တဂျက်ဂျက်

သာ့တိတူး

ရှူတင်ပြီးသည်နှင့် ကင်မ်ဆော့ဂျင်၏ခြေလှမ်းတွေက နတ်ပြည်တက်မလိုပင်သွက်နေခဲ့သည်။ ခြေလှမ်းတိုင်းက တိမ်ပေါ်လွင့်နေသလိုပင်။ ချစ်ရသူရှိတဲ့အရပ်ကိုသွားရမည်မို့ တက်ကြွမှုတွေကထိန်းမနိုင်သိမ်းမရ။ တစ်သက်နှင့်တစ်ကိုယ် ခုလိုတက်ကြွတဲ့အိမ်ပြန်လမ်းတွေရှိလိမ့်မယ်လို့ တွေးတောင်မတွေးဖူးဘူး။

အိမ်ပြန်ချိန်တွေမှာ အိမ်နဲ့တူတဲ့သူတစ်ယောက်က စောင်မျှော်နေမှာပဲဆိုတဲ့စိတ်ခံစားချက်က အတော်ကိုနွေးထွေးပျော်ရွှင်စရာကောင်းတာပဲ...
ဆက်တိုက် ရန်တွေဖြစ်ရင်း စကားများရင်း အရွဲ့တိုက်ရင်းကမှ ဘယ်အချိန်ကစခဲ့လဲမသိလိုက်။ သိလိုက်ရတဲ့အချိန်မှာ ထိုသူကိုလက်လွှတ်ဆုံးရှုံးရတော့မယ်ဆိုတဲ့တစ်ဖက်သတ်အတွေးတွေက ဘယ်လောက်တောင်သတ်ခဲ့လဲ ကိုယ်သာအသိ။ 
သူ့ဆီကိုလိုက်လာပြီး သူ့ကိုချစ်ကြောင်းဖွင့်ပြောတော့လည်း မူဖို့ကိုတောင်မတတ်နိုင်လောက်တဲ့ထိ စိတ်လွတ်လက်လွတ်ပျော်ရွှင်လိုက်ရတာဆိုတာ...

အရင်အချိန်တွေမှာဘာတွေဖြစ်ခဲ့တယ်ဆိုတာအရေးမပါတော့သလို...
အထင်လွဲမှုတွေကိုဖြေရှင်းချက်ပေးနေဖို့မလိုတော့သလို....
စကားတွေများများစားစားတောင်ပြောနေစရာမလိုပဲ ..ဒီလူဖြစ်နေရုံ..ဒီလူရွေးချယ်တဲ့သူက ကိုယ်ဖြစ်နေရုံလေးနဲ့ကို အားလုံးကိုမေ့ပစ်နိုင်တဲ့အထိ..
ဒီလူ့ဆီမှာ သူနစ်ဝင်နေခဲ့တာ...

ရုန်းထွက်ဖို့ခက်တဲ့နွံအိုင်လေးထဲမှာနစ်မြှုပ်နေသည့်သူတစ်ယောက်ဆိုရင် 
အဲဒီနွံအိုင်လေးထဲကလည်း လုံးဝရုန်းထွက်ဖို့ကြိုးစားမနေတော့ဘူး..
ကိုယ်နစ်ဝင်နေမိတဲ့နွံအိုင်လေးက မျက်လုံးဝိုင်းဝိုင်းလေးတွေနဲ့ဖြစ်နေသ၍..
ဂျောင်ကုဆိုတဲ့လူသားလေးဖြစ်နေသ၍...

ဒီနေ့တော့ချစ်သူလေးထက် သူကအရင်အိမ်ပြန်ရောက်သည်မို့ ရေမိုးချိုးကာ ဧည့်ခန်းတွင်သာထိုင်စောင့်နေလိုက်တော့သည်။ သူနဲ့ထယ်ယောင်းက ဆိုလ်းမြို့ပေါ်မှာပဲရိုက်ကူးရသည်မို့ ရိုက်ကွင်းသိမ်းသည်နှင့် ချက်ချင်းပင်ကွန်ဒိုပြန်ရောက်သည်လေ။ 

ချစ်သူလေးကိုစောင့်ရင်း အားနေသည်နှင့် အင်တာနက်ပေါ်ကနေ ရည်းစားထားလျှင်လုပ်ရသည့်အရာများဆိုပြီး ရိုက်ရှာကြည့်လိုက်သည်။ 
ကိုယ်ကရည်းစားမထားဖူးတာတော့မဟုတ်ပေမယ့် ဘယ်သူ့ကိုမှ၂၄နာရီပြည့်အောင်မတွဲဖူးတာ။ တွဲသမျှအကုန်လုံးကလည်း ဒီတိုင်းပေါ့ပေါ့ပါးပါးသာ။ ဘာခံစားချက်မှတောင်ပါခဲ့တာမဟုတ်...