-
ريف جابني على مكان مشبوه وبعيد شوي وخالي ذا كله على شان نسوي ترند! ما عارضت لأني ساحب عليه فترة وبيزعل علي
فوق الزعل زعل ثاني ، تكتفت وانا اناظره وهو يحاول يوقف الجوال بالوضعية المناسبه وكل شوي يرفع الستاند وينزله محتار وش الأفضل لين ثبت يده وانا للان ماني عارف ليه هالمكان بالذات
قال وهو يأشر لي على كاميرا وحيدة معلقة بركن الجدار
: بنصير مشاهير ياحبيبي !
قالها وانا انصرعت ضحك مشاهير مين يعمي؟ احنا المفروض نحمد ربنا لو الجيران درو اننا احياء فهمني السالفة اثاري فيه واحد معلق الكاميرا ذي والي يجي هنا ينزله بحسابه ف الاغلبيه يتميلحون وينمسكون سب و اللي يغرقونهم مدح عاد انت وحظك
واتوقع ما يحتاج نعرف حنا مع اي فريق !
ريف مسك خصري ماخذ وضعية اني حبيبته ويقعد يدورني كل ما زانت الجلسة بس ثواني ليش انا حبيبته ؟ ما بقى الا هي قعدت اتناقر معاه لين بدلنا الأدوار وتحت ضحكنا وتحركاتنا بإنسيابية قررت افكه فجأة يعني اصدم عيشته مره وحدة وتوقعات المشاهد من عبر الكاميرا وفعلا طاح لكنه بحركة سريعة قدم رجلة وشقلبني معه وبكذا اثنينا صرنا مستلقين بجانب بعض !
: احس استخرت ووافقت
ما استوعبته ! الا بعد حين قمت انفض الغبره
: انتي طالق بالثلاث قبل ما تصيرين على ذمتي
قام ريف وهو يتحلطم لاني ما خليته يعيش الدور اكثر من كذا
قاطع علينا اتصال بنص الطريق صادر من جوال ريف واللي بدوره استاذن مني وراح بسيارته
واما انا كملت طريقي راجع للبيت
-
نواف سبقني قده مركب العفش اول مرة اشوفه مروق للدرجة ذي
انا نفسيتي بخشمي و طول الطريق كنا نفتح كم سالفة بسطحية تامة ونرجع على صمتنا
سحبت جوالي ولقيت اشعارات كثيرة من حساب اياد
مرسل لي معلومات الشخص الي كلمته عنه اخر مره
وحرفيا ما بقى شي ما ارسله لدرجة اني اقرا منصدم ذا ادمي ولا يتهيألي دخلت على احد المقاطع المرسلة بعشوائية
صوته وضحكته مع هالشخص الي طلع معه بالمقطع كان كفيل يخليني ارتاح لو شوي ! صحيح انه سعيد بدوني لكن يكفيني اشوف ابتسامته العذبه نغزني قلبي بعد ما عدت المقطع مرارا وتكرار بدون ملل ولا كلل وبكل مرة ارسم نفس الملامح كأني اول مره اتابعه
هو لدرجة ذي ما ينمل منه؟ او لدرجة ذي انا مشتاق
اياد كاتب لي لستة كلام ومن ضمنهم
: ما طلعت هين ياوصخ تعرف تختار زين !
: تدري لقيت تويتر حقه شكل عنده حبيب دور غيره
: شكل ما لنا بهالدنيا حظ الي تبيه طلع بعلاقة والي احبه انا طلع يحب غيري هههههه
ذا مضيع يحسبه حبيبي
: اياد لا اجلدك ما احبه
: اعترف مافيها شي شوفني انا كبيت عفشي كله عندك
