-
متجمعين خمستنا ومسوين حلقة دائرية
وبنص القعده الكتب المتناثره واوراق المراجعات
ونظرنا كله مسكوب على نير الي قاعد يشرح لنا
وفجأة سكت عن الشرح واشر بيده قدام اسر الي من الواضح انه مفهي وباله ماهو معنا اسر ناظرنا باستغراب رافع حاجب
ورواد مسك الدفتر ورماه على راس اسر وقال
: ركز ياحمار لنا ساعه نبربر بغير فايدة
اسر بتسليك : معاكم معاكم
ناظره نير بشك وكمل شرحه لنا وهالمره اسر مركز
انا ورامي ناظرنا بعض لاننا فاهمين ليه هو سارح
قلت له بعد ما ربت على ضهره ولو شديت حيلي كسرت عاموده الفقري
: لهدرجه خايف تخسرني ! ياحبيبي انت
اسر يوم فهم دفني عنه : محد درا عنك وخر
المكابره شينه يخوان
سحبت عليه و عطيتها التكيه ذيك على رامي مناشبه
وبنفس الوقت صوت نير الهادي كان بمسامعي
والله اتمنى يتقاعدون المدرسين ويجيبون نير بدالهم
يختصر الوقت ويدخل المعلومة بسرعة
ولو في امك خير انساها
سمعت صوت اشعارات
حساب ريف الي قبل كنت مبلكه وشلت البلوك
ولعلي ندمت لانه ازعجني مغير يرسل يبوي لاصق باستي ذا
خشيت على المحادثه بشوف وش عنده
محادثة
يزن مختفي له يومين وامك خايفه تدوره
اذا جاك ولا شفته علمني !
رديت عليه : بستين داهيه وش دخلني
اختتمتها بقلب ابيض عشان انرفزه
رجعت بلكته وذا وجهي لو شلت البلوك مره ثانيه خله يخيس مع المحضورين
اسر الملقوف شاف المحادثة وقال
: اما وش دخلني !
مدري ودي اصفقه خمس وستين مره او سته وستين مره احسه رقم مميز ما امداني ارد الا وهو يهبدني بالكتاب اللي اشك ان سبب الضربة المعلومات المخزنة بذاكرتي تناثرت
: تدري الحديث وش قال؟ قوم قدامي
قصده الحديث الي يتكلم عن اهمية الام ..
قمت كاره ما ابي اطيح من عيون العيال ما يدرون انها تاركتني طول ذيك السنين ومحملتني ذنب ما ارتكبته وفوق كذا طول الفترة الي كنت عندها ترمي علي دعاوي مالها او وتالي وفوق ما انها حطمتني وكسرت مجاديفي وحرمتني من ابسط حقوقي وبكل مره اجيها اعتذر مع اني مو مخطي بس كنت طالب رضاها
كانت بالمقابل تقفل الباب بوجهي
للان ما نسيت نبرتها القاسية يوم قالت " تبريت منك " " لعد اشوفك توطوط قدام البيت منت بولدي ولا انا امك " خيبت ظنوني فيك "
" وجه نحس " " انت عالة علينا " " ليتك الي رحت ولا مازن ! "
ما قدرت استذكر كل كلامها لان دموعي بدات تنهمر والعيال فزو منخرشين لاني اول مره اصيح قدامهم بذي الطريقه لا ياربي انا ما قلت لهم شي عن حياتي عشان ما احس بالشفقه اخرتها كذا؟
الوحيدين الي هبدت علومي كلها عندهم رامي واسر
غيرهم محد يعرف وما قلت للاثنين ذول الا بلحظة ضعف
