عذابي الأزلي

البارت الاربعون

البآرت الأربعون

بقلم الكاتبة الزهيرية الزهيرية

قد تؤلمك مرارة الصبر
ولكن حين يحل العوض
ستنسى ما أوجعك

مينا /  أحنه مجتمعنه بي طبيعه عجيبه غريبه وهي انه نحكم على بيت كامل من خلال شخص واحد يعني لو چانت هاي العائلة كلها زينه واحد فقط مو زين ناخذ نظره على كل العائلة انه مو زينه شلون ما اعرف ورب العالمين بجلالة قدره يگول في كتابه الكريم (لا تزر وازره وزره أخرى ) واحنه العبد يحمل وزر شخص واحد لعائله كامله

واني ما اگول كمال وجوانا ما غلطانين بالعكس اشوف انه راكبهم الغلط من رأسهم لرجلهم  والمفروض اي شخص يريد يدخل بعلاقة جديده سواء حب او زواج لازم يكون ينهي علاقته القديمه حتى من يبدي بدايه جديده ما يكون ظلم احد ويا واني من رحت بحنة جنى
بوست حمواتي ومن دى اسلم على عمتي وجهه ثگيل عليه گبل خمنت على جوانا بس اني ما اهتميت

وبقيت گاعده يم جنى لان سوتلي مكان يمها وسالتها/
اگلچ جنى ليش النسوان گرايب العريس كلهن جايات

جنى / هااا اني اگلچ ليش لان باچر اروح من الصبح وياهم وويايه نور العرس  مو هنا في بغداد العرس بالناصرية

مينا / ليش انتي راح تعيشين بالناصرية

جنى / لا حبيبتي اسكن في بغداد لان ابو شيخ بالناصرية وعدهم عيب ابن الشيخ يزوج بدون عرس بالناصرية وره اسبوع نرجع لبغداد لان شغله وشغلي هنا في بغداد  وانتي شلونه حملچ معقوله ما راجعتي وأخذتي سونار شفتي جنس الجنين شنو لو تعرفين وما تگولين تخافين نحسدچ

مينا ضحكت وجاوبتها/ حبيبتي اني ما آومن بالحسد أصلاً عندي قناعه انه رب العالمين من يرزق شخص لو تجي الدنيا كلها ماكو احد يگدر ياخذ رزقه اما رب العالمين إذا ما يريد يرزق هذا الشخص لو تجتمع الجن والإنس كلهم ما يگدرون يرزقون هذا الشخص واني حمدلله إيماني بالله قوي اما شنو جنس الجنين عرفته صار يومين بس ولد

جنى / كذب بيچ ولّد حمدالله وشكر ربي راح يجي لريان ولد اگلچ وامتحاناتچ طلعت النتائج مال الطلاب الخارجي طلعت النتيجة مالتچ

مينا / اي طلعت حمد الله معدلي 83

جنى / وشنو قررتي تدخلين يا قسم

مينا / والله بعدني ما مقرره بس راح ادخل جامعه اهليه وبصراحه اني عاجبني تخصصچ قانون يعني اصير محاميه

جنى / عفيه بيچ والله محاميه كلش حلو اني گدامچ محاميه اگلچ وجوانا شنو معدلها

مينا / معدلها 91 وبعدها ما مقرره اي تخصص تدخل

جنى / الله يوفقها خطيه تعذبت هوايه