عذابي الأزلي

البارت الخامس والثلاثون

البارت الخامس والثلاثون

بقلم الكاتبة الزهيرية الزهيرية

يجب أن تدري عقلك ان يكون اقوى
من قلبك والا ستخسر نفسك

مينا / اني وصلت لقناعه انه هاي الدنيا مو أقدار تصيبك صارت عندي قناعه تامه انه الدنيا حظوظ وكل واحد وحظه والحظ القوي ما ينخاف عليه ابد ودائماً الحظ القوي يكون لشخص المو زين وما يخاف الله أما الانسان الأخلاقه زينه وگلبه طيب والله الدنيا تكفخ بي من كل جهة وما ترحمه ابد واني يشهد عليه ربي زواجي الاول والثاني چنت اصرف بأصلي وأخلاقي زواجي الاول من مصطفى چنت على الأطفال ولكون ما اخلف والله تجرعت المر وأخيرها يريد يزوج وإني موجوده يمه

وزواجي من ريان والله عمتي ام كمال قطر الندى لاعبه بيها طوبه وعادي عدها حتى ما ترد عليها وما توصل خبر لكمال بس ويه مينا لا تدعي عليه وگدام اي شخص عادي واني شگد زينه وياها وما امدح بنفسي وحق الله لكون ظهرها يوجعها ما أخليهآ تشتغل اي شي بالبيت كله اني اسوي وبس آسوي الغده لان ما يحبون ياكلون إلا من أيدها ومتت قهر بيوم چانت ملاذ موجوده تعيرني انه اني ما أخلف وگدام ملاذ واني هذا موضوع الاطفال إذًا اگول مسوي عندي عقده نفسيه يمكن مااحد راح يصدگني

لهذا من زوجني ريان ميليا عوضتني عن كل شي حتى شعور الأمومه حسيته ويه ميليا صارت روحي من الدنيا هي ومن رجعت يم خاله فهيمه نصحتني انه آشوف محاميه وللعصر رحنه على بيت المحاميه طلعت متزوجه وهذا بيت اهلها وام المحاميه انطتنه رقمها ومن رجعت اتصلت بيها من رقم امي لأن من طلعت من يم ريان عفت الموبايل لانه هو جابه الي
وهي طلبت مني اجي لأهله بالليل لانه راح تكون يم اهله

وإني طلبت من امي تجي ويايه لمحل الموبايلات اريد أشتري موبايل واخذت فلوس من المهري من ريان چنت ضامتهن يم خاله فهيمه   رحنه لشارع الربيعي واختاريت احسن جهاز ورجعنه وبقى سيمكارك امي راحت اشترتلي من الموبايل سيمكارت وسجلته باسمها وجابته الي خليته بجهازي واتصلت بجوانا وفرح من رقمي حتى يعرفن رقمي ولليل رحنه على المحاميه سحر وچانت موجوده جايه يم اهلها خطار وبالبدايه طلعت النه امها ودخلتنه للإستقبال وبعدها اجتي المحاميه سحر سلمنه عليها وگعدت واني حچيت الها الموضوع كله

سحر/ شوفي اول شي نرفع قضيه ضم الطفله لحضانتچ والقضيه الثانيه نرفع عليه قضيه طلاگ التعسفي اضافةً اريد منچ تروحين على المستشفى وتجيبين تقرير انه انتي تعرضتي للتعنيف واريد باچر تجين للمحكمه تجيبن التقرير وتنطيني وكالة خاصة

وبعد ما فهمت شنو تريد سحر اخذت رقمها وسلمنه عليها وطلعنه وعلى ثاني يوم رحت للمستشفى من الصبح دخلت على دكتوره چانت موجوده بالطوارئ والظاهر هاي الدكتوره زوجها چان يضربها لأنه من شافت آثار الضرب على جسمي وعرفت اريد تقرير ظلت تشجع بيه انه اخذ حقي وما اسمح  لاحد يهين كرامتي وكتبت التقرير واخذته وتوجهنه اني وآمي للمحكمه وأتصلت على سحر طلعت موجوده وسلمنه موبايلاتنه اني وآمي بالاستعلامات ودخلنه وچانت سحر تنتظرنه شافتنه وگعدنه على المساطب الموجوده وسويت وكالة خاصه