
جاهله تماماً نظرات محبوبها
الوجد حطت الجوال على اذنها : الوو صديق
المندوب : ايش في؟
الوجد : ارسل لك اللوكيشن وماترد علي
المندوب : انا في حي تاني مافي جيب طلبيه انتا مافي يفتح رساله
الوجد : صديقق تكفى ضروري ابغى الطلبيه
المندوب : مافيه انتظر يوم يومين
ناظرها فيصل وهو يراقب تغير نبرتها وشوي وتبكي عند المندوب عشان فستان!
سحب الجوال منها وحطه على اذنه : الوو صديق
الوجد بصدمه تقدمت لفيصل بتاخذ الجوال: عطني الجوالل انا اتفاهم معه
المندوب : اش في انت نفر ثاني
فيصل ماسك يدين الوجد يمنعها تاخد الجوال : صديق بعد شوي يجي هنا ويجيب طلبيه
المندوب : مايصير انا في شغل واجد !
فيصل : صديق انا انتظار ساعه مافي يجي طلبيه انا يدق على موقعكم
المندوب تنهد بقله حيله : خلاص يجي العصر
فيصل : حلو انتظرك
قفل الخط ومد الجوال : العصر يجي
الوجد اخذت الجوال بقوه : مابغى الفستان ولاابغى فزعتك
فيصل : احسن بعطيه شيهانه
الوجد ابتعدت عن فيصل : انقلع
فيصل : بنقلع معليك
خزته الوجد وراحت وهي تمشي مقهوره منه
ناظرها وابتسم وهو يشوف زعلها واضح على مشيتها
هز راسه بيأس وسكر الباب ومشى
،
شيهانه جالسه بمجلس الجده ومعصبه وقافله معها الوسيعه لانهم مصحينها غصباً عنها
تنهدت بطفش لان الوجد وبنات خالاتها راحو لبيوتهم ومابقى الا هي وحنان وامها وميلا
ام نواف صبت القهوه السعوديه : يام حنان وشدعوا عاد تدخلين مواضيع البنات بنا حنا خوات
ام حنان : الصدق زعلت امس تبدين الوجد على بنتي
ام نواف : مافضلت احد على احد بس اني احب الوجد من حب فيصل لها
ام حنان : حصل خير وانا مسامحتس يختي
شيهانه قلبت عيونها وقالت بينها وبين نفسها : الله اكبر عاد الي يشوفك يقول رضاك يدخلني الجنه !
جت ميلا تبكي : عمه شيهانهه
شيهانه تنهدت : كملت يميلا وشفيك؟
ميلا : ابغى الوجد
شيهانه : حتى انا ابيها بس وش نسوي الظروف حدتنا نجلس هنا انثبري شوي ونمشي ان شاء الله بقول لفهيدان ندزها للوجد
ميلا جلست جنب شيهانه : طيب وين عمو فيصل ؟
شيهانه : صدقيني لو اعرف وينه كان تعلقت برقبته بمشي معه مابجلس هنا
ميلا ناظرتها ومافهمت عليها
شيهانه : شكلي قلبتها فضفضه روحي العبي
قامت ميلا وراحت وتنهدت شيهانه وتكتفت بطفش
حنان نازله من الدرج : خالتي ام فيصل
شيهانه رفعت حاجبها : ام نواف ياستيمه
حنان : مايهم المهم خالتو
ام نواف اخذت نفس والتفتت : هلا
حنان : جدتي ماحصلتها
ام نواف : هو ؟ وين دوت
ام حنان : راحت لجيراننا شرايتس يالنايفه نروح معها ؟
ام نواف حطت الشرشف الاحمر على شعرها : مشينا وش يقعدنا هنا يلا مشينا
قامت ام حنان وام نواف وطلعو من البيت
حنان زفرت وجلست بالكنبه المقابله لشيهانه
شيهانه مسحت على شعرها البوي ونطقت بطفش : لسلامتك اسكتي ولاتنطقين بحرف ترى الاخلاق سالب مليون
حنان : ماتشرف اتكلم مـ...
قاطعتها شيهانه وهي تلبس سماعه الراس : اي خلاص كليزق
تنرفزت حنان من حركة شيهانه وكشرت وقامت وهي تهابد برجولها ! وع مستفزه
شيهانه سحبت السماعه حطتها على كتوفها من تأكدت ان حنان راحت تنهدت براحه : فكه الحمدلله !
اتصل جوالها وعقدت حواجبها وردت : يالمغبررر لعنبو ابليسك توي ادري ان عندك رقم
مازن : ذبه مستهلكه جيبي غيرها
شيهانه : يحيوان صادق فيصل يوم يقول انك نفسيه
مازن : اقول نفسيتكم جاكم؟
شيهانه : فيصل؟ ماجاء اليوم ليش شصاير؟
مازن : مادري شفته طلع وبالعاده يقولي وين بيروح لكن راح ولادري وينه
شيهانه ؛ تلقاه عند دلوعته طايح عندها
مازن : بحسب خبرتي المحنكه لا لانهم متهاوشين
شيهانه اتسعت عيونها بصدمه : ويشش! من متى ووش السبب
مازن : اذا جيتي تنتاقش على هالموضوع يلا سلم على الاهل
قفل الخط بوجهه شيهانه مما ادى الى انفعال شيهانه لانها تكرهه هالحركه تذكرها بفيصل وحركاته
زفرت بقهر : حيوانن مستفززز
قامت واتجهت للغرفه امها الي تنام فيها ببيت الجده لكن سمعت صوت بكاء حنان ووقفت بكل حذر وحرص
حنان بدموع : تخيليي رحاب خربت بين فيصل والوجد بس للحينهم متمسكين ببعض متخيله ان فيصل يراضيها بنفس الساعه الي تزعل فيها ويمسح دموعها قبل توصل لخدها تكفين قلبيي يوم اشوف فيصل معها ومعاملها معامله اميره اكثر من انها زوجه يحترق قلبيي!
اتسعت عيون شيهانه بصدمه وتذكرت اتصال مازن المفاجئ ويسال عن فيصل وجمعت وربطت الاحداث بمخيلتها وفهمت كل شي
طاح جوالها بالارض من صدمتها وقهرها والتفتت حنان وشافت شيهانه واقفه وتناظر فيها
حنان قفلت الخط ونطقت بتوتر : شيهانه حبي بغيتي شي؟
شيهانه تقدمت ومسكت تيشيرت حنان وصرخت بوجهها : الان معك دقيقيتين ماقلتي لي من طق طق ل السلام عليكم ماكون شيهانه ان ماذبحتك على يدي يابنت الكلب
حنان : يمريضه بعدي عني!
شيهانه بعصبيه : ديني ودين الي يخرب بين شخصين بالحلال فاهمه ؟ تهرجي
حنان : بأي حق تتجسسين علي !
شيهانه شدت شعر حنان بغضب : الله اكبر يامحور الكون اقول بتتكلمين ولا الموضوع بالغصب؟
حنان : طيب فكيني بتكلم !
ابتعدت شيهانه عن حنان وتخصرت بمعنى "تكلمي" !
قالت لها حنان السالفه بس ضافت بهارات وطلعت نفسها بريئه واتهمت فيصل !
حنان : كنت ماشيه بالمزرعه حالي حال نفسي وفجأه جاني فيصل وقالي لي كلام مو زين ماقدر اقوله وجت الوجد بوقتها وتهاوشو
شيهانه رفعت حواجبها : واو واو واو حبيت السينارو بأي قناه بتعرضينه؟
حنان تعدل تيشيرتها : ليش مو مصدقه؟
شيهانه : وتسأل بعد؟ اعلمك كيف
حنان رجعت خطوات : شيهانه انا بنت خالتك لاتمدين يدك خلاص قلت لك الحقيقه !
شيهانه صفقت حنان كف ونطقت بعصبيه : يامتخلفه تخربين بين زوجين ليه وش غايتك يامريضه ابعدي عنهم ولا والله لوريك نجوم القايله !
حنان حطت يدها على خدها : لاتخليني احطك براسي
شيهانه ضحكت بسخريه : اعلى مابخيلك اركبيه حطيني براسك وريني وش بتسوين اطقع ماشوفك
حنان : مريضه سايكو !
شيهانه : شف من يتكلم الـ...
ميلا دخلت : عمه شيهانه ابغى الوجد
شيهانه ناظرت حنان من فوق لتحت وخزتها : بوريك ان مافضحت فيك بقروب خالاتي ماكون شيهانه
مسكت يد ميلا وطلعت وهي معصبه واخذت جوالها وبلحظه غضب دخلت القروب وقالت كل شي لخالاتها !
اما عند حنان الي جلست تبكي بحرقه
اتصلت رحاب : بنت
حنان بدموع : هلا خيرر
رحاب بصراخ : يامريضه ليش تقولين لشيهانه عني فضحت فينا بالقروب !
حنان : وش اسوي ياختي
رحاب : بجيحه ماتصونين العشره الي بيننا كيف بعتيني باول مشكله انقلعي لاشوفك تتصلين علي وحساباتي احذفيها ماتشرف فيه !
قفلت الخط ونطقت حنان وهي تبكي : لالالا
،
دخلت الوجد معصبه غرفه العنود وتقلد صوت فيصل: بنقلع معليك ! ويقولها بكل برود حيوان قهرنييي
ضحكت العنود بخفه وهي تشيل السجاده : شفيك من صباح ربي طايره بالعجه
الوجد جلست على الكنب ونطقت : قهرنيي ولد اخوك
العنود جلست جنب الوجد : وش هو مسوي ولد اخوي
الوجد : ماراضاني رغم انه شافني ولااعتذر ! ماقال اسفف
العنود : اعرفه فيصل بيعتذر بس يبي يجمع نفسه ويجيك
الوجد تكتفت : مابغاه
العنود ضحكت : شلون ماتبينه وانتي تبينه يراضيك
الوجد : مادري مابغاه بس ابغاه يعتذر مالي دخل يتصرف
العنود : طيب لو راضاك بترضين؟
الوجد : لا اذا رضيت بسرعه مايهتم لزعلي مره ثانيه بيقول معليه ترضى بسرعه
العنود : اقنعتيني الصراحه بطبقها على فارس
الوجد تنهدت : فارس اعرفه ماهو بعصبي لاتشيلين هم
العنود : بخاطري اعطيك كف الصراحه فيصل يهيل منا حلوهه ولاهو يعصب عليك ويراضيك خلي عنك الثقل بس !
الوجد : نودي ياروحيي مافهمتي الي بيننا كيف يعرف اصغر تفاصيلي ويوم تهاوشنا قال لي كلمه هو يدري اني اكرهها شي يقهر ويبني ارضى بنفس اليوم؟!
العنود : والله مادري وش اقول غير الله يجمع شملكم انا حاسه انها عين ماصلت على النبي مو طبيعي بساعه تبعثرت علاقتكم
الوجد رفعت كتوفها : مادري والله
العنود : فيصل ماشاء الله يعاملك بلطف وحنان حتى قدام خالاته وعماته لاتستبعدين ان محد يحسدكم على علاقتكم !
الوجد : ينودي مدري ايش اقول احس اني مشتته
العنود وقفت ونطقت : بتركك هنا فكري بمصيرك ولاتظلمين الولد معك حرام عليك تراه يحبك وميت عليك لاتحرقين وتقطعين قلبك وتندمينه عيشته عشان كلمه ان كانك تبين الطلاق ف استهدي بالله وماتوصل !
الوجد التزمت الصمت لانها محتاره
تتهدت العنود وطلعت من الغرفه انسدحت الوجد على الكنبه واخذها التفكير
:حاسه اني ظلمتك يافيصل بس ستل انت كمان غلطان
قطع حبل افكارها دخول جوري الي تصرخ بـ:يمه يمه
الوجد عدلت جلستها : شفيك يالمطيوشه
جوري تنفض يدينها بخوف : وجد جاني جاني
الوجد عقدت حواجبها : شفيك من جاك ؟مافهمتت تعالي اجلسي
جلست جوري وهي تنفض بخوف : جاني بالانستا ويقول فكيني شرتس ولاعاد تنقلين علومي لامي
الوجد اتسعت عيونها بصدمه : بجيحح ! هو طلال؟
جوري : اييي كيف عرفنييي يالله كيفف
الوجد : حسابك وش اسمه؟
جوري : ام جابر لجلب العلوم
الوجد ضحكت : حسبته جايك بحسابك الشخصي لسى باقي ماعرف مين انتيي
استوعب جوري ان طلال جاها من حساب ام جابر وتنهدت براحه : الحمدلله والله من الخوف عجزت اركز
الوجد : يروحيي انتيي
جوري بتحدي : بجيح يجيني يهدد اجل انا اوريه علومه كلها عند امه هين هين
الوجد : حيلك فيه بس لاتودينه ورا الشمس واضح انه يعاني منك
جوري وهي تقلب بالجوال ونطقت بمزح : بالله اسكتي لااحطتس بالقائمه السودا
الوجد ضحكت بخفه ونطقت : حطي فيصلوه ولاتحطيني
جوري : ولايهمتس فيصل بجيب يوم ولادته بعد
الوجد تنهدت : انولد يوم الخميس
جوري رفعت حاجبها وناظرت الوجد بطرف عين : قلنا انكم تحبون بعض بس ماتوصل ليوم مولده
الوجد : احب اعرف تفاصيله
جوري بشماته وممازحه : ياخي حقين الحب
الوجد : اذا جربيته اتصلي علي بتشمت عليك
جوري ضحكت : على اساس انتي وفيصل بتوصلون للنهايات؟
الوجد نزلت راسها ونطقت بضيق : الظاهر وصلنا
فزت جوري بصدمه ومن صدمتها صرخت ووقفت : شنهوو! ابك انتي توحين وش تحتسين به؟
الوجد : ايوهه اوحي على قولتك اوحي
جوري حطت يدها على صدرها من صدمتها : لااله الا الله اللهم ان كان سحراً فأبطله مستحيل ماصدق ماصدق فيصل الي صرخ وحلف بين الناس ياخذتس يرضى ينفصل عنتس؟
الوجد : هو لسى مارضى بس انا راضيه انفصل!
جوري حطت يدها على جبهه الوجد : الظاهر عليتس حراره
الوجد : ماعلي حراره ولا شي بس صار خلاف ببني وبينه وبصراحه زعلت لانه عورني بكلامه !
جوري : ماودي ادخل بالتفاصيل بس وش سبب المشكله
الوجد تنهدت وقالت لها السالفه كلها
جوري اخذت نفس : والله انكم مكبرين الموضوع ترى اوفر سايزز "رياكشن"
الوجد : لاماهو اوفر ياماما كلمه من حبيب قلبك تخل موازينك كلها !
جوري : عن نفسي كلكم غلطانين الصراحه انتي غلطانه وهو برضو غلطان اجلسو عند بعض وحلو مشكلتكم صدقيني ماتوصل للانفصال عمره ماكان حل!اصحي على نفستس وتكلمو وحلو مشكلتكم قبل لايدخلون الكبار والله واحلف لتس ان دخل ابوتس وعمي محمد بالمشكله صدقيني بتخرب بينكم ويتولد الكرهه والحقد بينكم يصير تفكيركم كل واحد يقهر الثاني! حبكم اكبر من كلمه قالها بلحظه غضب اكبر ياوجد فيصل اكبر استوعبي تكفين لاتظلمينه ولاتظلمين نفستس !
الوجد اجتمعت الدموع بعيونها : احبه بس ماقدر اسامحه ابغاه يحسب حساب لاي كلمه يقولها مابغاه كل ماعصب رمى علي كلام ترى انا انسان احس وانجرح مو عشانه حبيبي اعفي وامشي له لاحبيبتي مابغى احد يستنزف من كرامتي جوري ياحبيبه قلبي صدقيني الحب مو كذا مو طبيعي اذا عصب يرمي كلامه الي اقوى من السهام على قلب حبيبته هذا تسمينه حب؟
جوري مسكت يدين الوجد ونطقت : لامو حب ابداً ويحق لتس تزعلين بس ابيتس تعرفين انتس انتي بعد غلطانه ليش ماسمعتيه من البدايه صح بعد هو غلطان ماوقف معه ولااني اطلعتس مخطيه عليه لا كلكم غلطانين بحق بعض! ارحمو نفسكم حرام عليكم
الوجد بدموع : ماراح تحسين بأحساسي اشوف حبيبي وزوجي مع بنت بأخر اليل ! مستحيل اسمع تبرير احد كل شي شفته بعيوني تقولين ليش ماسمعته بقولك لان عيوني ماتكذب كلشي شفته بعيني
جوري تنهدت : عين ماصلت على النبي مو طبيعي كيف علاقتكم قبل يوم وكيف الحين اتمنى تصحون وتمسكون يدين بعض زي اول والله لو انه اخوي او يحل لي كان مسكته من اذنه وخليته يعتذر لتس بس مقدر مو محرم لي
الوجد بدموع : لاتقولين له شي ولاتحاولين توصلين له يجي يراضيني ان كانه يحبني يجيني من نفسه مو من كلام فلان وعلان عشان يراضيني اذا مراضاته بسبب احد ثاني انا مابغاه !
جوري تنهدت بقله حيله ولو بيدها تكلمت مع فيصل بس ماتقدر كل الي بدر منها انها حضنت الوجد حضن حنون طويل وهادي وماتسمع غير انهيارات الوجد وادركت جوري ان الحب شي صعب مو كل من هب ودب حب حب صادق !
،
بعز الظهريه والحر والقيض وشموس الرياض القاسيه جالس بالمقلط ويتابع مباراه معاده ومعه حب دوار الشمس وشاهي وصوت المكيف ويغني اغاني قديمه : دكتور مال العين قالـ...
قاطع صوته الذهبي دخولها وهي تنطق : ورع من اليوم افر بالبيت ماحصلتك !
مازن وهي ياكل حب : الله اكبر عاد من كبر البيت تراه اربع بخمسه تقول صندقه
تنهدت العنود : صدق من قال الانسان طماع مايرضى بالي عنده اربعه بخمسه غرفتك لحالها
مازن : فارقيني بشوف المباراه
العنود : تستهبل هذي مباره امس الهلال والنصر!
مازن صرخ : قوللل الرابععع
العنود جلست : الحمدلله والشكر
مازن يسجد سجود شكر : الحمدلله يارب الحمدلله واحد اربعه للهلال
العنود : مازن خلاص عاد جيتك بسألك
مازن تعدل واخذ كاسه الشاهي ويشرب منها : شاهي ثقه حق خط الرين
العنود قلبت عيونها بطفش : فيصل وينه
مازن : راضع مني عشان اعرف وينه شدراني ماني بأمه
العنود : يالله تخليني اندم على الساعه الي فكرت اني اجيك فيها قولي لي فيصل وينه بأسلوب!
مازن ابتسم : شدارني وينه يايي وقلوب ووردات ، قلتها بأسلوب يلا دزي بكمل مباراه
العنود : افف كريه
مازن : ولو تكرهيني من هنا لبكرا انا توأمتس
العنود : طيب شرايك وش تحس من غلطان ؟
مازن وهو يشرب شاهي وببرود الارض نطق : كلهم حمير
العنود : ماقلت حدد لي جنسهم هم انسان ولاحيوان قلت من غلطان!
مازن : اجل انتي معهم حماره
العنود تلفتت بقهر تدور شي ترميه على مازن وماحصلت شي اخذت زنوبتها ورمتها على مازن : قليل ادب ماتستحي على وجهك بروح اعلم ابوي عليك اجل انا عروسه تقول لي كذا !! حيوان قليل ادب انا اعلم ابوي
مازن مسك الزنوبه : لعنه الوجد وصلتس كل ماقال لها فيصل اء قالت بعلم بابا
العنود : عزتي لهاا لو تبي تعلم ابوها اذا انت وفيصلوه نفس الطينه انا عروسهه
مازن عدل جلسته يستقعد للعنود وحط يده على فمه وشهق : اوهه عروسه ؟ توي ادري الصراحهه ليش انا اخر من يدري
العنود بغبنه : خيررر انا اختك كيف ماتعرف
مازن : امزح امزح اعرف
تنهدت العنود : اشوا عبالي بعد المهم فيصل شاف الوجد؟
مازن : يوم شافها عطاها وضعيه جيتني مثل الشروق الي محى عتم اليالي وربي عطاها هالوضعيه
العنود ضحكت : يالله تخيلت الشكل
مازن : حفله حفله اقولتس واذا قلتي له وشلونك هبد لتس قصيده عن الفراق وكذا
العنود : وناسه وينه بجلس عنده بشوف شكله
مازن تحمس : وازيدك من الشعر بيت الزقاره دايم بفمه على اساس انا من بعدك يالوجد تعبان
العنود ضحكت : بس بس متتت ضحك
مازن : وازيدك بعد لو سألتيه وين الوجد قال تم المعلومات وطلع لتس الوجد وينها !
العنود : مو طبيعيي رجعو له الوجد
مازن : لو رجعت الوجد وعاتبته قال المعاتب بين الاحباب ماهو بمستحب
العنود طاحت من المركي ميته ضحك لان الجلسه مع مازن تتحول لضحك رغم ان الموضوع يحزن بس بركات مازن تحول الموضوع ضحك
ضحك مازن على طيحه العنود
،
العصر ...
راجع فيصل من الدوام تعبان ومكروف وداخل بسيارته من عند مدخل المزرعه وطاحت عينه على البنت الي طرحتها على راسها وتروح وتجي وواضح تنتظر شي وهل يخفى القمر ؟ وجدنا تنتظر طلبيتها
عقد حواجبه وقال بينه وبين نفسه : وش يوقفها بالشموس
الوجد التفتت على دخول سياره فيصل على بالها المندوب ولكن اختفت ابتسامتها من شافت جيب فيصل الابيض مقبل لها
صدت عنه وفتحت جوالها تشغل نفسها عنه
وقف السياره ونزل ووقف قبالها : وش موقفك بهالشموس
الوجد ماردت عليه واستمرت بتجاهل فيصل
تنهد فيصل : خلي عنك الزعل شوي على جنب ليش واقف هنا عند الباب ؟
لازالت الوجد بتجاهل كلام فيصل تماماً ولاحتى تناظر فيه وهذا الي نرفز فيصل ومسك عضدها وسحبها له : لما اتكلم تجاوبين !
الوجد شهقت من سحبته لها ورفعت أنظارها له : ومين انت عشان ارد عليه؟
فيصل : زوجك
الوجد شالت انظارها عنه : سابقاً
فيصل : عموماً سابقاً ولا حالياً امشي داخل عيب توقفين هنا
سحبها معه بيدخل المزرعه
الوجد سحبت يدها ونطقت : بعد عني المندوب بيجي !
فيصل التفت لها : رجال قدامك طول بعرض ماتقولين له رح جب طلبيتي انا اجيبها انتي ادخلي
الوجد تكتفت : مابغى خلاص عاد يالرجل الغيور
فيصل بحده وغيره : بتدخلين ولا شلون؟
الوجد بعناد : مابغى ادخل وش بتسوي
فيصل تنهد : لاحول ولاقوه الا بالله تجبريني اشيلك غصب !
الوجد رجعت خطوات لورا خافت يشيلها ويروح الثقل
فيصل تقدم لها وهي ترجع الين حست بالسياره وراها ومافي مجال للهروب غير انها تبكي بس هي حالياً استنفذت مخزون الدموع
فيصل تقدم لها وتاكد ان مافي مجال للهروب ونطق : ماودك ترضين يام غمازه ؟
الوجد التفتت تشتت انظارها عنه ولاردت عليه
فيصل: مافي امل تطلعين من هنا الين تقولين لي وش يرضيك !
الوجد : يرحم والديك بعد عني
فيصل : ماني مبعد يابنت الحلال ابيك تقولين لي وش الشي الي يرضيك بجيبه لك
الوجد : نجوم السماء اقرب لك من رضاي
فيصل تنهد : لاعاد صيري قنوعه شوي
الوجد حطت يدينها على صدر فيصل تدفه عنها : بعد عني
فيصل :على بلاطه ماني مبعد عنك !
الوجد تنهدت : طيب وش تبغى بعد عني كتمتني بريحه عطرك بتنفس
فيصل : خليك من العطر الحين
اتصل جوال الوجد "المندوب " وردت : هلا
فيصل رفع حواجبه وسحب الجوال منها ورد : نعم اخوي؟
الوجد : يحوانن هات الجوالل !
فيصل كتف الوجد بيد ويده الثانيه يرد على المندوب : ايه تعال ...نفس الموقع .. خمس دقيقه واجد صديق... تمام تمام ...انتظرك
قفل الخط وناظرها : وشعندك انتي تردين على رجال
الوجد : ترى مندوب ماني مغازلته
فيصل : ايه زين انتهى الكلام يلا ادخلي
الوجد : مابغى واذا تبيها بالهجه الي تفهمها ماعاد ابي اروح
فيصل رص على اسنانه بغيره : شفيك انتي راكبك سكني من صباح ربي وانتي تدروين حرش ادخلي بالطيب يالوجد
الوجد : لاتحسبني بخاف منك بقعد على كبدك وانا الي بستلم الطلبيه غصباً عنك
فيصل تنهد بطفش من عنادها ونزل لمستوى رجولها وشالها بحضنه
الوجد بالعاده تتمسك برقبته الحين من قوه الزعل حتى ماتمسكت فيه وتحاول تنزل وصراخها الي واصل لاخر جار
طلع ابو نواف من البيت وهو معصب وحواجبه معقده من صراخ الوجد : الله يعطيكم الصجه واللجه ابك علامك علاها اتركها يملا الي ماني بقايل انا القاها منك ولامن الدلخ عمك مازن
فيصل : وجد اسكتيي يرحم امك خلاص فضحتينا !
الوجد بصراخ : نزلنيييي
ابو نواف اخذ الزبيريه ورماها على فيصل وطاحت بحضن الوجد
فيصل بعد ماصفقت فيه الزبيريه : يبه مالي دخل
الوجد نزلت بعد محاولات اخيراً نزلت بلحظه غفله فيصل عنها
الوجد : انقلع بس ! عمي شوف فيصل
ابو نواف قايم والاخلاق صفر : ورع واقسم بالله ان ماتقلعت انت وياها من قدامي ترى يصير شي ماتحبونه !
الوجد دفت فيصل وتعدته رايحه للمندوب
فيصل : تعالي !
ابو نواف : اتركها يامسلم يومنك مضيق عليها عيشتها ليه
تنهد فيصل ولحق الوجد وشافها تاخذ الطلبيه من المندوب وتعطيه قيمه الفستان "الدفع عند الاستلام "
فيصل : لحظه دقيقه صديق جيب هذا فلوس انا اعطيك فلوس
الوجد : صديق معليك هذا جنجان واجد خذ فلوس وروح
المندوب ميل شفايفه وراح
فيصل : وش تسمينه هذا وليش تدفعين له وانا عندك
الوجد : عندي فلوس ماني محتاجه
فيصل : ماختلفنا بـ....
ماكمل كلامه الا والوجد رايحه وهي فرحانه بالفستان وفيصل يناظر فيها يتمنى يشوفها بالفستان
تنهد : رجعنا للبدايات لنقطه الصفر الله ييسرها
،
دخلت الوجد وهي تضحك بفرحه : بناتتت
جوري وهي على اللابتوب : جت المطيوشه
العنود : شفيك
الوجد وهي ترقص بالفستان :جاء جاء
جوري وهي مركزه على معلومات شخص: ايه جاء للبقاله ومن بعدها راح لبيتهم
الوجد زفرت : لااا جوري اقصد الفستانن
العنود بفرحه : اخيراً !
جوري رفعت انظارها وناظرت للوجد وابتسمت : جربيه عاد بنشوف
الوجد فكت البوكس وطلعت الفستان وناظرت فيه وعيونها قلوب من جمال الفستان واخذت الفستان وراحت تلبسه والتفتت العنود : تحسين نفسيتها تحسنت؟ يعني اقصد من بعد فيصل
جوري : ماودي اقول هذي بس ترى فرحه مؤقته بتفقد فيصل بحياتها هي حالياً مستانسه عشان الفستان وصل لكن بعد ساعه بترجع نفسيتها اردى
العنود تنهدت وجلست : احس ظلمنا فيصل يحزنن مرهه نظراته لها قال لي مازن وضحكنا شوي لكن قلبي من بعدها عورني عليه احس ماودي نزعله !
جوري : ولاودي اظلم الوجد ترى حتى هو مخطي بحقها !
العنود : عارفه بس هي ماسمحت له يبرر موقفه وهو طول عمره يسمع لها ويخليها تبرر موقفها ركزي بالمنطق
جوري : امنا بالله انها غلطانه انها ماسمعته لكن مو عذر يصرخ عليها ويقول لها كلام ويرفع يده عليها ترى لو ماضربها بس تعتبر محاوله
العنود : يبنتي ماتسمى محاوله لو رجال غيره مكسر ظلوعها تختبر رجولته بالضرب لكن رغم ان الكلمه قويه بحق اي رجل الا انه تذكر الحب الي بينهم وحضنها وقتها عشان مايجيها اذى منه ! حرام تظلمينه جوري
جوري بجديه : ماظلمته ! ولاني فكرت اظلمه وادري انه ماضرها بس كلمته ابشع من الضرب
العنود : سؤال جويريه الحين لو احد شاف منك غلط وانتي بوقتها لازم تبررين ومحد سمح لك تبررين وش تسوين؟
جوري : ماني مبرره طز خلهم يفهمون الي يفهمون ماني متعبه نفسي ابرر الي بيصدق يصدق
العنود تنهدت : مدري وش اقول الصراحه
جوري : الي لازم تسوينه توقفين مع الوجد ومع فيصل مو تقولين فيصل مظلوم لا حبيبتي كلهم اخطو على بعض!
العنود : اخـ....
دخلت الوجد وهي تضحك وتدور على نفسها : شرايكم بناتت؟
العنود : واووو جوجيي يجننن !
جوري : يهبللل يختي يهبلل مدري وش اقول مامن كلمه تشرح جماله !
الوجد ابتسمت ونزلت انظارها للفستان وادركت ان محد يوصل لمدح فيصل لها : يحياتيي ي نودي وجويريه
اتجهت للمرايه تشوف شكلها بالمرايه وافكر كيف رده فعل فيصل اذا شافها بالفستان تدري به اذا شافها اعطاها مدح يوصلها للسماء وغير قبله الحب
: بنات تحسونه وسيع من عند الصدر؟
جوري تقدمت ونطقت : لا مو واضحح كذا حلو لاتعبثين فيه
العنود : صادقه جويريه لاتودينه للخياط يحوسه عليك
الوجد : تمام
العنود بحسن نيه : شرايك تورينه فيصل؟
الوجد تنهدت : نودي بليز لاتجيبين طاريه خلاص مابغاه
جوري : الي ودك انتي ارتاحي ولاتفكرين فيه
الوجد ابتسمت والتزمت الصمت
العنود : شيهانه متى تجي ؟
الوجد : ماعرف والله
جوري : اشتقت لها
الوجد : المزرعه من دونها ولاشي احبها ابغاه
العنود بممازحه : تبينها ولا تبين اخوها؟
الوجد : مابغى اخوها
جوري ضحكت ونطقت : اوله كل هذا زعل حتى اسمه مانطقته
ضحكت الوجد ونطقت العنود : يلا بنات عندي شغل مع فارس بروح معها واجيكم
جوري : وانا بعد بروح تشوف شغلي مع طلالوه بكرهه عيشته
الوجد : انتبهو على انفسكم
جوري : يلا سلام
طلعت جوري والعنود لبست عبايتها بتروح تختار اثاث مع زوجها فارس والوجد بدلت فستانها
،
بعد ٤ايام .. اخر اليل
بعد اربع ايام من تعب وهم وتفكير منسدح بسريره والتفكير ياخذه ويجيبه
تعب من صدها كل ماحاول يقابلها تصد عنه ماهو لاقي تبرير لصدها صحيح اخطى بحقها وكلمته قويه شوي بس ماتوصل انها تحرمه من شوفتها ! واهله جو من عند خواله وشيهانه تتوعد بفيصل
تنهد بضيق : اهخ ياوجدي تحبين تتعبين وليفك تحبين تتغلين على قلبه بس تراك اتعبتيه
اتصل الجوال وقام واخذ الجوال وقرا الاسم ورد : هلا
مازن : فيصل مسوي شاهي خاثر تعال
فيصل تنهد : والله ماني مشتهيه
مازن : قم بس تعال عانني عند النخله الي دايم نجلس عندها
قفل الخط مازن عشان يجبر فيصل يجي وفعلاً قام فيصل بقله حيله وسحب ثوبه ولبسه وطلع يمشي جسد بلا روح طلع من بيت ابوه وعيونه تطالع شباك غرفه العنود ينتظرها بس فقد الامل واتجهه لمازن الي جالس ومعه كاسه شاهي
: سلام
مازن : هلا وعليك السلام تعال اجلس
جلس فيصل واركى ظهره على غصن النخل
مازن مد الكاسه : سم
فيصل اخذ الكاسه : سم الله عدوك
مازن : ماواجهت الوجد ؟
تنهد بضيق ونطق : واجهتها بس تبي الصده عني ماتبي تقابل وجهيي ولاتسمع تبريراتي الي عالقه بقلبي !
مازن : عطها يوم تهدى فيه
فيصل بغبنه : لعنبو إبليسك اربع ايام وهذا الخامس ماتبي تواجهني ! تعبت
مازن : والله عاد الوجد اغرب صعبه منال
فيصل : وهذي المشكله
مازن : بتكلم معها انا
فيصل : لاتجيها ولاتقول لها شي
مازن : كيف يعني اتركها كذا تدلع عليك وتمسح بكرامتك الارض؟
فيصل : اقولك تعبت تعبت حتى تبرير مابي ابرر من كثر صدتها عفت نفسي مابي اعاتب واراضي لان هذا الشي يتعبني
مازن : لافيصل واجهه وراضها لاتستسلم
فيصل رفع انظاره يناظر السماء : بلاها ماتبي تسمع كيف تبيني اراضيها اذا هي مسكره كل ابواب قلبها !
مازن : شوف فيصل حبي خل الكلام والمراضاه على جنب جب لها هديه خاتم اسواره اي شي هي تحبه
فيصل: لو ان الهدايا ترضيها كان غرقتها هدايا بس ماتبي فاهمه عزه النفس غلط
مازن : مالك الا تاخذها غصب اجل
فيصل : كيف غصب يعني؟اخطفها مثلاً ؟ ماتجي
مازن : ايه عادي توصل للخطف اجبرها تسمعك غصباً عنها
فيصل : والله مادري وش اسوي
مازن : سو المستحيل لاتخسرها اذا انت رافض اني اتدخل بينكم لاتستسلم
فيصل : ماستسلمت لكن يمين بالله اني تعبت اجامل نفسي حتى
مازن التزم الصمت لان مافي كلمه تطبطب على قلب فيصل
فيصل سكت والصمت سيد الموقف
بضع ثواني ونطق بحب :
يومها بين يديني والغلا عادي
ويوم قفت تفجر حبها فيني .
مازن : صح لسانك
فيصل : صح بدنك
نزل كاسه الشاهي على شكلها ماشرب منها شي ووقف وتمدد بتعب ونطق : انا استاذنك عاد
مازن : وين تو الناس !
فيصل : وراي دوام
مازن مد قاروره المويه :خذ ، الله اكبر عاد من متى تحب الدوام ؟
فيصل اخذ قاروره المويه : عشت ، من يوم شفت الصد بعيون وليفتي حبيت الدوام اشغل نفسي
مازن عض على شفايفه بضيق والتزم الصمت
فيصل ميل شفايفه بقله حيله برجوع الوجد وتنهد ومشى وابتعد عن النخل لكن توقف من شاف بنت جالسه على اطراف الدكه ومعها سماعات وايباد
عرفها هي نفسها حبيبه قلبه ! وجد فيصل
سرعان مااختفى الضيق بملامحه وتحولت لملامح مليانه سعاده وحب !
،
بوسط هدوء المزرعه واصوت صراصير اليل وحركه اوراق الشجر والاضاءه الخافته
جالسه على اطراف الدكه ولابسه سماعه الراس تسمع بودكاست والشال على كتوفها ومعها كوب كوفي
تنهدت بضيق من كان البودكاست عن العلاقات وهي توها منفصله عن حبيب قلبها
فتحت ايبادها تغير البودكاست : افف وين ماروح اتذكرك! بس صدق وحشتني يحيوان بادر تعبت اتغلى عليك راضيني خذني معك غـ....
انقطع كلامها من حست بشخص وراها وحاط يده على فمها يمنعها من الصراخ
فيصل حاط يده على فمها وقاروره مويه على راسها على اساس "سلاح"!!
الوجد من حست السلاح على راسها "قاروره" خافت وتجمعت الدموع بعيونها ماتدري مين الي وراها
قومها معه بكل هدوء وكاتم ضحكته يشوف خوفها ورجفه يدينها وتحاول تصارخ
الوجد تمشي معه وتبكي ماتدري مين الي خاطفها جاهله انه فيصل
حط القاروره بجيب ثوبه ورفع يده يغطي عيونها ويمشيها قدامه وشال يده عن فمها
الوجد بدموع : اتركني يامريض والله اعلم فيصل !
فيصل ابتسم ابتسامه جانبيه ولارد عليها ورجع يده على فمها وتقدم للسياره وفتح الباب وتوهق اذا ركبها تقدر تشوفه وتنزل !
فكر بضع ثواني وطاحت عينه على شالها الي على كتوفها واخذه وحطه على عيونها
الوجد بصراخ : اتركنيييي
ربط الشال على عيونها ودخلها السياره وسكر الباب وبسرعه ركض وركب السياره
الوجد رفعت يدينها بترفع الشال عن عيونها لكن سرعان ماحست بأحد يمسك يدينها يمنعها تشيل الشال عن عيونها
الي مخوف الوجد ان الي خاطفها مايتكلم !
حرك السياره وهو ماسك يدين الوجد الثنتين بيده
الوجد بخوف : مين انت وليش ساكت كذا
فيصل ابتسم وهو يتأملها رغم ان بس كم يوم زعلانه بس يفقدها وهذي فرصته يتأملها !
ترك يدينها وطلع قاروره المويه وحطها على راسها
الوجد توقعت السلاح على راسها وبكت بخوف : رجعنييي خلاصص
فيصل مايتكلم ابداً كتب بجواله " ترجعين لفيصل؟" وسمعها الصوت ونطقت : ايوه ارجع بس اتركنييي
كتب فيصل " ترى اذا مارجعتي بفرغ السلاح على راسك " وسمعها الصوت وردت بخوف : طيب برجع له خلاص مين انت !
كتب لها فيصل " انا خوي فيصل القريب من قلبه وماجاز لي اشوفه متضايق " سمعها الصوت وهو كاتم الضحكه
: انت مو صاحبه لو صاحبه ماخذيتني !
كتب "بتسكتين ولاشلون؟" وسمعها
الوجد بدموع : طيب بعد السلاح عن راسي
بعد قاروره المويه عن راسها بهدوء عشان القاروره ماتطلع صوت ورجع كتب لها " خليك هاديه ولاتتحركين ولاتحاولين تفكين الشال لااذبحك عاد " وسمعها وماردت استمرت تبكي
فيصل مسك يدينها والابتسامه شاقه وجهه ويناظر الطريق
الوجد من كثر خوفها وتوترها ماركزت بريحه الدخان والعطر الي بالسياره !
الوجد برجفه : ممكن تشيل يدك عن يدي لاني على ذمه فيصل
شد على يدها يحارشها ولاتكلم
وقف السياره بمكان زي البرحه فاضي كبير اضاءه خافته
نزل فيصل واتجهه لباب الوجد وفتحه وبقى واقف يطالع فيها وهي تشيل الشال عن عيونها
فكت الشال عن عيونها وحست بجسم واقف على يمينها التفتت بخوف وشافته متكتف ويطالع فيها
التفتت مكان السايق تتأكد هو نفسه الي خطفها !
تنهدت بضيق وحطت يدينها على وجهها تخفي دموعها هي عندها فوبيا من الخطف تخاف من بعد ماجد تخاف احد يتعامل معها بطريقه اجراميه انهارت بخوف : ليه تخوفني
فيصل اختفت ابتسامته وحط يده على ظهر الوجد : احضنيني طيب ابكي بحضني
الوجد بعدت يد فيصل عنها : مابغاك
فيصل : مافي شي اسمع مابغاك بيوم وليله تنسين حبنا !
الوجد بدموع : طبعاً بنسى اذا الموضوع يمس كرامتي كيف برجع لك وانت قايل لي كلام وفوقها رافع يدك علي
فيصل تنهد : وجدي يابوك لاتظلمين حبنا عادي عطيني فرصه مو تصكين الابواب كلها بوجهي عشان خطا بسيط
الوجد بدموع : بنظرك بسيط بس بقلبي مو بسيط
فيصل تنهد وتقدم اكثر ومسك يدينها : وجدي يابوك الانسان مو معصوم عن الخطا ولو اخطى له فرص كثيره مو اول خطا تقفلين بوجهه !
الوجد سحبت يدينها ومسحت دموعها : بس في اخطا ينغفر لها وفي اخطا مانغفر لها
فيصل سحبها تنزل من السياره يبغاها تطلع الي بخاطرها وقف قبالها ومسك عضودها : يمين بالله ياوجدي لاليلي ليل ولانهاري نهار اتعب بالنوم اتعبت نفسي بكثره التفكير وقله الاكل وغير الدخان الي افطر واتغدى واتعشى عليه ! ارحمي بقلب من حبك ياصعبه المنال
الوجد ابتعتد عنه : لاتمسكني خلاص انساني
فيصل تنهد بنفاذ صبر لانه بدا يفقد اعصابه : لااله الا الله
الوجد : ليش متعني وانت تعرف جوابي
رص على اسنانه بغضب ونطق : انتي الحين وش هدفك وش بتوصلين له من اسلوبك وصدك لي
الوجد : اشوف اننا ننفصل
فيصل رفع حواجبه بصدمه : تستهبلين؟ بتقولين سبب الطلاق كلمه طلعت بوقت غضب ترى السبب مو منطقي
الوجد بدموع : لامنطقي كيف تجرح من حبتك وشافتك سند لها
فيصل صرخ بقهر : تراك قاعده تستزفين من طاقه الصبر فيني وغير كرامتي الي مسحتيها بالارض عشان رضاك انا انسان زيي زيك ليش تتعمدين تصدين عني وانا اكثر انسان حبك !
الوجد رفعت انظارها لعيون فيصل وشافت كميه الضيق والحزن والتعب بعيونه اجتمعت الدموع بعيونها من شافت عيونه متغيره ذبلانه مو فيصل الي عيونه القلوب المليانه بالحب تغيرت !
فيصل بقهر وغبنه مسك يد الوجد وحطها على قلبه: عورتي قلبي جعل عدوك لسلال ، ليش انا بالذات الي زعلتي عنه على اول غلطه
الوجد سالت الدموع على خدودها بغزاره : خلاص لاتكمل لاتطالع فيني قاعد تعور قلبي
فيصل ضحك من غبنته : تعور قلبي؟ ماتعور قلبك وانتي تشوفيني بشتى الطرق احاول اوصلك ؟
الوجد التزمت الصمت ودموعها تسيل على خدودها
فيصل ترك يدها وناظرها بجديه : اظن وصلنا للنهايه وانا حاولت اراضيك على حساب نفسي وكرامتي لكن كل ماحاول يجيني الصد منك حاولت وحاولت لكن مالقيت منك رد لاتلوميني اذا جاك الصد مني
الوجد رفعت انظارها بصدمه ماتوقعت ابداً فيصل يستغني عنها !
نطق كلمته الاخيره : استودعتك الله ياغلى واعز من دخل قلبي

_______________________
انتهى البارت ♡
رضيت بالله ربًا وبالإسلام دينًا وبمحمد ﷺ رسولًا ونبيًا)، ♡
حسابي تيك توك :Ot348285
حسابي انستا انزل فيه الروايه : Ot34828
*اعتذر عن الاخطاء الاملائيه*

احس الوجد قست عليه بزياده😔