_ليان ي بت احنا لازم نصحا، حنضيع كدا والله.
_ ياخ والله ما بتجازف.
_ ليان خلي اللعب كدي تعالي لي الليلة بنحاول سوا طيب؟ ( يلا دي اسمها نتونس سوا)
_ اه خلاص.
قفلت الخط ورقدت في السرير نامت.
........
نغم في المطبخ بتسوي فطاير :
نغم مع روحها : حسبي الله من ناس البيت ديل، ماعندهم دم نهائي، يعني ما ممكن انا الغدا كلو اسويهو و انا الضيفة في الموضوع.
جا وائل داخل المطبخ نغم اتخلعت طوالي.
_ بسم الله.
_ خير شيطان انا؟
_ لا لا معليش.
جا دنقر لقاها بتشكل الفطاير.
_ الطبخ يخلو ليك بس.
نغم :" يخلخل ضروسك"
وائل : كدي انا بحب اشكل.
نغم : اتفضل.
زحت ليهو و هو قاعد يشكل و يدردق في العجين و شعرو بيمشي و يجي و بقا نازل قدام وشو و هو مركز مع التشكيل، ونغم عينها ما زحت منو.
وائل اتلفت عليها لمن خلص وسألها.
_ اها كيف وكيف.
_ .....
وائل انتبه لي سرحتها و و ضربها بي طرف اصبعو علي جبهتها.
_ سرحانة وين هاي.
_.... اااا... ولا شي.. بس كنت بفكر اسوي شنو تحليه.
_ انا.
_ هههههه بس ما بحب السكر المسيخ.
_ كيف ما تردحي وانتي مرة احمد.
_ عليك الله ما تجيب سيرتي مع اسمو في جملة وحدة.
وائل بدا يشكل تاني و عمل ليهو حرف.
_ دا حرف البت البحبها.
نغم بقت بتعاين ليهو بي خلعة لمن شافت حرف الN.
_ منو دي ؟
_ زول بتعرفيهو شدييد.
_.... ممم.. نو.. دا ؟
_ زول معانا في البيت.
نغم بقت مية في المية متأكدة انو دي هي.
_ ما عرفتيهو.
_ لا.. لا لاا.
ابتسم وقرب منها و هي بقت بترجف و ترجع لي ورا، لصق ليها العجين في جبهتها و ضحك و قال ليها:
نبع الحنان ي وهمية.
_ شنو؟
_شوف بقت بترجف و تتخجل، هي دي امي.
_ الله يهديك.
_ دايراني اقول منو 😏.
_ كدي اطلع برا خليني اشتغل.
_ احييي حرقك كدا.
_ اطلعععع برااا.
_طيب اها طلعت.
طلع وهو بيطحك و هي شالت حرف الNالعملو وجغمستو بي يدها ورمتو بي عنف في الصينية.
_ " لي بيتلاعب بي كدا الغبي دا كمان، الله لي بيسلطني مع اولاد زي ديل، بس انا لي بالجد محروقة قدر دا؟ استغفر الله العظيم خرب لي مزاجي العارض دا".
.......
اسبانيا مدريد الساعة الواحدة ليلا :
_افتحي الباب دا. (بغضب و زجر)
_ما بفتح... ما بفتح ( بصوت مبحوح وباكي)
_ قلت ليك افتححيييي.
_ ما بفتح ما بفتح عايز تسوي لي شنو.
_ افتحي الباب دا ولا بكسرو فوق راسك.
_ الرجالة دي سويها في اهلك ديك ما تجيني انا.
_ خلي صرف العربي و افتحي قبل ما اكسر الباب دا النص.
_....
_ طيب ما دام كدا.
بقا بيضرب الباب بي رجلو بي كل عنف و يلزو بي كتفو و تاني يدفر، هيلين بقت بتصرخ وتبكي. كووووو فتح الباب و جاها داخل لقاها قاعدة في ركن الغرفة و بتبكي، طوالي جرا و حضنها.
هيلين بتبكي بي حرقة و بتحاول تتفك منو.
_ فكني... فكنييي ياخ... ما تقرب مني نهائي زح... من يوم الليلة انا ما بعرفك.
_ كدي خليني افهمك.
_ تفهمني شنو ؟
_ اني بحبك.
_ شايفني بستهبل و لا بضحَك.
_ و لا واحد شايفك جادة و انا جادي.
_ زح منيييييي.
محمد حضنها بالقوة و بي كلو قوتو و قعد يبكي.
_ كدي اسمعيني يا هيلين.
هيلين سكتت شوية و بقت بتبكي بي صمت لمن غلبها تتفك. منو..
_ هيلين ي بت انا بحبك شدييييد، ما قادر افارق بصري منك و لا دقيقة، انا عميان معاك، عميان من الحولي، بشوفك بس، انتي بتكفيني ماعايز شي تاني و في اللحظة دي ماعايز اتكلم الا لمن تهدي عشان كدا بس خليك هنا، خليك جمبي، معاي ، دا محلك يا هيلين، حضني دا، حقك انتي بس، و مستحيل وحدة تشغل محلو تاني.
هيلين بقت بتعاين ليهو بس و الدموع في عيونها، فكتو وقامت، اشرت ليهو على الباب عشان يطلع عاين و طلع بعد ماقال :
_ اخدي راحتك و انا بجيكي بعد ما تهدي.
.........
ليان جات لي تهليل في البيت قعدو في غرفتها بقرو و كل وحدة بتكورك في التانية.
_ الكلام دا ما بيتجازف ١٢ شيت ما فتحناهم.
_ انا قارية تلاتة.
_ قارية شنو عليك الله حسي سألتك حنانك ما ناقشاهو.
_ عايني نقرا الليلة ٥ و بكرا نتم الباقي.
_ شغل القطاعي حقك دا خليهو .
_ ما خلاص ما عندنا حل.
_ طيب طيب.
دق دق دق دق دق..... دق دق دق دق دق....
تهليل : نعم نعم.
فؤاد : انا.
تهليل : استغفر الله العظيم ياهو العبيط داك.
شالت طرحتها لبستها و عاينت لي ليان لقتها قاعدة و بتعاين ليها غطت ليها راسها بالبطانية : شعرك العاجبك دا غتيهو ما تعايني لي.
فتحت الباب : خير.
_ اااا.....اااا بس...
_ شنو؟ 😒
_ الغدا.
_ طيب ما كان تقولو من برا.
_....
_ خلاص جايين.
قفلت الباب و هي بتتأفأف نزلت الطرحة و قعدت في السرير.
ليان : دا فؤاد؟
_ اي هرد قلبي الولد دا، بكرهووووو.
_ لي كدا؟
_ متلصق فيني شديد ياخ.
_ بيحبك مش؟
_ ما عندي قضيه بي بحب و لا لا.
_ حصل اتظارفتي معاهو ولا كدا؟
_ لا لا ابدا، بس دا انا بحسو اعجاب بس ما وصل درجة الحب.
_ اهااااا، ما زي امجد.
تهليل طوالي قلبها دق و قلعت عيونها.
_ الجاب سيرتو منو هسي، كدي خلينا نتم قرايتنا.
_ تهليل بتحبيهو مش.
_ لا منو ؟
_ تهليييييل.
_ عليك الله ما تجيبي لي سيرتو؟
_ لي مالكم؟
_ مالنا؟
_ حصل حاجة بيناتكم صح؟
_ لا
_ عليك الله احكي لي، حصل متين امبارح صح؟ .
_ كيف عرفتي؟
_ اها احكي.
_قدامنا ١٢ شيت.
_ احكي لي سريع بس يلا.
_ اه طيب.
............
في سرير المستشفى كريم مقابلة ليهو سارة.
سارة كانت بتبكي شديد كل ما تعاين حالتو، وهو بيحاول يهديها، نام ليلة و نص و صحا في المستشفى بعد ما اخد اكسجين و ضمدو ليهو جروحوا.
_ لي يعملو فيك كدا، لي؟
و قعدت تبكيييي و مسكتو من وشو.
_ سارة انتي مالك خايفة قدر دا اها بقيت كويس.
_ والله ما اخليهم.
_.......
_ انت سويت ليهم شنو اصلو؟
كريم دنقر راسو و حست بي دموع بتنزل من عيونو رفعت ليهو راسو لقت عيونو مليانة دموع : ولا شي، ماعملت ليهم اي حاجة.
و قعد يبكي بي حرقة سارة ربتت علي ضهرو و قعدت تمسح دموعو.
_ ما تبكي يا كريم خلاص خليتو ماعايزة اعرف السبب بس نحمد الله انك كويس.
كريم ضماها عليهو بي قوة و هو بيبكي، سارة اتفاجأت من حركتو بس ضمتو هي زاتها و هي بتربت علي ضهرو : ما تستاهل يا كريم.
_ اقعدي معاي يا سارة عليك الله، انا ما عندي غيرك و الله.
سارة قعدت تبكي و ضمتو زيادة : طيب بس وقِّف بكا عليك الله.
فكتو وقعدت تقش دموعها.
_ سارة.
_ نعم؟
_ ممكن ما تدخلي في الموضوع دا، انا بحلو براي.
_ لي ما اتد...
_ قلت ليك ما تدخلي.
_ خلاص.
_ سنفورتي.
_ رجعت لي العوارة.
_ غالية و غلاك بعيد.
_ كريم خلاص كفا.
_ هسي ما كنا حلوين و بنتحاضن.
_ استغفر الله انا بقوم من هنا.
_ لا خلاص بهظر.
_ انت شكلو لو مكسر بتقوم تشاغل.
_ انا ما بشاغل غيرك.
_......
.............
