اسبوع اختبارات
الساعة 8:15 صباحًا
دخلت اركض وبيدي اوراق المراجعة البوابة الخارجية خالية من الطلاب واخيرا استوقفني الحارس ولقمت تهزيئه فر ش بالنهاية دخلني بدون تعهد ارسلت له بوساتي الحاره لانه مشالي تصريفاتي المعتادة خففت خطواتي لان خلاص انا داخل المدرسة ! ماله داعي العجله اخذت رشفة من قهوتي الي نصها انكب بسبب ركضي
واخيرا شفطت ام الكوب ورميته بالزبالة من بعد امتار واول ما دخل الكوب اعتبرته هدف وسويت احتفاليتي الخاصة و بطريقي مريت الحمام وغسلت يدي من بقايا القهوه ورحت ادور قاعتي زي الثور وعيون الطلاب الي بالساحة تراقبني وساحبين على ام الاختبار الي بيدهم ذول طلاب ثوالث باين من اشكالهم صبعت بالهوا للي يناظروني وانا اضحك بداخلي لان ما يمديهم يقومون ولا بيعتبرونه غش و بتنسحب الورقة كنت بكمل مسيري ادور على قاعتي بس خرب علي مراقب ثوالث
: تمرح وتسرح هنا والناس تختبر؟ على قاعتك قدامي اشوف
طبعا ذا من اليوم يناظر الطلاب وهم عيونهم علي وشكله منفحس لأنهم لقو شي احلى من ورقة الاختبار! بكل تأكيد
قلت له اني ما ادري وين قاعتي بكل بساطة علمته اسمي وفصلي ومو باقي الا ارسله موقع بيتي مره وحده لانه فلها من كثر ما يسأل بالنهاية علمني وين قاعتي ورحت لها جري وانا امشي بالسيب شفت مراقب القاعة حقتي متكي على باب القاعة ويناظرني وانا جاي له قال وعيونه علي
: الطالب ريان ؟
وش دراه ذا ! بعدين استوعبت ان اسمي اكيد موجود على الطاولة الي بختبر فيها وبما انها فاضيه اكيد من اليوم اكيد يسأل عني
هزيت براسي ب اي قالي استعجل عشان الحق اراجع قبل ما ينتهي الوقت واسلم الورقة
جلست على الكرسي وسبحان الله كل المعلومات الي براسي تبخرت ! احلف لكم اني وانا داخل وانا اردد الاجوبة الي براسي بس لعلي نسيتها قرأت اول سؤال وبطني مغصني ! يخوان ذا اخر درس توقعت بيجي من الاساس سكبت له
ابتسمت بوهقه وعديت عشوائي طلع الجواب ألف بس على زق حدسي يقول باء دايم الي بالوسط يفك ازمات
الاسئلة الباقية سهله جدا جاوبت بكل روقان واحسه هم وانزاح
قلبت الورقة وناظرت المقالي تذكرت نير وهو يشرح لنا ! نفس الاسئله بالضبط طلعت قعدت احل وانا ادعي له بالخير
واخيرا خلصت حطيت قلمي فوق ورقتي لانها شوي وتطير بسبب المكيف الي فوق راسي انا متاكد ما بتطير المعلومات الا منه
عساهم يغيرون مكاني بس ! شفت المراقب شكله مدرس جديد
ومدرس ثاني حق فيزيا غثيث ويحب يتفلسف فوق روسنا
ومن اليوم يذكرنا نكتب اسامينا عاد مين الحمار الي بينسى !
شدعوه نهائي ذا رفعت يدي قلك طالب مؤدب المراقب ناظر فيني وعطاني نظره اتكلم قلت بملل من جلستي ذي
: يا استاذ متى يخلص الوقت ؟
: توك داخل ومتأخر وفوق كذا تسأل
