.
رجعنا للجامعة بعد الاجازة لاقيت صحباتي و مشينا عشان نشوف درجاتنا...
كان معلقين المنشور في البورد في نص الجامعة... طبعا رحيق كان اولة دفعتها... مشينا لي حقت قانون بقيت بفتش في اسمي... لقيت روحي جايبة B+ قعدت انطط و ليان جايبة C مع انو شايلة مادتين...
طوالي قعدت افتش امجد... رحيق اشرت لي علي اسمو كان التالت في دفعتو و جايب A
_ خطيبك طلع اشطر منك...
مشيت ابارك ليهو لقيتو واقف مع اصحابو... بقيت بعابن ليهو من بعيد و رجعت لي ناس ليان...
_ مالك رجعتي...
_ قاعد مع اصحابو...
_ي بت انتي خطيبتو... اهم من اصحابو امشي...
_ امكن ما عايزني اجي جمبهم...
_ اتعاوري و خليك قاعدة...
فجأة ناداني في نص الناس...وهو مادي يدو...
_ تهليييل...
مشيت عليهو براحة... اشر لي علي حتة بعيد من التجمع...
رحيق لكزتني...
_ بالله شوف هي تعمل ليهو كيف وهوجاري وراها زي دا...
فرحت و مشيت ليهو جري
عاين لي وهو بيتبسم...
_ البت البحبها...
ضحكت بي خجل و قعدت في الكرسي و احنا الاتنين بنتونس...
....
.....
رجعت البيت وهي ماسكة ورقة طلاقها و بتبكي... قعدت تبكي قدام الباب عشان ما كان عايزة تلاقي زول... حسام الكان بيعاين ليها من بعيد... طلع من بيتو و عمل فيها رايح و ماعارف و سألها...
_ هيلين ؟ مالك ي بت قاعدة هنا...
قامت سريع و هي بتمسح دموعها... لاحظ لي ورقتها الشايلاها...
_ مافي شي...
_ انتي كويسة؟
_ اي...
دخلت سريع جوا... وهو وقف بيعاين ليها بس لمن دخلت...
......
...
_ ي وائل ما تخلي البت دي تمشي براها قدمها...
_ اااه طيب...
_ ي ولد مالك بتتنفر؟
_ طيب ي امي...
مشا عليها وهو بيحمر ليها...
_ يلا...
سكتت مشت معاهو...
بقو ماشين الاتنين وهم ساكتين...
فجأة قالت ليهو وهي بتبكي...
_ وائل خلاااص ياخ كفاية... ليه بتعاملني كدا... ؟ انا ما قادرة اتحمل بعدا... مش اعتذرت ليك؟
_ ي بت هسي البيبكيك شنو؟
_ ليه بتتزهج فيني كدا... لو ما عايز تقدمني ارجع...
_.....
_ انا ماشة براي...
بقت ماشة و هو واقف و ساكت...
_ جاوبيني بي صراحة...
وقفت واتلفتت عليهو...
_ ؟
_ كنتي عايزة تصلي لي شنو اليوم داك؟
_.....
_ خليك صريحة معاي...
_ الضمني شنو انك ما حتكرهني بعداك...
_ بس جاوبي...
_ كنت عايزة ارفع الصور ديك ستوري عشان اكاوي بيها احمد... بس كنت عايزة اوريهو انو....
_ دايرة توريهو انك ما شغالة بيهو و عندك زول غيرو و مبسوطة و كدا مش؟
_..... اممم
_ بس بي انا؟ انا لعبة؟
_ ي وائل انت ما حتفهمني.. اي انا عارفة روحي غلطت و ماعارفة كيف فكرت كدا... بس والله دا كان هدفي و عارفة اني غلطت معاك...
_ خلاص انسي الموضوع...
_ انا ندمانة والله شديد ي وائل... حاول تفهمني بس...
_ طيب طيب...
_ صافية لبن؟
ضحك و اتلفت مني...
_ خلاص ي بت وصلتي محطتك...
_ سلااام...
اشر ليها بي يدو و هو بيتبسم... اول ما فات منها بقا يفكر في كلامها وهو بيقول مع نفسو...
" اخرتها بقيت بيلعبو بي"
.......
...
بعد اليوم انتهى رجعت البيت و انا مبسوطة بعد يومي المليان بي امجد... اول ما دخلت كان عمي ماف طلعت غرفتي في الطابق الفوق فجأة زول هجم علي و دفرنيمن السلم... اتألمت شديدووقفت بي صعوبة رفعت راسي و انا بعاين العمل فيني دا منو؟... لقيت فؤاد واقف وبعاين لي بي نظرات بتخوف... فات من جمبي و انا دخلت غرفتي و انا مستغربة من السواهو....
......
...
رقدت بي الجمبة و هي بتسمع مقاطعو الصوتية تاني و تالت و رابع... و كلمة انا بحبك بترجعها اكتر من مرة عشان تسمعها... بقت بتبكي زيادة...
فجإة زول دق الباب...
قشت دموعها و فتحتو لقت امجد و اقف و معاهو باقة ورد...
_ دا شنو ي ولد؟
_ اظن دي من راجلك و لا طليقك....
_ ما اظن...
_ و بعدين هو مطلقك بيرسل حاجات زي دي ليه الولد الما مربى دا...
_ امجددد...
_ خلاص سكتت...
قعد في السرير و هي قاعدة جمبو.... فحأة فتحت المقطع الصوتي بالغلط بي اصبعها... " عايز اقولها لأخر مرة... بحبك...."
امجد بقا ساكت و هي دخلت في ضفورها... بقت بتحاول تقفلو... وهو ماسك الضحكة...
_ انا مافاهم.... انتو متطلقين و بترسلو لي بعض ليه؟
_ ما شغلتك ي امجد...
_ مدام بتحبو بعض كدا... امشي اتلمي معاهو في بيتو...
ضربتو بي المخدة...
_ اطلللع برا...
قعد يضحك و طلع طوالي...
الاحراج كان كاتلها طوالي رقدت و غطت وشها... مسكت الورود و هي بتقلبها غشان تشوف الرسلها...
ختتها بالجمبة و رجعت تسمع صوتو تاني....
....
...
بعد تحصيلي دا حاولت اجتهد اكتر... بقيت بحاول اكسب وقتي و اقرا... و فؤاد بقت تزيد حركاتو لمن وصل في يوم انو لقيتو دخل غرفتي و انا نايمة... ما شفتو بس لقيت حاجاتي مكركبة و تلفوني مفتوح... و مستحيل زول يعمل كدا غيرو... كنت عايزة اكلم حسام و لا امجد بس الاتنين حيهيجوا و يمشو يكفتوهو عشان كدا مشيت كلمت امو...
_ عمتو يارا...
_ نعم ي بتي...
_ بس عايزة اكلمك حاجة... وهي حساسة شوية... عشان كدا اول شي عايزاك تختي اني ما عندي حاجة شخصية في الموضوع دا...
_خير ي بتي؟
حكيت ليها العملو لي وقت كنت داخلة الغرفة بس ما كلمتها الباقي... عشان ما اكبر الموضوع
_ فؤاد دا انتي عارفاهو بيحبك ي تهليل...
اتصدمت من كلامها و ردة فعلها... دا ما مبرر لي افعالو يعني هو طفل و لا مجنون... قبل ما اردها انتظرتها تتم كلامها...
_ ايام كتيرة كان بيجي يحكي عنك و حتى اقل شي فيك بيقولو... من يوم الخطوبة وهو مقلوب و ما ليتكلم و اليوم كلو بيكورك... بس جربي ختي روحك مكانو... تصرفو غلط بس ما حاسة انو ليهو حق يعمل كدا؟
بقيت مستغربة... اي كلامها كلو منطق بس كيف ليهو حق؟ يعني عشان زعلان اخليهو يسوي العايزو ...
كل الردود دي كان بتجي لي في راسي بس ما كنت قادرة اوجهها ليها...
_ بس ي عمتي انا ما قصدي احسسو بي دا كلو بس قسمتي وقعت في زول تاني...
_ ممكن تفسخو الخطوبة..
بقيت مخلوعة... كيف ممكن تقول كلام زي دا... افسخ الخطوبة عشان فؤاد؟...
_ فؤاد دا حالتو ماشة في الاكعب و داخل في اكتئاب و موقف الاكل و الكلام و متوحد مجدوع في غرفتو و انتي كل يوم طالعة مع خطيبك و تلاقيهو في الجامعة ... انتي عارفة قدر كيف هو بيحبك و بيكره امجد بس انتي مصرة و مواصلة... قدمي لينا معروف و افسخوها...
اتصدمت و قمت من محلي و طوالي دخلت الغرفة... الفي خشمي كان كتير بس ما كان عندي نفس اتناقش معاها...كيف ممكن تكون ما عندها منطق كدا... طيب انا برضو بحب امجد؟ مش مفروض اتهني بيهو؟ لي يبقى هو محسوب في حساباتي قبل اعمل اي شي مع امجد... بقيت متوترة و اخلاقي ضايقة رقدت في السريرو راسي بس بيفكر و اصلو ما سكت...
فكرت اضرب لي امجد... ضربت ليهو تلاتة مرات ما رد... طوالي طلعت الشارع و انا بحاول اكتم دموعي... المطرة بدت تصب ما اشتغلت بالموضوع و جريت في الشارع ساي لمن وصلت جمب النادي البيلعب فيهو... ماكان قاعد... بقيت ببكي... و ببكي...
بقيت ماشة براحة و دموعي بتنزل و المطرة بتشد اكتر...
قعدت في مظلة دكان كان مقفول... و انا بمسح دموعي...فجأة سمعت صوت زول بيتكلم من جوا الدكان...
_ لو الجو دا هدا انا بطلع... نسيت تلفوني في النادي بمشي اجيبو قبل ما يتبلا...
_ حمزة ما بكون شالو ليك...
_ ما اظن خليهو يشيل روحو كدي...هسي تلقا قاعد في المطر دا... كدي اديني الولاعة...
_ ي ولد انت ما داير توقف سيجارة...
_ والله ما قدر...كل ما اشتاق ليها بجي بلقي روحي ماسك السجاير..
فجأة الباب فتح و الصوت بقا واضح... لمن شافني طوالي سكت و بقا مخلوع...
رما السيجارة طوالي... بقيت بعاين ليهو و انا مخلوعة...
_ تهليل الجابك هنا شنو؟
_ المطرة كان غزيرة و قعدت هنا لمن تقيف...
قرب مني و ريحتو كلها كان سجاير...
_ي بت انتي مبلية بيجيك التهاب...
_ انت من متين بتسجر؟
و غطيت نحرتي...ضحك و قعد جمبي...
_ ما كان مفروض تشوفيني انتي بذات...
_ ما بكلم زول بس اوعدني ما تسجر تاني...
_ الشي دي ادمان زيك كدا...
اتبسمت بي خجل و دنقرت راسي...
_ كنت دايما بجي هنا مع فؤاد و بنشرب سيجارة سوا...
_ فؤاد برضو؟
_ بس وقفها عشان امو شافتو...
_ الظاهر انا ما بعرف حاجات كتيرة...
ضحك و عاين لي...
_ كنتي بتبكي؟
_ اي... ظاهر في عيوني؟
_ اي...ليه؟
_ كنت متضايقة و عايزة اسمع صوت زول واحد في الدنيا دي و ما قدرت...كان ناسي تلفونو في النادي...
ضحك شديد و قال لي
_ معليش والله ما بي يدي... لو بيدي قبل تدقي لي انا برد زاتو...
ضحكت و قلت ليهو...
_ عارفاك...
_ متضايقة ليه ي غالية؟
_..... ما خلاص يعني هسي ارتحت بعد قعدت معاك...
_ برضو يهمني اعرف...
سكتت مسافة وقلت ليهو...
_ ولا شي ما عايزة اعكر مزاجي تاني...
_ مع اني مصر اعرف بس لو بيعكر مزاجك ما ضروري تقوليهو...
_ لو في زول قال ليك تخليني ي امجد حتخليني؟
_ ليه السؤال؟
_ بس جا في بالي...
_ و الجواب ما جاكي و انتي شايفة حبي دا كلو؟
_ عايزة اسمعو...
_ لو بيقوم من الارض بعد ما ادقو في اللحظة ديك انا بخليكي...
اتبسمت و انا بعاين ليهو قام قال لي
_ اتغيرتي ي تهليل...
_ كيف؟
_ زمان قبل ما اعرفك زي الناس...
_ قبل وفات امي الله يرحمها صاح؟
_ الله يرحمها ي رب... ما كنت عايز ادخل في الموضوع... بس اي
_ للأحسن؟
_ اكيد... كنتي خشنة و حتى التعامل معاك كان صعب و نوع البنات الهراشات...
ضحكت و قلت ليهو...
_ انت زاتك كنت وهمي و عوير...
_ حرام عليك...
_ بالجد كنت غياظ... متذكرة للأن يوم اتلاقينا و اجبرتني اغسل قميصك...
_ خلاص ما تدخليني في الحتات الضيقة... اعتذرت ليك اكتر من مرة...
_ و انا زاتي كنت وهمية و جني ردح و عاملة شعراتي الصفر القدام ديك...
قعد يضحك و قال لي...
_ بيكل حالاتك كنت بحبك...
خجلت و قلت ليهو
_ خلاص يلا المطرة بدت تخف...
_ طيب يلا...
_ امجد...
_ روح امجد...
_ ما تسجر تاني... عشاني و عشان ولدنا يشوف ابوهو وهو نصيح...
بقا ساكت و هو مخلوع و خجلان... غط وشو بي يدو وقال لي...
_ طيب عشان ولدنا و عشانك...
_ مالك؟
قعد يضحك و قال لي ولا شي...
لكزتو و قلت ليهو...
_ عارفاك بديت تسرح ي تافه...
_ شايفك اتعودتي علي...
......
...
دخلت شقتو و جات داخلة الغرفة حقتو بعد ما لقتها مفتوحة... قفلت مظلتها و ختتها بالجمبة و هي بتنادي صحبتها عشان تشوف... لقوهو مجدوع و دايخ... لقتو بتنفس قامت بقت تتلفت و شالت ليها كيس آيس" نوع من المخدرات القوية الانتشر في السودان في فترة" من الارض...
_ احمد...
بقت بتكفتو...
_ احمدددد...
جات عليها صحبتها و شافت الكيس...وقالت ليها...
_ الولد دا جادي؟ عاني اكل كم كيس؟
_ امبارح لمن جيت كان نفس حالتو دي...
_ دا كلو من العويرة ديك صاح؟
_ من نغم خلتو كل يوم هو كدا...
_ مالك شفقانة عليهو كدا؟
_و انا البحاول اساعدو وهو الفترة الفاتت عاملني حبيبتو عشان يكاويها اتخيلي؟
_ مالك بترخسي روحك ليهو كدا؟
_ لعب بس...
_ المسكين دا اللعب كتير فيهو... دا بس خليهو مجدوع كدا...
_ جيبي لي موية...نخليهو يشرب و يطلع الفي بطنو دا...
_ مالك و مالو اجدعيهو فوتي.. براهو بيصحا...
_ جيبي لي موية و خلي النقة...
_ استغفر الله...
جابت ليها موية... صحتو بعد تعب و بقت تشربو و تخليهو يطلع المخدرات الفي بطنو...
رقدتو في السرير بعد انتهى و طلعت...
_ انتي عيانة؟
_ ليه؟ عشان ساعدتو...
_ انتي مالك الفترة دي؟ شي اليوم داك مع تهليل و هسي الليلة؟ انتي ضربو راسك دا؟
_ الولد عايز يموت اجدعو امشي... ؟؟
_ ما ياهو زي كريم السففتيهو التراب و جدعتيهو...
_....
_ مالك سكتي؟
_ انتي عارفاني بكره كريم داك...
_ و برضو تهليل و لا نسيتي الكان بتعملو فينا في الثانوي... العويرة ديك اخر من اتعامل معاهو...
_ اتغيرت والله...
_ والله انتي جنيتي... عليك الله امشي صاحبيها كمان...
و فاتت خلتها...
......
...
طلع علي الحوش لقاها نايمة وهي قاعدة... و تاكلة علي الحيطة الجمبها... وحاضنة ليها كديسة... اتذكر الكديسة الكان قالت ليهو انو دي امي... بقا مستغرب كيف هي ماسكاها و هي سودا و بتخوف كدا...
مشا عليها و صحاها...
_ نغم... المطر خشي جوا...
طوالي الكديسة نطت منها و فاتت...
_ طيب طيب...
_ نغغغغمممم...
_ طيب...
دنقر و بقا بيعاين ليها ساي... فتحت عينها طوالي نط قام من جمبها...
قامت و هي بتتمطمط...
جات امو و هي شايلة بطانية و غطتها...
_ شكرا ي خالتي...
_ ادخلي جوا... شفقتي الولد...
طوالي خجل و قال ليها...
_ امي شفقة شنو؟ بس لقيتها قاعدة و ناديتها...
ضحكت و جرتهم جوا و هي بتعاين ليهو بي طرف عينها و تتبسم...
.....
...
قعدنا نضحك لمن وصلنا البيت...
ودعتو و دخلت براحة اول ما قفلت الباب لقيت عمتو يارا في وشي... حاولت اتفاداها و امشي قامت مسكتني من يدي و لصقتني كف بي كل العندها لمن حسيت اضاني صنت...
_ فؤاد رايح من قبيل و انتي حايمة مع خطيبك انصاص الليالي...
....
...
..
سيو 🙋🏻♀️✨
