عذابي الأزلي

البارت السادس والثلاثون

البارت السادس والثلاثون

بقلم الكاتبة الزهيرية الزهيرية

لاتجبر نفسك على احد
دع الايام تخبرهم بقيمتك

مينا / اكو اشخاص حتى من نجاوزهم ما نخلص منهم  ودائما يصورون احنه عايشين على ذكراهم  وهذا شي عايشين بي بس بمخيلتهم واني من رجعت من المحكمه وطلعت موبايلي لگيت رقم غريب متصل بيه اكثر من مره  واني ابد لا تصلت بي ولا رمشت عفته على الشحن بالغرفه وبدلت ورجعت يم خاله فهيمه لان لازم تعرف كل شي وبأدق التفاصيل واجتي يمنه امي تحچي لخاله فهيمه

أنوار/ تدرين فهيمه اليوم صدگ نكسر خاطري على ريان ظل يتوسل من طلع من يم القاضي على مود بنته ولچ يمه الله فوگ راسنه البنيه مو بنتچ خطيه هيچ ينكسر گلب ابوها عليها والله إذا اخذتيها غصب عن ابوها ربچ يعاقبچ

مينا / والله انتوا ما تفهمون عليه اني احب ميليا عبالك بنتي وهناك ماكو أحد يعتني بيها جنى تطلع من الصبح للعصر يله ترجع وقطر الندى ما آلها اي شغل بيها وعمتي هي مريضه تريد واحد يعتني بيها والله احس نفسي گاعده على نار لكون ميليا بعيده عني

أنوار/ هاي مو بنتچ وهيچ محروگ گلبچ  لعد ابوها شيگول الله يساعد گلبه تدرين هاي لو بنتچ وطالعه من بطنچ وحق ربچ تگومين تاكلين اوادم على مود بنتچ تبقى يمچ يمه مينا خلي عقلچ براسچ وخلي البنيه يم ابوها ولا شيلين خطية احد برگبتچ

مينا/ اني اعرف تصرفي غلط انه اخذ ميليا من أبوها بس شلون بگلبي المكسور على ميليا اكتفيت بالسكوت ورجعت للغرفة لگيت الموبايل يدگ وهذا نفس الرقم الغريب رديت عليه

اجاني صوت ولد گال / شلونچ مينا

مينا / بخير الحمدلله منو حضرتك

الغريب / معقوله ما عرفتيني اني گلت مستحيل تنساني عشرة 3 سنوات ونص

مينا / من گال عشرة 3 سنين ونص عرفته هذا مصطفى جاوبته/ هااا عرفتك انت منين جبت رقمي وشتريد

مصطفى/ منين جبت الرقم هذا سهل نطيت فلوس لزوج اختچ فرح وانطى الي اما شنو اريد مينا بشنو تردين احلفلچ انه ما يوم غبتي عن بالي ولهسه احبچ واريدچ

مينا / وانت مصور انه اني بعدني عايشه على ذكراك او انت تهمني والله انت ضحك بابا نسيتك وحق الله هسه انت ذكرتني بروحك على العموم شتريد

مصطفى/ مينا ندمت لكون تزوجت عليچ واريد نرجع سوه واذا تردين اخليچ بيت وحدچ وشنو تردين ضمان من عندي اني قابل

مينا / بابا انت بعدك عايش بالقديم وبوهم الله يكملك بعقلك اني بابك سديته وقفلته وشمرت المفتاح لهذا مستحيل ينفتح بابك مره مع السلامه

وبس غلقت ويا الخط حضرته ورجعت اتصلت بفرح وگتلها / خلي تبلغ زوجها عيب عليه يبيع رقمي لمصطفى