عذابي الأزلي

الجزء الاول من البارت الاخير

الجزء الاول من البارت الاخير

بقلم الكاتبة الزهيرية الزهيرية

لو ان البكاء يعيد عزيزاً
لبكينا من العمر ما تبقى

مينا / مرات تجي أوقات تتمنى لو تكون ورقه في مهب ريح ولا الموقف انت بي وهذا الموقف تكون بي عاجز حتى عن رد الموت عن اقرب الناس الك ويوم الجمعه چان يوم طويل كلش  نحسب الدقايق والثواني ونحس نفسنه گاعدين على نار چان يوم صعب ومأساة والله حتى للإنسان الاكره ما آتمنى طبعاً چان كمال كله ينطي ابر منوم لعمتي حتى يرحمها من عذابها لان اليشوف عمتي يگول مستحيل بعد ظل ساعه لان مستحيل تگعد دقيقه ساكته إذا مو تبچي ودگ وتلطم وبيوم الجمعه بالليل ساعه 10 بالليل اني چنت بالصاله يم عمتي ويمان نايم اما كمال چان بس يفتر بالبيت حائط يصده وحائط

وچان موبايله بيده دگ موبايله انتبه رقم غريب اخذ الموبايل وراح للمطبخ واني هم رحت ورا ومن رد ما اعرف المتصل شنو گال لكمال بس سمعت اجابة

كمال / اي اني كمال اخو ريان

مينا / ورجع المتصل ما اعرف شنو گله بس جواب كمال انه هسه يجي وغلق كمال الخط وسالته / شكو كمال ونزلت دموع

كمال / مبلغين  ريان انه راح يعدموا وسألي شنو آخر امنيه عنده وهو طالب انه اكون ويا آخر لحظات حياته اني راح اروح عليه مينا خاف تگعد أمي وتسأل عليه گليلها راح للمستشفى خابروا على حاله فهمتي

مينا / گمت ابچي وادگ على وجهي وگله لكمال / شگال گلبك ريان من عرفت اليوم إعدامك شگال گلبك هم خفت وانت شوف الموت بعينك وانت تمشي اله

كمال / اني ما اگدر اگلچ لا تبچين او لا تلطمين بس ما اريد امي تحس عليچ الله يخليچ والله تموت

مينا / عافني كمال وطلع وبقيت افتر والطم وابچي بالبيت ومن الرجف بالجسمي حتى وجع في بطني صار عندي واني ادعي ربي يهون على ريان سكرات الموت وكمال طلع ما يقارب 10 وربع وصارت  ساعه 3 وربع واني چنت افتر بالمطبخ وأسمع عمتي صيح بعلو صوتها

ام كمال / ولك يمه ريان ولك يمه يا حرگة گلبي عليك ربي اخذني بدل  ريان  وخلي هو خيمة لمرته واطفاله ولك يمه ريان وينك

مينا / اجيت يمها لزمت ايدها وبستها واني اهون عليها وهي چانت بعدها تحت تأثير المنوم سالت عن كمال ومن گتلها راح للمستشفى رجعت نامت وبقيت اني الوب مثل الوحده عدها ولاده متعسره والوقت يمشي صارت الساعه 5 الفجر بعد ما تحملت اتصلت على كمال اريد اعرف شنو صار وجاوبني وهو يبجي سالته شنو صار

كمال / نعدم ريان من ساعه 2 بالليل

مينا / بعد ما تحملت صرت اعيط بخبال وشگيت ثوبي وعلى عياطي اجتي نسوان الجوارين التموا علينه وخطيه ام ميمو حاضنتني وتبچي وگعدت بالگاع وألطم والنسوان كلها تبچي ويايه وام ميمو تگلي / صوتكم لا يعلى خطيه امه لا تحس وهي ذيچ ألأشهر كلها تتخربط ويصعد ضغطها گولوا الله يرحمه والله راح شهيد بشغله ما آله ذنب بيها